工業區

老公的辦公室，於今個月15日必需遷出，因為整幢大廈要拆卸了。這座工廈不算是很舊，不過旁邊幾幢都變成甲級工廈了，大業主當然想趕走我們這班平民租客，將大廈重建可以租比富貴的租客。

在這區待了六年，是有感情的。所以我們搬到另一邊馬路的工廈，希望那邊可以多待幾年。以前的工廈最細間都要幾千呎，過萬呎係平常事。當香港製造業北移之後，好多工廈都變成了劏房。我們租大概七百呎地方，出電梯之後有十多間劏出來的獨立辦公室，每間都有七百幾至一千呎，有電有冷氣有天花有地磚，鄰居有些是網頁公司，有些是設計公司，都是一些很「斯文」的行業，工廈入面好似已經冇咩「工業」存在了。

租工業區有很多好處，租金便宜，樓底高，交通方便，又不需要著千篇一律的 OL look 就可以返工。感覺比商業區舒服自在，人流亦沒有那麼急速，工作起上黎增添幾分寫意！不過時代是不斷進步，眼見工廈慢慢變成甲級商廈，我們這班小租客真係唔知可以退到去邊。

以前菲菲住觀塘，眼見以前做暑期工的工廈變左 APM，初初真係覺得好怪，一時之間接受唔到。入到去，又係同一樣的店舖，同一樣的食店，好悶喎！同我家附近的大型商場沒有太大分別，點解我要搭車去呢？哈哈！

公司位於新蒲崗，希望呢區唔好發展得太快，我仲想在市區吸到一口比較清新的空氣。