漏電男

知道咩係「漏電」嗎？當然唔係講電線殘舊會漏電，係講人。

人會漏電？唔係美國漫畫入面的超級英雄或者大壞蛋，係言行舉止無意之間令到異性產生「幻覺」的人。菲菲認識的人當中有幾位漏電男，一位係專登漏電，一位係唔知自己漏電，仲有一位動機不明有待觀察。

先講下專登漏電果位男士，四十來歲外形仍然保養得不錯，身型夠高穿衣有品味，單看外型已知佢叉足電。佢已婚育有一對仔女，不過很少會提及自己有家室。佢平時講野都幾精神的，但係對住部份女士講野就會漏電。點為之漏電？就係在女士身畔輕輕的說，好像在講秘密的模樣，但係內容並不是甚麼秘密，單是這種感覺就讓人心神恍惚。剛才說他的對象是「部份女士」，咁係點劃分呢？大凡靚女、有錢女、叻女佢都會專登漏下電，暗中培養女士對他的好感，好讓他日後有事相求時可得心應手。最絕就係佢從來冇去「追求」或「獻殷勤」，只係令到女士們對他有微妙的好感。在我認識的女性朋友中，最少有三位中招，在不同程度上 (金錢或人脈) 幫助這位漏電男。

另一位冇心漏電的是一位靚仔，三十來歲文質彬彬。平時佢有少少怕羞，聲線很柔和，和他傾計時有種很清新的感覺，彷彿和愛情片的男主角攀談一樣，令人悠然神往。他和人說話時很有禮地望著對方的眼睛，配合他俊秀的外形，定力少D都比佢電暈。他已有固定女友，但係有女性友人同菲菲講呢位俊男想追佢。真係笑死人！呢位女士都唔細啦，三十幾歲人都仲未識分咩叫「追求」，靚仔冇罪 ga，望住你講野係有禮貌，同追求完全扯不上關係啦！

最後一位動機不明的漏電男，好似未夠三十歲，不算很靚仔，不過性格主動熱情，亦都很喜歡溫柔地和女士傾計。他的聲線好似有魔力似的，會從耳畔直入心坎，連菲菲功力咁深厚都幾乎中招。菲菲認識呢位陽光漏電男時間尚淺，他的動機有待觀察！

以往只知道女性會以色做餌去達到自己的目的，原來現今男士都有此本領，佩服佩服！