重覆犯錯

錯左一次，可以叫做無知。錯第二次係唔係叫做蠢？

菲菲家有兩位外傭，姑且叫做地做工人A和工人B吧。工人A三十來歲，在18歲那年，工人A的爸爸親自欽點左一位「好仔」要佢結婚。在父命難違的印尼社會下，工人A就同一個佢都唔知係乜水既人結婚了。婚後生左一個仔，之後來港打工，老公就留在印尼。佢老公每個月除左等老婆寄錢返黎養佢之外，仲四圍溝女，連工人A的堂妹同大嫂都唔放過。工人A知道後當然好傷心，決定同佢離婚。原來印尼人辦離婚係好困難的，如果男方不同意，就要女方比萬幾元去辦離婚。萬幾元港幣對於印尼人黎講唔係小數目，最終工人A都冇法離婚。

最近聽工人B講，工人A的爸爸叫佢不如搵過另外一個老公啦。他的理由是︰「你個仔長大結婚之後就只會照顧老婆，唔會照顧你呢個亞媽，你都係搵返個男人去照顧你啦。」。之後就慫恿佢同一位在鄉間已認識的男士和她來往。工人A再次聽信爸爸之言，大家以 SMS 隔空交往。

聽完之後真係想問下工人A的爸爸點解咁肯定佢個仔會唔理佢？就算唔理，工人A都仲有D錢，如果而家交往果位男士最終又係呃哂佢D錢，咁佢下半世點算？我唔質疑她爸爸的出發點係為個女好，但係之前佢已經睇錯人，佢點保證今次冇睇錯？同埋工人A同呢位男士天各一方單靠 SMS 交往，又點可以瞭解到呢位先生係一個咩人呢？大家都冇相處過，她的情況就好似無知少女和網友談情，被騙成份好高喎！

老實講，一個普遍印尼男人如果要搵老婆，佢地會首選十來歲的處女，始終係一個好傳統的父系社會。點解當地有大把十六歲卜卜脆的唔要，係要揀一個三十幾歲仲要有個十幾歲兒子的失婚婦人？除左錢之外我真係諗到其他原因。

之前的失敗經驗，究竟工人A同佢爸爸有冇吸取過教訓？知唔知問題響邊？如果而家呢位男士真係存心呃佢D錢，佢畢生既積蓄就會化為烏有，咁佢呢十幾年出外打工究竟又有咩意思？