老公你好嘢！

上文提到的所謂大男人 A君，最近又在我老公面前講我。今次老公終於叫佢唔好再講，仲叫佢唔好再煩我。

老公今次終於肯為我開聲，真係好開心！

女人往往不顧面子都要維護男人，但男人卻為了面子取悅朋友而犧牲女人。男人們，別人在你面前說你女人不是，不是你冇面，係講人是非嗰個冇品。呢個簡單邏輯，卻難倒天下的男人。

小家「大」男人

有些人，不論你容忍咗佢幾多次，原諒咗佢幾多次，都會不斷挑戰你，這些人可以點形容？

基於不想我老公難做，縱使我再討厭佢，都未發佢圍。呢條友得罪的不止我一個，有另一人的太太都好討厭佢。佢為人如何我不評論，佢有冇瞞住佢老婆出去攪攪震我冇證據。但佢睇唔起女人就不容置疑。

佢多次在我老公前中傷我，攪到我地吵大鑊。寧教人打仔莫教人分妻，呢個道理佢識唔識㗎？以下有單嘢又關佢事，我忍唔住要發洩一下，姑且叫佢做A 君啦

。

今日老公突然話某朋友新屋入伙，佢明晚要單拖去食飯。聽到我一頭霧水，個朋友我都識仲好好傾，點解新屋入伙冇我份？佢老公話 A 君霸哂啲位，冇位比我喎。聽完仲 R 頭，又唔係 A 君入伙，關佢咩事呀？如果冇位坐未企 lor，好小問題之嘛。

老公開始九唔搭八，話去酒樓飲，所以冇位。咩料呀？新屋入伙去酒樓擺酒？呢位朋友唔似咁鐘意排場喎，越講越唔明。老公終於講出重點，呢次飲宴係 A 君攪嘅，我估佢係借朋友新屋入伙為名，攪場飲宴去招呼佢啲生意朋友掛。

聽宪即刻明哂。冇位？唔想請埋我就真。老實講，請我都唔一定去，但男人老狗做埋呢啲小動作，仲同我老公講到明冇我個位，我又睇唔起佢多一次。

黃色恐怖

旺角連夜來的衝突，令旺角的居民和商戶雪上加霜。他們的動機，是爭取普選定係蓄意衝擊警方，明眼人心中有數。

主流傳媒在報導中故意刪掉暴徒衝擊的場面，放大警方驅趕暴徒的所謂暴力，到底是報導事實還是曲線煽動，懂分析的人自有判斷。

在網絡上呼籲網民去旺角「鳩嗚」(普通話購物之諧音)，但帶備了頭盔和口罩，很是耐人尋味。

把警員家屬逐一起底，是甚麼手段？

在網上論壇以暗號交談，我想他們是在策劃一些不見得光的事吧。

反佔人士出言反駁就被滅聲，我們的言論自由已蕩然無存。

網民肆意杜撰旺角警察隨街打人的故事，但住在旺角的我們，每天只見到友善的微笑，警察是不會無故打路人的。

教師主動發表仇警言論，明顯有違專業操守。有部份警察的行為不當就抹黑整個警隊，基於此概念，曾有教師性侵學生，哪整個教育界都是淫魔了嗎？作為教師，應該懂得甚麼是「以偏概全」和「將心比心」吧。

法律界人士聲稱會幫助被捕的「市民」，很正義呀！

以上種種，令我們體會到甚麼叫恐怖。

未來與希望

最近，我正在積極思考一個問題，不如舉家搬去大陸住吧。

如果香港會漸漸被激進份子邊緣化的話，我情願在國內找機會。如果這班激進份子，將會是我們孩子的上司、師長或合作伙伴的話，我真的擔心孩子們的未來。

對於我來說，共產黨並不可怕，我們還要靠國內客戶來養家。但在我眼前的熱血青年，只是不斷破壞我們的生活，危害我們的安全。

不要說我銅臭，熱血的不用吃飯嗎？他們為甚麼要攪咁大鑊嘢?因為年青一輩缺乏向上流動的機會吖嘛。先唔講向上流動要點裝備自己，有正能量等等的條件，我講動機。

向上流動為咗咩呀？講到尾都係錢。向上流動唔係為錢唔通為咗服務社會?你們信嗎？熱血的冇資格話努力工作的人係豬，因為你們連人都未識做。向上流動唔係靠政府，亦都唔係靠政策，係靠自己。

如果香港的未來是掌握在這班不負責任的人手裡，我們的下一代還有希望嗎？

身份象徵

很多年前，有張信用卡係身份的象徵。但現在對某些人來說，信用卡可能是負債的代名詞。

到了2014年11月，回鄉卡搖身一變，成為大家都引以為傲的身份象徵。有回鄉卡，可以在國內吃喝玩樂、打工、做生意，連結婚生仔都得。

回鄉卡不單是一張可以落葉歸根的 Return Home Card (潮爆佔中英語，令人大開眼界！)，仲可以幫你搵工順利啲。失效的回鄉卡，會令多少僱主卻步？就算洗心革面了又如何？所有與國內有關係的工作都做不了，會失去幾多發展機會？

工作以外，想去旅遊觀光又唔得，如在香港搵唔到伴侶，連返大陸結識異性的機會都無了。

有人形容被取消回鄉卡係好「恐怖」，但我只覺得可笑。既然都擺明車馬話不喜歡大陸，人家取消了你的回鄉卡，實在理所當然，有咩咁恐怖？唔通我明知你唔妥我全家，都請你入屋嗎？

汝之智慧，不可思議！

第一次備戰

明天開始，大仔開始第一次測驗。

在半個月前已開始幫佢溫習，在呢兩星期，我又學懂了一點點。學懂的當然不是知識啦，係點幫小朋友溫習。

我個仔唔會自動自覺溫書，連範圍係咩同如何溫習都唔知道。都好正常，畢竟係佢人生第一次測驗。評估過佢各科能力之後，我知道普通話同數學都可以唔溫，可以煩少兩科。餘下三科，中文最穩陣，其次係常識，最弱係英文。

為了令佢容易投入，我決定先溫中文，令佢在溫習中得到滿足感。在溫中文期間，滲少少英文生字比佢，等佢對英文有啲認知先。

溫完中文，就攻英文生字。呢段係最艱苦的時刻，因為佢成日撈亂啲字。咁我就每日同佢溫五個生字，雖然好慢，但佢漸漸記得啲字。

苦盡甘來，溫完生字溫常識。經過溫英文的艱苦之後，佢認為常識較易入手，好快就溫習好。在尾段，再同佢溫英文句式，因已有生字打底，感覺無咁困難。

呢兩日，為之前溫習過的作了個總結，有八成內容都記得。希望佢今次測驗可以穩步過關啦。

我不懂

在又一城和地鐵內，既沒有陽光亦沒有下雨，為何要舉傘?

在2003年殉職的飛行服務隊成員，與爭取真普選有咩關係?

發起人都話要回復正常生活回大學復教了，為何疑似學生們仍在訓街?

商場保安勸喻不要張開雨傘，為何要發起其他人同往舉傘?

以上種種，代表了甚麼，詮釋了甚麼?

就快測驗了

開學2個月，話咁快就收到測驗的通告。亞仔間學校算係舒服，一年只有2次測驗和2次考試，比起3測3考的小學要舒服得多了。

暫時課程仲係淺，數學可以唔駛溫，只係溫習下中英文詞語應該都可以。作為一位 hea 媽，我唔打算陪太子讀書，我希望可以培養到佢自己溫習的習慣。

亞仔平時最愛扮老師，日日要細佬妹聽佢講書。令我想起我小時候，因為細佬妹太年幼，扮老師都冇學生，就會自製教材和故事書來自娛。在製作這些故事書時，就自自然然溫習了。在我印像中，我係幾乎冇乜點溫書，都考到好成績。

見亞仔扮老師時都有自製教材，佢會唔會好似我咁，順便溫埋書呢？如果佢學習的模式和我小時候一樣的話，我就可以繼續做 hea 媽了。

旺角城寨

萬料不到，在2014年的香港，一個國際大都會，當中最繁忙的鬧市旺角，會突然變成一個城寨。

來自四方八面的人，突然合理地攻佔了旺角的心臟，當中的居民商戶全都成為了人質。他們築起城牆，自成一國。他們以家傳戶曉的生日歌作為國歌，黃色作為國家的顏色，只欠一面國旗罷了。

警察趕佢地唔走，禁制令趕佢地唔走，區內市民形形色色的驅趕行動都趕佢地唔走。睇黎佢地意志已經堅定到無人能阻的階段。

大家都係講廣東話，但城裡城外的人完全溝通唔到，令人費解。

不如由得佢地在城寨內，過他們的烏托邦生活好了。他們有大把時間和不明來歷的錢，有學生這個銜頭作擋箭牌，誰也妄想動他們一根頭髮。

懇請城寨內的學生們作一個富教育意義的示範，一人一票選出你們的寨主吧。群龍無首就會淪為烏合之眾，你們仍是一盤散沙各懷鬼胎的話，未爭取到民主就爆發內戰了。

如果唔明我講咩，請讀下中國近代史，或者參考近10年的國際新聞啦。在批評別人短視之前，請思考一下你們有多務實。理想和務實，是唇齒相依的搭檔，如你們硬要把它們劃清界線，無論做甚麼都註定失敗。

擴闊思考空間吧，共勉之!

證據

有支持佔中的人 whatsapp 我，問我旺角的情況。

旺角每天發生咁多事，有些有見報，有些沒有傳媒報導過。我不會去戰區，所以我就求其講幾件傳媒有報導過的事給她知。

她的回覆是質問我有冇證據，拉唔拉到人之類。

其實佢問呢啲嘢係想關心我定落我口供呢？係朋友嘅就算唔慰問，最少都講句無奈吖。我地顧及安全，冇咩事都唔會去高危地帶啦，其實除了見到好多警車警察之外，真係冇嘢好報導喎。我當係朋友式傾計，你要我比證據，係咪攪錯咗啲嘢呢？

在佢地心目中，我地呢班除了是人質之外，仲要為佢地充當戰地記者嗎？

談判冇結果，我們繼續做人質。或者已經是戰地孤兒，誰也幫不上忙。

冇問題，我不介意，我們總有辦法活下去。但請別再問我旺角有甚麼事發生，想知的話自己來找證據吧。反正傳媒報導都係講啲唔講啲，咩消息、圖片和短片都反映不了真相，亦沒有所謂的證據。

關心我們的人，謝謝你們！今天旺角還未爆發內戰，我們仍然安好。

如果有愛

早前和朋友晚飯，大家都係旺角區街坊，話題當然離不開佔領行動。

明顯地大家都討厭佔領行為，但他們好似蟑螂一樣，數目眾多，越打越有，且有損市容。我們面對這群蟑螂實是束手無策。

朋友的客人向她訴苦，她的子女在家張貼大字報，要求民主自由，把朋友的客人氣過半死。朋友問我，如果是我的子女，我會怎樣處理。我下意識地回答:「既然他們想要民主自由，就自己外出生活吧。為了培養他們的責任感，我會停止經濟援助，要靠自己努力去獨立生活了。」。之後再想一想，這情況真的會在我家出現嗎？我肯定我的子女們不會變成這樣。

這不是我一廂情願的想法，是有理據的。子女在家貼大字報，在家宣示主權，即是和家人之間沒有很多的愛。如果你愛你的家人，會用這種手段去傷害他們嗎？如果愛家人，會狠心和他們對立嗎？

我也年青過，也反叛過，但真的可以做到咁絕嗎？撫心自問，真的做不出。

家是一個談情說愛的地方，無論對老公、孩子、工人甚至貓咪，都以情行先，在情的基礎上再說理。在沒有情的基礎上，連道理也不用說了。因為各人心中早已落了閘，只向自己的方面想，失卻了設身處地為別人著想的美德。

用愛做基礎的家，意見不合也會找到共識，對嗎？當紛爭出現時，總會顧及到曾經建立過的情誼吧。

眼見今天年青一輩的所作所為，令我們反思，究竟他們的成長中，得到的是精神上的愛，還是物質上的溺愛?他們的價值觀和人生觀建立於甚麼基礎之上?我想，父母們有很大的反思空間吧。

家長們，共勉之！

瘋狂的世界

彌敦道北行線通車半日，晚上又大批人來佔領，重奪旺角，乜彌敦道係佢地擁有 ga?

旺角居民回家被路障擋住，移開路障回時比人打到手骨骨折，三個月開唔到工，有人性嗎？

深夜推小孩上戰場，和中東的恐怖份子有分別嗎？

這是我生活了幾十年的香港嗎？

Wild camp

原來學生們物資充足，節目豐富。在香港活了幾十年，都未試過在主要行車通道上 BBQ，打邊爐，打乒乓球，。生活設備完善，有碌架床，澡堂，仲有源源不絕的各種物資。

其實佢地係真心有理想定係在鬧市中玩 wild camp 呢？他們的生活真寫意，唔駛交貴租就可隨意霸佔公共地方來享樂。

這是我們未來的棟樑嗎？比起假民主，他們更令人心寒。

小朋友爭玩具

小朋友爭玩具，爭電視睇，父母會如何處理?

菲菲三個孩子還年幼，佢地幾乎每日都有嘢爭。有時真的很想要所以爭，有時係為啖氣，人爭我又爭唔好蝕底。無論佢地為乜而爭都好，我都只會用一個辦法去處理，就係叫佢地自己協調一個大家都認同的方案。

個方案係乜唔重要，最重要係大家必須尊重各人的意見和利益，大家都要有適當讓步，同埋大家都願意遵守協定了的規則。

孻女才三歲，知道咩叫和而不同，爭取之餘亦要顧人感受。她懂得爭取不一定要硬搶，往往軟功更為有效。當她嗲下兩個亞哥，哥哥們點都讓佢幾分。

細仔四歲，上有亞哥，下有妹妹，夾在中間其實最冇籌碼。但他精於看時勢，如知道暫時不夠 power，會暫時放下自己的欲望，改做別的事情。到大家都不爭了，就可以從容不迫地做返自己想做的事。

大仔六歲，上了小學明顯成熟了，在爭拗時會第一時間出來主持大局，讓大家盡快解決問題。如果佢都有份爭，我先出手，提醒佢作為大哥的責任，佢就會主動提出解決辦法，和細佬妹商量。

三個小孩性格不同，處事方式不同。但在家中彼此尊重，不會因爭拗而傷感情，這才是一家人。

打不死精神

過去十天，我家的生活因為佔旺而發生極大的變化。因為小朋友太年幼，生意仍在淡季，人生安全受到威脅、周遭的人萬般指摘等等，我的情緒一度崩潰。事情會如何發展，香港會變成怎樣已經無法預料。但我和老公的前半生都經歷過重重困難，只要有清晰的方向和堅定的信心，我們必定能夠走過這難關。

雨傘黑衣人會否離開、香港會有民主定係假民主都好，我們的生活都一定要過。別人同情又好，鬧我地無遠見又好，我地仍然要交租交學費。每人對明天的定義不同，我尊重你們的理想，就算受到你們唾罵，我都必須為自己下一代負責。在未有民主之前，我肯定仲要供養孩子。在他們能掌握未來之前，我都要裝備好他們的心智和思維。

大家處境不同，剖析問題的角度不同，自然就會意見不同。可惜地，過去十天，是我人生中最沒有言論自由的十天。激動過後，我明白了一件事。身處甚麼環境，如何惡劣都好，都總會有一些機會存在。世上沒有完全的地獄，亦沒有理想的烏托邦。世界本來就是錯綜複雜，我們一向都在如斯環境中默默找出路，以往如是，以後亦然。現在只是一個變動，我們打不死的精神長存心中，只要知道自己想做甚麼，想要甚麼，不管明天是如何，都有能力去闖過。作為父母，我們更要以身作則，面對困難時從容不迫，才會教育出有力量的下一代。

這裡不論政，不要騎劫我的文章。只是一位母親在危難中的一點感想。

放過我們一家大細吧！

又好耐冇寫文，呢篇文不煸情不感人，只因壓力太大，邊寫邊流淚……

忙暑假和開學已經夠哂皮了，諗住10月可以 plan 下其他嘢時點知提早佔中。事情發展得奇快，仲佔埋旺角，一夜之間我家的生活受到極大的干擾。

唔想講立場，唔想講政治，亦唔想講我們面對的壓力。唔想睇面書，連 whatsapp 群組都較哂靜音。不住在旺角的人叫我忍耐，細路返少幾日學唔會死，你咁忍得不如一家大細搬黎住同讀書啦。

我只知我地仲要交租交學費，一家五口要開飯，保護家人安全係父母天職。旺角市面一日不回復平靜，我們的壓力就會每日俱增。申訴苦況就批評我冇遠見，當每日都要面對生活和安全問題，再有遠見都捱唔到落去了。

我唔想住在戰場，懇請你們放過我們吧！

Hea 媽心聲

大仔準備入小學，幼稚園攪了個小一模擬課程。當中有一部份叫做「記憶遊戲」，美其名即係默書啦。原來有部份家長唔知係默書，後悔冇同小朋友溫習。其實呢 D 所謂默書都係比小朋友習慣小學生活姐，第一次默得唔好仲有第二次，唔需要太「後悔」丫。下次記得溫就可以啦。

好勒，到第三次默書前夕的晚上十時，有家長求救話唔知聽日默咩。都晚上十點了，知唔知都唔緊要啦，反正咁夜叫醒小朋友串字都係入唔到腦，好好地訓返覺好過。

呢班家長，平時好似好緊張小朋友咁，因為小小事就對其他家長 (即係我) 惡言相向，但對學校事務就一無所知，奇怪。學校有哂通告，有哂範圍都可以話唔知要默書，唔知默 D 咩，自己檢討下啦。

默書都算，平時小朋友唔記得抄家課冊又緊張一大輪。比我就由得個仔唔好做，等佢返到學校面對下個後果，咁佢以後都唔敢不抄家課冊啦，駛咩咁緊張。

幼稚園姐，唔駛如臨大敵咁，幾時捱得完小學？

香港人，放鬆 D 啦！

笑話

昨晚和老公的中學同學飯聚，當中有朋友的女兒升中一獲派第一志願，當然要恭喜下佢地啦。席間另外有朋友講起，有家長因為小朋友獲派第二志願而不開心，急著要叩門。聽罷覺得都幾好笑，第二志願都唔差啦，唔一定要派第一先至可以接受呀？

點知呢 D 都仲未算勁，有獲派第一志願的家長都感到不滿。唔係呀？已經派第一志願比你，仲有咩唔開心呀？原來家長們在選校時沒有把最勁的學校放第一志願，覺得自己好似蝕底了。真係無奇不有，咁都有得不滿，無言！

最難教的是…

菲菲的教育界朋友和我分享過，在學校入面，最難教的不是甚麼問題兒童或成績學生，而係家長。家長之中最難攪的不是咩都唔理果種 (老師其實最鐘意呢類家家長，哈哈！)，而係咩都關佢事，咩都要攪學校的家長。

現在的「家校合作」，已經演變成「家長迫學校合作」。如果校方有咩安排令到家長不滿，可以嘈到上校長度，迫令學校讓步，去切合他們孩子的需求。天呀！而家咩世界呀？學校作為一個作育英才的場所，是教育下一代的聖地，為何會比班唔識教育為何物的怪獸侵佔了？

以下有幾件發生在我個仔學校的例證︰

例證一

學校為學生安排影學生相，搵了專業攝影師來學校，打哂燈 set 哂場咁為小朋友影。到睇相辦時，有部份家長認為攝影師影得佢位寶貝唔靚，要求學校安排重影。好在最後都冇，如果唔係校長以後仲有大把野要「重做」。

例證二︰

有家長認為學校安排得太少時間去綵排畢業禮，校方就加多一節綵排時間，家長又話綵排得太密，咁即係想點呀？

例證三︰

亞仔間學校係 happy school，程度唔深功課又少。有好多家長投訴程度太低，於是校長在高班加強學術訓練，班家長又話深到小朋友追唔切。咁難服侍，不如叫佢地自己制訂課程啦。

仲有好多，不能盡錄。如果易地而處，當你係老師校長，面對呢 D 要求時，又會點處理呢？

現在的父母太兇狠，學校唔順佢地意思就嘈。但學校面對咁多家長，可以遷就就幾多個？我地細個讀書時，平時做功課、默書、測驗、考試、課外活動等等，學校叫你做乜就照做，邊有咁多亞之亞咗，邊會有人嘈到去校長度？

我諗需要接受教育的，除了小朋友之外，仲有呢班所謂家長。要學懂咩叫對尊重、體諒和合作，知道學校係一個崇高的地方。教育係一個專業，請不要用「顧客永遠是對的」的那一套去對待教育工作者。你的孩子是寶貝，難道別人的孩子是草嗎？苛索別人來滿足自己，又是甚麼身教？

家長們，共勉之！

女兒受傷了

星期五晚我和老公出街食下飯拍下拖，一返到屋企，工人面青青同我講亞女整親隻眼流血。當時嚇到心都離哂，老公即時走去睇下，看似係皮外傷。老公哄亞女玩，觀察佢狀況，我就問清潔究竟發生咩事。

我有 2 個工人，在傍晚時份我講明一定要有一個工人睇住班細路，尤其係我外出的時候。如果佢地睇住都玩成咁，只好怪我我小朋友太頑皮。而事實上，有一個工人在洗碗，而另一個負責看管小孩的工人就無啦啦自己走左入廁所，又唔通知另一個工人，於是班小朋友就處於無人看管狀態。就響呢個時候，亞女同細仔追逐，在廚房的工人聽到「嘭」一聲之後衝出黎，見到亞女受傷大哭。而廁所裡的工人仲未肯出黎。亞女眼角滲血，嚇到魂飛魄散。不久我地就返到，負責看管小孩的工人驚慌地坐在地上，唔敢講野。

當時心中係極之有氣，但都冇狠狠地鬧佢，只係同佢講︰「已經係第二次勒，係唔係每次都要出事你先至唔會自己走入廁所唔出聲呀？」。佢不斷道歉，但又有咩用？佢出年完約，到時唔會續佢就算。始終我經常晚上有事要外出，點都要有人睇實班細路。佢地仲細，我忍多\佢一年咁多啦。

老公睇左亞女一陣，應該係皮外傷，冇再流血，但眼肚腫了。我個心好疼，雖然佢係頑皮，但如果有人在場，點都會制止到。當時心中暗付，呢排除左必要的情況，晚上都係唔好出去了，真係信佢唔過。同亞女玩左一陣，就叫亞女早 D 訓啦。當晚心中忐忑，好夜先至睡得著。

翌日起床，工人話亞女眼角仲有血水滲出，嚇到我立刻帶亞女去急症室。星期六的急症室迫滿了人，我估要等好耐先至有得睇。咁我就打電話去搵睇開的醫生，講明係眼晴受傷都話要收工，叫我下午四點半再去。我實在唔想等，就搵老公救求。不久我收到一個學生來電，話可以找她的視光師朋友看看。其實搵視光師並不是我的即時解決辦法，而呢位學生係有學順勢療法的，我即管問下佢有冇時間幫我睇下。真好彩，佢好快就過黎同我個女睇，

幸好真係皮外傷，佢開了一個療劑，飲了一次，眼部已不再滲血，腫亦慢慢消了。今天星期日，一起床去睇亞女，情況好轉得好快，我諗食埋今日一劑，明天應該會冇事。

我一向都不太 buy 西醫的一套，不過講到受傷，就一定會去搵西醫。今次事件，令我對西醫更加沒有信心，去公營醫院就迫爆咁多人，搵私家醫生又話要收工，等佢地救命真係大鑊。好在我都認識好多不同種類的醫師，不需要依賴西醫。早排我的小朋友染上手足口病，中醫和西醫都話藥只係減輕病情，不是甚麼治療。只有學順勢療法的朋友可以肯定地比到解決方法我。我同小朋友試過，不需 2 日，手足口病真的痊癒了。

事實上有好多不同的療法都比西醫有效果，點解小朋友有病，一定要去睇西醫？

夜深人靜時百無聊賴的我在胡思亂想

晚上 3 個小孩都睡覺了，老公有工作仍未回家，正好有點私人時間做下自己野。

早 2 個月前報讀了一個簡短的 Human Design 課程，內容是很吸引的，奈何導師的筆記實在太難明，彷彿把整篇英文放上 Google Translate 翻譯成中文就派比我地咁。每隻中文字我都識，但文法錯哂兼詞彙怪相，實在冇辦法理解。所以呢個月我幾乎晚晚都在把一本睇唔明的中文筆記，翻譯成為睇得明的筆記。雖然很有趣，但今晚想休息一下，所以想搵 D 輕鬆 D 既野睇下。

煲左陣 You Tube，睇左陣面書，仍然感到百無聊賴，唯有走返黎自己個 blog 度寫下野。

以前我好鐘意玩面書，但覺得面書太可怕了，就算只係 post 一張生活照，都會唔知點解攪出好多風波。呢排我都冇再在面書發表甚麼，有時連留言都唔敢，當自己消失左算數。有想講既野，都係留返響度講好勒，起碼認識我的人 (除左我老公之外) 係唔知我有寫 blog 的。在網上世界黎講，呢度係最安全了。

學校的風波表面上是平息了，但我心中仲有條刺，近排沒有去學校亦沒有接觸任何家長，希望事情可以快些淡化。但大仔在學校似乎出現了點問題，有部份同學唔同佢玩，佢好唔開心。我心中知道點解，但大人的事，點解要攪到去小朋友度呢？我唯有叫佢搵其他同學玩啦，始終一班有咁多同學，唔會全班同學都杯葛佢掛？

同做教育界的朋友講起我的遭遇，佢第一句就問︰「攪你果 D 係港燦呀？」。原來老師們好唔鐘意呢類自以為是又聲大大的香港家長。佢地會成日因為雞毛蒜皮的事鬧到翩天覆地，完全破壞了校園的和諧。聽罷，我心中有點點安慰之餘，亦為日後的家長歲月而擔心。往後的小學和中學，我都要擔當家長的角色 (希望大學時唔需要咩家校合作啦，讀大學要學識自立啦！)，仲要面對呢 D 「港燦」家長，我都唔知幾時會踩親佢地條尾，又比人拎出黎批鬥，實在好煩厭。

亦和另一位火星朋友傾過，佢好攪笑咁叫我睇多 D 港劇，先至明白現在 D 人諗咩。佢話我完全唔接觸地球文化，又點同地球人相處呢？哈哈哈！係我錯，冇入鄉隨俗，我要好好反省一下！講完笑，佢認真地講叫我小心選擇朋友，明知同佢地唔同channel 就無謂勉強自己啦。

寫到呢度，老公回家了，胡思亂想完畢，又要開工做公司野了。

叩門後記

上篇文章提到，小兒派位不理想，菲菲和亞仔奔波了差不多一個月，幸運之神瞄了我地一眼，終於在6月30日收到電話，我地叩門成功了！收到電話的一刻，即時放下心頭大石，彷彿整個月的壓力都釋放出來了。

我地叩到的，不是甚麼名校，都係一般的小學，但已經比起獲派的那一間好得多了。

亞仔有好多同學仔都派得不理想，整個六月家長們見面時都係關心叩門情況。據我瞭解，大約只有三份一的小朋友叩門成功，其他的小朋友仍在等待中。

菲菲有位家長朋友算是最熟稔，我地 2 個仔由 playgroup 開始已是同學，住得又近，成日都會出黎玩。佢個仔獲派一間二線小學，朋友完全不能接受，到處叩門，希望佢個仔可以叩到一線學校。佢每日都問我亞仔叩門叩成點，又勸我不要買書買校服，直至八月中真係冇 offer 才去買云云。

佢每天的「慰問」，原來不是朋友間的互相關懷。當佢知道我個仔叩到學校時，佢既態度就即時 180 度轉變。本來約好的活動，求其作個理由取消了。過了 2 天，發生了一件對我來說好震撼的糾紛。一班家長無啦啦走黎指責我，言詞惡毒無理，我完全唔知發生咩事，唯有向學校求助。事情最後是解決了，在解決的過程中，我知道就係我呢位「好友」做的好事，刻意擺我上檯，煽動一班激進家長黎攻擊我。

我個仔同佢唔同校網，我叩到門唔會影響到佢，唔駛玩到咁大呀？好在菲菲仲有少少 EQ 同 AQ，2 日之間就拆得掂呢單野。但係我就一夜成名，臭名遠播，我估以後 D 家長見到我都會兜路行。不過唔緊要啦，我呢 D 火星人，真係冇辦法同地球人做朋友，睇下幾時有錢，就搭火箭回火星吧。

比朋友出賣，我已不是第一次。算啦，如果出賣了我佢會感到開心的話，我當做一個善功德啦。我已經不會去計較誰是誰非，反正人人都認為自己的對的，根本沒有討論的空間。

既然叩門成功，我就專注同亞仔準備返小學的事務，其他人和事，你地自己慢慢玩啦。

考驗和希望

6月7日小一統一派位公佈結果，今年派得頭三志願的只有 66.4%，是歷年新低。

人生的考驗，就在我得知我是餘下的 33.6% 的時候開始了。我大仔獲派的小學，我只知它的名字、地址和宗教背景。因為之前我從來冇諗過選呢間，所以當我收到派位時，一時之間都唔知點算好。

同其他失望的家長一樣，我都忙於填表、整 portfolio、叩門同帶小朋友去面見。經過一星期的忙亂之後，終於有時間靜下來寫下野。今年實在太多人去叩門了，勝算真的不高。現在可以做的，除了等電話之外，就係發掘一下被派學校有咩優點。優點唔係冇既，不過唔夠吸引。但係到開學時都未有消息的話，幾唔鐘意都要讀。

小學派位即係派彩，中唔中標純粹係運氣。派得不理想，只係暫時運氣不夠好，成世流流長，呢 D 只係小考驗。希望派得不理想的家長，不要沉淪在悲傷之中，辦法總比問題多，今日解決唔到唔代表呢世都解決唔到。放鬆 D，希望在明天！我都為自己加油，希望好快有好消息啦！

不說話的銷售

銷售人員給人的印象往往係喋喋不休，好多潛在客戶因為怕煩而唔想多接觸銷售人員。講得太多係一般銷售人員的通病，但成功的銷售不在於你識講幾多，而係你知幾多。

想提高銷售機會，絕對唔係好似洗腦咁同個客講你的產品服務有幾勁，而係在於你識睇同識聽幾多。沒有客人願意被說服，往往係客人自己說服自己，單交易才最穩陣。銷售人員唔係要閉上咀巴咩都唔講，係要以詢問形式，知道客人的喜好，盲點在哪裡，同埋帶領客人進入思考及選擇的狀況，就會更易促成交易。眼睛都不可以閒著，要留意客人的面部表情和身體語言，得以知道客人的傾向。再根據客人的傾向，調節一下詢問的方向或內容，先可帶領客人去到「自己想要買」的狀態。

以上簡單幾句，包含的學問可不少。要識聽同識睇，絕對係知識加經驗的結晶。要學懂鑑貌辨色，去書店搵多 D 相關的書睇下，可以幫助提升觀察力。再加以鍛鍊，就可以知道客人的傾向。再唔係，去讀下性格學，對人這回事多點瞭解，就會減少白費唇舌的機會。

講係留返最後先至講，等客人選擇好買咩的時候，再向客人詳細解說。到時，客人就會好有心機聽你講，仲會覺得你服務態度好好添！因為客人認為係佢自己作決定，唔係你迫佢，對你印象都好好多。你係一個協助佢落決定的人，唔係一個迫佢買野的人，客人對的觀感都會截然不同。

只有信心不夠的人，才會以說話去掩飾自己的不安。客人係會感受到的。你越不安，客人就越想離開。換轉係你，你去買野時，都唔想個 sales 煩住你啦。到你想問的時候，就希望得到 sales 的協助，幫你選定自己認為合適的產品，對嗎？

在你想改進自己的銷售技巧之前，先假設自己係客人，會希望遇到一個咩類型的 sales，就會為自己的問題找到答案。

2014 的 cold call

在 2012年6月28日，我寫了一篇名為「Cold Call 皇后」的文章。呢篇文章係呢個 blog 閱讀次數最高，亦引發最多保險界網友發電郵比我了解有關 cold call 的事。我做 cold call 最輝煌的時候，係 2001 年的事，即係 13 年前的事。在 13 年前，cold call 確有生存空間，只要你肯做，唔會冇生意。在 2014 年的現在，cold call 仲可行嗎？

做保險，在各式各樣的原因下，都無可避免要做下 cold call。有 D 係為湊夠單或湊夠數，有 D 係 warm market 不足，焗住要做 cold call。但在今時今日，打電話、企街或洗樓仲可行嗎？

先講企街，我都做過唔少。當年公司有部 van 仔，可以車我地去唔同地方搵客，搵到客就上車傾。我都響車度開過唔少單，仲有好多大單。但而家你地有幾可見到有保險公司攪呢 D 活動？可能我出得街少，呢幾年真係唔多覺眼。在商言商，如果呢招仲有效，一定會繼續用。好明顯，基於結果，流動保險銷售已經不合時宜了。

再講洗樓，我地以前幾乎想去邊度洗樓都得。因為保安冇而家咁嚴密，一般商業大廈或工廈都可以自出自入。而家好多大廈都唔容易比你白撞入到去，就算你入到大廈，去到商業單位，你接觸到的只是叫你留卡片的 receptionist。以前我地連 receptionist 都唔放過照 sell，但現在好多 receptionist 都久經訓練，采你都傻。如果你搵的係小企單位，佢地都唔輕易放你入去講野，因為佢地人手不足，唔得閒聽你講保險。

最後就係打電話，先唔好講你份講稿有幾無懈可擊，相信大部份人接到 cold call 都會即時 cut 線，你根本冇機會講落去。

我唔敢講以上方法完全冇效，但相對 13 年前，呢 D 方法太吃力不討好了，白白消磨自已的意志，何苦呢？

市場永遠在變。大家有冇留意，香港絕大部份人都用緊智能電話。而智能電詰大多數都唔係用黎傾計，係用黎玩交友 apps 或即時訊息。而家電話 plan 已經唔係講比你傾幾多分鐘，因為你好難傾爆個 plan，反而係著重上網速度和流量。好明顯個智能電話唔係用黎傾，係用黎玩啦。要做 cold call，何不向呢班玩電話的人埋手？

如果我接到個 cold call 電話，二話不說就會 cut 線。但收到唔知邊個 send 黎的 msg 就會睇喎。我估唔止我一個係咁，大部份人都係咁。原來市場已經有咁既變化，做 cold call 的係唔係要變下陣呢？

有好多交友 apps 都有比你 search 附近的人的功能。你只要不斷響電話度 search，不難搵到附近的人留意到你。相信總會有人會繼續同你閒聊，聊下聊下就可以傾生意了。希望呢個小貼上可以幫到要做 cold call 的朋友啦。

終生學習

菲菲大學時主修市場學，但我的爸爸經常問我有關中國歷史和文學的事。我沒有讀過中國文學，中國歷史只讀到中三，仲要係勉強合格嗰隻，所以爸爸問的課題我全部都唔識，爸爸就會話我讀到大學咩都唔識。同類事情在人生中經歷了 n 次，令我很不快。心諗，你明知我讀 marketing，無啦啦走黎考我中國歷史，係咪玩嘢呀?

大學畢業真的冇乜大不了，區區一個學士課程，只係某專科的基本入門課題，距離成為專業人士仲有十萬九千里，絕對不值得驕傲，但亦未至於咩都唔識咁離譜。自問都算好學，自大學畢業後都斷斷續續學過好多課題。有人問我點解唔讀碩士和博士，偏偏走去學咁多其他嘢，因為我知道自己想要啲咩。

讀完 degree 入唔返自己讀嗰行，就知道再讀上去對我幫助不大。因為我投身銷售行業，所以進修銷售技巧、人際關係和性格學等等的課題。呢啲課題都幫到我提升工作能力和質素。職業生涯中曾放過一個悠長假期，在假期中就學下普通話同日文，因我真的喜歡學外語。做了媽媽就學湊仔，請了工人就學做一個好僱主，而家掌握到家庭節奏，又去學返自己鐘意的 topic。當然我仍在學習一些人生課題，正在努力改進自己中。

學習不是固定的，但是必須的。在香港這樣的大城市，每件事都在急速演變，保持終生學習的態度，才不會被社會淘汰。學如逆水行舟，進則退。在學會各種技能的同時，也要學會修心。任何學問都有助人和損人的一面，修心可令學問發揮正面作用，但心存歪念，就會變成持術欺人，後果只會累已累人。

修心比起任何學習都重要，近期有人提醒我品格不夠高尚 (即係冇品？ @@”)，咁我就注意下改善自己啦!

近排菲菲忙於上課，疏於貼文，希望大家見諒！

銷售小貼士 - 隨意講

今日心血來潮，想講下銷售。隨心分享下 D 小貼士啦，希望你地認為有用。

貼士一︰客人的分類

好耐之前，當菲菲仲係做緊前線銷售時，有位師兄分享佢的個人經驗比我知。佢話︰「客可以分兩種，一種係好客，一種係麻煩客。好客會好快幫你買野，麻煩客唔會即時幫你買野… 」(下刪一萬字)

當時我諗︰「師兄，講野唔好用個肺，諗野唔好用 seafood 丫！」。乜客係咁分既咩？你識唔識賣野 ga？

於不同的立場，客戶的分頖都會不同。可以跟地域、收入、教育程度、工作性質等等各種方式去劃分，但唔會分咩係「好客」，咩係「麻煩客」。如果你覺得個客「麻煩」，原因只有幾個︰

1. 你唔瞭解客人

2. 客人唔知你講咩

3. 你根本搵錯客戶群

綜合以上三點，得出一個結論。如果你覺得客人有問題，有問題的不是客人，係銷售人員本身，都唔知自己做緊乜。

貼士二︰瞭解客人

客人有絕對的選擇權，佢買與不買，除左取決於佢是否是你的適合對象之外，最大因素係銷售人員本身對客戶有幾掌握。唔好講到懶深，簡單 d 講，你要注意以下幾點︰

1. 你要搵的客戶群有咩特性 (唔好講你賣的東西係人都適合，呢 d 係你老細昆你的說話。就算真係全人類都合用，你都要知咩人用咩方式去切入。)

2. 你的目標客戶群在哪

3 佢地會從咩角度去分析你所銷售的東西

4 佢地缺乏咩資訊，所以仍未購買

5 佢地缺乏咩動力，所以仲未購買

6 佢地會聽得明 d 咩，同埋聽唔明 d 咩

客人口中的「無時間」、「無錢」同「無興趣」，全因佢地未知道價值何在。而價值呢樣野係因人而異。每個人的價值觀都不一樣，但根基都是一樣︰重要的事較有價值。換句說話，客人唔知你賣緊的東西，對佢有幾重要。如果攪唔清楚客人的價值觀，你點講都係對牛彈琴。

貼士三︰點 sell

以前有老細教過 selling by FEAR，即係嚇到個客嘔白泡，如果你唔買個天會塌下來。這方法在 closing 時或許有用，但當客人清醒時，就會發現自己好似比人呃了。到時，冇左張單又唔定，比人唱十年又唔定。所以呢個方法我唔會主力用，只會在開場時稍為用少少，比客人有思索的空間，等佢願意去思考時，才用較正面的方法 (Selling by motivation) 去繼續。咁樣客人會認為你係幫佢解決問題，對你信任會大增。

至於點樣去平衡 sell fear 和 motivation，係要從經驗中累積的。銷售好比一個故事，有起承轉合，全程只用單一手法，只係一部銷售機器，中就中，唔中就下一位，徙增自己工作壓力和心理壓力。

**********

後記︰講住咁多先，下次諗到咩再講。如果你對某 D 貼士想瞭解多 D，請留言啦。

生日飯局

我地有為資深學生慶祝生日的習慣，一般都會一呼百應，次次生日飯都會坐滿一圍檯。

昨日我如常為一位學生安排了一個生日飯局，除了壽星，我和老公就係必然出席的了。本來只有4個人報了名會來 (咁少…)，但在最後一日，一個話有事做唔黎，一個話病黎唔到，仲有一個就大陸返唔切黎 (最後呢位都有在尾段趕到，有心有心！)。結果，除了壽星和我倆之外，就只有一位學生有黎，總共4人。

攪生日飯都咁凋零，我都替壽星仔感到心傷。

佢平時冇乜點出聲，同學們的活動都甚少參加，可能同學們對佢感情不算深厚，所以報名人少，出席率更奇低。可能因為太少人，亦可能因為壽星仔太靜局，呢次可算係我參加過的最悶的一次生日飯局。

捍婦

如果有人批評我老公，呢個人不配做我朋友。朋友間要互相尊重，不可批評朋友的家人。連你屋企人都批評得嘅，有真心待你為朋友嗎?

事實上，我身邊的人都知我悍衛家人不受別人傷害，冇人敢在我面前講我老公不是。曾經有人在我面前串我老公，我唔會理佢係邊個，當場要令佢收聲。人不犯我，我不犯人，你無啦啦走黎攪事，我會任由家人比你奚落嗎?別人可能覺得我小器，不過當你愛你的家人時，就不能接受這種事發生。

同樣，我亦都不能接受有人在我老公面前說我不是，這是干涉別人的家事，離間別人夫妻感情。

做女人，會義無反顧地維護家庭。

做男人，會同樣地義無反顧嗎?

財務自由

昨日提起過「財務自由」呢個字眼，聽就聽得多，一般人真正做到冇乜幾個。大約二十年前已經知道有「財務自由」呢個願景，但只限於願景，根本唔知以我的本事有咩能力可以達到。「財務自由」簡單D講，即係你的被動收入比你的支出大，唔需要再為生活而工作，可以有足夠金錢過你想要的生活。以前，我只認為二世祖先至有所謂財務自由，一般打工仔如我係冇可能做到的。

做了咁多年銷售，響好多範疇都聽人講過呢個 term。尤其做傳銷、保險、基金呢類，就好多時會講及「財務自由」。老實講，如果要靠以上途徑達到夢想，冇話唔得既，不過唔係咁容易做到咁解之嘛。我老爺仙遊後，有一間物業留返比奶奶收租。因為物業本身價值都不錯，所以收返黎既租絕對夠奶奶生活有餘。呢D就係所謂財務自由了，唔駛做都有一個資產提供現金收入比你，而呢個收入係會追得上通漲，繼續令係生活無憂。

要做到呢一點，只要你擁有一個有租收的物業就可以了，好似好簡單。不過好多人連自己住果間都未攪掂，又點會有能力購入多一間或以上去收租呢？有首期銀行都未必批按揭，只係得個想字。

其實要做到財務自由，唔一定要投資地產\。所有各式各樣的投資項目，只要你真係識得玩，輸得起，輸完學到教訓，再接再勵，總會有達到財務自由的一天。除此之外，仲要有驚人的毅力、信心、膽色、眼光、努力、EQ、AQ和FQ等等，先至有機會做到。冇做足功課同裝備好自己就盲目投資，結果只會得一個，就係做炮灰。

我唔想做砲灰，亦唔想我老公一個人養哂成頭家咁大壓力，亦唔想老來要睇媳婦面色做人，所以今次要好好把握呢個裝備自己的機會，可以儘快走向財務自由的第一步。

如果你睇完呢篇文覺得我好天真好傻，唔緊要，你係正常的。

如果你對我的想法有共鳴，我們對自己的人生都有願景的，希望你都可以達成你的夢想。

後記︰菲菲今日心情低落了一天，但壞心情不會影響我的信念。就係事事不順，心情不佳，更加要為自己打打氣！

我的夢想

做了師奶，不一定沒有夢想。我都有一個夢想，希望可以買樓收租。呢個夢想好似好冇大志，但諗深一層，可以有樓收租，即係建立一個真正的長遠收入，真係唔駛做都有錢洗，你話幾爽！

之不過講就容易姐，要有足夠市值的物業，先至有條件講靠租金過活。呢件事，一直停留響夢想階段，仲未有膽去行第一步。早排老公的其中一個學生買了他人生第一間物業，不久之後成功租出，開始做有收入的業主了。我地替佢高興之餘，亦從佢口中得知佢係上咗一個課程之後學會物業投資的竅門，所以開始了收租的生活。

聽罷我都極有興趣，今天課程舉辦簡介會，我就拉埋老公一齊去了解。其中有幾個三十歲左右的學員都係讀了這個課程後買了樓收租，並計劃在短期內再度置業累積資產。呢個課程，正好可以幫到我實現夢想，於是二話不說就拉埋老公一齊報讀。

其實要讀，我一個都可以。不過講到買樓咁大件事，仲要係買完一間又一間，大家必須要有共識，所以我都叫佢報埋。學費唔平的，但我有信心學識物業投資一定搵得返，絕對值得投資。

我好期待快啲到七月，就可以快啲知道點達到我的夢想了!

懶媽

現在是星期六上午11時半，我正身處山林道某補習社，等緊大仔放學，佢今日上的是普通話。

補習社有個 area 比家長同小朋友休息和等候，其他家長都在聊天，只有我百無聊賴，於是寫下 blog 打發時間。我和其他家長每星期都見面，大家都是認識的，但她們的話題我一句也搭不上。

她們交流如何跟進功課，可是我係唔跟功課的。功課係小朋友的責任，我只係檢查是否完成。反正而家只係幼稚園，佢地有本錢去錯，亦可培養佢地面對過錯的態度，所以我係唔干涉小朋友如何做功課，同家長們冇咩好交流。

一係會講各種才藝訓練同考試，我的小朋友咩才藝班都冇上，所以我唔識搭咀。另一批講英文考試，oh my god 我連英文文法班都冇報，呢個話題又唔關我事。

仲有一批講小朋友如何痴身，因為佢地只有一個小朋友，沒有弟妹做玩伴，當然只會痴住媽媽啦。我湊仔都湊得瀟灑過人，三個小朋友自己玩，我就可以做下自己嘢，冇佢地的煩惱。

總括而言，係我懶！  XD

兒童權利

今天學校舉辦了一個有關兒童權利的講座，今天的講座是我參加過的最少人出席的一個講座。老師和校長都是坐上客，但出席的家長真係寥寥可數。香港的家長對兒童權利有幾關心，由此可見一班。

我對兒童權利一知半解，見到有呢個講座就即時報名參加了。兒童權利包括的範圍很廣泛，由最基本的生存權利，到發展權、言論自由、參與權和遊戲權等等都有涉及到。在香港，雖然都會有虐兒和殺害兒童的個案出現，但大部份兒童都有生存權利，至少吃得飽、穿得暖、有瓦遮頭、有醫療等等。至於發展權，基於香港的教育制度太畸型的關係，孕育了一群怪獸家長，兒童們不愁沒有學習的權利，只怕係學習得太多吧。

很多家長都忽略了兒童的言論自由、參與權和遊戲權。與兒童最切身的教育問題，我估冇乜幾多個家長會徵詢兒童的意見，總之我叫你學乜就學乜。家長們認為小朋友唔識得為前途舖路，但有誰可以肯定你為佢地舖的路係絕對適合佢地呢？如果小朋友從小就厭倦學習，厭倦父母的安排，後果會係點呢？如果小朋友可以學習自己喜歡的東西，情況又會如何呢？世事沒有絕對，但我偏向比小朋友自己選擇，讓佢地享受學習過程，總比拉牛上樹舒服得多！

小朋友有咩意見想發表，往往被成人所忽略，導至好多小朋友到稍為懂事時就不願主動和父母溝通，因為講都冇人會理，講黎做乜？參與權更加少之又少，父母們怕小朋友出岔子，邊敢咩都比佢地參與？很多家長都有控制小朋友的潛意識，又點會比小朋友真正藉著參與而發揮他們的無限潛能？學習不一定要進課室，生活本身就是一個最好的學習環境。在生活上讓小朋友多參與、多瞭解，他們懂的一定比課室多。

至於遊戲嘛，不一定要買名貴玩具，不一定要去主題公園或出外旅遊的，只係去一般的公園，比佢地同其他小朋友玩下，對小朋友黎講已經係最好的遊戲。小朋友之間的互動，係最珍貴的體驗呢。

聽完呢個講座，好慶幸我的小朋友都擁有兒童應有的權利，亦留意到身邊很多家長朋友都忽略了小朋友的權利。希望學校可以大力推動兒童權利的計劃，令更多小朋友可以真正健康愉快的成長。

我回來了

這幾個月，我正在經歷一些心靈上的考驗，沒有心情寫文，亦不知道可以寫D咩，曾經諗過就此休博算了。但近來我卻斷斷續續收到網友發給我的電郵，他們都因為睇了我寫關於銷售的文章而有些感受。直至剛才，又收到另一位網友的電郵，才發現我的文章和想法，其實對很多人都有點意義，所以我決定再寫，至少寫下現在我的感受。

最近我在經歷甚麼呢？就是要經歷「平凡」。菲菲在職場上勇戰了多年，有很多人認同我的能力，我的說話有很多人願意聽，我的見解有很多人願意接納。漸漸我就覺得自己很了不起，當然至直現在我都認為自己很捧，哈哈！在 2009 年我捨棄了職場，全心全意做個全職媽媽，經歷了很多心理調整，先至適應下來。

這幾年我全副心機都花在家庭上，幸好都有點點回報，三個小孩都開心快樂，老公亦不需為家事而操心，總算稱職吧。漸漸身邊一些人就用「師奶」的眼光來量度我。冇錯我而家冇打工，但我的職場智慧不會突然消失，我對人和事的洞察力亦沒有減退，有些人因為定型我係「師奶」，覺得我沒有甚麼見識，男人工作的事的我不會懂等等而看不起我。老實講，我真係受唔到呢D白眼，我絕對會還以顏色。沒有得到我的批准，誰都不可以睇唔起我。好可惜，呢D睇我唔起的人，就係我老公的朋友，為左比面老公，我忍。

呢幾個月，不停有些我認為「不合理」和「不尊重」的事發生。基於比面老公，表面上我不發一言，別人更加認為我係白痴。私底下，我同老公分析利害和事態發展等等，佢都唔太認同，激到我就黎發顛。好啦，我不停遊說自己，放下吧，人地點睇由得佢啦，反正我都冇做野咁耐，當自己脫左節啦。

但收到幾封電郵之後，我對自己多了點肯定。我唔係冇料，係人地唔識欣賞。唔緊要，會睇我文章的人識得欣賞就得勒。所以，我會繼續以我的作風，響呢度繼續分享。呢度有識得欣賞我的人，我不會輕易休博了。

在 2013年12月5日，我寫了這一篇「希望是我錯」，在今天基於事實，當時我沒有看錯，只是大家包括我老公都唔願意相信我的看法。老公，如果你有緣睇到呢篇文章，我的意思並不是要 show off 我的能力，我只係想你知道，我做每一件事都係由你的利益做出發點，我絕對不容許別人去傷容你，亦不容許別人去離間我們的感情。如果有人時常同你講「唔好話比你老婆知」，我百份百肯定佢身有屎，怕我睇穿佢，阻止佢去利用你。我係「小器多疑，婦人之見」，定係「心思細密，觀察力強」，我相信你係有能力分辨的。

舒了口悶氣，可以整理心情，諗下可以再寫D咩了。

理所當然？

星期日菲菲一家和朋友吃晚飯，朋友讚菲菲的三個小孩很乖，會主動和人打招呼，又安靜地自己食飯。菲菲聽罷當然好開心，但開心完之後細心一諗，呢啲基本嘢咋喎，唔駛特別講出黎吖。

朋友話，而家啲細路唔多主動同人打招呼，食飯時一係走黎走去，一係顧住睇平板電腦唔食飯，再唔係就亞媽一邊哦個仔食飯，一邊餵個仔食嘢。有時大人想傾下計都唔得，因為要忙於叫小朋友食飯。

我一直都唔明，如果家長想小朋友專心食飯，點解要開平板電腦比佢睇？有嘢睇就梗係唔食嘢啦！亞媽又怕個仔餓親，就餵個仔食嘢。呢個係咩邏輯呀？乜教識個仔專心食飯真係咁難？

仲有，食飯都要迫，得罪講句，我覺得好折墮。食飯係生理需要，香港竟然富裕到要迫人食飯，我真係 O 哂咀。

我家小孩有半小時晚飯時間，食飯時唔開電視，夠鐘必定收碗。食唔切或周圍走的話，話之佢喊通頂喊到嘔都唔會再有嘢食，直至明日早餐先有得食。我堅持咗幾個月，就唔需要再為食飯呢個問題糾纏 。小朋友都習慣食飯要在限時內自己完成，唔駛迫唔駛餵，我認為這是理所當然的。

我都有同朋友分享呢方面經驗，曾有人批評我殘忍。係，我係殘忍，但在社會上再殘忍的事多如天上繁星，基本連食餐飯都面對唔到，第時小朋友在社會中可以經得起幾多風浪？

希望大家不要随意用一部平板電腦去 calm down 你的孩子。他們需要學習融入社會，唔係預習做宅男宅女呀。