2013年8月30日 星期五

回到2001

早幾日,菲菲的多年好友 send 左張相去我 whatsapp 度。相中有年青的菲菲和年青的美女朋友,當時我地去左影貼紙相,相中印有 2001 的年份,12年前!

友︰執野時搵到,原來我有2張,你要唔要?寄比你丫。
菲︰好呀!

收到陳年貼紙相,望下張相再望下現在的自己,個樣完全變哂!12年前我都廿到尾,但相中的菲菲好似學生妹咁,笑得好燦爛,好純真。十二年後的今天,菲菲開始了下半生的旅程,做左三個小朋友的亞媽,成個人走哂樣,忽然覺得母愛真係好偉大,哈哈!

老公睇左張相,竟然話︰我覺得你而家靚D,果陣你都唔夠而家開心。

哈哈!究竟係氹我,定係讚緊你自己呀?

2001年,是我和老公相識六周年。當年我地係朋友,大家都經歷緊人生低潮。

2013年,我們相識十八周年,共同建立了一個熱鬧和溫馨的家。

我都係鐘意現在的情況多D!

2013年8月29日 星期四

有冇咁蠢呀?

呢 2 日有單新聞引起了我我注意,就係印傭被香港僱主虐待案。我冇刨哂D報導,不過大致上都係講有對育有三名子女的夫婦,2年前請左個印傭,對佢好左3個月之後就變成魔鬼,出盡怪招去虐待佢。又話唔出糧,唔比同外界接觸,冇飯食,唔比衫佢著,外遊時綁住佢唔比佢飲食和活動,仲迫佢著成人尿片云云。當然唔少得就係比僱主不斷虐打等等。

第一次見到呢單新聞,齋睇大字標題都幾嚇人。但係諗深一層,個印傭又唔係比人禁室培慾,個僱主一家大細唔通真係咁唔憂米,係要花咁多錢請個工人返黎虐待?個工人有冇咁怕事,要等到比人虐待左2年先至出聲?除非雙方都有精神病啦,如果唔係呢單野好難合理地成立喎。

部份香港僱主確係對外傭的工作表現不滿,但一般只有幾個處理方法,唔好老脾既就不停鬧爆佢 (反正香港人都好 like 鬧爆人,又可以發洩,又可以減壓,一舉兩得!XD),怕事既就忍忍忍直至工主完約,以上皆非的就索性炒左個工主。就算壓力爆煲,一時唔理智真係郁手打過個工人,都唔會打上癮掛?仲要屋企有三個細路都照打得咁兇狠?真係好令人難以置信喎。

作為外傭僱主的我,傾向相信個印傭作大。單憑報導 (現在只有工人作供,暫未知僱主方面會點講),我估雙方係有 D 牙齒印,個工人就趁臨返歸之前,煮返舖杰撻撻嘅比僱主嘆下,順便屈返一大筆錢返老家。外傭講大話呃僱主金錢、物資同感情已非新鮮事,實在有太多人中招。以前就搵熱水淋自己或搵把刀界自己一野扮受襲報警,而家就講到係一連串的虐打,D 故仔真係越作越離譜喎。唔通佢地以為香港人同佢地一樣咁「有智慧」?求其講幾野就有人相信?

如果不幸地,個工人冇作大的話,我就唔明點解個工人會蠢到咁既地步,要比人打足兩年都唔出聲。

無論事件係真定係假,都想講一句︰「有冇咁蠢呀?」

2013年8月28日 星期三

暢遊香港科學館

這個星期,身體狀況有點改善,踫巧有朋友邀約,就帶了三個小朋友去了香港科學館。

今天人流不算很多,加上沒有很多強國人,我們可以隨心參觀,小朋友亦玩得很開心。在香港活了幾十年,只是去過茶藝博物館和火車博物館,其他的博物館完全沒有去過,所以今次對於我來說都是一個新鮮的體驗。

科學館內除了有很多與科學有關的小遊戲外,亦展出了飛機和引擎。剛巧近期熱播衝上雲霄II,小朋友更感與趣。在三樓有一個舖了軟墊的兒童天地,小朋友可以盡情玩耍,我就可以趁機休息一會,哈哈!

在科學館內發生了小插曲。我的朋友帶著2位年幼兒子,我就幫忙抱著她未足半歲的小兒子。我的孻女忽然留意到我抱著別人的BB,就跑過來抱住我的腳哭泣。她不想我抱別人的BB,硬要我抱她。我就偏偏不依她,她就好「可憐」地抱住我的腳飲泣,這一幕令我覺得她很可愛。哈哈,好一個硬心腸的變態媽媽!

2013年8月26日 星期一

123 猜猜猜

最近愛上了「123 猜猜猜」這小玩意。

有些是諧音,有些是意景。有些猜人名、有些猜地方名、有成語、有港式通俗說話。玩起上黎不亦樂乎!

以圖像來猜文字的遊戲多年來玩過不少,今次呢個可算幾吸引。雖然沒有和對手爭膀負的「壓力」,但在 whatsapp 上和朋友討論和拆解難題也很開心!

2013年8月24日 星期六

沒有暑期活動的暑假

菲菲兩個兒子返的幼稚園只有短短2星期的暑假,本來想趁孻女未返學,可以帶佢地周圍玩下。工人B一早請了這2星期作為大假,唔緊要,仲有工人A嘛。

可惜,每逢工人放大假我就病。上次工人A放大假我就耳水不平衡,今次係哮喘加劇烈頭痛。唔好話出街,連在家休息都覺辛苦。我只可以維持有限度活動,就係帶大仔去上暑期班。希望我的情況可以快D好轉,盡量把握最後幾天同幾個小朋友去玩啦。

暑假都要屈響屋企,連公園都冇得去,我真係覺得有D對唔住D仔女。

2013年8月23日 星期五

粉底液分享 - Maybeline Super Mineral 24

自從菲菲識得化妝開始,都對開架品牌有偏見。認為開架品牌品質不夠好,效果不夠靚,所以一直都唔會睇更加唔會買。

直到幾年前,有同事推介某開架品牌的睫毛液,試用後覺得效果比很多專櫃品牌還要好,慚慚對開架品牌產生了興趣。不過興趣歸興趣,都係去睇下姐,粉底唇膏呢D項目都唔敢試用,始終心存偏見嘛!哈哈!

最近菲菲發現用開的專櫃粉底開始不合用,容易甩妝。補妝多了又出乾紋。咁攪法唔係路喎!化妝都係想靚姐,攪到又甩又乾咁,顯得好老喎!於是我向各美女朋友交流一番,有某美女提議菲菲試用 Maybeline Super Mineral 24,佢話只用濕粉不上碎粉,個妝 keep 到之餘更唔會出乾紋。

呢位美女用開不少專櫃品牌,佢都會建議呢隻,當然好樂意去嘗試。

試過一次之後,對開架品牌真的改觀了。呢支粉底液質地好水狀,好易推開 (菲菲慣用手指,間中會用下濕粉掃)。亦因為係水狀,可以推到好薄亦有適度 coverage。上了妝之後感覺很輕,很貼面。

而家大熱天時,一出街就出汗,個鼻例牌出油。但係幾小時過後只係見到個鼻有少少油光,稍為印一印就可以了。其他出汗的位置仍然 keep 得好好,沒有乾紋亦沒有泛油,效果理想!

至於落妝方面,我專登用最輕盈的卸妝泡,都卸得好乾淨,讚!

我會繼續留意開架品牌有咩好野,有機會再分享下啦。

2013年8月19日 星期一

教育生意

早前我的大仔去參加 KPCC 普通話考試拿了卓越獎 (即係 Distinction),隨後該教育機構 (以下姑且稱之為學校) 就話叫我個仔在年度畢業典禮上表演普通話朗誦。

呢間學校有開辦 2至3歲的兩文三語班,好讓一班未能入讀 N 班的小朋友有一個定時的學習環境。除此之外,還有很多不同的興趣班和學術班。我個仔都算係佢地開業以黎的第一批學生,一直都響度學普通話。事實上老師都教得幾好,起碼睇比賽和考試成績都不俗。

每年他們的兩文三語班都會攪畢業典禮,而其他興趣班和學術班的優異生會「獲邀」在典禮上表演,我個仔已經係連續兩年成為「表演嘉賓」。但係我地身為表演嘉賓的家人,為左捧亞仔場,係要買入場劵的。老公話,呢間學校都幾識做生意喎,話叫你個仔去表演,就焗住要買飛入場,仲幫佢賣埋廣告,show 比其他家長睇佢地的興趣班和學術班有幾勁。哈哈!比著我都會啦,唔通白白浪費呢 d 哂冷同吸納新收入的好機會咩。

亞仔平時唔會練習,在會場等待期間都好似悶悶不樂咁。叫佢影相張張都冇笑容,坐又坐唔定,都唔知佢捱唔捱到典禮尾段的表演時間。幸好佢上到台會變臉,親切笑容加上淡定流暢,表演完畢仲搏得熱烈掌聲。落到台又回復憂鬱小生的模樣,只係不停嚷著爸爸要比返段片佢睇,真係比佢吹漲。

而家做教育,好多學校都著重外出比賽成績,同埋搵呢d優異生出黎表演吸納新客。我地就一邊比錢,一邊幫佢搵錢,唔知幾時會比返個「電視框」我呢?

2013年8月14日 星期三

風吹草民動

掛不掛八號風球對菲菲來說並沒有太大分別,因為我的小朋友仲返緊幼稚園,打三號就會停課,所以我有連續兩天的親子日。但係對於一眾打工仔黎講,幾時打八號風球就好大影響。

菲菲的打工仔朋友,在昨日早上開始進入戒備狀態,在各即時通訊群組不時「交流」所謂內幕消息。其實幾時打風,睇天文台公佈就最實際啦,咩「船公司」、「貸櫃碼頭」之類的來源,都係有心人一廂情願編造出來,完全冇根據但係唔知點解又有咁多人信。

昨晚雖然風大雨大,風力很強,打著傘都濕哂身,但唔知點解仍是三號風球。既然天文台仲未考慮清楚是否掛八號,晚上的課程仍要繼續。我們在傍晚六時,冒住風雨和放工的人群返回公司,教完書後約十時仍未掛八號,我們和一眾學生就如常去了食宵夜。

好嘞,等到天文台考慮清楚,終於決定在凌晨時份掛八號風球,大家都好開心回家休息,希望會多一日假期。怎料今天下午又是一片趕返工的混亂,這班打工仔慌忙返工,又火速放工,不禁怨聲載道。咁又係既,個八號風肯捱多2粒鐘,市面就唔會有咁大混亂,起碼返朝九晚六果班朋友不用如此狼狽。

其實掛幾多號風球,係邊個決定呢?係天文台定係力牆呢?如果按天氣,星期二下午已經好唔穩定,雨傘吹反了,路邊不斷有東西被吹倒,都仲係三號?明明雨勢仲係好大,仲聽到有雜物被吹到「嘭嘭」聲,就咁快由八號改掛三號?好多朋友等車都等成粒鐘,又要冒著風雨趕在兩小時內返到公司,個身仲未乾透又話放工,又要迫一輪車歸家,呢D又係咩安排呢?雖然冇我份,但我都認為好擾民。

我都知天文台好難做,但係要幾百萬人陪你咁玩法,難免會令咁多人不滿了。

2013年8月13日 星期二

親子家務

心情已經完全平復,可以重回正軌生活。

今天三號風球,幼稚園停課,三個小寶貝都留在家玩。小孩需要的玩具真的不用很多,甚至不需玩具,只要有玩伴就可以了。

下午時他們玩掛衣服遊戲,就是把洗好的衣服掛在衣架上,夾個衣夾,再把掛好的衣服繫在繩上便完成。本來是煩瑣的家務,到了小孩手上,就成為充滿樂趣的玩意。他們三個又要鬥快、鬥多又鬥靚,不消一會,所有衣服都掛得整整齊齊,三個都好有滿足感!

下午茶我打算整鮮果沙律,又請他們來幫忙。我讓他們把切好的水果一點一點的放進盤子,很快一盤色彩繽紛的鮮果沙律就完成了。吃著自己有份整的沙律,我想是特別香甜吧!

常聽到家長朋友要買玩具來訓練小孩各種技能,為何不把學習融入生活中呢?這樣不是更有意義和對小朋友更有益處嗎?既省錢又令小朋友學懂自理,不需要動輒買數百元一套的玩具吧?

估計明天會繼續打風,又可以繼續玩親子家務!

再為自己打氣!

深深體會到貪婪和自私是何等可怕和可惡,更加要努力教好自己的子女,要做個對社會有貢獻的人。

貢獻不一定是甚麼驚天動地的偉大事蹟,只是多一點同理心,多一點愛心,已經是對社會一份貢獻。

經歷困境可以有好多方法,積極面對和反思,才是最有得著和最有效的方法。

堅強不是強忍淚水,而是不被逆境所影響,繼續昂首闊步向前行。

我們一起加油!

為自己打氣

突然出現了一個困境,但我相信上天給我們的考驗,是在我們能力範圍以內的。

接受和面對,就是最好的方法。

加油!

2013年8月12日 星期一

體驗痛苦

晚飯時,大仔扭計要食通粉,我話晚上係食飯,早餐先至會食通粉,叫佢乖乖埋位食飯。大仔聽罷就開始喊,一邊喊一邊扭要食通粉。

工人A見大少扭計,就好言相向,想氹佢唔好喊,話改天再食通粉云云。工人B一向鐘意同工人A唱反調,就話大少做咩扭計,似係準備出言責難。未等佢再講落去,就叫停2個亞姐。之後我當無事發生一樣,著細仔同細女叫人食飯 (開餐前指定動作),之後我都開始食飯,冇理到大少仲扭緊計。

我唔理佢唔係因為我冷漠,係等佢喊夠,同埋知道喊完都係冇通粉食 (扭計唔成功)之後,就會乖乖食飯。無論氹定係鬧,佢都會繼續喊,直到對方肯屈服為止。我係佢亞娘,又點會唔知佢脾性?果然不出我所料,十分鐘左右佢就收聲,之後問工人姐姐要毛巾去抹眼淚。

工人A拿了毛巾,我叫佢要同姐姐講唔該,大少唔肯講。工人A就恐嚇佢,話唔講唔該就唔比毛巾佢。看似係教緊大少要有禮貌,但係佢唔明咁樣只會令大少再喊過,白白浪費我呢十分鐘的沉默。於是我又要叫停工人,再請大少同姐姐講唔該。最終大少都肯講,抹乾眼淚就開始食飯,仲食到好津津有味。

呢件係每天教仔眾多小事中的其中一件,點解會咁無聊寫出黎呢?只係想同大家分享一下,教仔,唔一定要氹或要鬧,沉默都係一個方法。

扭計的小朋友,就係要引起別人關注,從而滿足自己的需要。無論你比咩反應,佢都有本事食住上,再黎一輪角力,絕對係勞民傷財兼浪費時間。大人覺得很吃力,小朋友亦沒有得著。沉默,即係唔比反應。在沒有對手的情況下,只要情緒發洩過後就會回復平靜。只要佢平靜了,就會做回正軌的事,亦知道扭計係冇效果的。

事後,我沒有和他檢討。因為他愛面子,扭完計冇人理已經好冇面,事後仲要比人秋後算賬,大人都無地自容啦,何況係細路。我傾向用「體驗式」的方法去令小朋友自己明白事理,從不會「苦口婆心」咁做黑白天鵝。道理講就口響,聽唔入耳果度弊呢。但係佢親身體驗過,感受過之後,呢個道理就會成為佢自己的資產。佢會覺得呢個道理佢佢自己認同、接受和願意執行的,不是因為父母的意願而夾硬去遷就。要培育小朋友的心智和思考能力,係要佢適當地受少少苦,佢地先至會領略到。

2013年8月11日 星期日

被銷售經驗分享

今日帶大仔去上專注力訓練課,訓練中心無啦啦話同我個仔做英文能力評估,既然唔駛錢就梗係做啦。呢個世上冇免費午餐的,菲菲心知肚明,做完評估之後一定有野 sell。

呢個英文評估,其實係一本 workbook,頭三份一係認圖片同連線,係一般K2生的範圍。中段係串字,係九龍塘幼稚園的程度,我仔當然唔識。後段係理解整句句子,明顯係國際學校的內容。我個仔係讀一般幼稚園,當然只係識得做頭三份一。

做完評估之後,有位導師黎同我講解評估結果。依照結果,我個仔只係做到三份之一,好似好嚇人。不過菲菲心中明白,呢份題目係經過精心設計,如不睇清楚,好易以為自己個仔英文好唔掂。

導師同我講解完之後見我冇咩反應,見佢有D亂左陣腳,講野開始口窒窒。可能其他家長一見個小朋友「成績」如此不濟,會表現得好緊張,就會中正導師的下懷,比佢 sell 到要買一套英語課程。講返個導師,見我冇反應,又拎另一本練習比我睇,話呢D係小一程度,問我識唔識。好衰唔衰我又識喎,佢更加無從入手,話題兜黎兜去都唔知佢講乜。

然後佢又拎左一大堆 flash card 比我,話點樣教小朋友學英文云云。我話家中有好多呢D野,不過全部都要抽時間同小朋友做,我D仔女係返全日班,放學返黎做完學校功課,又要做補習班功課,之後仲要睇中英文故事書,已經好 full,仲點抽時間出黎玩呢D野?唔通我要完全剝削小朋友的私人遊戲時間?同埋我知道知識好重要,不過情緒健康仲緊要,每日返學放學做功課,完全冇玩樂時間,根本就唔健康。言下之意,我唔係怪獸,我唔會只著重學業而忽略小朋友的心智發展。

講到呢度,導師投降,唯有放我走。

根據以上銷售例子,呢位導師做漏了一個很重要的部份,就係 fact finding。佢冇問過我滿唔滿意小朋友的英文程度,平時點同小朋友溫習英文,對小朋友的學業有咩期望等等。佢完全唔知我對小朋友學業的睇法和教育方法就急住要 sell,相信只有怪獸和英文程度不濟的家長才會比佢 sell 到。我知亞仔英文程度係咩水平,亦知佢有咩不足。不過最大問題係,要我在家另外抽時間去訓練佢就做唔到。人人都係得24小時,唔可能咩都去到盡,只可以在各種需要上找平衡點。

如要成功銷售服務,必定要令到客人認為有需要才行。世上好的東西何其多,就算有咁多錢都冇咁多時間去消化。「需要」這個 term 又好玄,可以係實際上的需要,亦可以係心理上的需要。舉個例,係女人都要用手袋,呢個係實際需要。但係名牌手袋就超出了「實際」的範疇,係心理需要。如果客人沒有這個心理需要,或銷售人員未能引起客人的心理需要,客人就不會花幾萬元去買個手袋。

英語課程亦然,香港地學英文係必需,但學到有幾高深就係「心理需要」大過「實際需要」。冇人知道呢套英文課程會唔會令小朋友英文科拿100分,但部份家長會認為有呢D課程 back up,小朋友的英文就會「勝人一籌」。「勝人一籌」這回事,就係心理需要。就算家長願意使用英語課程,幻想自己有時間同心機去陪太子讀英文,都要貨比三家,看看究竟邊一套課程會更有用。但係呢次被銷售經驗中,我睇唔到呢套課程有咩獨特之處,所以係一個不合格的銷售過程。

銷售同打仗一樣,要「知己知彼」才會百戰百勝。連客戶係咩背景同心態都未知就盲目亂 sell,只會增加踫壁的機會。在戰場中的銷售人員們,希望呢個小小分享可以比到少少 hints 你地,有助增加成功機會!

2013年8月3日 星期六

心理戰

早前因為餵中藥不果,就索性唔同個女沖藥浴,等佢濕疹復發。不出三天,佢果然周身痕係咁抓,抓到成身損哂。呢招係老醫師教的,要醫好呢個女,唔係用藥開始,係從心理開始。

我亦跟從老醫師的吩咐,等佢抓到發哂狂時走去問佢食唔食藥,再解釋一次食藥的好處,佢當然話肯啦!不過事情並唔係想像中咁簡單,佢一聞到藥味又係耍女擰頭。我唯有指住佢抓到損哂的患處話︰「你睇幾肉酸!唔靚女勒!要食藥先至變返做靚女 ga!」卒之哄下哄下先至食左幾毫升,好過無啦,點都叫做一個好開始。

由佢開始肯食藥果晚起,就恢復同佢沖藥浴。佢知道沖藥浴會唔痕,同埋佢肯食藥就可以沖藥浴,之後佢先至肯乖乖食藥。雖然有時都扭扭擰擰要人哄先至肯食,到今日佢已經可以食到30毫升了。老醫師的方法真的很有效。

在同亞女玩心理戰期間,發現亞女真係好聰明。佢知道幾時要扮弱者,幾時要發威。當佢有求於人時 (同埋心情靚時),係好識得又氹又電要人幫手。行雷又會扮驚 (第一下雷聲會真係驚,之後果 d 明顯係扮嘢),要人抱佢,十分小鳥依人。事實上佢係想睇放在高處的物品,所以諗計要人抱,以佢咁識扮弱者來抽水的性格,第時實會欺騙不少男孩的心… 囧

2013年8月1日 星期四

旺角藥房一二事

每當有食店「租約期滿」,轉眼就會變成藥房。

每間藥房的招牌都係閃爍不斷的燈,以前是黃色招牌的天下,現在是閃閃紅白十字的世界。

每間藥房都唔同名,但原來佢地同區有分店。同一個集團有幾十個名,等顧客以為有新競爭,其實都係連鎖經營。

有奶粉罐展示,但長期冇得賣。

強國人不愛買的藥,香港人都休想買。早前我想為小女找「戒手指水」,行了十間藥房都冇得賣。強國人不理會小孩食唔食手指,所以呢D貨係冇銷路,索性唔入。

余仁生最出名的保嬰丹,在旺角任何一間分店都係買唔到的。

在旺角的藥房,好似咩都有,但搵起上黎,原來係咩都冇。好弔詭!