2013年5月31日 星期五

合理待遇?

早半個月,我家工人剛續約不久,佢話收到風人工會加到 $4XXX,次次都係剛續約先至走黎加,感覺有D唔抵喎。早幾日,呢件事真的浮上面,何議員竟然為外傭爭取合理工資至 $4200!更(有傳係加至 $4500!

作為僱主的我,當然好唔想又加外傭的最低工資。佢地可以年年加人工,有幾多香港人可以年年加人工?香港打工仔,返工比老細鬧,為左一家生活,幾唔願意都會硬食。如果老細叫開OT,無論你有幾累,幾想見下個仔,都係因為要生活而頂硬上。打工人份人工,係唔包衣食住行,亦唔包保險,更加唔會包你交通費。

但係外傭嘛,佢唔LIKE就黑你面,某D家務唔想就就索性唔做,一係扮唔識做。佢地份人工係全包宴,傭主要包食包住包保險機票,香港通貨膨脹影響唔到佢地。如果工人表現不佳,有情緒問題等等,我地只係有得震冇得訓。奇怪地,外傭成日都有好多家事要處理,家鄉成日都有人受傷、死人、LUM樓等等。外傭的男人都喜歡包二奶,佢地又會打打下工想返鄉下睇住佢頭家。咁佢返左去睇佢頭家,我頭家點呀?仲要比埋機票送佢走。都未講機票價錢已經三級跳…

以上的事,全部係我親身經驗。

仲未計有部份不良女傭,會勾引男僱主、偷野、借財仔、在香港識男人攪大個肚、虐兒等等的問題,我真係睇唔到有咩理據需要加佢地人工。

有好多香港人,要公一份婆一份先至養到家,迫於無奈先至要請個外人黎照顧自己的小朋友。在香港要照顧一個小朋友已經好貴,由爭生仔床位,到搶奶粉尿片,醫療教育又要搶,最大鑊係幼稚園已經成為必然項目,學費年年加,但15年免費教育仲係未有著落。再要加外傭人工的話,香港人仲有能力撫養小朋友嗎?仲有人敢生嗎?

提出呢D垃圾建議的人,腦袋生草了嗎?

2013年5月30日 星期四

無知婦孺

雖然我係一個全職家庭主婦,但我唔係一個無知婦孺。

仍在職場工作的你,不用下下扮q哂專家,我講咩你都話有問題,搬好多data出黎駁我。你的目的係要證明你對我錯之嘛,有咩實質得著呢?

我唔返工,唔係因為我搵唔到食冇料到,係我有更加重要的人和事要關心。最重要係有一個好好的老公支持我!

你識得搵data我唔識咩?唔同你拗係因為我覺得好無聊。

你硬要搵d野去凌駕於我之上的,隨便你。

在職媽媽,你唔好響我呢d全職媽媽面前扮哂咩都識啦!我係全副心機精神去做一個媽媽,你仲要花心思響你份工度呀,講專家,你夠我黎咩?超!

唔識營養學,就唔好響我面前扮營養專家。唔好意思,我有營養學證書的,咩營養產品要點用,我可以講返個 talk 都得。網上資源係好豐富,但當中底蘊你瞭解嗎?

如何同孩子溝通,先唔講量 (我實多過你!),淨係講質都比你優勝。你懂得小朋友的潛台詞嗎?從小朋友的身體語言你瞭解到他們的動機嗎?你知道孩子性格的底層是甚麼嗎?

一味去買最貴最多人推的產品…
人云亦云咁去教仔…
呢d先至係無知婦孺。

2013年5月29日 星期三

加瘋

月初時,公司的業主提出加租要求。本來我地簽左一年生約,一年死約。但係業主在一年死約後,就提出要加租超過三十幾巴仙!一年就加咁多,如果佢年年都加三十幾巴仙,即係叫我搵地方搬姐!

今日打電話去傾下可唔可以加少D,同我傾的只係職員,話唔到事。我就探下口風,睇下可以傾到幾多。呢位職員口吻好似公務員咁,咩都答唔到我,叫我試下還價,睇下老板點答覆。佢唯一有講的就係︰「唔會比你減得幾多。」

同老公商議過後,決定中間落墨。我同呢位職員表示,不如只加十幾個巴仙啦 (十幾都好溶呀!頂!),職員話會照同我話比老板知,不過機會好微云云。

救命!剛搬黎只一年,就加得咁兇狠,唔通剛落腳又搬過咩?呢D未叫做大石壓死蟹LOR!

2013年5月24日 星期五

直昇機親戚

結婚對於大部份女士黎講,係一個好大的挑戰。你要嫁的,並唔係一位老公,而係一個家族。

被冠夫姓之後,無論時代如何變遷,無論你願意與否,都會多左一班原本係不相干的人來干涉你。呢班人,我地會稱呼佢地為「親戚」。呢班親戚,與我既冇血緣關係,大家性格、成長背景、人生觀、價值觀完全唔同,理論上係連朋友都做唔成。但因為我有了老公,就順道要有埋呢班「親人」了。

我和小孩的一言一行,一舉一動,都成為他們談論的焦點。每次見面都好似審訊大會咁,比人問足幾粒鐘,好似比人拉左返差館問話咁。佢地關心的其實只係小朋友的日常生活,其他人與事係完全不關心的。老公平時在外搵食,照顧小孩的事佢不太清楚,想幫我解圍都幫唔到。有時真係太煩,連老公都匿埋一二邊,等我獨力招架佢全家。所以我會盡量減少大家見面的機會,只有大時大節才會見面,好讓我有喘息的空間。

見面少了,就會用面書去報告小孩的近況。例如︰有咩威水野啦,有咩校外活動啦,去邊度玩啦之類,總之就好似明星咁不斷上載消息,比呢班人追下星。

當佢地見到照片內的小孩有咩不對勁,例如︰笑容不夠燦爛、衣飾髮型唔合佢地心意、去主題公園冇叫佢地一齊去、皮膚上的濕疹未好返等等,都會以各種方式來查詢。真係想講一句︰「你地好煩呀!不如自己生個小朋友黎玩啦,唔好煩我啦唔該!」。

如果我怕煩唔上載照片,一係追問我幾時擺相,一係話要上黎探佢地… 總之就係一日不見如隔三秋。我知佢地係錫小朋友,不過可以溫和點嗎?我唔係老奉要招呼你地全家喎!要照顧三個小朋友加一個大朋友 (我老公) 已經好忙了,再無餘力去應付咁多人的問話,請放過我吧,直昇機親威!

註︰現今,有「直昇機家長」,是無時無刻要監視子女所有活動的家長。直昇機親戚,你地知係咩啦!


2013年5月22日 星期三

佛地魔

有睇過哈利波特的朋友,一定知邊個係佛地魔。呢個名,連提都唔可以提,一講起,彷彿不可思議的恐怖事情就會發生。

菲菲認識一位N小姐,最初認識她,因為她是我老公的學生。但係不久,有好多學生都向我老公投訴,呢位N小姐太討厭,如果N小姐再讀落去,佢地就會唔讀。看似係玩要脅,不過呢位N小姐經常遲到,上堂訓覺 (呢D都唔緊要),訓醒唔明又要問,問黎問去都係問佢「自身」的問題,並不是客觀的學術研究,所以令到很多人不滿。

課餘時間,就要想盡辦法搵我老公,一係上佢公司,一係打電話黎講幾粒鐘。講咁耐都冇實質內容,似係無病呻吟,浪費別人時間居多。呢位N小姐明知有我存在,當時我仲大住個肚等生細女,我唔扮產前抑鬱剷Q佢,已經極度比面我老公。因為佢太鐘意痴住我老公唔放,有些為人正義的學生,對呢位疑似小三更加不滿。(好在我老公有TASTE,呢件野佢哽唔落!)

最終,呢位N小姐再冇上堂,亦冇在學生之間的聚會內出現。

點知…

佢經由另一位朋友介紹下,我地和N小姐在同一宗教團體內成為兄弟姊妹!天呀!

N小姐今次改了對象,纏住我們的師父唔放,又係晚晚打電話講埋哂D無謂野。我們的師母可不是善男信女,一係當眾對呢位N小姐冷嘲熱諷,一係索性借故批評佢。呢D都唔怪得人,面係人地比,架係自己丟,邊個叫佢好攪唔攪,走去攪人老公?

N小姐在其他圈子,包括︰成長課程、公司、家人和朋友,都係不受歡迎人物。一係不斷搵人傾吐心事,一講就幾粒鐘。一係就專痴住團體內的首領 (例如︰佢老細 / 某 Training Center 的 Trainer / 我老公 / 我地師父等),而呢D人物全部係人地老公,咁又點會受歡迎?我都覺得佢好勁,我知唔可能要世上所有人都喜歡自己,但係要犯眾憎犯到咁盡真係未見過!

記得有一次飯局,某朋友想提起N小姐,我忍唔住講左句︰「佢係佛地魔黎GA,唔好講佢個名啦!」

席間,大家笑到拍哂檯,而「佛地魔」之名亦好快在不同的朋友圈子中流傳開去…

2013年5月21日 星期二

窩心小子

昨日被一隻蚊針了鼻哥,相信隻蚊都幾毒下,個鼻即時又痕又痛,仲要腫起半邊。

回到家,用無比滴搽患處,竟然痛到入心入肺,我更肯定隻蚊真係好毒。

今晚,細仔走埋黎,指住我個鼻話我流鼻血。原來佢見我鼻上的針痕結左焦,佢以為係鼻血。哈哈!

細仔好細心,拎左張紙巾幫我抹,仲問我痛唔痛。

呢個就黎三歲的小子,真係夠體貼,令媽媽很窩心!

換新機

未有小孩之前,不知道DVD機原來是會爛的。菲菲講的係「爛」,並不是壞。只係我個大仔,已經整爛左2部DVD機。無論我放到幾高,佢都有本事駁腳上去整爛佢。所以我不會買貴的DVD機,反正下場都係比小朋友整爛。

最近,輪到細女成日走去攪部DVD機。部機冇爛到,不過唔知佢按左D咩制,所有碟播到一半就唔肯再播落去。我攪左部機幾日都攪唔掂,叫老公試下。佢又攪左好耐都攪唔掂,我估部機應該係壞左了。

壞左,不過都睇到,只係每隻碟只可以睇頭半截。我有打算去買過部機,不過老公話去深水埗買會平D,所以我將呢個重任交左比佢。責任係交左比佢,但部機一日未瓜佢一日都未的起心肝去買。之前我買左成套 Toy Story 諗住同2個仔煲碟,結果都係冇得睇,無癮!

星期日,我帶三個小朋友去逛書店,見到有 Cinderella 呢隻DVD,就諗住買比細女睇。佢實在太男仔頭勒,要搵D女性化既野去薰陶下先得。星期一,細女睇新碟睇到好入神,正當故事講到灰姑娘穿起舞衣和玻璃鞋,跳上南瓜車準備去王子的宴會時,部機一如以往停左。呢下可不得了,細女大吵大鬧要睇埋落去,但係部機真係唔肯播,我都冇計GA。

老公知道亞女冇得睇灰姑娘發脾氣,就九秒九衝左去深水埗買機。第二日,亞女有得睇哂成隻碟,冇投訴仲好開心添!

睇黎以後屋企有咩要老公做,只要叫亞女開句聲,就必定辦得快靚正!哈哈!

2013年5月19日 星期日

合伙做生意

與人合伙做生意,有利亦有弊。

不同的合伙人,除了可以帶來更多資金之外,更可帶來更多經驗和客源。人多好辦事,是很多公司找人合伙的原因。但人多意見亦多,如何經營、如何拆賬,資金不夠要如何注資等等都是惱人的問題。做得不好虧了本,當然有傷和氣,做得好有錢賺,亦會有眼紅別人分得比自己多,埋怨別人出力比自己少的情況。講到底都不是一件划算的事。

菲菲和老公之前有過和別人合伙的經驗,都是不歡而散。以後有攪生意的機會,都不會考慮和別人合伙,情願自己辛苦D都唔想和友人因財失義。

早排有朋友的公司想「拓展業務」,有意招攬投資者。大概是想找9位投資者,而朋友的公司就佔最大份,擁有決策權。先勿論朋友在公司內只是一名職員,並不是老細。就算佢係老細,要管理9位投資者又談何容易?除非投資者本身對「資金」的看法是已出之物,不會查根究底,否則他們要處理的恐防不是業務問題,而是人事問題。

朋友美其名為「拓展業務」,說穿了是想找人注資「填氹」。菲菲並不是初出茅廬的小丫頭,又點會比佢三言兩語哄到呢。就算不是上市公司,公司有其他投資者,盤數點都需要和和投資者交待,我諗佢地淨係解決財務報表呢個問題都好頭痕,仲邊有時間「拓展業務」呢?

如果有人找你合伙做生意,又講到公司前景如何光明,真的要考慮清楚。在得到利益之前,你要付出的代價可能比你想像中還要大很多!

講故事

上星期菲菲參加了學校的「爸媽講故事」活動。我先後為2個仔的組別講了2次故事,這真是一個很難得的經驗!

第一天是到細仔的組別講一個很簡單的故事,雖然只有幾頁紙,但係都非常緊張。小朋友只有2至3歲,他們並不完全瞭解故事內容,到問答時間時,他們的答案全是天馬行空。幸好有老師在旁協助,先至攪得掂呢班小靈精。

第二天輪到大仔的組別,故事比較長,但結構仍算簡單。今次的組別是4至5歲,他們發問的問題可多了。只不過是2年的差別,他們對故事結構要求高了,我選的故事似乎對於他們來說太簡單。哈哈!

有些家長以為學校攪呢D活動係冇野搵野做,不過我衷心欣賞校方願意花心思令我們更瞭解學校的教學方法。我每天都為三個小孩講故事,又要講中文故事,又要講英文故事,仲有網上故事,理論上經驗還算豐富的。不過親身體驗過在學校為一群小朋友講故事,就知道我還有很大的進步空間!

做家長,都是活到老,學到老的!哈哈~

2013年5月11日 星期六

心虛

菲菲有2位印傭,佢地做野有時會疏忽,有時會失魂。不過係人都會有情緒高高低低,如果問題不大,我都係蜻蜓點水咁提下佢地就算。工人A來了5年,為人較正直,亦較笨。工人B來了2年,較為聰明,做事勤快,但係比較計較同埋多口。

平時如我有事要工人幫忙,一般都會叫工人B。因為佢話頭醒尾,一教就識,好多時要幫忙買東西和格價。正因為我常常叫工人B幫手同我出街買野,工人A就多左冇王管時間。以前工人A都會做下家務,但係近排發現我地出左去時佢索性咩都唔做。之前我有諗過同工人A認真傾下,不過佢份人好要面,如果兜口兜面話佢實諸多「解釋」,最後都係沒有結果。昨日,我終於想到了一個方法…

晚上,三個小孩都在家,我忙於跟大仔功課,工人A煮緊飯。正常工人B係要幫手睇住2個細的。但係因為工人A在下午沒有處理好堆積如山的衣服,工人B要忙於執好哂D衫。於是我走去問工人B…

我︰點解而家燙衫既?
B︰因為有好多衫嘛,唔執好今晚亞妹訓邊?
我︰(故意大聲D) 我之前講過晚上唔可以整呢D野,要睇細路喎
A︰(聽到我問工人B野,慌忙走出黎,好大聲地講) D衫未乾呀!
我︰點解下午唔做呀?
A︰我濕左少少GA… D衫未乾丫嘛!(越講越大聲)

之後工人A不斷大聲講好多九唔搭八的野,目的係唔比我講野。

我知佢心虛,佢怕我鬧佢冇做野,所以諗住用聲煞擊退我。
不過我既目的唔係要責罰佢,係要比佢知道,佢冇做野係瞞唔到我的,今日佢就不敢偷懶,好勤力做野。

******

昨晚,我提醒工人A,今日大仔返完普通話班之後要即時回家,因為我地要準備明天的飯局,有好多野做。

中午,佢地回家後,大仔好開心同我講︰「媽媽!屋企樓下開左間新舖頭呀!」。
我好奇間舖頭開響邊個位同埋有咩賣,就問工人A︰「樓下開左間新舖頭咩?」
點知,工人A又連珠砲發咁話佢諗住去印尼舖頭度買D野,所以帶埋大仔去。仲問我得唔得。我都未答佢,又繼續講︰「你問我要即刻答,我唔識講呀!」

我叫佢冷靜D先,我只想知有間咩新店舖姐,佢自己就鬼拍後尾枕咁爆左自己私下去買野的事,其實我係覺得好笑多D。

之後佢好緊張話︰「你一問我,我就好驚你鬧呀!」
我︰你冇做錯事又怕咩我鬧呢?

事實上,如果我要鬧人,唔會講一段開場白,要鬧就鬧,唔駛扮溫水煮蛙。好明顯,佢又心虛了。

都好,佢以後帶住我仔出去上課時,唔敢私自去買野,因為我個仔識得報串!哈哈!

與怪獸共處一 Group

細仔而家讀緊N班,全班只有十幾個小朋友,我地班家長開左個 whatsapp group 互相交流。好多時我都係睇,好少回覆,因為發現大家唔啱 channel。

事件一︰
去年冬至,學校發生了件很哄動的事。有2名家長在學校附近因為小孩互有踫撞而口角,鬧鬧下仲出埋超勁粗口,嚇到2個細路縮埋一邊喊。剛巧N班的班主任經過見到,2位家長準備大打出手,老師一個人攪唔掂,於是搵埋校長和幾位老師來調停。但係出動到校長都調停不果,最終要報警解決。原來其中一位家長,正是N班的家長。我從沒想過,2個同校小孩有點踫撞可以攪到報警,會唔會誇左D呀?

事件二︰
學校會協助小朋友攪生日會,攪唔攪由家長決定。如果攪就自備蛋糕、禮物和相機,校方會安排茶點時間攪生日會。呢D唔係學校的責任,只係配合家長的需求。

早排有位在職家長,佢幫小朋友攪生日會,訂左蛋糕同禮物,但係冇比相機學校,之後發現「原來」可以帶相機回校,佢就好似失控咁在我們的 whatsapp 內轟了五十幾個 msg!話學校唔提佢帶相機,話學校有責任提佢同埋有責任同佢影相。

又有家長附和,老師冇影到蛋糕的大特寫,又係學校不對。之後有家長搵到開學的「班務通知」,send 出黎比大家睇,內容係有提及生日會安排。意思即係︰學校有比過通知你,係你冇睇姐!但係該家長仍死心不息認為係校方疏忽!我真係唔認同攪生日會係校方責任,仲要應付佢地的怪獸要求,真係難為了老師!

事件三︰
學校舉辦爸媽講故事活動,出了通告講解詳情,家長如想參加,係要出席一次簡介會,之後再出席一次為小朋友講故事。有家長唔知係唔識中文丫,定係唔睇清楚通告,以為只需出席一次,就請假出席。但當收到校方電話,知道要出席2次時,又在 whatsapp 轟了數十個 msg,話校方的通告寫得唔清唔楚。我都有參加是次活動,張通告一睇就明,唔通果幾位家長係外國長大所以唔識中文?嘈左好耐之後決定不參加,因為請唔到假。

其實呢D活動係自願性質,黎到就黎,黎唔到都唔緊要。佢地唔需要咁緊張丫,自己唔睇清楚又大動肝火,好難同佢地溝通喎。

總結以上事件,係我不夠關心校務丫,定係佢地太怪獸呢?有時我真係想退出左個群組算了…

2013年5月9日 星期四

兩歲小孩的心靈

最近傳出某名幼稚園有2歲幼兒被老師綁手跪地的照片,引起大眾,尤其係家長的關注。菲菲的小朋友都讀緊幼稚園,見到張相都感到嘩然,當然無法接受如此對待一名年僅2歲的幼兒!

照片是生果動新聞傳出的,由有位疑似前外藉老師提供。內容講到小朋友因為搶玩具所以被老師用膠紙綁手,更要小孩跪在地上。事後,有多方面人士都發表過意見,一般家長如我當然係指責校方如此暴行,有朋友的子女就讀該校,他們就不相信傳言。校方亦有發通告澄清,亦有前教師在親子網站上聲援校方,更有一些「認識幼兒教育界」的朋友指出這是很常發生的事。

人人的角度不一,菲菲的子女沒有就讀此校,只係知道事件的皮毛。無論係真有其事,定係有人存心抹黑學校而拍了一張這樣的相片,相中的小朋友都已受到心靈上的傷害,無論如何都是一件不能接受的事。

該校是很多家長都爭相報讀的名校,一心希望自己的心肝寶貝得到好好的培育。一個2歲小孩,語言能力有限,社交能力才在起步階段,和其他小朋友爭玩具是平常事。菲菲不是讚同爭玩具的行為,是明白到如此年幼的小孩有行為不當是要教導,而不是用傷害自尊和心靈的方式去懲罰小孩!小朋友受到如此對待,回家後又不懂告訴家人,這對小小的心靈會有甚麼影響?不用多說吧!

或者這是個別人士的行為失當,但作為一位幼師,竟然做出如此沒有愛心的事,怎樣也說不過去吧!或者係香港的教育制度畸型,迫到家長急急送只有2歲的小孩上學,為的就是起跑比人前。但是小孩真的承受到嗎?抑或老師都承受不了?所以會發生這樣的事?真的很令人痛心和屯慨嘆…

無奈地,菲菲今年都會送年僅2歲的細女上學去。不認同,也得隨波逐流。為的不是起跑比人前,只是不要起跑比人落後…


2013年5月8日 星期三

自討苦吃

今個星期日係母親節,我見奶奶好耐都冇見過D孫仔孫女,於是發起母親節來我家食飯。原意係唔想出街同人迫,同埋冇理由母親節都要勞煩奶奶煮十幾人飯掛?

昨日去預訂母親節蛋糕,發現唔係間間都有2磅的蛋糕 (因為有11個人,訂一磅都唔知點切),搵到有2磅蛋糕的,又要考慮款式 (影相靚唔靚),又要考慮口味 (要就哂咁多人的不同口味真係唔容易)。揀左半粒鐘,終於訂到個達到以上要求的蛋糕,於是 send 左個 whatsapp 比各姑仔同叔仔,叫佢地唔駛訂蛋糕。

點知佢地的回覆係︰
細姑仔︰麻麻唔鐘意甜食喎 (但係點解佢地次次都會買蛋糕上黎我家呢?唔通佢地的蛋糕唔係甜的?)
叔仔︰買一磅得啦,我唔係好食 (唔食都要切GA!一磅點切11份呀?)
大姑仔︰叫小朋友畫張畫比麻麻好過啦!

睇完佢地的回覆,真係無名火起!我買個蛋糕姐,唔駛你一言我一語圍攻我呀?鐘意食多D,唔鐘意未食少D LOR,呢D說話唔需要講啦!究竟佢地識唔識咩叫「人情世故」GA?又唔駛佢地比錢,又唔係迫佢地食哂,諗住買個蛋糕比大家開心下姐,攪咩要一人一句插到咁行呀?2磅蛋糕都唔平GA,而家我好似貼錢買難受咁。

以後,有咩節日,我都唔會做孝順心抱,無啦啦叫佢地上黎食飯。呢D叫做自討苦吃!

2013年5月6日 星期一

加加加

家傭剛續了約,今年七月開始家傭會加薪。其實係佢地唔好彩,2年前剛續約不久就加外傭最低工資,佢地到今年七月先至享有人地已經受惠左接近2年的最低工資。

老公剛收到公司業主通知,七月會加租,仲要加成三十幾個巴仙!上個月我地先至在辦公室對面單位租多左個倉,唔通因為加租而搬辦公室,留返個倉響度咩… 唯有同業主傾下,可唔可以加少D啦…

做生意同做僱主,加價壓力仲大過打工仔呀…

2013年5月4日 星期六

攝影展

菲菲有一位多年沒有見面的朋友,最近他在面書邀請菲菲看他的攝影展。這位朋友雖然多年沒見,但他是菲菲的救命恩人,在一次困難中救過我 (不是錢銀上的「救」,真係救左我條命),所以我一口答應了。不過我始終不是文化界一份子,對看攝影展嘛… 哈哈,真係諗住去捧下朋友場,所以帶埋大仔去。一黎我有個伴,二黎又可以比大仔感受下文化氣息。

展覽場地在石硤尾,一個我甚少去的地方。和大仔抵達時,大仔大呼︰「我黎過GA!」。下?你幾時黎過呀?原來學校之前有帶過佢黎藝術交流呢!睇黎要感受文化氣息果個應該係我…

以前菲菲都去參加過一些攝影展、畫展之類,一般去到展覽場地的門口,會有接待處要簽返個名,有部份展覽仲會有簡介單張,甚至有人導賞。但係今次,真係一個好奇怪的展覽。展覽場地難搵都算了,去到埸館,冇接待處,冇工作人員,唔見我朋友,亦冇其他參觀者!整個展覽場地只有我兩母子同埋工人。咁我朋友邀請我黎,真係純粹睇展覽,連佢人影都見唔到。可能我太耐冇去呢D場所啦,所以唔知而家係冇咁好招呼呢…

好在我有帶大仔黎,真係有個伴陪我,如果唔係,就係我單拖去一個陌生的地方,睇一個其實我唔係好識的展覽!