Sales 的天份

在宗教活動上遇見N小姐，之前佢鐘意纏住我老公，而家佢唔知點解鐘意纏住我。昨日N小姐一出現，就拉住菲菲講過不停，但係講黎講去都係三幅被。

N小姐響天后做地產經紀，佢知道我之前 (十幾年前！) 都做過地產，所以問我有關工作的事。佢老細呢排照佢肺，比最後機會佢，話做唔到單就要拜拜。N小姐做左地產差唔多一年，好似只係開左3張單，佢老細而家先至比最後通牒佢，算係仁至義盡了。佢老細話佢做事不懂分緩急輕重，日日埋頭苦幹好似好勤力咁，但係咩成績都冇，日日白逗人工。N小姐好苦惱，佢真係沒有工作的智慧，完全唔識得分邊D係重要邊D係唔重要，簡單D講係成日做埋哂D無生產力的事。

菲菲問左佢幾個問題 (其實係 coach 緊佢去自己發現問題)，原來佢係唔知d客點解要買樓，平時只係根據客人提供的表面資料去搵盤比客。咁做當然唔成功啦！每個客人買樓都有佢自己的原因，如果找不出呢個真正原因，經紀又點擊中客人的購買意欲？再者，N小姐只係不斷帶客睇樓，根本無把握去 try closing。睇樓過程又冇留意客人的反應，佢連個客鐘唔鐘意層樓都唔知！如果我係佢老細，會選擇即時炒左佢。原因好簡單，佢冇做 sales 的天份，無謂浪費大家的時間、感情和錢！

做 sales 最基本係觀察力強，客人唔會一五一十咁講哂自己d野出黎，要瞭解客人的真正需要，真係要靠觀察同揣摩。Sales 可以懶，可以講野唔叻，只要你知道個客想要咩，響適合的時候比到客人，再收窄客人的選擇範圍和時間，就會好快成交。我見過好多沉實的 sales，佢地一係唔出聲，一係就一鳴驚人，只要佢地一出手就會成交。反而d口水多過茶的 sales，會令客人喪失思考空間，客人就無法下決定。

N小姐係冇呢方面的天份，而且觀察力呢D野唔係一教就識，唔明就係唔明，絕症也。叫左佢幾次轉工，佢堅持唔肯，就係要證明自己有能力。我唔否定佢有某方面的能力 (至少佢係勤力的，不過腦筋唔靈活罷了)，但係佢唔瞭解自己有咩強項同弱點，係要去做自己最不擅長的工作，咁就想「發圍」？似乎係妙想天開喎！

N小姐的工作如意與否，菲菲並不關心。只希望佢唔好再搵我講佢工作的事，都係浪費緊大家的時間！