手拖手

上星期菲菲和老公出席了一個應酬活動，場內大部份的人我們都不認識，亦沒有太大興趣去認識，只是比面朋友出席，好讓她對大會有個交待。呢個活動係一個商業組織的一週年晚宴，會員全部都係跑緊數的人，大家聚在一起就係希望吸納更多 referral，以互動的關係去增加生意。本來呢個概念是不錯的，但係會員要比五位數字的入會費，每星期必須要帶一位新朋友出席活動，以便大會可以吸納更多會員。會員本人的生意有否增長係一個未知之數，不過大會肯定有錢賺。會員大多數係保險、傳銷或小小企，對我們的生意幫助不大，所以純粹係一個比面派對，好讓朋友在晚宴交足人頭，唔駛比會長白眼。

老公係做風水師，會員們對呢位異類亦不大感興趣，所以席間我地兩個自己傾計食飯，大會進行咩環節都好似唔關我地事咁。好不容易到散席時，我地就離開會場歸家去。我地習慣了手拖手，有些人用好奇異的目光注視我們 (兩公婆拖手好平常之嘛，唔駛咁出奇掛？)，終於有一位女士走黎講左句︰「你地都好恩愛喎，拖住手咁行，比著我就一腳伸開個老公勒！」。我和老公聽罷報以微笑，之後一齊加快腳步離開。

別人的家事我地唔會知亦不想知，不過我地兩公婆拖手都可以激發佢心中呢團火，要爆返句︰「伸開個老公」，相信她係喜歡事業多過老公了。菲菲和老公很喜歡齊上齊落，有咩事都共同進退，從來冇諗過要「伸開佢」。唔知係佢覺得老公阻住佢，定係大家未有足夠瞭解就結為夫婦，所以佢會有呢個想法。

菲菲慶幸可以找到對的人過埋下半世，真的是世上最幸福的事。

朋友

如何知道自己有沒有成長？看看身邊的朋友就知一二。

讀書時最要好的朋友當場係同學，出黎社會做事之後就會和同事成為朋友。但係社會經驗漸多，朋友的圈子會不斷產生變化。做生意時會認識做生意的人，在我成為媽媽之後，就認識不少媽媽朋友，大家有共同話題，不亦樂乎。

在這一年間，菲菲的朋友圈子又產生了變化。和媽媽朋友們少了共同話題，菲菲對充滿挑戰的職場再蠢蠢欲動，所以多了不少做生意的朋友。不知不覺中，菲菲亦多了很多學者和醫者朋友，對我來說是一種鼓舞。因為學者和醫者都係有崇高理念的人，就算佢有幾玩得都好，都唔願意和言詞乏味和沒有內涵的人相處，相信菲菲在社會經驗上又多了幾分增長。

老公的學生之中，有好多都係某一個專業領域的導師甚至博士，其中有一對博士夫婦係教氣功和手診，又有教 Reiki 的導師，又有教顱底治療的自然療法醫生，又有中學教師，好一個充滿文化氣息的班底！除了下課後大伙兒去食宵夜互相切磋之外，我亦時常參與他們的各式講座，當中真係學到好多野！今晚就去聽了有關氣功的講座，才恍悟自己有氣功的底子，唔學真係好浪費。菲菲亦準備學基本的顱底治療，原來兩者係有共通和融匯之處，到我學了氣功之後可以為學顱底治療打好根基了。

這班醫者朋友不嫌棄菲菲這個外行人，亦很願意教我很多養生的方法，除了無限感恩之外，仲有對自己的內在提升亦有了些肯定。原來除了跑數之外，菲菲亦有少少內涵，能夠和這班醫者朋友融洽地相處呢！

你會選蠢人定係懶人？

蠢人和懶人，係管理層和老細最唔想見到的人。不幸的是，世上聰明和勤快的人不多，所以我們要學懂點去處理呢D普羅大眾，令公司可以維持正常運作。

友人話，蠢人和懶人，基於「兩害取其輕」的理論，會情願用一個「懶人」都唔想用一個「蠢人」。懶人最多都係唔做野，但係蠢人會做錯野。唔做野可以搵人補位，做錯野要搵人甚至係自己補鑊，當然唔想請蠢人啦！但係我們必須要面對一個好殘酷的現實，不單止係90後，其實任何年齡階層都存在蠢人和懶人，作為管理層的根本避無可避。既然要硬食，不如諗下點哽好過啦。

單單提高自己EQ去屈就，只係斬腳趾避沙蟲的方法，即係唔夠積極。要積極處理佢地，先要搵出蠢和懶的原因，再對症下藥方為上策。

蠢有兩大原因，第一係佢天資有限，真係講極都唔明。呢一類你唔好對佢有期望，咁就唔會失望。不要安排複雜的工作給呢類人，只要安排每天如是的例行公事比佢地就可以了。佢地做到退休都瞭解唔到佢究竟做緊D咩，只知道返工做哂老細「柯打」的工作，月尾就會有糧出。呢類人最適合做刻板的工作，佢地唔會有怨言，亦好樂意去做，因為佢地會做得好好！

第二類蠢人唔係真蠢，係「不懂」。每個人的家庭和工作背景都不同，有D我地以為係「常識」的事，原來佢地係唔識的。唔識唔係罪，唔識就教到識，只要肯比D耐性，一個看似好蠢的人都可以做出成績。當然教的過程係好痛苦，佢地會以為自己識，又或者覺得我地煩，大家千萬不要灰心，因為你炒左佢請過另一個都係咁上下質地，到頭來只有令自己更痛苦。應付呢一類蠢人，係有一段磨合期的，只要捱得過，就會有個好幫手。

至於懶人，大致上都分兩類，第一類係欠缺推動力所以懶。欠缺推動力，一係來自本身冇目標感或冇責任心，一係佢在工作中搵唔到滿足感，所以選擇 hea 住做。呢類人係比較鞋攪的，要為佢建立目標、責任心或其他內元素之前，先要建立互信的關係。佢地唔信公司會比機會，就唔會對工作負責，更不會為事業定下目標。至於佢點先至肯相信公司，定係佢捱唔捱到在被炒之前大徹大悟，就好睇管理層有幾願意花心機去同呢類人建立關係了。當然，遘到頑石時都要平衡付出與收獲，如果付出的心力只可以換取少少回報 (即係佢就算全心全意做足一百分，對公司的利益都影響不大的話)，就有商榷餘地。始終大家都係打份工，唔一定要幫人教埋仔或者付出埋自己的私人時間去招呼一D當你係傻仔的人。

呢類懶人都以為自己已經為公司付出好大努力，以為自己已經做得好好，但係公司依然諸多挑剔，繼而產生不信任公司的負面情緒。同佢地硬併即係等收辭職信，對事情毫無幫助。要處理佢地，要循序漸進，不可操之過急。慢慢加工作量和責任，由小目標和小滿足感慢慢提升上去，佢地先至掌握到工作的節奏，漸漸就可以對公司產生信任和願意付出努力了。

第二類懶人就係工作效率較高，早早已完成工作所以有時間去懶。如果公司有呢類人出現，管理職就責無旁貸了。只要比多D野佢做，自然解決到所謂「懶」的問題。

菲菲初出道時，管理層係唔會教仔咁教，做到就留低，做唔到就OUT。但係現今社會轉變了，唔好用返以前果套黎管現今的打工仔。時移世易，根本不可以比較。我地係木人巷出身的，工作係打拼慣的，但係年輕一代唔係捱出來，係寵出來的。所以我地要管好佢地，在手法上都要有些調節，才配合到「市場需要」。

不要再糾纏甚麼「兩害取其輕」了，係時候深化自己的管理手法，好好瞭解和掌握自己的下屬吧！

奇遇

菲菲的朋友早前簽了一條美容產品線做總代理，據她形容此產品的理念獨特而且效用顯著。友人的本業並非美容業，對美容市場毫無概念，又因為菲菲之前在美容院做時係負責選產品，所以她邀請菲菲去試一試產品的功效。其實菲菲心中有盤算，如果呢隻產品真係咁堅，我會考慮簽呢隻產品的香港代理黎做。

一般做美容產品代理都好重視產品示範，因為客戶們 (即係美容院老細) 都不輕易試產品。要試清楚功效係要將整套產品試上面喎，美容業都係靠面口搵食的行業，如果新產品導致皮膚有咩問題，點做生意呀？就算我而家唔係做緊美容院，但係呢個係美容業的共識，產品示範係一個好重要的環節。

當我去到朋友公司時，朋友將我交左比佢幾位同事「照顧」之後就去做其他事。本來都唔係好重要，但係我見呢個兩個皮膚差勁的女士加一位中年男士的組合，心中暗暗打左個突。未訓上美容床已對產品的信心打了折扣，不過既然答應左朋友，就必定要摒除偏見，試左先至算。

她的同事們好熱情叫我訓上床準備，但係我對呢套美容產品完全未瞭解，唔駛咁心急呀？講解下先都得掛？既然佢地唔講，我就問︰「你地會準備同我做D咩產品呢？」美容師︰「你放心啦，我地會幫你做GA勒。」聽左呢句，先至係最唔放心！連同我做D咩都講唔出，唔係呀？由我訓上美容床的一刻開始，果位中年男士一直在旁邊工作，即係我做緊 facial 時有個男士和我共處一室！呢條麻甩佬好似係佢地上司，唔知佢係想監督定係點，雖然冇出過一粒聲，但係全程冇離開過呢間房，令人感到不安穩，咁我又點可以放鬆地試產品？

到洗面時，我再問︰「你地會同我做咩產品呀？」美容師︰「我地會幫你做個水份面膜。」當時真係想即時落床，有冇攪錯呀？我係專登黎試下呢套產品的威力，你同我做水份面膜？係你唔識美容定係侮辱緊我呀？但係當時菲菲比面朋友無發難，唯有改變策略，再問︰「呢套產品有咩理念GA？」正常黎講，呢個問題係引導佢地大肆炫耀套產品有幾勁，但係佢地三人全部啞哂！菲菲好似問左個好難解答的問題一樣，攪到佢地好尷尬。(乜做產品示範之前冇熟讀產品理念咩？太離譜了！)。之後美容師結結巴巴吐了幾句，大致意思係某某教授研發，可以令肌膚回復青春之類的「行貨」。呢D說話電視廣告都大把啦，算係咩賣點呀？不過菲菲知佢地程度太低，就問返D白痴問題︰「咁我肌齡似幾多歲呀？」其實我係想搵D容易回答的問題去緩和佢地尷尬的氣氛，點知佢地連呢句「行貨」都唔識答，仲發我難渣話呢D野係冇得答的。

當時氣氛好緊張，菲菲塊面響佢手上，唯有封口不再問，由得佢地做完個水份面膜，快D離開現場就算勒。好不容易終於捱完呢次「產品示範」，果條麻甩佬走黎「follow up」，問我做完有冇改善。我答︰「老實講真係冇喎。」麻甩佬唔忿氣︰「唔係呀，洗完面之後都白左啦！」(我心想︰用咩洗面產品洗完都會白左ga啦！我未聽過有產品洗完面會唔白喎！廢話！)菲菲真係不屑同一條麻甩佬討論美容功效，完全唔理佢就走出去搵我朋友。

朋友問我套產品掂唔掂。菲菲問左一句︰「你話唔話到事GA？」言下之意係「如果你話唔到事就唔好浪費大家時間啦」。我從未做過一次咁爛的產品示範，唔知呢套野有幾勁，唔知咩背景咩理念，只係見識左水份面膜！

間公司係朋友的父母開的，「試」完產品之後見到朋友的媽媽，伯母好關心隻產品好唔好，我唯有將整個過程講比佢知，伯母聽完之後都唔知點比反應我。佢問可以點改善，我叫佢地去美容展睇下其他供應商點 sell 客先，之後再講啦。佢地班員工咁既程度，同市場基本標準相差太遙遠了，我真係唔識比意見，因為全程所有細節都係有問題的，點講得哂！

到而家我都唔明，點解會搵條麻甩佬黎 sell 美容產品 ga？見到都倒胃口，同「靚」呢個字完全拉不上關係，點可以在呢行搵食呀？祝我的朋友好運！

我的第一次

菲菲一向不愛夜蒲，更不喜歡落吧，所以對猜枚劈酒之類的活動好陌生。昨晚老公的中學同學好比面，大伙兒在日本料理店包了房間為菲菲興祝生日，菲菲終於獻出了我的第一次。

在飯局中菲菲好似小朋友咁只係飲汽水，佢地就飲清酒。菲菲酒量有限，為免未食完餐飯就醉倒，所以整餐飯都滴酒不沾。到佢地酒過三巡之後，有人提議玩骰盅，我都係睇佢地玩，完全沒有參與。但係佢地玩左一陣之後，唔知邊個提出壽星 (即係我！) 要做莊，佢地要同我玩樓梯莊。菲菲真係唔知咩叫樓梯莊，原來係佢地輪流同我玩，輸左就要飲。嘩！唔係咁激呀？雖然計埋我老公都係一對五，但係飲清酒喎，玩多幾舖都好甘喎！好在菲菲有少少運氣，都唔係輸左好多次，佢地玩左2個回合之後就放過我勒。估唔到菲菲幾十歲人先至第一次比人圍攻飲酒… 哈哈！

好在老公在旁，真係飲醉都唔駛驚，一定返到屋企。

因瞭解而分手

九月下旬，所有學校適應活動都完滿結束了，菲菲的生活要重新編排，相信我都適應了新的生活節奏。

年多前我和老公都投資了一盤小生意，呢盤生意有很多合黟人，我們只是投資性質，很少過問生意上的事。在這年多以來，都知道生意出了不少問題，很多股東都努力挽救，但最近因為一些法律問題需要考慮結業。老實講，我地投資的數目不大，亦不熟呢一行，只係比面性質支持朋友，生意好與壞我地都不抱太大期望。但係一講到要結束生意，有好多平時冇乜點理會的股東都忽然活躍起來，又要問罪，又要查數，又要查文件等等，鬧得很不愉快。

有些股東是打工仔，佢地投資呢盤生意係寄望有朝一日唔駛睇老細面色，可以坐響度收錢。相信好多做緊老細的讀者都知道，做生意係辛苦過打工N倍，如果純粹因為唔想睇人面色而做生意，似乎唔係一個好充份的理由。做生意要睇更多人的面色，人地放左工可以關人忍事，做老細的仲要為盤生意諸多思量，唔好以為做老細好過瘾，心力少D都頂唔住。

當菲菲知道呢盤生意快將玩完時，心中冇咩大感覺。冰封三尺非一日之寒，由開業到而家究竟發生左D咩事菲菲都略有所聞。做生意遇到問題係平常事，不過當中最大的關鍵係管理不善，完全冇一個可以話到事的人去定方向和策略，有問題只懂頭痛醫頭，腳痛醫腳，對問題的徵結一無所知，又點可以令盤生意企得穩？更加唔好講賺錢，唔駛再注資已經偷笑。呢年多以黎我地已經注資左2次，每次注資的錢只足夠應付眼前的問題，再有其他情況出現就攪唔掂。而管理層方面只懂提出問題，卻不懂提出長遠解決方案。在這樣的情況下，菲菲睇唔到呢盤生意會有咩生機。

結束其實係一件好事，好讓眾多發「老細夢」的人醒覺，知道做生意唔係你一言我一語就事成。發起人冇能力去 handle 咁多股東，又冇能力去處理困局，早D結束對大家都好。

對於菲菲來說又學到D咩呢？就係唔好再做好心「支持」朋友攪生意了，免傷和氣亦不要浪費大家的時間和心機。

不要港童

九月第一個星期，相信很多家長都好忙，菲菲都不例外。大仔升K2，比較容易攪，兩歲的細仔今年開始上N班，首星期學校要求家長做伴讀書僮，協助小朋友適應學校生活。呢幾日陪太子讀書，讓我發現香港的孩子有「港童化」的趨勢，而令孩子變成港童的，家長真的責無旁貸。

為了讓細仔適應學校生活，菲菲於開學前一個月已開展特訓，包括︰自行如廁及洗手、限時內食完飯、自己換鞋、自己抹鼻水等等。雖然N班只有十幾個學生，但只有幾位老師，總不能要老師一對一貼身照顧吧！所以他在開學之前必須懂得基本自理能力。這樣到上學時我和細仔都少了一份壓力。

在伴讀期間，看見很多小朋友仍未可以自行進食，要大人追住黎餵食，亦有小朋友不懂自行如廁，很多家長都很擔心自己的小朋友會否得到照顧。更有些小朋友需要家長抱住來上課，不可以自行跟隨老師的指令，如果哭鬧會抱得更緊。這樣可以令小朋友適應到學校生活嗎？菲菲真的存疑。菲菲的細仔在上課時都很緊張，不時望向我或想走到我身邊，但我為了他好，都不可以心軟，點都要佢跟從老師的指示。一星期過後，他總算慢慢享受上課的過程，對老師的信任提高了，可以不需要時常找我。

讓小朋友上學，目的就是讓他過群體生活。如果家長老是抱著不放，他又點可以學懂在群體中生活？這個過程係痛苦的，但可以避免嗎？早一點適應，就可以早一點放心。下星期我們不可以在課室中伴讀了，沒有人貼身照顧了，我和細仔都要堅強面對，他很快就會懂得照顧自己，甚至好像哥哥一樣可以照顧別人了，這樣對他不是更好嗎？

心寒

今日終於睇左9月3日亞視的「ATV焦點」。之前菲菲唔係太明白洗腦教育的定義係D咩，一睇呢條片就明白哂！呢個節目做左一個「國民教育」的示範，實在令人心寒！甚麼「無恥」之類之話，都不足夠去形容。

呢一刻，我深深體會到23年前為什麼會有移民潮。當時菲菲還年輕，感受不到這種切膚之痛。現在這個情況，比血流成河更令人毛骨悚然。這些「教育」是污衊了下一代的心靈、思想和人生觀。是非黑白完全扭曲，甚麼真假對錯失去了據點，不單是平反歷史的問題，連如何做一個人都成問題！

走不是最好的解決方法，抗爭才會建立真正的價值觀，我們更加用身去教自己的下一代。

這個不是甚麼政治問題，係良心問題。我們還有良心的話，要勇敢，要堅持！

鎖鎖碎碎

超過一星期沒有寫網誌了，這星期除了忙於為兩個仔準備開學之外，就係病，病到連思考的力氣都沒有，所以寫唔出，哈哈！

今日陪同細仔返N班，今日係佢人生第一日正式上學，係我地的大日子。呢個小古惑在學校表現淡定，淡定到好似入左定，所以冇咩反應。細仔天生係觀察型，凡事都會先觀察才會出手。有D人認為呢D係慢熱或不夠主動，我就認為係「穩陣」。佢對小眼睛不停留意各人動態，遊樂時間都係「睇定D」先至決定玩D咩，全程不發一言，好嚴肅的一個樣子！呢個星期菲菲每天都要做伴讀書僮，引導他適應學校生活。

另外，這個星期又收到朋友打算離婚的消息，今年聽得太多了，聽到菲菲開始麻木了。麻木不是不仁，而係我可以為佢地做D咩？係咩都做唔到。為佢地的小朋友痛心嗎？人地父母都唔痛心，我咁著緊又點姐？可以幫到呢班單親小朋友嗎？失去父愛可以點彌補？呢D問題應該留返比佢地的父母和家人去思考，我地呢D旁觀者最好唔好參與。

至於我的健康嘛，真係令人氣餒。本來菲菲用緊最溫和的方式去減肥 (生完細女之後變左肥師奶，再唔減我怕會定型)，但係都唔得。我又血壓低又頭暈，肺功能仲衰退緊，醫生嚴重警告我要食多D野，如果唔係會好難攪。呢幾日行步路都冇氣，連手袋都冇力拎，所以完成必須活動之後就臥床休息，希望可以快D復原啦。黎緊的日子如果少見菲菲寫網誌，應該唔係忙到寫唔到，而係身體未夠好姐。哈哈！