2016年12月18日 星期日

愉快學習

有很多家長都渴望子女成績好,甚至我認識有人要求自己個女每次都要 100分。佢話如果個女冇 100分就會唔睬佢,唔駛咁極端呀?

其實我的兩個讀緊小學的仔成續都 ok,但 100分就不常見。老公話想兩個仔努力啲,就推出一個獎勵計劃。只要累積三次 100分,就可以換領一份禮物。

呢個計劃推出咗唔夠一個月,兩人都達標了2次,即係每人都換了2次禮物。有人話我們功利主義,用物質引誘小孩。乜在呢個世界搵食唔係咁嘅咩?用自己努力換取想得到的回報,不是我們每天在做的事嗎?

講返讀書,目的都係求學問。我覺得九十幾分同 100分的分別,唔係識唔識的問題,係認唔認真的問題。我們只係用獎勵方式去令佢地更認真,而呢份認真係可以獲得肯定的,而且係可以換來快樂的,有何不妥?

在我而言,咩叫愉快學習?學習的過程不一定愉快,甚或有點艱苦。但努力後得到的結果,會令自己很愉快。就正如我們做人一樣,要有經歷有磨練,才會得到更美好的成果。

2016年12月7日 星期三

不需要退休

昨天和老公在上課前食下午茶的時候,在餐廳裡有一位長者和侍應閒聊。

他們的對話沒有甚麼特別,都係閒話家常,想下當年咁。重點不是內容,是氣氛。這位長者已退休,我估他的家人都在事業拚搏中,不能時常陪伴他。他已用餐完畢,但完全不想離開。彷彿步出餐廳後都不知去哪裡消磨,所以找侍應來打發時間。

看到這種場面,我和老公講:「好在我們不用退休,不用想辦法來打發時間。」。

很多人都希望可以提早退休,可以逃離職場,過自己的人生。慶幸我們的工作就是人生,我們不需要逃離。沒有工作,沒有寄託,這種退休後的生活對於我來說是一個惡夢。到我年長後,可能我不需要為錢而工作,但我需要為意義而工作,繼續燃亮我的生命。

我真的很感恩,我們能走上玄學這條康莊大道。

2016年9月26日 星期一

睇樓趣事

近排我們要搬家,就四處搵 agent 睇樓。在呢段睇樓的經歷,令我對現今的地產行業開了點眼界。

我諗我們搵了六、七個 agent 去睇樓,因為睇唔啱所以搵完一個又一個。當 agent 同我們睇完樓,知道我們睇唔啱,就好似了咗件心事咁,冇再搵其他盤比我們睇。

又有另一位 agent,我專登打電話約佢睇樓,講好搵樓條件,點知佢話有事不能帶我們去睇樓。最初我以為佢比其他客約咗,後來我搵其他 agent 睇樓時先發現佢呆站在新樓盤外做開放日。當時我覺得好奇怪,明明有客約都唔去睇樓,反而走去新樓盤度姜太公釣魚。呢啲係咩邏輯?

之後有一個 agent 帶我們去睇樓時,在中講:「呢個單位好多客都話有問題,不過即管睇下啦」。唔係呀?明知有問題都帶我睇都算嘞,你講到出口,我即時覺得好掃興啦。果然間屋係好唔掂,有兩間房係完全冇窗,點住呀?

仲有一個好得意的 agent,帶我們去睇咗兩間,問我鍾意邊間,我話兩間風水都唔好所以不考慮。我估佢係信耶穌的,一聽到「風水」呢兩個字就變面,仲話「呢啲嘢信就有唔信就冇啦!」。我講得出就即係信啦,而家又唔係返教會,唔駛用不屑的語氣對待客人掛?

而最奇怪的就係幫我們促成交易的 agent。我在網上睇到一個盤好啱我,我就約佢睇樓。但我們未見面就話業主有苛刻條件,而呢個條件係絕對不能接受的。咁即係點呀?登個廣告黎趕客呀?之後佢有 send 過幾個盤比我,但完全不適合,我都冇意欲搵佢睇樓。到最後我睇樓睇到幾乎絕望時,我 send 咗 個 whatsapp 比佢,講清楚條件,佢就搵到一個盤比我。

呢個單位果然好合我的條件,於是我們就著手還價了。其實個盤開價合理,我求其還咗少少價,但我最看重的係免租期。點知個 agent 一味同我挫價,完全唔識傾免租期。我三番四次話價錢已經 ok,我只想有長啲免租期。佢好似聽唔明咁,不斷話要同我再傾平啲。

最終我係見到業主代理人,親自講清楚我要免租期的理由,業主就即時答應了 。嗰一刻,我真係覺得我個 agent 有啲廢,咁小事都傾唔到。因為我睇咗幾十間得一間合適,我先會容忍一個如此不濟的 agent。

點解而家啲 agent 會咁奇怪嘅?定係當年我做 agent 時訓練較嚴格,所以佢地的行為在我眼中就係低級錯誤。點解咁多 agent 好似習以為常嘅?可能我已經是老古董,同時代脫節了。

2016年9月16日 星期五

做人大嫂唔容易

九月一向是最忙的月份,開學、中秋和很多家人的生日聚會。

剛剛又籌備了奶奶的生日飯,只是一圍咁多人之嘛,但籌備功夫絕不簡單。奶奶不是愛舖張的人,其實只係去酒樓 book一張枱,之後再 book 一個蛋糕罷了,但當中的過程係好考 EQ、耐性和溝通技巧的。

當老公提出食飯時,有親友就提議地點。可能只有我們有小孩,佢提議的地點是不適合帶小孩去的。提議地點的同時,又「叮囑」我唔好買大蛋榚,因為奶奶有糖尿唔食得甜。我知吖,所以已經 cut 哂所有應節食品,過時過節我咩都唔送,免得貼錢買難受。

其實當刻我係有啲火起的,佢唔識選地點冇問題,個蛋糕都係影下相,最終都係小朋友食大部份,唔駛咁快落哂閘呀?我買比自己食唔得呀?重點係,呢位親友係我後輩,一出言就好似發號施令咁,太冇禮貌了。

好,我大人有大量,就逐點列名原因同佢講解。佢最後都接受我的提議,當時的感覺似係我教緊仔,顯淺的道理都要由零講起才明白,吹漲!

我們提議的酒樓是集團式,有好多分店的。之後又有另一位親友話去佢地附近嗰間。天呀!我帶住幾個細路加一個蛋糕去你附近嗰間,堅冇同理心!好在老公夠 power,即時 turn down 佢地的要求,去返我們附近的分店。

佢地可能認為我們要遷就老人家才會有 objection。無問題的,一係佢地自己攪返囉,我唔會有意見。就係每次佢地攪親都爛尾,一係場地太迫太吵,一係預食物太多,一係時間太緊迫,攪到大家唔開心,老公先至要我攪。我唔介意攪的,我估如果我不做中間人,大家係約唔到食飯。到時奶奶會以為我唔比佢見啲孫,呢個罪名我擔當唔起呀。

2016年9月7日 星期三

Cold call 完結篇

很多網友都係因為「Cold Call 皇后」這篇文章而認識我,我亦很感恩有很多網友都因為看過這篇文章而聯絡我。

我的 cold call 戰績是發生在 2001 年,即是距今 15 年前的事了。當時社會冇咁多電話或街頭騙案,公司又有專車帶隊周圍出征,所以當時的環境對 cold call 是有利的。

隨著社會的變化,還有市場的變化,現今靠掃電話和企街來做 cold call 已經不合時宜了。在兩年前我寫過另一篇「2014 的 Cold Call」,剖析了另一種 cold call 的方式。

如你堅持打電話、洗樓和企街才是 cold call,你已經 out 了。這些方式只是在消耗自己,就算有成果也和付出不成正比。如果你完全冇 warm market 又冇破釜沉舟必定要做 sales 的推動力,也請不用試 cold call 了。尤其是新入行的,在冇 script 冇 training 的情況下,單靠一個勇字就想成為 cold call 天王的話,在現今社會該是奇蹟。

這篇文章,會是 cold call 系列中最後的一篇。我希望大家別對 cold call 抱太大希望,我曾經歷的,現在已不存在了。就算我當年 cold call 有幾利害,也不能套用在現在的市場情況了。

我再一次多謝大家欣賞我,願意和我交流。但關於 cold call 嘛,我不會再和大家分享了。

2016年9月6日 星期二

街坊專家

昨日在某媽媽群組見到有人話服用香薰油,跟住就有其他媽媽急不及待話:「我睇過報導,香薰油係唔食得喎!」。之後一大群人你一言我一語咁,好快就講到嗰位媽媽收咗皮。大家彷彿是聖人,正在努力拯救世界咁。

報導?係咩報導同係邊個寫㗎?詳細內容係點㗎?似乎無從稽考。

香薰呢家嘢,我只懂皮毛。我知有啲係可以服用的,但我冇研究香薰咁多年,在腦海中完全抓不到任何記憶。不過重點唔係香薰食唔食得,重點係太多人睇咗啲唔知咩報導就扮專家,到處危言聳聽。

又例如營養學,食維他命 C 可以提高抵抗力,這是基礎常識。至於維他命 C 有咩類別,在甚麼情況下吸收或排出,在甚麼情況下要攝取幾多份量,有幾多人會去採討?

有一次我的小朋友初起感冒,我就用多次少量的方式比維他命 C 佢地食,係 supplement 嗰種,唔係沖水出氣泡嗰種。食咗一日,訓醒一覺就精神爽利上學去。有人質疑我點解唔帶佢地去睇醫生,有人話我比太多維他命 C 會生腎石云云。經過嗰一次,我明白無知就好似自殺式炸彈咁,要迫人攪炒。

我唔想比較西醫和營養學,因各有所長根本無得比。但在小病時我係採用營養學的方法,因為我學過,所以識用。食幾多維他命 C 先會生腎石?我可以講,飲幾多水同飲咩水先係關鍵!

太多人看了冰山一角的報導就以為自己睇緊研究報告。而且多數呢類報導都係出自讀新聞系的記者,並唔係讀營養學的學者。大家的專業範疇都唔同,對於我黎講同睇娛樂新聞冇分別,都係得啖笑。

做健康產業的朋友們,快啲好好教育下啲家長吧,可以拯救到好多小朋友㗎!

2016年9月5日 星期一

被動收入

有好多人都希擁有被動收入,咁咩為之被動收入呢?

一般黎講係包括:收租、收息和投資生意獲利等等。在健康產業或直銷行業中,下線團隊的業績所產生的分紅,都是「被動收入」的一種。點解我要用個「」去括住佢呢?因為我對呢個定義有所保留。

如有物業出租比人,除了物業維修之外,業主係可以咩都唔做等每月收租。如有存款或投資定期派息,仲乾手淨腳,真係乜都唔駛做就等派息。如投資生意,都係由管理層去營運,等每年派成績表。

以上的方式雖然投放的金額、回報和風險等都唔同,但無論銀碼大小、夠唔夠駛都好,都係被動收入。

至於透過直銷團隊而獲得的被動收入,其實唔係堅可以唔做有錢收。直銷公司會 sell 「Walk away money」呢種超神的收入模式,但事實上好多直銷計劃都要每月 keep 分和 leep 團隊業績。咁都好正常吖,冇業績搵咩黎分紅呀?

莫講話團隊細的要不斷跑人跑生意,就算團隊大的領袖都要返公司站台演講去 keep 住團隊活躍啦,又何來 walk away money?

我對直銷係抱極正面的睇法,但希望帶出當中的盲點,讓大家多一個客觀的角度吧。

2016年9月1日 星期四

知性美女

今天開學日,上小學的兩個哥哥要早些出門,妹妹唔駛咁早返學,我就同妹妹傾下密偈。

我:「今日可以見返班同學仔,你最掛住邊個呀?」
妹妹皺起眉頭擰頭。
我講咗幾個同學的名字,妹妹都繼續擰頭。
我:「你同小慧最好朋友喎,你唔掛住佢咩?」
妹:「佢唔同我玩呀……」
我:「點解呀?」
妹:「佢話我貪靚係唔啱,所以唔同我玩。」

估唔到在五歲女孩的社交生活中,已開始爭研鬥麗了。我都唔扮謙虛,我個女樣子標緻,有一頭及腰的長曲髮,老師們都好鍾意佢。因為佢在班中都係數一數二的靚女,幾乎所有表演都安排佢在前排中央位置,難免惹人妒忌。

女孩排斥靚女係自然現象,但我堅持女性無論咩年紀都要扮靚。由 BB 開始我就為我的寶貝女扮靚,靚已經成為佢生活一部分 。沒有外在美,邊個有興趣瞭解你有冇內在美?

靚女除咗要識扮靚,仲要豐富內涵和提升修養。我就藉住呢個機會,向女兒灌輸成為靚女的內在條件。

第一,要繼續堅持自己愛美的追求,不要因為別人的說話而扭曲自己。連自己的儀容都堅持唔到,佢將來長大仲有能耐堅持其他嘢嗎?

第二,別人因為做不到而妒忌,絕對不是自己的錯。講真,做靚女好忙㗎,淨係打理把長髮都要唔少時間啦,要靚真係要勤力㗎!

第三,佢要走知性美女的路線 (小孩理解為又靚又叻),就預咗比大部分女孩排斥。基於吸引力法則,被排斥係好正常。因為知性美女與眾不同,有個人風格,有獨特見解,能幹又細心,一般人是接受不了她的氣場的。

我好細個就想成為一個又靚又叻的事業女性,奈何被家人打壓不准我扮靚。到我有能力裝扮自己就被視為反叛,總之愛美就是錯。但我相信女兒是一個比我更出色的人,為了讓她更出眾,我會陪她走過每一段被排斥的路。

2016年8月29日 星期一

暑假的特訓

以往放暑假我都會帶小孩周圍去玩,但今年剛巧有新班要開,抽唔到太多時間帶佢地出去玩。咁呢個暑假我地做咗啲咩呢?

因為得返一個工人,要照顧三個小孩真係好吃力。所以今個暑假,我為三個小孩進行自理及家務特訓。

佢地學識咗自己沖涼吹頭,掃地,開飯,食完飯執枱,洗碗和自己摺衫。

每人都做多一點,工人就無咁辛苦了。

2016年8月28日 星期日

飲宴

我仲係小朋友的時候,參加飲宴係一件極隆重的事。就算在街坊酒樓擺壽宴,大家都會著最靚嘅衫,戴哂首飾咁出席。時移世易,而家咩嘢都可以成為擺酒理由,大家都漸漸變得麻木,唔會再盛裝赴宴。

最近我們又要出席壽宴,雖然我們不打算搶主人家風頭,但老公一套西裝,我一條長裙也算是現在赴宴的基本衣著吧。

在飲宴前幾天,有親友問我要不要著得好隆重,我話:「都唔一定嘅,總之整齊企理就得啦。」。點知當日見佢係著住波衫波褲 (好短的),一副剛踢完波滿身灰塵的模樣去飲。

雖然而家冇人因為你著得唔靚而歧視你,但著得整齊係對自己和對主人家的一份尊重。飲宴當日會影好多相,會見到好多人,大家都著得整整齊齊,唯獨有一個髒波牛在相中,個情景都幾格格不入。

可能我們渴求認識新面孔,所以在飲宴這類容易認識新朋友的場合都會注意自己的儀容。不需搶鏡,得體就可以了。外表始終是給人們看見的第一印象嘛!

2016年8月22日 星期一

不用體罰

在好多媽咪群組都見到有媽媽談及體罰,仲有好多心得。例如:點樣打、用咩武器、幾時打等等。講體罰講到寫論文咁,好似好有道理。其實不體罰真係教唔到小朋友嗎?

如果你希望小朋友潛意識中有「暴力可以解決問題」的因子,就繼續體罰吧。很多人都低估了體罰的嚴重性,有誰可以確保自己在體罰孩子時不帶情緒?有誰可確保體罰不會令小朋友受傷?有誰可確保體罰不傷害親子關係?

我的小朋友都會爭玩具,都會爭執,都會搗蛋,都會在我最忙亂的時候為我添麻煩。值我堅持不體罰。

在大家情緒都不穩定時,最好大家都冷靜下。我會叫佢地在家中不同的角落罰企,面壁思過。而我就躲在房中冷靜一下,整理好思緒,才去處理大家的問題。

到我冷靜過後,確保不帶情緒,才開始和小孩們逐一對話。對話是有問有答,不是我在唱獨腳戲一味在罵。要讓小孩懂性,就要讓他們思考。單向的責罵或說教都是冇用我。在對話過程中,孩子會自己發掘錯在哪裡,為甚麼辰改和該如何去改。

在教導孩子中,要孩子明白「為甚麼」是最重要的。如果他們不知道為甚麼被罰和為甚麼要改,問題只會惡化,犯錯會一次比一次嚴重。

教仔同醫病一樣,都係病向淺中醫。就算孩子犯的錯再細,都要教大道理。每一件事重複發生,都會潛移默化,融入細胞中。體罰越多,小孩的暴力傾向越大。對話越多,小孩的分析和思考力就會越高。

如何培育一個小孩,父母是有得揀的。

2016年8月12日 星期五

眼睛可騙人

眼睛看到的就是真相嗎?

則才我們一家在繁忙時間搭地鐵,我和老公先入,小孩和工人跟著我們後面。我踏入車廂後就擰轉身睇細路,正當我轉身時,站在我背後的人推我,我幾乎失重心向前傾。如果我真係向前傾,就會將我啲細路撞開。被推的一刻,我微微轉頭講:「唔好推啦,有小朋友呀!」。語畢,後面的人自己退後了。

我老公在我身旁,佢唔知有人推我,佢以為我無啦啦鬧站在我身旁的一對母女,就出口話我鬧錯人。仲話係亞仔撞到我,唔關人事。

到站了,我們下車,仔女隨工人回家,我和老公繼續行程。

待仔女離去後我先同老公請返件事。老公話我係向住對母女講,佢見人地黑面,所以先至話我。推我的人在後面呀,我個頭唔識擰 180 度㗎,點向住當事人呀?我同老公講:「我講完嗰句,推我的人已經退後,你梗係睇唔到啦。對母女冇推過我都以為我話佢地,唔係我問題,係佢地問題喎。仲有,亞仔明明冇推我,做咩要話佢?」。

老公無言,原來佢親眼目睹的竟然不是事實。

大家有試過因為「看見」而怪錯人嗎?我們有眼耳鼻舌身這五感,為何只相信眼睛?要騙過眼睛是最容易的,要騙過整體感覺就困難得多了。

下次在責備別人之前,請多搜集資訊,避免被人認為你魯莽、武斷和容易受騙。

新嘗試

老公被邀請去為企業家們講課,身為「跟得夫人」的我當然侍奉左右啦。下課後大夥兒去食飯,我和女士們講下女人經,老公就和男士們講下生意經。

食到一半,老公突然同我講,叫我提佢下星期要交文章。原來有朋友正在籌備一本雜誌,邀請佢寫專欄。當時我唔知點解,衝口而出透露我都好寫得,已經寫了十幾年 blog,仲開埋比佢地睇。

朋友睇咗啲就叫我都寫一個專欄,我又唔知點解即時應承咗。其實寫 blog 係純屬興趣,我冇諗過會在媒體寫嘢。既然咁爽快答應了,我會比心機寫好佢。可能上天有啲舖排我仲未參透,不過我好相信快就會明白的。

這算是一個新開始嗎?

2016年8月11日 星期四

健康的堅持

某位從事健康產業的親友,帶我的大仔去食下午茶。他們在美式 cafe 點了炸薯角和雞翼,親友點了杯凍檸茶走甜比我仔飲。在進食期間仲拍下短片留念。在短片中親友問大仔:「杯檸檬茶好唔好飲呀?」。鏡頭中的大仔一臉尷尬地回答:「我覺得有少少唔好飲啦。」。

自我感覺良好的我認為,只有8歲的大仔已經回答得好得體了。凍檸茶走甜,除了苦澀味之外,還有甚麼味呢?冇可能會認為好味掛?

因為親友從事健康產業,所以反對小朋友飲含糖飲品。我都贊成小朋友少飲這些飲品,所以我係索性比水佢地飲,而唔會比杯凍檸茶走甜佢飲咁不倫不類。

從事健康產業的朋友,請在生活上加返點人情味,味覺係好直接影響感覺和心情的。在追求健康時忽略感覺和心情,誰有本事堅持一生一世呢?

2016年8月9日 星期二

淺談健康產業

身邊有很多人從事健康產業,即係做健康補充品、美容品、水機、紅外線床墊之類的行業。我和老公年輕時都做過,老公更是做得很出色的那一批。

健康產業需求越來越大,按道理從事健康產業的人應該係搵到錢的。但事實上有大多數從事健康產業的不但搵不到錢,仲好神憎鬼厭。點解呢?

大多數健康產業都係行直銷模式,即係以人傳人的方式去發展。如果人的質數好,就係以生命影響生命,令更多人得到健康,實在非常偉大。反之,就會係 hard sell 甚至被演化成迫人買貨買職級的所謂「騙局」。

另一種我最常邁到又最令我反感的,就係打著健康生活的旗號,猛批評我的生活模式。咩早睡早起,多做運動,少肉多菜,少油鹽糖,戒甜品罐頭即食麵之類,對大多數香港都市人黎講都係不容易的。更加唔好叫人戒煙戒酒呢啲不受歡迎的話題。我唔係鼓吹不健康的生活,問題係要人一下子扭轉整個生活模式,在大多數人心中似乎係 mission impossible。

咁點先可以在這環境中鼓吹健康呀?其實好簡單,叫人戒乜戒物就話乞人憎姐,但叫人食健康食品去改善體質就冇咁大阻力。舉例:吸煙會消耗維他命 C,吸煙人士就要攝取更多維他命 C 來補充。結果係:冇叫人戒煙但健康產品會比「非煙民」食多咗,即係生意仲好做咗。

做咗客戶,再慢慢教育佢都唔遲吖。駛乜搬啲大道理出黎趕客咁 stupid 吖,呢啲叫吃力不討好,是做人做生意的大忌呢!

2016年8月4日 星期四

有一種無奈叫做親戚

上回提到有親友叫我買額外的暑期作業比亞仔做,但我拒絕了。

早兩日,呢位親戚竟然自掏腰包買咗兩本暑期作業比亞仔。我真係 O 咀,學校叫佢做一本,你就買多兩本,我係唔係要講多謝㗎?亞仔一早做哂啲暑期作業,目的就係想玩,點知做哂又整多兩本黎,算唔算整古呀?

在佢角度可能係一番好意,我應該謝恩。但背後的影響係我來承受喎。呢兩本暑期作業,就好似你未收工就做好哂啲嘢等放工去玩,點知你老細臨收工再比 double 工作你,嗰種感覺唔會係好 welcome 吧?我唔想個仔覺得功課係 never ending,終有一天會谷爆。我唔谷,親友走黎谷,呢種無奈真係非筆墨所能形容!

2016年7月30日 星期六

套料

和工人傾閒偈時,佢話我的男家親友經常趁我不在時找她套料,問我們家中的大小事務。

好在我和工人關係良好,佢好醒咁十問九唔知。當他們追問工人點解乜都唔知,工人就答:「唔知未唔知囉。」。我在幻想佢地套料但不得要領個樣,真係覺得場面應該幾有趣。

點解一場親戚都要攪到咁鬼鼠呢?同埋做咩要咁八卦呢?我家中生活細節對佢地有咩影響呢?唔駛靜雞雞搵我工人套料咁無聊呀?

萬一我工人比佢地套到料,有冇諗過係將我家工人變成計時炸彈㗎?我工人忠心係好事,一次出賣得我,就會有下次。唔通佢地想養成工人出賣僱主的習慣?究竟佢地睇咁多宮廷鬥爭劇有冇學到嘢㗎?

講真我唔係嬲,係覺得佢地為求滿足好奇心而做出不智的行為。我教育唔到佢地,我只可以教好自己的工人。

2016年7月29日 星期五

暑期作業

七月仍未過,大仔已做哂所有暑期作業。有親友得知,就叫我買多幾本比佢做。

我都係改唔到串咀的性格,極速回咗佢一句:「買暑期作業?你係玩佢定玩我呀?」。親友無言,轉話題了。

今年我都有帶大仔去書展,一見到補充練習和教材即閃。我們係去搵三國演義漫畫,故事書同埋天文書籍的。要培養閱讀興趣,梗係要搵有趣嘅書啦。邊有人鍾意操卷㗎?完全違反生理同心理需要,我呢啲火星家長堅持唔谷 academic,我的火星孩子先可以搵到自己的興趣。

我是有點反叛的,認為要有動力 work hard,先要有空間 play hard。

2016年7月17日 星期日

最潮宣傳渠道

在十多年前菲菲開始寫 blog 的時候,發夢都無諗過而家只要用電話都可以自編自導自演做直播。

最近我經常玩 fb live 去推廣我們的教學理念。有人問點解唔拍片,剪好先放上網?最大的原因就係我唔識剪片囉!直播可以即時知道觀眾反應,又可以隨時調節內容,真係直接掌握第一手市場資訊。而且對觀眾嚟講,直播較剪好的片真實得多,又可以即時參與,都幾過癮的。

可能大家不知道,fb live 已成為玄學界的潮流。以前玄學界要做推廣很不容易,不是每個玄學家都有上電視上電台的機會,而且很多有料的玄學家都未上過電視啦 。但透過直播,大眾可以直接睇到你係咩料,不用靠人事去搵人「訪問」,每個人都可以造就屬於自己的宣傳平台。

如果你的生意都面對宣傳樽頸的問題,快去 fb 開個專頁,狂做直播吧!反正是免費的,試下無防嘛。

2016年7月3日 星期日

珍貴的回饋

上回講到大仔得了服務獎,我和老公都出席了頒獎典禮捧亞仔場。

到達學校時,見家長並不多,與幼稚園時的墟冚情況完全唔同。到正式頒獎時,先發現原來每班只有幾位小朋友得獎,服務獎只有一位得獎者。當下才知道這個服務獎不是豬肉獎,是全班最有服務精神的同學才可獲獎。

我真係好開心,亞仔真係學懂了做人的點點道理,願意為同學們付出,亦得到老師的認同。學做人比學知識要困難得多,他得了這個獎,對於我來說是一個很珍貴的回饋

2016年6月29日 星期三

豬肉獎

上星期大仔比張通告我,學校將有年度頒獎典禮,問家長會否出席。我問過亞仔有冇獎攞,佢話冇所以我打算不去。

點知昨日亞仔話佢有獎,所以我都係要出席啦。我問佢攞咩獎佢話唔知,打電話去搵班主任但又搵唔到人,我一直都唔知佢會攞咩獎。

直至今日,佢話綵排咗,原來佢得的是服務獎。我問佢做咗啲咩服務而得獎,佢依然係唔知。聽完真係覺得好攪笑,亞仔乜你咁夢豬豬㗎?

好明顯呢個係豬肉獎,不過都好慶幸,都叫做有個豬肉獎鼓勵下。希望呢個夢豬豬繼續享受他的小學生活啦。

2016年6月27日 星期一

經營婚姻

昨晚和老公閒聊,佢話見人地湊初生嬰兒時日以繼夜冇覺好訓,我們有三個小孩但佢都唔覺自己要幫手湊,結論係覺得我好勁。

我諗我最勁一定唔係湊仔,係湊老公。好多新手媽媽都怪責老公不幫忙湊 B,或者怨老公 / 長老們湊得唔好。其實呢啲所謂「合理」的訴求都是破壞關係的元兇。

老公們唔識湊仔,不是新聞啦!反而識湊仔嘅老公先係傳奇,值得大力嘉許。老人家湊仔,你預咗係求其啲 (回想下自己童年就明白),加上年紀體力等因素,同埋老人家必定會縱孫,你估作為媽媽的可以要求啲咩?如果當了媽媽都一定要外出工作,要靠老人家幫手湊仔,你最好當自己咩都唔到,免生磨擦。

頭先我話識湊老公,重點係盡量唔駛佢湊,減低佢壓力。亦唔需要老人家湊,減低磨擦機會。只要老公不受嬰兒的起居飲食所影響,大家就唔會為湊小朋友而爭吵,夫妻關係少點挑戰。

可能你會認為:個仔跟佢姓㗎,有乜理由我做哂仲要唔好煩到佢呀?我有好多朋友就係咁,最後都把老公迫走了。當然在佢地心目中係認為男人不負責任,掉低老婆仔女出去搵女人。你可以咁認為,但我明白係男人們實在唔識點去遷就老婆,做又錯唔做又錯,唯有在外尋找自由的空氣。

我會睇遠一啲,生小孩就係真正組織家庭的一步,湊 BB 的艱辛都係兩年內的事,人生幾十年,值得為兩年去換下半世的幸福嗎?

老公今天看見別人的情況,深深體會到我有多照顧他感受。我們的感情肯定是更穩固,婚姻就是這樣一點一滴地經營出來吧。

2016年6月24日 星期五

女人的能耐

少刨娛聞的我,最近都留意到伍姑娘的家事,老公疑似出軌,還可以在記者面前輕鬆面對。她令我想起了希拉莉。

在婚姻關係中,最不能接受的莫過於另一半不忠,這種裂痕是最難修補的。出色的女人遇到丈夫不忠,不但要把情緒收起來,還要「輕鬆地」為丈夫解圍,這種能耐真教人敬佩萬分!

如果男人懂得領受呢份情義,他就會知道老婆有多愛他,為了悍衞婚姻可以不惜一切。如果男人心存僥倖以為又過到骨,待風聲冇咁緊又重蹈覆轍的話,這種用下體思考的低等動物總有被遺棄的一天。

女人還願意為男人如此付出,可能一生沒有幾多次,男人們請珍惜真心愛你的女人。

2016年6月22日 星期三

又係制度問題?

本來冇追電視,但「贏在射精前」呢句實在太爆,吸引我上網睇返呢個節目有幾勁。

講真我覺得節目內容誇張得黎都算寫實。身邊確有一班人有呢個想法,亦在付諸實行。佢地咁落力去催谷小朋友,最大嘅「原動力」就係香港的教育制度。

我都唔認同香港的教育制度,但我的著眼點並非培育小朋友成為制度下的奴隸,所以我對教育制度本身冇咩感覺。我讀書比我老公多,但而家我們一家五口,加埋工人和貓星人,都係我老公獨力賺錢養家。咁學歷其實代表到啲咩?

有點社會經驗的人,都知道做生意比打工更有機會賺多點錢。投資又比做生意更易賺到錢,當然更易蝕錢啦。
做生意和投資,最緊要的不是學歷和知識,而係心態!

既然心態比一切重要,為甚麼要用繁忙的時間表去磨掉小孩的自我呢?講到尾都係教育制度的問題吖嘛。其實跟制度走只會製造跟隨者 (followers),不受制度束縛就會啟發創造者 (creators)。

選擇比機會重要,大家都識講,但有幾多個夠膽做?

2016年6月21日 星期二

工人消失後

亞懵突然人間蒸發後,我當然有好多善後工作要做。通知入境處、重新編工作時間表、通知學校、為小朋友做心理輔導,仲有叫醒目工人 (亞醒) 去收風。

亞醒在街市見到亞懵的朋友 (都係印尼姐姐),問佢地有冇見過亞懵。當佢地知亞懵走咗佬,竟然冇咩反應。亞醒肯定呢單嘢佢啲朋友有份參與。

在大仔學校門口都係印尼姐姐吹水熱點,因平時係亞懵帶大仔返學,今日亞醒出現,其他姐姐以為佢係新工人,即刻上前 social 一番。原來亞懵在其他姐姐面前講盡我同亞醒的壞話,當其他姐姐知道亞醒係我用了多年的工人後,即刻以嫌棄的目啤住佢。

仲有姐姐同亞醒講:「以前嗰個姐姐好勁㗎,佢識好多好犀利嘅師傅㗎! (落人降頭嗰啲)」。亞醒答佢地:「係咩?好勁㗎?我老細都係做呢行喎。」。之後班姐姐就各自散開了。亞醒講返比我知時,笑到我標眼水。真係咁勁就唔駛黎香港打工啦,吹水唔抹咀。

亞懵閃咗我係忙咗,但屋企氣氛好咗。希望小朋友們盡快適應啦。

2016年6月19日 星期日

消失的工人

今天亞懵放假,在應該回家的時候她沒有回來。電話不通,whatsapp 冇 online,冇帶屋企鎖匙,她的衣櫃沒有衣服,她的隨身物品不在,昨晚穿的內褲丟進垃圾筒,我相信她出走了。

她突然出走,我竟然可以鎮定地和 agent 溝通。Agent 提供了幾個封殺她的方法,但我不想花時間和不負責任的豬糾纏,所以我不打算做。我只會做自保的一部分,確保家人受的影響可減至最低。

可憐孩子們,話要留返件父親節蛋糕比佢,見佢遲遲不回家又要我打電話找她。時間一點一滴過去,孩子們都明白她不會回來。

他們開始哭,開始怪兄弟們不夠乖,所以工人走了。在這時候,我要糾正孩子們,工人走絕對不是他們的責任。如處理不好,會令孩子們留下陰影。

安撫完他們,亦不忘提醒他們,萬一在街上見到她,絕對不可跟她走。孩子們一時不明白,我只好簡單地說:她已經變成壞人了。這一刻我知他們不懂接受,我唯有減少工作,多點和他們慢慢溝通吧。

上司的技能

有些打工仔認為自己的上司無能,因為覺得自己在技術上或效率上都比上司優勝。其實上司不一定要做得比你好,只要知得比你多就行了。

菲菲在職場或在家,當上司的經驗都非常豐富,我想我都有資格分享一下,哈哈!

我在美容院當大家姐時,要帶著兩間舖的美容師去跑數。講美容技術,我當然唔係美容師嗰皮。但我清楚每個美容師的強弱項,在派客時可避重就輕。客人容易感到滿意,美容師們跑數都輕鬆啲。

在當客服經理時,要帶著廿多人去處理各式各樣的客戶問題和查詢。文筆較好的負責覆 email,轉數快和 EQ 高的負責接電話,外表娟好的就坐在靠門口位置,這也是公司形象嚇!

在當 Sales Manager 時,我主力不是去跑數,係幫未夠數的同事提升能力和做心理輔導。和安排新仔跟師兄師姐執頭執尾,從旁偷師,增廣見聞 。

在家睇住兩個工人,蠢的做 routine 和無危險的工作,醒的就做 ad hoc 嘢同煮飯。

上司的工作,就係識得如何用人。請不要誤會上司係超人,如你上司做得比你好,那你的存在價值就很低了。

2016年6月18日 星期六

銷售不露底

銷售人員每月都要追 target,但未必每個月都夠數,有時在情急之下露了底也不自知。

露底不是講衣著啦,係講心態同行為。在客人面前露了底,成功機會就大減,所以響度比少少貼士大家,希望你們用得著啦。

在我做地產的時候,老細教過「成交金額的高低不是最重要,最重要是買賣雙方願意成交。」 。

在我做保險的時候,老細教過「我們要似在湖中游泳的鴨子,表面很優閒,但在水中要不停踢水才會向前。」。

有些銷售人員想快啲追 target,就著眼銀碼大或佣金高的項目。但當客人想退而求其次時,就急著硬銷水位高的項目。結果只會嚇怕客人,連次一等的單都簽不成。

有些銷售人員願意大小通吃,但著急相太流露於表面,剝奪客人考慮的空間,要迫客人即時購買。當客人受壓,在沒有足夠考慮之下,可能會選擇不買。亦有些客人會「被迫」買了,但我肯定他不會再找你第二次,等如自斷了一個客戶群。

我知每月追 tatget 是有一定的壓力,如果接受不了就請轉行吧。如果仍想在銷售行業長做長有,請參考我兩位老細的名言吧。

2016年6月17日 星期五

金句王

雖然我年青時是黎粉,但這裡不是講 Leon,哈哈!

在網上成日見朋友狂 po 金句,其實都係 share 別人的 link。在 caption 上都是說「好有道理」、「發人深省」、「至理名言」之類,就輕易呃到百幾二百個 like。有時我都覺某一兩句幾有 point,但 po 得太多,就覺得好膩好虛浮。

人生有座右銘係好事,但一句就夠嘞。在某些朋友的 fb 中,咩內容都冇就只有 share 別人的所謂金句。好似好有能量,其實你想點呢?開個 fb 齋 share,同冇開冇分別吧!

從金句裡學習,睇完要吸收,再以自己的方式去實踐,先係真正學到嘢。廣傳開去的同時,這些至理名言你又實踐到幾多?

題外話,我覺得暢所欲言的菲菲回來了,不用再小心翼翼地諗下會唔會得罪人才落筆。我寫得好暢快,希望你地都睇得暢快!

小筆友

暴近有位媽媽在某個 whatsapp 媽媽群組發起小筆友活動,邀請小朋友們互相寄信,好似想提升寫作定表達能力云云。呢件事意義係幾好,不過感覺上好似「為做而做」咁,所以我冇參加。

大家的小朋友都讀緊 K2,只有五歲人仔,咁快要寫信?老實講叫我無啦啦寫封信比「筆友」,我真係唔知寫咩好。我個女讀 happy school,現階段係文盲,連自己個名都未識寫,點寫信呀?又唔想亞女畫幅畫寄比人,人地收到該如何處置呢?掉咗又好冇禮貌,收起又阻地方。成件事我覺得好夾硬黎,所以冇 join。

我肯定亞女表達能力不錯,見佢同兩個亞哥鬥咀時可以用成語互相秒殺,大人都未必有佢地咁精警。至於寫字,到佢地要用時就自然會學識,不必太心急吧。

2016年6月16日 星期四

股神

菲菲不懂炒股,但身邊很多朋友都有玩股票。

有位朋友很喜歡分享炒股經驗,又對各種股票分析得很細膩。他的一大堆「冧把降」我完全不明白,但他除了分析之外,還經常分享輸股票的經驗。每次失利都是六位數字,但從來未聽聞過他有多少斬獲。

有些朋友嘲笑他,買親都輸就唔該快啲斬手指戒賭啦。但在我眼裡,他不單是股神,連做人都很有一手 。

我相信他輸出去的冇幾千萬都有幾百萬,輸咗咁多年仲可以談笑風生,即係呢筆錢對他影響不大。再諗深一層,佢贏錢時是絕口不提的,相信佢「輸」咗咁多年都未破產,肯定贏返黎的會更多。

他只講輸錢不講贏錢,一來不會比人知佢有幾多錢,二來不會錯誤引導別人在股票市場贏錢是太輕易。這樣就不會有人被他導了去炒股,攪到損手爛腳時來怨他。

只看表面的人會當他是傻瓜,想深一層就明白 他一點也不傻!