老公的前世女友

好多人話女兒係爸爸前世的女友，我唔識睇通前世今生，冇辦法去驗證，不過目睹好多爸爸愛錫女兒的例證。

今日帶大仔去上跳舞班，連埋我朋友的兒子在內，全班只有三個男學生。我們到達學校時間尚早，兩個小男生換好衣服就在學校內嬉戲。佢地玩起上黎，講得好聽D係「活潑」，事實上係粗野。在你追我逐的時候不小心撞到女同學，當然我地兩位媽媽即時叫停他們，連忙向女同學道歉。女同學是爸爸帶她上學的， 一個粗獷的大男人看見自己女兒被人撞到 (沒有跌低，輕微踫撞罷了)，即時流露出憐惜的眼神，擁著女兒又呵又氹，十足十氹女朋友咁。

在小朋友排隊準備入跳舞室時，一大班爸爸圍在門口，要看到女兒入了課室才肯離開。一般媽媽們都不會這樣依依不捨，小男生就要學獨立，不可以整日依賴媽媽嘛！唔知點解，呢間舞蹈學校特別多爸爸帶小朋友的，睇佢地個樣又唔似「家庭主夫」，我估呢班爸爸都係把女兒當成了小公主般愛護，連帶佢地學跳舞都必定親力親為，亦可能怕了我們的小魔怪會嚇懷他們的小公主，所以要全力保護吧。好一班溫室小花呢！

至於我老公，無論孻女有幾野蠻、暴力、發脾氣都好，都會照單全收，真的好似對女朋友的萬般忍耐咁，毫無怨言。唔怪之得我個女咁喜歡爸爸啦，可惜我呢個孻女唔係溫室小花，係霸王花！