愛心爆棚

身邊的每一個圈子，總有一兩個願意為大眾付出而且是愛心爆棚的人，我他們彷彿是團隊中的愛心大使。

這些愛心大使義無反顧的付出，的確為大家增添了不少力量。但在另一個角度睇，係助長咗一班凡事都依賴的懶人。

本來一個願打一個願捱，係冇咩可以批評的。但在團隊運作上，就逐漸形成愛心大使咩都做哂，做埋班懶人的「阿四」。而班懶人就越黎越老奉，甚至連自己的責任都推埋比愛心大使。久而久之，愛心大使都會不勝負荷，團隊的運作就會面臨崩潰。

凡事追求結果的我，最近都忍唔住要插手，狠狠地插咗班懶人一嘢。實在離譜到不能接受，在活動開始前不足一小時，才玩失蹤，一個 whatsapp 就要愛心大使頂埋佢嗰份，有冇咁不負責任呀？

愛心大使一臉無奈，我就老實不客氣在 whatsapp 喪插條友。事後我有檢討過，係咪自己太燥底，又亂開火。經過一輪沉澱和討論之後，今次絕對不是一時之氣。佢玩臨時甩底已不是第一次，而愛心大使都幫佢頂咗好多次。每次佢都若無其事咁一點歉意都冇，如果咁都唔駛丙，以後點服眾？

佢可能完全聽唔入耳，亦有機會玩永久失蹤。但在整個團隊的利益上，我點可以縱容一個如此不負責任的人來破壞團結精神呢？

愛心大使們，都應該為自己設下底線，不要被人利用了自己的愛心。

愉快學習

有很多家長都渴望子女成績好，甚至我認識有人要求自己個女每次都要 100分。佢話如果個女冇 100分就會唔睬佢，唔駛咁極端呀？

其實我的兩個讀緊小學的仔成續都 ok，但 100分就不常見。老公話想兩個仔努力啲，就推出一個獎勵計劃。只要累積三次 100分，就可以換領一份禮物。

呢個計劃推出咗唔夠一個月，兩人都達標了2次，即係每人都換了2次禮物。有人話我們功利主義，用物質引誘小孩。乜在呢個世界搵食唔係咁嘅咩？用自己努力換取想得到的回報，不是我們每天在做的事嗎？

講返讀書，目的都係求學問。我覺得九十幾分同 100分的分別，唔係識唔識的問題，係認唔認真的問題。我們只係用獎勵方式去令佢地更認真，而呢份認真係可以獲得肯定的，而且係可以換來快樂的，有何不妥？

在我而言，咩叫愉快學習？學習的過程不一定愉快，甚或有點艱苦。但努力後得到的結果，會令自己很愉快。就正如我們做人一樣，要有經歷有磨練，才會得到更美好的成果。

不需要退休

昨天和老公在上課前食下午茶的時候，在餐廳裡有一位長者和侍應閒聊。

他們的對話沒有甚麼特別，都係閒話家常，想下當年咁。重點不是內容，是氣氛。這位長者已退休，我估他的家人都在事業拚搏中，不能時常陪伴他。他已用餐完畢，但完全不想離開。彷彿步出餐廳後都不知去哪裡消磨，所以找侍應來打發時間。

看到這種場面，我和老公講：「好在我們不用退休，不用想辦法來打發時間。」。

很多人都希望可以提早退休，可以逃離職場，過自己的人生。慶幸我們的工作就是人生，我們不需要逃離。沒有工作，沒有寄託，這種退休後的生活對於我來說是一個惡夢。到我年長後，可能我不需要為錢而工作，但我需要為意義而工作，繼續燃亮我的生命。

我真的很感恩，我們能走上玄學這條康莊大道。

做人大嫂唔容易

九月一向是最忙的月份，開學、中秋和很多家人的生日聚會。

剛剛又籌備了奶奶的生日飯，只是一圍咁多人之嘛，但籌備功夫絕不簡單。奶奶不是愛舖張的人，其實只係去酒樓 book一張枱，之後再 book 一個蛋糕罷了，但當中的過程係好考 EQ、耐性和溝通技巧的。

當老公提出食飯時，有親友就提議地點。可能只有我們有小孩，佢提議的地點是不適合帶小孩去的。提議地點的同時，又「叮囑」我唔好買大蛋榚，因為奶奶有糖尿唔食得甜。我知吖，所以已經 cut 哂所有應節食品，過時過節我咩都唔送，免得貼錢買難受。

其實當刻我係有啲火起的，佢唔識選地點冇問題，個蛋糕都係影下相，最終都係小朋友食大部份，唔駛咁快落哂閘呀？我買比自己食唔得呀？重點係，呢位親友係我後輩，一出言就好似發號施令咁，太冇禮貌了。

好，我大人有大量，就逐點列名原因同佢講解。佢最後都接受我的提議，當時的感覺似係我教緊仔，顯淺的道理都要由零講起才明白，吹漲！

我們提議的酒樓是集團式，有好多分店的。之後又有另一位親友話去佢地附近嗰間。天呀！我帶住幾個細路加一個蛋糕去你附近嗰間，堅冇同理心！好在老公夠 power，即時 turn down 佢地的要求，去返我們附近的分店。

佢地可能認為我們要遷就老人家才會有 objection。無問題的，一係佢地自己攪返囉，我唔會有意見。就係每次佢地攪親都爛尾，一係場地太迫太吵，一係預食物太多，一係時間太緊迫，攪到大家唔開心，老公先至要我攪。我唔介意攪的，我估如果我不做中間人，大家係約唔到食飯。到時奶奶會以為我唔比佢見啲孫，呢個罪名我擔當唔起呀。

街坊專家

昨日在某媽媽群組見到有人話服用香薰油，跟住就有其他媽媽急不及待話：「我睇過報導，香薰油係唔食得喎！」。之後一大群人你一言我一語咁，好快就講到嗰位媽媽收咗皮。大家彷彿是聖人，正在努力拯救世界咁。

報導？係咩報導同係邊個寫㗎？詳細內容係點㗎？似乎無從稽考。

香薰呢家嘢，我只懂皮毛。我知有啲係可以服用的，但我冇研究香薰咁多年，在腦海中完全抓不到任何記憶。不過重點唔係香薰食唔食得，重點係太多人睇咗啲唔知咩報導就扮專家，到處危言聳聽。

又例如營養學，食維他命 C 可以提高抵抗力，這是基礎常識。至於維他命 C 有咩類別，在甚麼情況下吸收或排出，在甚麼情況下要攝取幾多份量，有幾多人會去採討？

有一次我的小朋友初起感冒，我就用多次少量的方式比維他命 C 佢地食，係 supplement 嗰種，唔係沖水出氣泡嗰種。食咗一日，訓醒一覺就精神爽利上學去。有人質疑我點解唔帶佢地去睇醫生，有人話我比太多維他命 C 會生腎石云云。經過嗰一次，我明白無知就好似自殺式炸彈咁，要迫人攪炒。

我唔想比較西醫和營養學，因各有所長根本無得比。但在小病時我係採用營養學的方法，因為我學過，所以識用。食幾多維他命 C 先會生腎石？我可以講，飲幾多水同飲咩水先係關鍵！

太多人看了冰山一角的報導就以為自己睇緊研究報告。而且多數呢類報導都係出自讀新聞系的記者，並唔係讀營養學的學者。大家的專業範疇都唔同，對於我黎講同睇娛樂新聞冇分別，都係得啖笑。

做健康產業的朋友們，快啲好好教育下啲家長吧，可以拯救到好多小朋友㗎！

知性美女

今天開學日，上小學的兩個哥哥要早些出門，妹妹唔駛咁早返學，我就同妹妹傾下密偈。

我：「今日可以見返班同學仔，你最掛住邊個呀？」
妹妹皺起眉頭擰頭。
我講咗幾個同學的名字，妹妹都繼續擰頭。
我：「你同小慧最好朋友喎，你唔掛住佢咩？」
妹：「佢唔同我玩呀……」
我：「點解呀？」
妹：「佢話我貪靚係唔啱，所以唔同我玩。」

估唔到在五歲女孩的社交生活中，已開始爭研鬥麗了。我都唔扮謙虛，我個女樣子標緻，有一頭及腰的長曲髮，老師們都好鍾意佢。因為佢在班中都係數一數二的靚女，幾乎所有表演都安排佢在前排中央位置，難免惹人妒忌。

女孩排斥靚女係自然現象，但我堅持女性無論咩年紀都要扮靚。由 BB 開始我就為我的寶貝女扮靚，靚已經成為佢生活一部分 。沒有外在美，邊個有興趣瞭解你有冇內在美？

靚女除咗要識扮靚，仲要豐富內涵和提升修養。我就藉住呢個機會，向女兒灌輸成為靚女的內在條件。

第一，要繼續堅持自己愛美的追求，不要因為別人的說話而扭曲自己。連自己的儀容都堅持唔到，佢將來長大仲有能耐堅持其他嘢嗎？

第二，別人因為做不到而妒忌，絕對不是自己的錯。講真，做靚女好忙㗎，淨係打理把長髮都要唔少時間啦，要靚真係要勤力㗎！

第三，佢要走知性美女的路線 (小孩理解為又靚又叻)，就預咗比大部分女孩排斥。基於吸引力法則，被排斥係好正常。因為知性美女與眾不同，有個人風格，有獨特見解，能幹又細心，一般人是接受不了她的氣場的。

我好細個就想成為一個又靚又叻的事業女性，奈何被家人打壓不准我扮靚。到我有能力裝扮自己就被視為反叛，總之愛美就是錯。但我相信女兒是一個比我更出色的人，為了讓她更出眾，我會陪她走過每一段被排斥的路。

不用體罰

在好多媽咪群組都見到有媽媽談及體罰，仲有好多心得。例如：點樣打、用咩武器、幾時打等等。講體罰講到寫論文咁，好似好有道理。其實不體罰真係教唔到小朋友嗎？

如果你希望小朋友潛意識中有「暴力可以解決問題」的因子，就繼續體罰吧。很多人都低估了體罰的嚴重性，有誰可以確保自己在體罰孩子時不帶情緒？有誰可確保體罰不會令小朋友受傷？有誰可確保體罰不傷害親子關係？

我的小朋友都會爭玩具，都會爭執，都會搗蛋，都會在我最忙亂的時候為我添麻煩。值我堅持不體罰。

在大家情緒都不穩定時，最好大家都冷靜下。我會叫佢地在家中不同的角落罰企，面壁思過。而我就躲在房中冷靜一下，整理好思緒，才去處理大家的問題。

到我冷靜過後，確保不帶情緒，才開始和小孩們逐一對話。對話是有問有答，不是我在唱獨腳戲一味在罵。要讓小孩懂性，就要讓他們思考。單向的責罵或說教都是冇用我。在對話過程中，孩子會自己發掘錯在哪裡，為甚麼辰改和該如何去改。

在教導孩子中，要孩子明白「為甚麼」是最重要的。如果他們不知道為甚麼被罰和為甚麼要改，問題只會惡化，犯錯會一次比一次嚴重。

教仔同醫病一樣，都係病向淺中醫。就算孩子犯的錯再細，都要教大道理。每一件事重複發生，都會潛移默化，融入細胞中。體罰越多，小孩的暴力傾向越大。對話越多，小孩的分析和思考力就會越高。

如何培育一個小孩，父母是有得揀的。

眼睛可騙人

眼睛看到的就是真相嗎？

則才我們一家在繁忙時間搭地鐵，我和老公先入，小孩和工人跟著我們後面。我踏入車廂後就擰轉身睇細路，正當我轉身時，站在我背後的人推我，我幾乎失重心向前傾。如果我真係向前傾，就會將我啲細路撞開。被推的一刻，我微微轉頭講：「唔好推啦，有小朋友呀！」。語畢，後面的人自己退後了。

我老公在我身旁，佢唔知有人推我，佢以為我無啦啦鬧站在我身旁的一對母女，就出口話我鬧錯人。仲話係亞仔撞到我，唔關人事。

到站了，我們下車，仔女隨工人回家，我和老公繼續行程。

待仔女離去後我先同老公請返件事。老公話我係向住對母女講，佢見人地黑面，所以先至話我。推我的人在後面呀，我個頭唔識擰 180 度㗎，點向住當事人呀？我同老公講：「我講完嗰句，推我的人已經退後，你梗係睇唔到啦。對母女冇推過我都以為我話佢地，唔係我問題，係佢地問題喎。仲有，亞仔明明冇推我，做咩要話佢？」。

老公無言，原來佢親眼目睹的竟然不是事實。

大家有試過因為「看見」而怪錯人嗎？我們有眼耳鼻舌身這五感，為何只相信眼睛？要騙過眼睛是最容易的，要騙過整體感覺就困難得多了。

下次在責備別人之前，請多搜集資訊，避免被人認為你魯莽、武斷和容易受騙。

健康的堅持

某位從事健康產業的親友，帶我的大仔去食下午茶。他們在美式 cafe 點了炸薯角和雞翼，親友點了杯凍檸茶走甜比我仔飲。在進食期間仲拍下短片留念。在短片中親友問大仔：「杯檸檬茶好唔好飲呀？」。鏡頭中的大仔一臉尷尬地回答：「我覺得有少少唔好飲啦。」。

自我感覺良好的我認為，只有8歲的大仔已經回答得好得體了。凍檸茶走甜，除了苦澀味之外，還有甚麼味呢？冇可能會認為好味掛？

因為親友從事健康產業，所以反對小朋友飲含糖飲品。我都贊成小朋友少飲這些飲品，所以我係索性比水佢地飲，而唔會比杯凍檸茶走甜佢飲咁不倫不類。

從事健康產業的朋友，請在生活上加返點人情味，味覺係好直接影響感覺和心情的。在追求健康時忽略感覺和心情，誰有本事堅持一生一世呢？

淺談健康產業

身邊有很多人從事健康產業，即係做健康補充品、美容品、水機、紅外線床墊之類的行業。我和老公年輕時都做過，老公更是做得很出色的那一批。

健康產業需求越來越大，按道理從事健康產業的人應該係搵到錢的。但事實上有大多數從事健康產業的不但搵不到錢，仲好神憎鬼厭。點解呢？

大多數健康產業都係行直銷模式，即係以人傳人的方式去發展。如果人的質數好，就係以生命影響生命，令更多人得到健康，實在非常偉大。反之，就會係 hard sell 甚至被演化成迫人買貨買職級的所謂「騙局」。

另一種我最常邁到又最令我反感的，就係打著健康生活的旗號，猛批評我的生活模式。咩早睡早起，多做運動，少肉多菜，少油鹽糖，戒甜品罐頭即食麵之類，對大多數香港都市人黎講都係不容易的。更加唔好叫人戒煙戒酒呢啲不受歡迎的話題。我唔係鼓吹不健康的生活，問題係要人一下子扭轉整個生活模式，在大多數人心中似乎係 mission impossible。

咁點先可以在這環境中鼓吹健康呀？其實好簡單，叫人戒乜戒物就話乞人憎姐，但叫人食健康食品去改善體質就冇咁大阻力。舉例：吸煙會消耗維他命 C，吸煙人士就要攝取更多維他命 C 來補充。結果係：冇叫人戒煙但健康產品會比「非煙民」食多咗，即係生意仲好做咗。

做咗客戶，再慢慢教育佢都唔遲吖。駛乜搬啲大道理出黎趕客咁 stupid 吖，呢啲叫吃力不討好，是做人做生意的大忌呢！

珍貴的回饋

上回講到大仔得了服務獎，我和老公都出席了頒獎典禮捧亞仔場。

到達學校時，見家長並不多，與幼稚園時的墟冚情況完全唔同。到正式頒獎時，先發現原來每班只有幾位小朋友得獎，服務獎只有一位得獎者。當下才知道這個服務獎不是豬肉獎，是全班最有服務精神的同學才可獲獎。

我真係好開心，亞仔真係學懂了做人的點點道理，願意為同學們付出，亦得到老師的認同。學做人比學知識要困難得多，他得了這個獎，對於我來說是一個很珍貴的回饋

經營婚姻

昨晚和老公閒聊，佢話見人地湊初生嬰兒時日以繼夜冇覺好訓，我們有三個小孩但佢都唔覺自己要幫手湊，結論係覺得我好勁。

我諗我最勁一定唔係湊仔，係湊老公。好多新手媽媽都怪責老公不幫忙湊 B，或者怨老公 / 長老們湊得唔好。其實呢啲所謂「合理」的訴求都是破壞關係的元兇。

老公們唔識湊仔，不是新聞啦！反而識湊仔嘅老公先係傳奇，值得大力嘉許。老人家湊仔，你預咗係求其啲 (回想下自己童年就明白)，加上年紀體力等因素，同埋老人家必定會縱孫，你估作為媽媽的可以要求啲咩？如果當了媽媽都一定要外出工作，要靠老人家幫手湊仔，你最好當自己咩都唔到，免生磨擦。

頭先我話識湊老公，重點係盡量唔駛佢湊，減低佢壓力。亦唔需要老人家湊，減低磨擦機會。只要老公不受嬰兒的起居飲食所影響，大家就唔會為湊小朋友而爭吵，夫妻關係少點挑戰。

可能你會認為：個仔跟佢姓㗎，有乜理由我做哂仲要唔好煩到佢呀？我有好多朋友就係咁，最後都把老公迫走了。當然在佢地心目中係認為男人不負責任，掉低老婆仔女出去搵女人。你可以咁認為，但我明白係男人們實在唔識點去遷就老婆，做又錯唔做又錯，唯有在外尋找自由的空氣。

我會睇遠一啲，生小孩就係真正組織家庭的一步，湊 BB 的艱辛都係兩年內的事，人生幾十年，值得為兩年去換下半世的幸福嗎？

老公今天看見別人的情況，深深體會到我有多照顧他感受。我們的感情肯定是更穩固，婚姻就是這樣一點一滴地經營出來吧。

又係制度問題？

本來冇追電視，但「贏在射精前」呢句實在太爆，吸引我上網睇返呢個節目有幾勁。

講真我覺得節目內容誇張得黎都算寫實。身邊確有一班人有呢個想法，亦在付諸實行。佢地咁落力去催谷小朋友，最大嘅「原動力」就係香港的教育制度。

我都唔認同香港的教育制度，但我的著眼點並非培育小朋友成為制度下的奴隸，所以我對教育制度本身冇咩感覺。我讀書比我老公多，但而家我們一家五口，加埋工人和貓星人，都係我老公獨力賺錢養家。咁學歷其實代表到啲咩？

有點社會經驗的人，都知道做生意比打工更有機會賺多點錢。投資又比做生意更易賺到錢，當然更易蝕錢啦。
做生意和投資，最緊要的不是學歷和知識，而係心態！

既然心態比一切重要，為甚麼要用繁忙的時間表去磨掉小孩的自我呢？講到尾都係教育制度的問題吖嘛。其實跟制度走只會製造跟隨者 (followers)，不受制度束縛就會啟發創造者 (creators)。

選擇比機會重要，大家都識講，但有幾多個夠膽做？

宣佈

Leader 同 Manager 有咩分別，相信大家在網上很容易就找到海量的資料。但我處於一個非常尷尬的位置，在工作上我的位置該是 Manager，但實質上我要發揮 Leader 的特質，才會把我的頂頭老細 (我老公) 發揮得更加好。或者換個形容詞，我是經理人，他是 artist，這樣會更貼切。

因為我老公係玄學家，工作就是幫客人解決奇難雜症，久而久之大家會認為佢係萬能。每一個人都有強弱項，哪有萬能的可能？所以在某些情況下，我要擋在他面前，好像經理人保護 artist 一樣。

明事理的，會認為我們向展所長，萌塞的就認為我該回家湊仔，男人的事最好不要管。

曾經我自己都處於進退兩難的位置，但我堅信我所做的事全部都係為我老公著想，旁觀者憑甚麼說三道四？

時間就是最好的證明，這幾年我的默默付出，是有回報的。既然沒有了包袱，我可以大聲宣佈：

我的崗位是師母！是一個在學術以外，用心教化每一個學生，令他們向善的師母。

教育界的市場變化

今天小一派位，我的 whatsapp 群組不斷傳來報喜和恭賀的訊息，似乎今年大家都派到心儀學校。睇返幼稚園公佈的結果，明白了為何可以皆大歡喜了。

因為今年很多家長都選了二線小學做首選，有幾間一線小學好似完全冇人揀咁，命中率當然高好多。另一方面，可能大家都厭倦了沉重的功課壓力，所以摒棄了一線學校，大家不用做功課奴隸。

這個趨勢很好呀，家長們先醒覺，不去追捧催谷過度的學校，那些學校就不會以「受家長歡迎」這等謬論去證明自己是對的。

教育界是是很崇高的，用經濟學的「Demand and Supply」去討論實在有點不敬。但事實上，如大多數家長都傾向 happy school，那著重 academic 的學校就會漸漸出現收生危機。學校在面對收生此等大事，自然會有點自我調整了。

只要相信，就會發生。家長們都可以有力量去改變教育制度的。

小改動，大改善

小時候父母有教，如別人對你好，你都要對別人好。長大了，體驗多了，發現這個「道理」似乎有點漏洞。

首先是潛台詞的問題，把以上道理反過來，豈不是「如別人對你不好，你就要對別人不好」嗎？這是個冤冤相報的惡性循環吧！

如果要真正啟發孩子善良的心，可以把字眼稍為改動一下，成為「如果你想別人對你好，你就先要對別人好」。把被動轉成主動。基於吸引力法則，率先散發正能量，才會吸引更多的正能量，對吧？

就算不是每個人都給你正面的回饋，也不打緊。至少自己無愧於心，也是一個重要的處世道理呢。

無論行善或行惡，都會成為習慣，成為自己的氣場。別人修不修善，我們管不著。但為自己和自己的下一代修善，我們絕對有能力做到。

教化 - 實例一則

要令別人願意接納你的意見，並會切實地去改善，相信是一門藝術。經過多年鑽研和考證，我得了點體驗。

在向別人提出意見之前，最好瞭解一下對方的內心感受。別人做了一些事，你認為對方需要改善，問題可能是對方的不當，也可能是自己不夠包容。如未弄清對方動機就胡亂加插自己意見，很多時只會令自己變成「厚多士」。

知道對方的原委後，確定到對方有改善空間，才慢慢出手也未遲。每個人包括你和我，都不喜歡被批評，都喜歡被瞭解。基於人性，如果衷心想對方好，比意見都要由對方的利益著想，對方才會接受。

講咗咁耐，即係點呀？且看以下例子就明。

我們有一位女學生，每句說話都必有粗口，多聽幾句都覺負能量超標。我留意咗佢幾次，佢經常怨自己際遇不佳，最終我以簡單兩句，令佢認真地戒了粗口。

我：你希望行好運嗎？我有個辦法幫到你，仲要不用花錢的。
學：好呀！係咩方法呀？
我：只要你戒粗口，啲運就會返黎你度。粗口越多，負能量越大，只要戒咗，正能量就會痴住你。

就係呢兩句，佢真的不再講粗口了。

要教化一個人，不需苦口婆心，亦不需狠批其不是。只要帶點關心，帶點微笑，對方才會認真地受落吧。

豬一般的隊友

大家都不怕神一般的對手，只怕豬一般的隊友。曾幾何時，我認我極度歧視蠢人。在講求結果和效率的大都會，蠢人絕對會拖跨你的人生。

在這幾年間，上天不斷安插我認為能力不達標的人在我身旁。在我心目中，這些人眼光短淺，沒有計劃，做事沒有條理，效率奇低，不斷重複犯錯…… 幾乎每分每秒都想把我氣炸。我曾經想過，究竟我前世做錯咗啲咩，今世要比一大班蠢人折磨。

漸漸地，我對自己有了點反思。點解我會覺得身邊有咁多蠢人？是我自視過高嗎？是我為人太刻薄嗎？抑或是我沒有同理心嗎？我估，應該樣樣都有啲。

過往我太著重評估別人的能力，我都不自覺地要不斷提升自己的能力。但我忽略了一件很重要的事，就是去欣賞別人的心。對，每個人都有優點，能力只是其中一樣。當我放下對才能的執著，就看得見更多美好的人。

當我認為別人蠢時，可能另一些人都覺得我係豬兜。所有人和事都是相對的。如你覺得世界充滿不如意的人和事，你的世界就會變暗。如你覺得世界美好，世界就會以最美好的一面來回饋你。這不是妄想，而是鐵一般的事實。

不要期望別人會為你改變，你可以改變的就只有你自己。

一念天堂，一念地獄。該如何選擇？你懂的。

Amazing kids

孩子們每天都在學習，他們最需要學習的是甚麼呢？家長們都需要學習，我們要學的又是甚麼呢？可能大家會聯想到一大堆學術、體藝、音樂、情商甚至禮儀等等的項目，但這些並不是最重要的。

孩子要學習的就是自己解決困難，家長要學習的就是要放手。

大仔上了小學，我無做伴讀書僮，唔刻意同佢跟功課和溫習。讀書是小朋友的責任，幾時變成了家長的責任了？如果小孩連自己的責任都負不了，將來你期望佢會做得成甚麼大事？

小朋友得到了夢寐以求的零食，拿到我面前想我幫忙打開。我只會說：「自己開唔到就唔好食了。」。最後，他們當然有辦法解決此等小問題啦。

五歲的細仔最喜歡砌模型，佢都係自己睇說明書去砌。四歲的孻女最愛打扮，都學識自己紮辮了。呢啲同前途看似無關的事，正正係令佢地有能力掌握前途的事。

現在資訊爆炸，要學乜都唔難，只要你想學就得。但有幾多個小朋友有掌握前途的心態呢？佢地知道為何要上學嗎？不是為了搵份好工，而係為尋找夢想而打好基礎。知識是屬於自己的資產，不是被別人衡量你的工貝。小朋友擁有夢想，對自己有期望和懂得找辦法去達成，才是最重要的事。

家長們要對小朋友有信心，只要你肯放手讓他們去嘗試，他們才真正學習到屬於自己的技能。趁他們還小，受一點錯折，嚐嚐失敗的滋味，再自己尋找出路，才是給他們最好的訓練。

孩子愛閱讀

我的孩子們都愛閱讀，最近讀小學二年級的大仔愛上研究成語，粗略估計佢識得約一百則成語，當中有一半佢係記得典故和歷史背景的。細仔五歲，在大哥的薰陶下，都記得幾十則成語，大部分都懂得運用。

我不是炫耀孩子有幾叻，我相信佢英文水平比某些幼稚園生還要弱，哈哈！重點係，點解佢除了功課和默測考之外仲有閒情逸致去研究成語呢？

幸運地，大哥讀的小學係 happy school，課程編排跟足教科書，從不越級挑戰。一週有2天的下午沒有學科，學校安排了不同的興趣活動讓小朋友輕鬆一下。功課在區內算少，默書測驗也不算緊迫。所以孩子在晚上有空閒時間可以做自己喜歡的事，逕自從書本和網上研究起成語來。

在現今香港教育制度下，絕大部分小學生都背負沈重的學業壓力。學校不斷加功課，家長又怕「蝕底」狂谷小朋友，令大家都過著就快窒息的瘋狂生活。這種生活方式最少要持續六年，想起都教人心寒 。

學習係要講興趣的，唔係夾硬塞啲知識入腦袋就叫做學習。大人返工 OT 得多都想唔撈啦，可憐小朋友返學冇得唔讀。請問係邊個話「求學不是求分數」㗎？咁又有有邊間學校係唔計分呢？哈哈！無言……

Happy school 呢家嘢又係世紀矛盾。家長們又想冇功課壓力，但又想小朋友入讀學術水平高的學校，似乎冇乜可能吧。要 happy 就要在學術上作出取捨，如真係怕輸在起跑線就唔好怨辛苦，這是常識吧！

言歸正傳，因為我仔讀的是 happy school，所以學術水平不高。但在他的世界裡，除了返學放學做功課之外，仲可以玩、睇電視、睇自己鐘意的書、思考一下他的人生哲理 (即係發白日夢 XD)、做下家務，仲可以幫忙跟下細佬妹的功課，係一個比較平衡的生活模式 。我想，這樣的生活模式較容易持續吧！

知識這事兒，不需急於一時的。只要有興趣，就會自己去探求。如果真的冇興趣也不是世界末日吧。何必為爭一日之長短而磨掉大家的意志呢？事實上，有幾多家長真正願意放棄「起跑線」而尋回自我呢？我想當中也有不少掙扎吧。