你叫咩名呀？

以前d人有講「唔怕生壞命，最怕改壞名」。古時冇擇日開刀生仔呢回事，條命生得好與壞都唔到你決定，所以冇得怕，哈哈！但係名字係父母或長輩改的，如果改得唔好就一世都比人笑。先唔講點從玄學角度去改名，呢個課題太長篇勒，只係講下與名字有關的趣事。

(1) 讀音一樣
今年年初，要同細仔報N班，因為人數太多，第一回合係 group interview，每6位小朋友一組。細仔同組有5位女孩，聽老師叫名字時，心入面忍唔住嘩左一聲。呢5位小女孩都係叫「程程」、「澄澄」或「晴晴」！呢幾個字讀音一樣，駛唔駛咁夾呀？另外朋友中最多女孩叫「因因」、「欣欣」、「恩恩」同埋「殷殷」。男仔好多「俊俊」、「進進」同埋「晉晉」。

(2) 唔識讀呀！
而家多左人搵師傅改名，有些師傅為左顯示自己好有才華，就會改D好深既字或者係古字。可憐我呢D讀番書大既人，中文程度冇咁超班，見到小朋友的名字都唔知點叫佢。其實好多老師、老細同客戶都冇咁高中文修養，唔知呢D小朋友在學校和公司會唔會被受冷落呢？唔識得叫你個名，就梗係唔叫啦，改為叫D識讀既名字啦。哈哈！友人的B女叫「宓孺」，好在菲菲都識讀，不過呢位B女既家人好多都係澳洲移民，見鬼多過見人，都唔知點解改個咁深奧的名字。有人讀「密孺」(墨魚？)，有人讀「必需」(有邊讀邊)，有人讀「Fok Yu」(好似粗口 Fxxx U 喎！)，攪到成家人都唔知點叫佢，哈哈！

仲有好多有趣的名字，不過唔想朋友響度見到自己的小朋友比人笑，所以更加好笑的暫且不提了。