孩子愛閱讀

我的孩子們都愛閱讀，最近讀小學二年級的大仔愛上研究成語，粗略估計佢識得約一百則成語，當中有一半佢係記得典故和歷史背景的。細仔五歲，在大哥的薰陶下，都記得幾十則成語，大部分都懂得運用。

我不是炫耀孩子有幾叻，我相信佢英文水平比某些幼稚園生還要弱，哈哈！重點係，點解佢除了功課和默測考之外仲有閒情逸致去研究成語呢？

幸運地，大哥讀的小學係 happy school，課程編排跟足教科書，從不越級挑戰。一週有2天的下午沒有學科，學校安排了不同的興趣活動讓小朋友輕鬆一下。功課在區內算少，默書測驗也不算緊迫。所以孩子在晚上有空閒時間可以做自己喜歡的事，逕自從書本和網上研究起成語來。

在現今香港教育制度下，絕大部分小學生都背負沈重的學業壓力。學校不斷加功課，家長又怕「蝕底」狂谷小朋友，令大家都過著就快窒息的瘋狂生活。這種生活方式最少要持續六年，想起都教人心寒 。

學習係要講興趣的，唔係夾硬塞啲知識入腦袋就叫做學習。大人返工 OT 得多都想唔撈啦，可憐小朋友返學冇得唔讀。請問係邊個話「求學不是求分數」㗎？咁又有有邊間學校係唔計分呢？哈哈！無言……

Happy school 呢家嘢又係世紀矛盾。家長們又想冇功課壓力，但又想小朋友入讀學術水平高的學校，似乎冇乜可能吧。要 happy 就要在學術上作出取捨，如真係怕輸在起跑線就唔好怨辛苦，這是常識吧！

言歸正傳，因為我仔讀的是 happy school，所以學術水平不高。但在他的世界裡，除了返學放學做功課之外，仲可以玩、睇電視、睇自己鐘意的書、思考一下他的人生哲理 (即係發白日夢 XD)、做下家務，仲可以幫忙跟下細佬妹的功課，係一個比較平衡的生活模式 。我想，這樣的生活模式較容易持續吧！

知識這事兒，不需急於一時的。只要有興趣，就會自己去探求。如果真的冇興趣也不是世界末日吧。何必為爭一日之長短而磨掉大家的意志呢？事實上，有幾多家長真正願意放棄「起跑線」而尋回自我呢？我想當中也有不少掙扎吧。

公園見聞

今日帶小朋友到附近公園玩，天氣清爽，十分舒服。

當孩子們玩緊時，突然聽到一個約五、六歲的小孩大叫：「爺爺！爺爺！你去邊呀？」。他的爺爺正在離開公園，同小孩講：「我去廁所呀，你響度玩吖。」。雖然公園係小朋友地頭，但點都唔會放心到留低個孫自己玩掛？

另一邊，我看到一個小女孩在公園赤足狂奔，冇錯，係赤足呀！留意多佢一陣，發現帶佢黎的係一位女長者，唔知係婆婆定嫲嫲。但點都好，點可以由得小朋友在公園赤足？小朋友腳板仲好嫩，好易受傷吧？

又另一邊有位女長者帶住兩個孫黎玩，一個係會跑會跳的小男孩，另一個係大概一歲的 BB。小男孩和 BB 都坐在公園的滑梯旁玩電芯。坐在滑梯旁已夠危險了，會被其他小朋友撞到，仲要玩電芯，我真係呆了。啲電芯仲要係女長者提供，用腳踢比 BB 玩，極度不可思議！

可能我係怪獸家長，對小朋友太呵護，所以接受唔到老一輩如此湊孫的方式。我慶幸沒有叫老人家幫忙過一天，免得佢地吃力不討好時，我又會心存怨恨。

如何讀小學

臨近開學，好多朋友的子女都升小一，心情既開心又緊張。朋友們都問我小學生活是否好辛苦，我話舒服過幼稚園，朋友們都不大相信。

首先，我亞仔的小學係跟課本程度，一年級就教一年級的書，不會跳教。課本設計係有 logic 的，夾硬跳教只係苦了學生和家長。

課程、功課、默測考呢啲只係其次，家長心態先係最緊要。我認為小學一年級的 focus 係要令小孩適應小學生活，至於功課成績等暫時不是最重要 。一個6歲小孩面對新環境，很多人和事都會帶來衝擊。例如：沒有認識的人、老師較嚴肅、甚麼都要自己照顧自己、在學校內迷路、寫漏手冊、遺失文具等等……

我相信小孩未必好 alert 名次，但以上每件事都會為小孩帶來困擾。我會先讓孩子適應小學的衝擊，令佢對小學有正面觀感，享受小學生活，自然就找到自己路向。

佢抄漏手冊，由得佢欠功課。唔識做功課，由得佢亂做。唔迫佢溫書，由得佢低分。唔見文具唔買，唔見水壺就買個平價水壺比佢頂住先。住何明知的問題我都絕不插手，比佢撞板，親身感受一下挫折。我只在旁引導佢自己分析為何撞板和如何避免，再加以鼓勵和支持，令佢覺得自己好叻，識解決問題。久而久之，佢認為自己懂得掌握小學生活，建立起自信心了。

至於成績嘛，佢自己會去追求的了，不用我操心。

挑戰

挑戰確實會令人成長。

呢幾個月，我要面對很多新事物，新工人、新電腦 (即係新 OS 和 MS Office 2013)、新 project 仲有新課程。所有事物都存在挑戰，我正在逐一破解和適應中。

最棘手的就係新工人，要令一個不需思考的人動腦筋真不容易。我請外傭都係做家務和帶小孩，看似手板眼見功夫，但我的新工人猶如一部機器，只懂做卻沒有腦。佢做家務係好好的，但面對我三個小孩就束手無策，比佢地玩返轉頭，到頭來家中秩序大混亂。

孻女最古惑，明知我唔准佢做的寧，就會叫新工人做。我唔准餵飯和抱，我工人做哂。我叫佢睇住三個唔好做危險動作，佢就掛住玩電話。我另一個工人好心教路，等佢錯少啲，就點知佢地為了爭吵，無視三個小孩正在搗亂。仲有太多，不能盡錄。

我問自己，係咪連一個工人都攪唔掂，係咪咁容易就換人，係咪咁輕易向困難屈服？ Definitely not！如果我炒咗佢，等同宣佈自己無能，為自己在此劃上句號，絕對不能接受！

幸好有老公支持，我終於想到辦法，貫徹我的作風，用好短時間就處理到佢心態問題。Theory XY 看似落後的理論，原來對文化不高思考欠奉的人好有效！

完成哂我手頭上的挑戰後，我知下一步要挑戰甚麼了。人總要有目標，才會活得精彩！

君子愛財

不甘於打份工份糧的人，會做生意或做銷售，希望可以搵更多錢。這種積極的態度是值得鼓勵的。但搵錢的同時都要講下道義。

如客人有真實的需要，但佢未曾 realize 到自己的需要，銷售人員藉著引導和講解去 push 客人下決定，係份內事。如銷量人員希望增加收入而令客人購買了不必要的產品或服務，或提高金額來提升收入，就值得商榷。就算客人幾有錢都好 ，都不能編造藉口，去將自己的不義行為合理化。

君子愛財，取之有道。大家都知呢個道理，但有幾多人係真正明白和實踐到呢？

如果打出幫助別人的旗號去歛財，目的係滿足自己金錢的欲望，我並不欣賞。我不會用「因果報應」此等說話去安慰自己，我只會引以為鑑，時常提醒自己不要利欲薰心，被金錢蒙蔽了良心。

以德服人

作為一個團隊的領袖，有很多方式去帶領自己的團隊。可以好 open 咁大家有傾有講，廣納各人的意見。可以好似軍訓咁，咩都係「This is an order!」，隊員必須服從領袖。亦可以不聞不問，由得隊員自由發揮。

其實冇一個方法係絕對正確或絕對錯誤，只有適唔適合。重視創意的團隊，較 open 的 approach 會較適合。重視紀律的團隊就要絕對服從。如果團隊內有優秀及獨立的隊員，領袖可以讓他們自由發揮，不需太限制他們。

如果領袖比隊員年輕，人生經驗較淺，該如何帶領他們呢？世事無奇不有，這些事是很平常的。

其實作為一個領袖，唔一定要在技術上或經驗上比隊員優勝，亦不需要擺出一副高高在上的姿態去壯膽，有社會經驗的人是不吃這一套的。領袖要夠宏觀，要知道隊員的長處，提供空間和機會比佢地發揮，如遇到問題請隊員提出解決方法，盡量少插手為妙。領袖只需在旁觀察，確保事情在正確軌道和預定時間內完成就可以了。

領袖並不是用來炫耀的，也不是靠踐踏別人來顯出自己有幾威。如果團隊內的優秀隊員都真心真意拜服年輕的領袖，他才是一位出色的領袖。

裁培小孩

今年很不錯，身邊有不少朋友的小孩，在小一派位都獲派第一志願，大家都非常開心。但開心了不到一星期，壓力也開始來了。

有朋友發現獲派的小學水平太高，現在要努力補習去應付小一的進度。有朋友發現學校要求小孩必須有一體一藝，除了比錢上課買衫買器材之外還有評估云云。又有朋友發現書簿費和雜費都不菲，有點失預算。

我覺得好奇怪，家長們唔知一般的「好」學校都係咁咩？要學生出類拔萃，總要付一些代價吧。

另外，今日遇到一位家長朋友，佢個女同我大仔都係小一生。佢個女讀一線小學，媽媽大嘆好辛苦。不過呻辛苦的潛台詞係佢個女好叻，英文又好，課外活動又勁云云。我應亞仔要求 cut 哂所有課外活動，所以我唔辛苦又冇嘢可以 show off。呢位家長好震驚，佢話我個仔已經唔係讀一線小學，學業唔夠人爭，仲要冇課外活動，認為我在摧毀亞仔的前途。

講真，我絕對唔認同佢的諗法。我見盡太多有知識但冇思想的人，呢啲人比文盲更可怕。如果要我將小朋友變成倒模式填鴨，令佢失去自我，同扼殺佢未來有咩分別？

我相信有好多人唔認同我，唔緊要的。沒有一個方式是絕對正確，我只會找尋更加適合的模式。我心中自有裁培小孩的策略，但絕不是一般人正在採用的方式。因為，我知道過於控制和催谷，係會有反效果的。

山埃貼士

最近遇到好幾位剛從事保險業的初哥，他們都一腔熱誠地向身邊的人講保險。我有留意佢地的 presentation，發現有幾個共通點。

1. 講多過聽
可能係初當銷售，以為要滔滔不絕咁講嘢先至似係 sell 緊嘢。又可能係想掩飾自己無信心，所以不斷講嘢黎壯膽。無論係邊一個原因都好，講多過聽一定會趕客。

其實在銷售過程，最重要係知個客想要啲咩，因咩原因想要，在解決過程中唔明啲咩，同埋可以付出幾多去解決佢心中的疑慮。一般情況客人唔會主動講，係要 agent 懂得問。但我發現冇一個新 agent 識問問題，只懂講個 plan 點勁，完全錯哂方向。

2. 和準客爭拗
當客人提出不同意見時，就急不及待要「糾正」佢，講講下就會變成爭拗。相信冇一個客係因為你拗贏咗而同你買單的，對嗎？客人提出不同意見，正好有機會瞭解客人多點，但好多新 agent 會親手扼殺呢個大好機會。

3. 不斷比較產品
每間公司都有自己的優勢，每種 plan 都有不同的特色。盲目地比較產品其實很不智。百貨撞百客，每種計劃都有人 buy 有人唔 buy。Agent 要攪清楚的，係邊種計劃較適合，而不是較好。

以上種種，都係 agent 大忌。但有趣的事，原來呢啲「招數」都係上司教的，真係匪夷所思！究竟係上司都唔識 sell 定係唔識教？

呢啲所謂「招數」係萬試萬靈的山埃毒藥，如果全部做齊點開單呀？有部分公司更將以上招數列入 training manual，要 agent 背熟來應付客人，實在離以想像，點解今天的 training 會係咁？

定係 agent 本身學啲唔學啲，最重要的 fact find 就唔學，淨係學點去 ko 啲客嘅口術呢？

Who knows?

效率 vs 發展

我的其中一個工人完了約返了老家，新聘的工人下星期才報到。在這段間，就只有我和一個工人，去照顧三個小孩。

少了一個工人，家中的效率快了很多。小孩可以早些出門上學，晚飯後可以早點打理完家務，小孩比平時更早上床睡覺，一切都變得爽快了。

原因好簡單，我做事效率快，利落又準確。其實做家務帶小孩，大部分工序和流程都是 routine 工作，變化不大，根本不是甚麼難題，唯一的缺點就是困身。

既然我做得比工人好，為何我仲要請工人？因為有多一個工人，我就可以抽身，不用落場處理雜務。這樣我可以專注各家庭成員的 development，優化各人的素質。

要令家中各人 (包括老公、自己、小孩和工人) 都不斷進步，係要有觀察、辦識和思考空間的。過於投入雜務，腦袋就會被瑣事充塞，埋沒了思考空間。

在長遠來說，development 一定比效率重要。所以我很期待新工人上任，我們又可以繼續向前邁進了。

這種想法，不單家中適用，在工作中都適用，對吧？

兵行險著

呢幾日我抱恙在家，發覺工人 B 有異樣。平日佢好醒目，我未講佢都知我想要乜，但呢幾日佢心神彷彿，又不時同家人傾電話，所以我估佢屋企出咗啲事。

佢屋企確係有啲事，不過唔係咩生死存亡的事，係佢的兩個女兒不受管教的問題。呢啲情況好常見，工人千里迢迢來打工，根本不可能親自教育子女，往往用錢和物質去滿足他們，當係彌補失去的母愛。但為了生活，他們似乎別無選擇。

工人的女兒們有幾反叛先不說，她在印尼還有其他家人，但她的家人一遇到管教問題就打電話比佢，要佢解決。之前我已經教育過工人，如果佢黎香港負責搵錢，家人就要幫忙管教。佢一個人冇可能又在香港搵錢又要兼顧印尼的家事吧？經過多年的教育，她的家人總算可以幫到一點忙，令佢可以專注工作。

這幾天，佢兩個女各有各反叛，攪到佢家人一頭煙，又打黎香港求救。今次工人顯得有啲失控，不斷做錯嘢之餘又喊哂咁，完全亂哂陣腳。我叫佢冷靜叫咗幾次都停唔到，不斷哭哭啼啼要生要死咁。佢繼續咁落去都唔係辦法，於是我狠狼地拍檯講：「既然你屋企人攪唔掂，我聽日即刻買張機票比你返印尼攪掂佢！」。

唔單止工人嘛親，連我老公都窒一窒。當時工人仲繼續喊，我講完就走入房冇理佢。其實，我係出最後通牒比佢，如果佢仲未令家人有能力自行處理家事，就唔好搵錢返老家攬住一齊喊啦。

看似好無情，其實我係肉赤佢。佢長時間見唔到啲女，做媽媽的會好受嗎？每當家人來電都係數落佢啲女有幾唔聽話，佢會不心痛嗎？

換一個角度睇，工人寧願忍痛都要搵錢養活成家人，她的家人不是有責任幫忙管教她的孩子嗎？直接啲講，食佢嘅住佢嘅但唔肯幫佢管教小朋友，仲不停數佢啲女有幾衰，係咩所為？

最終我的威脅有效了，佢屋企人怕佢冇咗份工，忽然間所有問題都解決到了。唉！好言相勸聽唔入耳，係要迫人抓爛塊面。

其實，如果佢真係走返老家我好大鑊的，佢真係好幫得手。兼且我另一個工人快完約返印尼了，如果佢走埋後果都好嚴重。但我都夠薑兇佢，因為我知佢底線，冇咗份工佢地全家下個月即刻冇飯開，佢風險比我大，所以我有本錢 show 佢 hand。

但只此一次，下次就無效了。希望佢屋企人生性啦！

比賽

我的細仔有學普通話，久唔久都會去參加下朗誦比賽。平時聽佢講普通話，發音不太標準，有很多懶音，面對人群會好緊張，好明顯去比賽只係志在參與，訓練下自信心，求其有張證書比佢影下相開心下就算。

昨日細仔又有比賽，平時我係唔會通知其他人，但今次巧合地有親戚知道了，發了一段錄音來「鼓勵」佢，希望佢得到冠軍云云。可能一般人都會咁樣鼓勵小孩，不過我不認同。每個人最需要戰勝的，並不是其他人，而是自己。冠軍並不是甚麼鼓勵，反而是一種壓力，一種會毀掉人的壓力。

每次比賽，都抱著擴闊視野的心態去參加，才會有真正的得著和真正的成長。獎項只是錦上添花，不要太重視得失，你得到的才會越多。

我有此諗法，並不是我從未得過獎，所以諗呢啲嘢黎安慰自己。獎項只是一個時段的肯定，一場比賽完結後，另一場立即就開始了。這是一個沒完沒了的競賽，一時之高下又何足掛齒？

收到親戚的錄音之後，我細仔都回覆了「唔一定要攞冠軍㗎，咁樣比賽先會開心！」。Dearest son, I am proud of you!

增廣見聞

昨日幼稚園有舊生活動，大仔和一班幼稚園同學又再聚首。無見幾個月，個個都明顯長大了，連我都增廣見聞了。

有位小男孩走來同我講咗句：「死八婆」，我唔肯定佢真係罵我，定係覺得呢句說話好得意，所以當係同我玩。我即時同佢媽媽講，佢媽媽好輕描淡寫咁答：「上咗小學係咁㗎啦，啲高年班都成日講啦。」。

言下之意，你即係認為個仔隨意罵人死八婆都冇問題，係我大驚小怪。同埋既然學校啲哥哥姐姐都係咁啦，佢學識講呢啲說話純屬正常。

我明白小朋友有時係唔識分邊啲係好榜樣邊啲係壞習慣，但作為父母都唔好好引導小孩去分辨是非，仲默許佢繼續發展壞習慣，我真係無法認同呢種做法。

算啦，人地個仔做咩我理唔到，既然唔認同佢地就少見為妙啦。

不是朋友

世事好諷刺，當一個女人沒有返工的時候，有些人會認為你冇價值。一次又一次比人當你透明，經常性是一個可有可無的路人甲，有時難免會感到不快。

要放棄事業去打理一個家，當中的爭札有誰會明白？難道為了證明自己而放棄自己下一代嗎？在別人眼中，係我好彩嫁到個好老公。有幾多人會明白，其實我老公都幸運，娶咗個可以攪掂哂佢背後所有事的老婆？可能有些人只懂看表面，所以在某些人眼中我並不是一個值得交往的人。

唔緊要，好好肯定，呢個係你嘅損失。最少，你損失了一個關係。而在我心目中，你已失掉了所有人credits，已不是朋友了。

筍工

最近我朋友公司請人，講明有底薪有高佣金，有 training 仲要返五日，條件幾吸引，不過一睇就知係打新 market 的 sales 崗位。我幫佢 fwd 去朋友群組，睇下有冇人想搵 sales 工。

好快就有幾位朋友私訊我，問有冇唔係 sales 的工。會唔會攪錯咗啲嘢呢？我唔係 recruitment agency，唔會有好多工擺響度等你揀喎。

又另外有朋友私訊我，問係唔係 office 工。真係啼笑皆非，如果有客搵上門比你 sell 就唔駛出高佣金啦！梗係要你出去打啲新客返黎先值得有高佣金呀？

又想搵多啲錢但又唔願出多啲力，無言。

和誰在一起

你有甚麼朋友，就反映了你內心有甚麼追求和有甚麼傾向。

喜歡和懶人在一起，就會變得更懶。
喜歡和有錢人在一起，心中最渴望的是金錢。
喜歡和有品味的人在一起，你的生活會更有品味。
喜歡和聰明人在一起，就會變得更聰明。
喜歡和有才能的人相處，你的才能必會提升。
喜歡和有智慧的人相處，你的人生會更有得著。

要瞭解一個人不難，看看他的朋友，就一目了然。

同樣地，你有甚麼下屬，就反映了你是一個怎樣的上司。

如果你認為下屬是廢柴，你就是一個廢柴上司。
如果你認為下屬很能幹，你就是一位能幹的上司。

別抱怨下屬無能，先檢討下自己，為甚麼帶不起他們的工作能力？強將手下無弱兵，細味一下，就知自己有幾多實力。

如此類推，你身邊的每一個人，都在反映你自己。

答案永遠都在問題。

不受氣的生意

菲菲近年愛上網購，皆因方便，多選擇又唔駛周圍格價。我多在 Instagram 買嘢，貨品種類較多和較 update。

在這段時間的購買經驗中，睇到好多賣家的人生百態。在早期試過幫趁一個賣家，貨品寄失了，但她在 IG 或任何訊息都冇講明郵寄風險的處理方法，賣家只係一句 sorry 就了事。雖然貨物價格不高，但佢沒有考慮長遠留住熟客呢點，我唯有當買個教訓，unfollow 佢就算。

既然郵寄有風險，我就改用當面交收吧。又試過有另一個賣家，交收時遲到成粒鐘，佢不斷發訊息話我知「黎緊」，香港唔係大到咁呀？地鐵會塞車嗎？於是在這次交收之後我又 unfollow 了她。

在網上買嘢，為了貪方便，反而造成不便，多諷刺！不過唔係個個都咁甩皮甩骨的，都有好多負責任的賣家，我會繼續支持真心創業的年青人。

最攪笑係，有好多賣家都在自我介紹中列明「不做受氣生意」和「把棄單者開名」。哈哈！做生意面對各式人等，受氣和棄單本是營商的一般風險，咁都承受唔起？客人要承受郵寄和賣家遲到的風險，點解賺錢的一方卻不能承受這些一般風險？

可能好多賣家只係做買賣，不是在做生意。生意係有來有往，有得有失的。學懂去評估和正面地處理風險，才是生意吧。覺得受氣，究竟係客人問題定係自己溝通問題？我夠膽講句，客人比氣你受，證明你功力未夠，未有足夠能力去處理不同的客人，所以會覺得受氣。

至於客人棄單，直接把貨物賣給其他人吧！有咩好嬲？仲要開人名？雖然我從未棄過單，但我真係唔敢幫趁囉。

再刁難的客戶都處理到，再多的滯貨都賣得出，你的生意就真正可以越做越大了。

大家努力，共勉之！