兄妹情深

今日孻女和細仔爭住幫手做家務，其實只係好小事，就係爭住將污漕衫放入污衣籃咁小事。但係衫得一件，細仔搶住要做，剛滿一歲的孻女當然唔夠佢爭。刁蠻的孻女爭輸左，就一口咬落細仔度，咬到損左仲有清晰可見的牙印！細仔被咬即時嚎哭，菲菲安撫完細仔之後就去炮製呢個刁蠻女。

佢咁細個，同佢謂道理係未有效果，而且佢只會笑笑口當我唱歌。於是我指住佢個口，話佢唔可以咬哥哥，之後就罰佢自己響間房度。一閂埋房門孻女即時大哭，菲菲硬住心腸在房外留意住，佢一直企在房門哭，知道佢安全就計時，諗住五分鐘左右就放佢出黎。細仔聽見妹妹在房內哭，都不顧自己仲痛緊，走到房門猛敲，仲大叫「妹！妹！」，好似要救返佢出黎咁。

最終我係不忍細仔救妹心切，一分鐘左右我就放左孻女出黎。孻女一出黎就抱住我哭，其實我都好心痛，咁細個BB邊度捨得困住佢丫！鬼叫呢個刁蠻女軟功硬功都唔受，唯有用呢D非常方法。細仔見妹妹「獲救」，就走過去抱住妹妹錫返啖，就係咁呢個小哥哥就唔記得被人咬過的痛楚，又繼續同刁蠻小妹玩。

細仔只有兩歲，就識得咁大方，同埋咁保護妹妹，其實係值得高興的。不過孻女就會變得有持無恐，就算做錯事就會即時得到原諒，菲菲最擔心的，就係呢朵霸王花會被哥哥們寵壞。希望到佢大少少時，同佢講道理會湊效啦。

教育下一代，永遠都係鬥智鬥力的比賽。菲菲加油！