獨居老人

今天是小學秋季旅行，一、二年級是親子旅行。我的細仔和孻女分別就讀、二年級，所以今年有個熱鬧的親子旅行。

在幼稚園時的親子旅行，真的是親子，小孩仍會緊貼著父母。升小一後，所謂的親子旅行，父母只是一個補給站。孩子們自己夥同朋友們，有自己的活動了。只有要吃要喝時才會來找我們，忽然有點獨居老人的感覺，哈哈！

這種孤單的親子旅行，讓我體會，孩子開始長大了，要開拓自己的世界了。本來孩子們去玩，家長們也可以自己聊天打發時間。但是，聊天都要有對手，遇到話不投機甚至不堪入目的，我情願當獨居老人了。

愉快學習

有很多家長都渴望子女成績好，甚至我認識有人要求自己個女每次都要 100分。佢話如果個女冇 100分就會唔睬佢，唔駛咁極端呀？

其實我的兩個讀緊小學的仔成續都 ok，但 100分就不常見。老公話想兩個仔努力啲，就推出一個獎勵計劃。只要累積三次 100分，就可以換領一份禮物。

呢個計劃推出咗唔夠一個月，兩人都達標了2次，即係每人都換了2次禮物。有人話我們功利主義，用物質引誘小孩。乜在呢個世界搵食唔係咁嘅咩？用自己努力換取想得到的回報，不是我們每天在做的事嗎？

講返讀書，目的都係求學問。我覺得九十幾分同 100分的分別，唔係識唔識的問題，係認唔認真的問題。我們只係用獎勵方式去令佢地更認真，而呢份認真係可以獲得肯定的，而且係可以換來快樂的，有何不妥？

在我而言，咩叫愉快學習？學習的過程不一定愉快，甚或有點艱苦。但努力後得到的結果，會令自己很愉快。就正如我們做人一樣，要有經歷有磨練，才會得到更美好的成果。

做人大嫂唔容易

九月一向是最忙的月份，開學、中秋和很多家人的生日聚會。

剛剛又籌備了奶奶的生日飯，只是一圍咁多人之嘛，但籌備功夫絕不簡單。奶奶不是愛舖張的人，其實只係去酒樓 book一張枱，之後再 book 一個蛋糕罷了，但當中的過程係好考 EQ、耐性和溝通技巧的。

當老公提出食飯時，有親友就提議地點。可能只有我們有小孩，佢提議的地點是不適合帶小孩去的。提議地點的同時，又「叮囑」我唔好買大蛋榚，因為奶奶有糖尿唔食得甜。我知吖，所以已經 cut 哂所有應節食品，過時過節我咩都唔送，免得貼錢買難受。

其實當刻我係有啲火起的，佢唔識選地點冇問題，個蛋糕都係影下相，最終都係小朋友食大部份，唔駛咁快落哂閘呀？我買比自己食唔得呀？重點係，呢位親友係我後輩，一出言就好似發號施令咁，太冇禮貌了。

好，我大人有大量，就逐點列名原因同佢講解。佢最後都接受我的提議，當時的感覺似係我教緊仔，顯淺的道理都要由零講起才明白，吹漲！

我們提議的酒樓是集團式，有好多分店的。之後又有另一位親友話去佢地附近嗰間。天呀！我帶住幾個細路加一個蛋糕去你附近嗰間，堅冇同理心！好在老公夠 power，即時 turn down 佢地的要求，去返我們附近的分店。

佢地可能認為我們要遷就老人家才會有 objection。無問題的，一係佢地自己攪返囉，我唔會有意見。就係每次佢地攪親都爛尾，一係場地太迫太吵，一係預食物太多，一係時間太緊迫，攪到大家唔開心，老公先至要我攪。我唔介意攪的，我估如果我不做中間人，大家係約唔到食飯。到時奶奶會以為我唔比佢見啲孫，呢個罪名我擔當唔起呀。

街坊專家

昨日在某媽媽群組見到有人話服用香薰油，跟住就有其他媽媽急不及待話：「我睇過報導，香薰油係唔食得喎！」。之後一大群人你一言我一語咁，好快就講到嗰位媽媽收咗皮。大家彷彿是聖人，正在努力拯救世界咁。

報導？係咩報導同係邊個寫㗎？詳細內容係點㗎？似乎無從稽考。

香薰呢家嘢，我只懂皮毛。我知有啲係可以服用的，但我冇研究香薰咁多年，在腦海中完全抓不到任何記憶。不過重點唔係香薰食唔食得，重點係太多人睇咗啲唔知咩報導就扮專家，到處危言聳聽。

又例如營養學，食維他命 C 可以提高抵抗力，這是基礎常識。至於維他命 C 有咩類別，在甚麼情況下吸收或排出，在甚麼情況下要攝取幾多份量，有幾多人會去採討？

有一次我的小朋友初起感冒，我就用多次少量的方式比維他命 C 佢地食，係 supplement 嗰種，唔係沖水出氣泡嗰種。食咗一日，訓醒一覺就精神爽利上學去。有人質疑我點解唔帶佢地去睇醫生，有人話我比太多維他命 C 會生腎石云云。經過嗰一次，我明白無知就好似自殺式炸彈咁，要迫人攪炒。

我唔想比較西醫和營養學，因各有所長根本無得比。但在小病時我係採用營養學的方法，因為我學過，所以識用。食幾多維他命 C 先會生腎石？我可以講，飲幾多水同飲咩水先係關鍵！

太多人看了冰山一角的報導就以為自己睇緊研究報告。而且多數呢類報導都係出自讀新聞系的記者，並唔係讀營養學的學者。大家的專業範疇都唔同，對於我黎講同睇娛樂新聞冇分別，都係得啖笑。

做健康產業的朋友們，快啲好好教育下啲家長吧，可以拯救到好多小朋友㗎！

知性美女

今天開學日，上小學的兩個哥哥要早些出門，妹妹唔駛咁早返學，我就同妹妹傾下密偈。

我：「今日可以見返班同學仔，你最掛住邊個呀？」
妹妹皺起眉頭擰頭。
我講咗幾個同學的名字，妹妹都繼續擰頭。
我：「你同小慧最好朋友喎，你唔掛住佢咩？」
妹：「佢唔同我玩呀……」
我：「點解呀？」
妹：「佢話我貪靚係唔啱，所以唔同我玩。」

估唔到在五歲女孩的社交生活中，已開始爭研鬥麗了。我都唔扮謙虛，我個女樣子標緻，有一頭及腰的長曲髮，老師們都好鍾意佢。因為佢在班中都係數一數二的靚女，幾乎所有表演都安排佢在前排中央位置，難免惹人妒忌。

女孩排斥靚女係自然現象，但我堅持女性無論咩年紀都要扮靚。由 BB 開始我就為我的寶貝女扮靚，靚已經成為佢生活一部分 。沒有外在美，邊個有興趣瞭解你有冇內在美？

靚女除咗要識扮靚，仲要豐富內涵和提升修養。我就藉住呢個機會，向女兒灌輸成為靚女的內在條件。

第一，要繼續堅持自己愛美的追求，不要因為別人的說話而扭曲自己。連自己的儀容都堅持唔到，佢將來長大仲有能耐堅持其他嘢嗎？

第二，別人因為做不到而妒忌，絕對不是自己的錯。講真，做靚女好忙㗎，淨係打理把長髮都要唔少時間啦，要靚真係要勤力㗎！

第三，佢要走知性美女的路線 (小孩理解為又靚又叻)，就預咗比大部分女孩排斥。基於吸引力法則，被排斥係好正常。因為知性美女與眾不同，有個人風格，有獨特見解，能幹又細心，一般人是接受不了她的氣場的。

我好細個就想成為一個又靚又叻的事業女性，奈何被家人打壓不准我扮靚。到我有能力裝扮自己就被視為反叛，總之愛美就是錯。但我相信女兒是一個比我更出色的人，為了讓她更出眾，我會陪她走過每一段被排斥的路。

暑假的特訓

以往放暑假我都會帶小孩周圍去玩，但今年剛巧有新班要開，抽唔到太多時間帶佢地出去玩。咁呢個暑假我地做咗啲咩呢？

因為得返一個工人，要照顧三個小孩真係好吃力。所以今個暑假，我為三個小孩進行自理及家務特訓。

佢地學識咗自己沖涼吹頭，掃地，開飯，食完飯執枱，洗碗和自己摺衫。

每人都做多一點，工人就無咁辛苦了。

不用體罰

在好多媽咪群組都見到有媽媽談及體罰，仲有好多心得。例如：點樣打、用咩武器、幾時打等等。講體罰講到寫論文咁，好似好有道理。其實不體罰真係教唔到小朋友嗎？

如果你希望小朋友潛意識中有「暴力可以解決問題」的因子，就繼續體罰吧。很多人都低估了體罰的嚴重性，有誰可以確保自己在體罰孩子時不帶情緒？有誰可確保體罰不會令小朋友受傷？有誰可確保體罰不傷害親子關係？

我的小朋友都會爭玩具，都會爭執，都會搗蛋，都會在我最忙亂的時候為我添麻煩。值我堅持不體罰。

在大家情緒都不穩定時，最好大家都冷靜下。我會叫佢地在家中不同的角落罰企，面壁思過。而我就躲在房中冷靜一下，整理好思緒，才去處理大家的問題。

到我冷靜過後，確保不帶情緒，才開始和小孩們逐一對話。對話是有問有答，不是我在唱獨腳戲一味在罵。要讓小孩懂性，就要讓他們思考。單向的責罵或說教都是冇用我。在對話過程中，孩子會自己發掘錯在哪裡，為甚麼辰改和該如何去改。

在教導孩子中，要孩子明白「為甚麼」是最重要的。如果他們不知道為甚麼被罰和為甚麼要改，問題只會惡化，犯錯會一次比一次嚴重。

教仔同醫病一樣，都係病向淺中醫。就算孩子犯的錯再細，都要教大道理。每一件事重複發生，都會潛移默化，融入細胞中。體罰越多，小孩的暴力傾向越大。對話越多，小孩的分析和思考力就會越高。

如何培育一個小孩，父母是有得揀的。

有一種無奈叫做親戚

上回提到有親友叫我買額外的暑期作業比亞仔做，但我拒絕了。

早兩日，呢位親戚竟然自掏腰包買咗兩本暑期作業比亞仔。我真係 O 咀，學校叫佢做一本，你就買多兩本，我係唔係要講多謝㗎？亞仔一早做哂啲暑期作業，目的就係想玩，點知做哂又整多兩本黎，算唔算整古呀？

在佢角度可能係一番好意，我應該謝恩。但背後的影響係我來承受喎。呢兩本暑期作業，就好似你未收工就做好哂啲嘢等放工去玩，點知你老細臨收工再比 double 工作你，嗰種感覺唔會係好 welcome 吧？我唔想個仔覺得功課係 never ending，終有一天會谷爆。我唔谷，親友走黎谷，呢種無奈真係非筆墨所能形容！

暑期作業

七月仍未過，大仔已做哂所有暑期作業。有親友得知，就叫我買多幾本比佢做。

我都係改唔到串咀的性格，極速回咗佢一句：「買暑期作業？你係玩佢定玩我呀？」。親友無言，轉話題了。

今年我都有帶大仔去書展，一見到補充練習和教材即閃。我們係去搵三國演義漫畫，故事書同埋天文書籍的。要培養閱讀興趣，梗係要搵有趣嘅書啦。邊有人鍾意操卷㗎？完全違反生理同心理需要，我呢啲火星家長堅持唔谷 academic，我的火星孩子先可以搵到自己的興趣。

我是有點反叛的，認為要有動力 work hard，先要有空間 play hard。

珍貴的回饋

上回講到大仔得了服務獎，我和老公都出席了頒獎典禮捧亞仔場。

到達學校時，見家長並不多，與幼稚園時的墟冚情況完全唔同。到正式頒獎時，先發現原來每班只有幾位小朋友得獎，服務獎只有一位得獎者。當下才知道這個服務獎不是豬肉獎，是全班最有服務精神的同學才可獲獎。

我真係好開心，亞仔真係學懂了做人的點點道理，願意為同學們付出，亦得到老師的認同。學做人比學知識要困難得多，他得了這個獎，對於我來說是一個很珍貴的回饋

豬肉獎

上星期大仔比張通告我，學校將有年度頒獎典禮，問家長會否出席。我問過亞仔有冇獎攞，佢話冇所以我打算不去。

點知昨日亞仔話佢有獎，所以我都係要出席啦。我問佢攞咩獎佢話唔知，打電話去搵班主任但又搵唔到人，我一直都唔知佢會攞咩獎。

直至今日，佢話綵排咗，原來佢得的是服務獎。我問佢做咗啲咩服務而得獎，佢依然係唔知。聽完真係覺得好攪笑，亞仔乜你咁夢豬豬㗎？

好明顯呢個係豬肉獎，不過都好慶幸，都叫做有個豬肉獎鼓勵下。希望呢個夢豬豬繼續享受他的小學生活啦。

女人的能耐

少刨娛聞的我，最近都留意到伍姑娘的家事，老公疑似出軌，還可以在記者面前輕鬆面對。她令我想起了希拉莉。

在婚姻關係中，最不能接受的莫過於另一半不忠，這種裂痕是最難修補的。出色的女人遇到丈夫不忠，不但要把情緒收起來，還要「輕鬆地」為丈夫解圍，這種能耐真教人敬佩萬分！

如果男人懂得領受呢份情義，他就會知道老婆有多愛他，為了悍衞婚姻可以不惜一切。如果男人心存僥倖以為又過到骨，待風聲冇咁緊又重蹈覆轍的話，這種用下體思考的低等動物總有被遺棄的一天。

女人還願意為男人如此付出，可能一生沒有幾多次，男人們請珍惜真心愛你的女人。

又係制度問題？

本來冇追電視，但「贏在射精前」呢句實在太爆，吸引我上網睇返呢個節目有幾勁。

講真我覺得節目內容誇張得黎都算寫實。身邊確有一班人有呢個想法，亦在付諸實行。佢地咁落力去催谷小朋友，最大嘅「原動力」就係香港的教育制度。

我都唔認同香港的教育制度，但我的著眼點並非培育小朋友成為制度下的奴隸，所以我對教育制度本身冇咩感覺。我讀書比我老公多，但而家我們一家五口，加埋工人和貓星人，都係我老公獨力賺錢養家。咁學歷其實代表到啲咩？

有點社會經驗的人，都知道做生意比打工更有機會賺多點錢。投資又比做生意更易賺到錢，當然更易蝕錢啦。
做生意和投資，最緊要的不是學歷和知識，而係心態！

既然心態比一切重要，為甚麼要用繁忙的時間表去磨掉小孩的自我呢？講到尾都係教育制度的問題吖嘛。其實跟制度走只會製造跟隨者 (followers)，不受制度束縛就會啟發創造者 (creators)。

選擇比機會重要，大家都識講，但有幾多個夠膽做？

工人消失後

亞懵突然人間蒸發後，我當然有好多善後工作要做。通知入境處、重新編工作時間表、通知學校、為小朋友做心理輔導，仲有叫醒目工人 (亞醒) 去收風。

亞醒在街市見到亞懵的朋友 (都係印尼姐姐)，問佢地有冇見過亞懵。當佢地知亞懵走咗佬，竟然冇咩反應。亞醒肯定呢單嘢佢啲朋友有份參與。

在大仔學校門口都係印尼姐姐吹水熱點，因平時係亞懵帶大仔返學，今日亞醒出現，其他姐姐以為佢係新工人，即刻上前 social 一番。原來亞懵在其他姐姐面前講盡我同亞醒的壞話，當其他姐姐知道亞醒係我用了多年的工人後，即刻以嫌棄的目啤住佢。

仲有姐姐同亞醒講：「以前嗰個姐姐好勁㗎，佢識好多好犀利嘅師傅㗎！ (落人降頭嗰啲)」。亞醒答佢地：「係咩？好勁㗎？我老細都係做呢行喎。」。之後班姐姐就各自散開了。亞醒講返比我知時，笑到我標眼水。真係咁勁就唔駛黎香港打工啦，吹水唔抹咀。

亞懵閃咗我係忙咗，但屋企氣氛好咗。希望小朋友們盡快適應啦。

消失的工人

今天亞懵放假，在應該回家的時候她沒有回來。電話不通，whatsapp 冇 online，冇帶屋企鎖匙，她的衣櫃沒有衣服，她的隨身物品不在，昨晚穿的內褲丟進垃圾筒，我相信她出走了。

她突然出走，我竟然可以鎮定地和 agent 溝通。Agent 提供了幾個封殺她的方法，但我不想花時間和不負責任的豬糾纏，所以我不打算做。我只會做自保的一部分，確保家人受的影響可減至最低。

可憐孩子們，話要留返件父親節蛋糕比佢，見佢遲遲不回家又要我打電話找她。時間一點一滴過去，孩子們都明白她不會回來。

他們開始哭，開始怪兄弟們不夠乖，所以工人走了。在這時候，我要糾正孩子們，工人走絕對不是他們的責任。如處理不好，會令孩子們留下陰影。

安撫完他們，亦不忘提醒他們，萬一在街上見到她，絕對不可跟她走。孩子們一時不明白，我只好簡單地說：她已經變成壞人了。這一刻我知他們不懂接受，我唯有減少工作，多點和他們慢慢溝通吧。

小筆友

暴近有位媽媽在某個 whatsapp 媽媽群組發起小筆友活動，邀請小朋友們互相寄信，好似想提升寫作定表達能力云云。呢件事意義係幾好，不過感覺上好似「為做而做」咁，所以我冇參加。

大家的小朋友都讀緊 K2，只有五歲人仔，咁快要寫信？老實講叫我無啦啦寫封信比「筆友」，我真係唔知寫咩好。我個女讀 happy school，現階段係文盲，連自己個名都未識寫，點寫信呀？又唔想亞女畫幅畫寄比人，人地收到該如何處置呢？掉咗又好冇禮貌，收起又阻地方。成件事我覺得好夾硬黎，所以冇 join。

我肯定亞女表達能力不錯，見佢同兩個亞哥鬥咀時可以用成語互相秒殺，大人都未必有佢地咁精警。至於寫字，到佢地要用時就自然會學識，不必太心急吧。

教育工人

很多朋友都說我好彩請到一個好工人。她本質都不錯的，但都要花心思去教育和管理，不是單靠好彩就有好工人。

她剛來我家不久就問我借錢，因為她之前的理財觀念薄弱，家中所有人無錢洗就問佢攞，佢又照比，所以佢係印尼版「長岐涼美」。如果不及早教育佢，佢好快就要去搵財務公司了。

錢我就堅決不借，只係關心下佢點解要借錢。她要供養外婆、父母和兩個女，連埋自己一共養六個，靠幾千元簡直係冇可能。她已離婚，前夫不會供養女兒，但她有兄弟，長輩的責任總可以分擔吧？

她家鄉的人，以為她來香港掘金，事無大小都向她要錢。首先要她明白，她的家人有時的所謂「需要」，如是必須的，他們有為自己計劃的責任，如是非必須的，就要自己取捨了。

初時她都不能接受，認為家人是有需要才向她求救。直至有一次，他哥哥的生意拍檔，撞了借來的車。車主要求賠償，他哥哥的拍檔說要賣掉共同飼養的牛。她的哥哥當然不想賣牛，又問我家工人借錢。這是荒天下之大謬吧！恕我無禮，印尼的男人知道甚麼叫責任感嗎？

我就借此機會，叫工人狠狠地拒絕。我說，你唔比，都一定有人比。最初她不相信，結果事主自己有方法解決了。我教育她，不可以讓家人過份依賴，每個月寄幾多錢是一個 fix amount，她的家人有責任計劃如何運用。

她有疑惑，說如果家人不夠錢用怎辦？我反問：如果你沒有賺錢能力，他們可以依靠誰？答案就在問題裡，我的工人開始明白她在縱容家人不負責任。

現在她可以儲點錢，家中的人都懂得為自己的生活負責，大家都少了點怨氣。工人覺得在我家工作，不單可以賺到錢，還可以幫她處理家鄉的問題，她在港工作就可以更放心了。

禮物大比併

我的細仔和孻女所讀的幼稚園，歡迎小朋友在學校舉辦生日會。

在生日會當天，家長們會為生日的小朋友悉心打扮，和帶蛋糕回校慶祝。家長們亦為全班的所有小朋友準備小禮物。

在幾年前小禮物一般都是零食或小文具。但我發現這幾年，這些所謂「小禮物」已經不小了。孻女班中有同學的小禮物，由一個 A4 拉鍊袋盛載著自製曲奇、小玩具、貼紙、小筆記本和文具。班中有三十多位小朋友，這些禮物要花多少心機、功夫和金錢才可準備好？

這個小禮物已演變成小朋友的面子，本來開心的活動變了面子大比併了。

今個月底是孻女生日會，我本想準備零食算了。但孻女不肯，我要想辦法說服她了。

讓小孩看電視劇

我們小時侯，都是和父母一起電視撈飯長大的。但現在很多家長都反對小朋友看電視，尤其是電視劇。

早期我都學著大家，不讓小朋友看電視，怕小朋友會學壞。自從大仔上了小學之後，我意識到，這根本是自欺欺人。苜先，現在的電視尺度比我們小時侯緊得多，我們看了那麼多年都未學壞，我相信電視教壞細路的「邏輯」不成立。小朋友返了小學，會接觸到很多不同家庭背景的小孩。他們每天相處最少七小時，相信從朋輩中學壞的機會率會更加高。

以前我會找些所謂益智的影碟給小朋友看，但久而久之，我發現大仔彷彿太過不食人間煙火，對現實社會失去聯繫。到他上了小學，發現他好似笨蛋一樣常被捉弄，我就知道他的「天真無邪」就是他被捉弄的源頭。

自從影碟機壞了，我未有時間去買新的，大仔就開始睇電視了。無論電視劇的劇情有多爛，不多不少都是現實生活的寫照。他從電視中看到他生活中未曾經歷過的事，對於他來說是透過電視去瞭解成人的世界。

有時他看到不明白的情節，我會解釋給他知，原來這樣也是一種不錯的教育方式。他有興趣看，有興趣知，我亦樂意去講解，反而增加了彼此的瞭解。

其實讓小朋友看電視沒有想像中般可怕，只是家長們沒有信心可以正確引導小孩吧。

小改動，大改善

小時候父母有教，如別人對你好，你都要對別人好。長大了，體驗多了，發現這個「道理」似乎有點漏洞。

首先是潛台詞的問題，把以上道理反過來，豈不是「如別人對你不好，你就要對別人不好」嗎？這是個冤冤相報的惡性循環吧！

如果要真正啟發孩子善良的心，可以把字眼稍為改動一下，成為「如果你想別人對你好，你就先要對別人好」。把被動轉成主動。基於吸引力法則，率先散發正能量，才會吸引更多的正能量，對吧？

就算不是每個人都給你正面的回饋，也不打緊。至少自己無愧於心，也是一個重要的處世道理呢。

無論行善或行惡，都會成為習慣，成為自己的氣場。別人修不修善，我們管不著。但為自己和自己的下一代修善，我們絕對有能力做到。