亂

呢個星期菲菲忙於宗教活動，少左在家，家中秩序大亂。

我不在家，工人A常常在家傾電話，仲要係放底哂所有工作，坐在廳中慢慢傾。本來我係唔會知道呢件事的，不過早兩日佢傾到興起，忘記我仲未出門口，到見到我望住佢先至速速收線。本來我係唔介意工人傾下電話的，話哂離鄉別井出外打工，同家人朋友傾下電話實屬平常，只要唔好影響照顧小朋友就得了。我在家時佢都傾到咁忘我，好明顯我唔響度時更肆無忌憚。

昨日我同佢講要幫細仔戒尿片，佢就即時幫細仔換左底褲唔比片佢著。以往幫小朋友戒片，我唔會用D咁激進的方法，只會定時帶小朋友去廁所學習，即時唔比片佢著即係搏下幾時要幫佢沖涼再抹地，我冇咁蠢比功夫自己做。工人A黎左差唔多四年，之前佢都係跟我教佢我方法同大仔戒片的，今次就好似失魂落魄咁，又係掛住傾電話所以攪亂哂大籠。

仲有家中大小事務都出現錯漏，成卷廁紙都寫唔完。菲菲一向都好少理會佢地的工作時間表，不過我響度時就會自動自覺唔駛我叫，我唔響度幾日就攪成咁，如果我出去返工都唔知點算。

工人A份人好「唔話得」，一話佢就發脾氣，塊面仲黑過我。曾有朋友叫我換左佢，不過每個人都有缺點，平時佢做野都OK，我就包容下啦。同埋我學識左唔好同佢硬踫，盞兩敗俱傷。而家我習慣咩都叫工人B做，初初工人A好開心，因為有人幫佢做埋。不過慢慢佢發覺地位開始不保，怕我遲D只要一個工人時會炒佢先，所以佢都主動左，我又勞少左氣。

不過工人B都唔會放過爆佢大鑊的機會，佢見我對工人A有少少不滿，就乘機篤佢背脊。原來工人A的細佬打算來港打工，所以工人A不斷同佢傾電話，教佢路云云。唔知佢細佬來港打咩工呢？真係好少聽聞印尼男士出外工作，除非係做生意或專業人士，不過佢細佬兩樣都唔係，真係摸不著頭腦。

好在盛大的宗教活動今日係最後一日，過埋今日菲菲會座鎮家中繼續主持大局。