槍手

菲菲工作時寫過不少計劃書，一般都係希望別人提供資源去支持某一個項目先至會寫。商業的、慈善籌款的都寫過，基於結果，大部份的計劃書都有不錯的成效。

早幾日有朋友打電話比我，話想問政府借錢攪生意，對方需要佢交出計劃書，佢諗住我識寫所以搵我寫。不過佢連盤生意有咩賣點、如何收支平衡、風險管理、甚至日常開支等等的問題都未攪清楚，我可以點幫佢寫？仲有，寫計劃書係一件費神的事，佢冇提過酬勞問題，只係希望我義務為佢寫，我就真係唔想同佢做。我唔係市儈咁簡單，寫一份商業用的計劃書係會有潛在收益的 (政府會借錢比佢)，而果份收益唔係我的，佢即係想我義務為佢工作，我D愛心仲未爆棚到咁既地步。再者，錢借左返黎佢唔攪生意，用黎自己揮霍的話我都冇佢符。皆因佢有前科，我的擔心在情理上係成立的。如果我真係寫左份計劃書比佢借錢去 fing，成件事我未好白痴？

老實講，我老公都有一份計劃書要寫，我點都要攪掂老公果份先啦，大家坐埋一條船，唇亡齒寒丫嘛。而我呢位朋友，平時唔會搵我飲茶食飯吹水，次次搵親我都係有事相求的，我唔想做佢的鍾無艷。

呢件事令我諗起好多年前，當時老細修讀 MBA 但係冇時間做功課，佢掉低本書同份 assignment 就叫我幫佢做。次次功課都 meet 到 deadline 兼成績唔錯，所以幾乎每份功課都係我做的。最後佢衰左響考試手上，入到試場咩都唔識答，佢果十幾萬就咁泡左湯了。

所以為左別人好，我堅持唔再做別人的槍手了。