廣東話真係咁難讀？

每星期二都會叫印傭去買報紙比大仔做剪報 (而家K1都要做剪報，即係叫我做啦！)，平時我地係買開日月報的，昨日印傭落街買報紙時剛巧日月報賣哂，佢扛電話返黎問，我就叫佢改買星島，點知佢買左份成報返黎。因我今日先至有空幫大仔做剪報，冇得拎去換。

雖然好多印傭都識講廣東話，不過佢地好多發音都係攪不清。例如︰唔識分「星期一」同「星期日」的讀音，「飲筒」會講成「針筒」(已經成日響便利店度買野時攪出笑話，都係改唔到)，又唔識講個「瘀」字，有次話我個仔隻腳「軟」左 (嚇死人咩！)，原來係「瘀」左。仲有，唔識分辨量詞，咩都係用「個」，例如︰一個筆、一個被、一個車、一個筷子之類。同埋文法去又出現問題，例如︰「講好多野」會講成「好多講野」、「媽媽的杯」會講成「媽媽杯」(佢地唔識用個「的」字)、唔識用「闊窄」黎形容，會用「肥瘦」黎形容，會講「檯好肥」、「門好瘦」之類、會撈亂「藍色」同「綠色」、「透明」會講成「白色」、唔識分「灰色」同「啡色」的讀音。「牆」、「窗」、「床」全部讀成「床」… 實在太多不能盡錄！

本來我都冇需要改正佢地的讀音，最大鑊係大仔跟工人講錯，我唯有不辭勞苦去糾正佢地。但係佢地又好熱心要教我個仔講野喎，比佢地激到嘔血！不單止廣東話發音不正確，連英文都係咁。千萬唔好以為有個外傭響度小朋友會識講英文，真係大錯特錯。佢地的發音既不是美式亦不是英式，盞越學越唔識。例如︰「Vitamin」會講成「Bitamin」、「plastic」會講成「blastic」… 


而家三個小寶都學緊講野，我要打醒十二分精神去留意佢地了！