菲菲在2001年9月入行做保險,點解咁記得?因為我仲上緊 training 的階段時發生911事件,實在令人難以忘記。當年點解入行?因為我係做開中層管理的,但當時中層cut人cut得好利害,一年之內我經歷左三次裁員,響冇其他出路之下就走左去做保險。
諗返起當時都好勇,九十年代尾我離港遊學玩左一段時間,到2000年先至返香港工作。返到香港時好多舊友既 contact 都冇哂,即係我係響冇 warm market 的情況下踏足保險界的。既然冇warm market,唯有做 cold call 啦。當中包括搵 call list 打,上工商大廈甚至住宅逐家逐戶拍門,跟公司 van 仔周街拉客上車,去人多地方做問卷等等,真係咩方法都試。
講起 call list,其實係老細唔知響邊度搵返黎的一堆電話加個名,佢地係乜水我地完全唔知道。一般每個星期都會有一晚安排新仔玩 cold call 比賽。賽前老細叫我地預測自己一小時內打到幾多個 call 同埋 make 到幾多個 appointment。第一次玩比賽時,我答︰「打20個call,約到2個 appointment啦。」,其實答果陣都冇咩信心,老細問到唔通話打唔到咩!一小時的比賽過後,我好似打左四十幾個 call,約到5個 appointment,攪到全場嘩然,因為大部份都係約唔到。老細都係好穩陣的,話d客唔放飛機先至當係約實。哈哈!又咁好彩5個都見到面,仲簽左2張細單添!
做公司 van 仔拉客時,一日最少響街8粒鐘,見人就埋去講,訓練左摩打口同面皮厚。公司為左獎勵一班勇於抓爛塊面企街既小 agent,每日出車都有三個獎︰最快開單,最高C數獎 (即係最大張單),同埋最多 case 獎。菲菲試過一日內響街抓左3張單,攞哂三筆獎金,當中最高C數係講緊月供二千幾蚊的儲蓄保單。好多新入行 agent 一個月都未必有三張單,當時菲菲的紀錄成為公司的佳話。
好快菲菲亦可以招聘自己的agent下屬,在同期入職的同事們中,我亦係最快有自己下屬,下屬數目都比別人多。一般情況,保險呢行要招攬下屬都係向熟人入手,菲菲響冇「熟人」既情況底下又點搵下屬呢?其實呢d下屬都係 cold call 返黎的!當時有好多職業展覽,菲菲就去會場搵下有冇 smart 既後生仔女,一見有就上前派卡片遊說佢地入職。真係咩事都有可能,我就係靠全 cold call 建立左自己的團隊。可能佢地覺得我夠 guts,所以願意在完全冇互相的情況下膽粗粗跟我入行。
做左保險公司唔夠一年,菲菲就轉左去 broker firm 度做 Training,係唔係好匪夷所思呢!一個在行內做唔夠一年既人,竟然可以去教人?因為 broker firm 的老細知道菲菲有超強做新客生意的能力,所以叫我去幫佢地公司手教一眾新人點做 cold market。
相信憑以上的例子,菲菲自稱 Cold Call 皇后都不為過吧!哈哈!
cold call 皇后?哈哈...
回覆刪除好鍾意你blog頭個一句"來吧伴我菲"! ^_^
多謝!咁得閒多D黎睇下~ ^^
刪除我做個差唔多一年insurance telemarketing (外國part time,但主攻中國人). 我只可以說我非常非常非常佩服cold calling 同可以抓爛塊面 gei 勁sales... 我做jor 一年後真系頂唔順.
回覆刪除我係做到麻木左果隻,當時要供樓,訓街慘過抓爛塊面呢…
刪除你真係一個天生TOP SALES,我做咗幾年SALES都係一事無成。
回覆刪除曾經考累過做保險SALES和地產SALES,因為唔想天時暑熱着老西週街走,所以揀咗個地產,結果當然....哈哈哈。
做地產都唔錯呀,搵到錢喎!咁謙話自己一事無成… XD
刪除BTW,我都做過地產,響淺水灣…
淺水灣豪宅區喎,我都係灣不過係九龍灣工業區咋。
刪除N年前的事了,當時地產經紀仲未駛考牌的年代。
刪除勁!雖然我係臺灣做兼職保險 agent 半年都有得去百萬圓桌會,但我一張cold call 單都冇。
回覆刪除以結果導向,我情願做MDRT都唔想做 cold call 皇后 lor,超辛苦呀!你半年做到MDRT仲勁啦!
刪除你好犀利呀!一個字"勁"吖!哈哈.....
回覆刪除勁乜鬼丫,呢D叫馬死落地行咋… XD
刪除我都幾佩服做 sales 的人,cold call,對我來說是匪夷所思!
回覆刪除未做之前,我都覺得係匪夷所思的事。哈哈!
刪除真係好佩服你,COLD CALL做到咁既程度,可唔可以留個EMAIL之類同你CONTACT?
回覆刪除Javan 你好呀!
刪除我的 email: vivi.vivicat@gmail.com
好勁呀,真coldcall王
回覆刪除想請教一下打callist,做問卷有咩script?