想當年我在地產的日子

菲菲在九十年代做地產經紀，當時仲未有發牌制度，即係年代久還也！哈哈！

地產係菲菲的第二份工，第一份工在室內設計公司工作，不過做左半年都唔知自己做左D咩。當時老細請我時冇講明要做D乜，請左我返去又真係冇咩比我做，菲菲覺得好無聊所以冇做了。點解又會入地產呢？其實當時我冇諗過做邊行，剛巧有人介紹就入行了。介紹人認為我識英文可以招呼鬼佬客所以我就入了港島南區做。

記得初初返工好攪笑，年少無知的菲菲十下十下咁，咩都唔識，比老細由朝鬧到黑。老細見我傻下傻下就點我去行 site，唔單止行哂我地分行負責的地區 (由陽明山莊至石澳)，仲要行哂全港島區的豪宅路線，包括山頂、中半山、西半山、東半山、寶馬山、砲台山等等 (全部都係山！哈哈！)。全程係一步一步行，帶埋鎖匙逐間逐間睇，其實真係好甘！不過勝在年輕力壯，大熱天時咁行法都冇中暑。

行的過程仲要記哂樓盤資料、每座的位置、呎數、成交紀錄等等一大堆資料。唔知老細係想玩殘我等我自己走丫，定係想訓練我，菲菲足足行左三個月山！但係次次老細問我行左d咩我又答得出喎，佢又冇辦法炒左我呢個笨蛋，之後就用第二個方法去「訓練」我。佢有一批齋睇唔買既客「比」哂我，叫我跟下，我又好落力咁約呢班「遊客」睇樓，全程絕無欺場，照 sell 照 try close。當然呢班遊客唔會買樓，不過菲菲就有好多練習機會。

老細見我仲未肯走，就叫我 hold file。即係劃一個地盤比我，叫我起哂d盤出黎。老細派左最少盤的舂坎角比我，規定我每星期例會都要交新盤。哈哈！點知傻更更的菲菲又真係走去舂坎角逐家逐戶拍門，又比我起到新盤喎，仲有業主肯簽獨家比我，老細開始唔再留難菲菲了。

到大概入行四個月左右，老細先至肯比我跟新客。因為之前受過地獄式訓練，我一接到新客就即時安排好睇樓路線，再從客人反應中慢慢揣摩他們的需要。記得菲菲第一張開的單，係當時的新盤「赫德道八號」，仲要係頂樓。在港島南區工作的我，竟然做到一間商廈，同事們都覺得好奇怪。事關菲菲在行 site 時和各區分行同事都混熟了，要搵盤比別人容易，所以在沒有人協助下做左單商廈。

之後菲菲陸陸續續開單，工廈、商廈同住宅都做過哂，豪宅同屋苑都做埋，最終在年度頒獎中得了個銀獎。這是我人生第一個工作上的獎項，那獎牌菲菲仍保存至今。

做地產是很開心的，可惜菲菲年少得志，沒有好好珍惜。加上不想再做 sales，希望轉一份較舒服的工作，所以在97年就難開了地產，開始了OL的生涯。不過世事就係咁奇怪，我唔想做 sales 咩？偏偏份份工都係 sales… 哈哈！