活在地球的火星人

事有湊巧，我呢度又係講有關資優的…

星期四帶大仔上數學班後，老師特意走出來和我談了幾句。她說我的兒子學習能力很高，學得比別人快，但是欠缺耐性和不擅與人溝通。他上堂好像發白日夢，老師叫了他好幾次都沒有理會，但作業卻做得快而準。老師懷疑他是資優生，叫我帶仔去 check 下 IQ。

聽了之後，有種很奇怪的感覺。我是知道有資優生這東西的，不過不知道甚麼才算是資優。看看網上資料，覺得大仔似係但又唔係百份百係，攪到我好迷惘。今天帶大仔上普通話班時，見其中一位老師有餘暇，就問下佢關於資優生的事。呢位老師的反應好得意，佢不屑一顧咁話︰「乜有人話你個仔似資優咩？千其唔好比學校知呀，好多小學都唔收資優生GA，佢地冇資源去幫你GA！」之後就黑面轉身走了。

首先，我只係做下資料搜集，我都未去求證，點知個仔係唔係資優姐。駛唔駛擺出一副「劃清界線」的咀臉呀？仲有，香港的資優生好似被受歧視咁喎，又話學校唔收，又話比人標籤，而家唔准人高智商咩？

看到 Desertfox 的文章，對資優生的情況總算有個大概瞭解，都認為不防帶大仔去 check 下，至少心中得個明白。如果他真的是資優，就要計劃一下如何發展他的長處，如果不是，就要認真處理一下他的散漫作風。

但可悲的是，香港的老師們都摒棄與正常有別的學生。正如我前文所想，我已經是「去了錯的地方」，我不想自己的孩子都跟我一樣，明明係火星人，做咩黎地球姐？

去了錯的地方

菲菲從小就有一個疑問，到底我出了甚麼問題？

上幼稚園的第一天，和母親說了「拜拜」就到教室坐下等上課。周遭的小朋友不斷哭叫，有些要媽媽，有些要回家。當時只有4歲的我，都清楚知道下課後就可以回家見媽媽，為什麼他們要哭？我不明白…

上小六時，老師教小朋友唱 Auld Lang Syne，同學們都邊唱邊哭，彷彿過了今天就會永別了似的。當時只有11歲的我知道，如果大家是真正朋友，不上學也可見面。如果大家並不投緣，以後不常見面實屬正常，又何需哭得肝腸寸斷？

上中學時，同學們都質疑老師有各式各樣的問題，有些是性格，有些是行為。同學們會群起反抗他們看不順眼的老師。只有我認為同學們都很無聊，老師都是人，他們來學校除了使命感之外，都要為生活。為何老師不可以和我們性格不合？他們來是教書，不是做 PR，作為學生的不是要尊重老師嗎？當時覺得同學們很幼稚。

大學畢業時，很多同學都組織背包歐遊團，為的不是要體驗生活，而是怕出來工作之後沒有假期可以去歐洲。當時真的覺得很攪笑，出來工作之後想去旅行，大可以請假 (反正當昤很多工作都返五天，放紅日和14日大假)，而且有收入之後可以用較舒適的方式去旅行，又何必怕以後冇機會就急急碌爆卡去歐洲訓火車站？去歐洲真係咁重要？唔去會有咩後果呢？真係諗唔明…

出來工作之後，在商業社會接觸了不少爾虞我詐的事，很多同事都慨嘆商業社會的殘酷。但現實生活不就是這樣嗎？人人都為自己的利益而鬥爭，為生活不可能只活在烏托邦。每個人的成長和意向都不一樣，在如此複雜的環境要取勝，真的可以達到和諧嗎？每人都在爭取有限的資源，真的是逆水行舟，不進則退呀！

工作了幾年，身邊很多人都趕在三十歲之前結婚。他們都怕過了三十歲就找不到伴侶，但結婚是一輩子的事，並不是與時間競賽，可以如此草率嗎？就算對方和自己性格不能完全配合、和對方的家庭觀、人生觀和價值觀不一，都以為結婚之後可以改變對方嗎？有些性格和觀念，是很根深蒂固的，不是在婚書上簽個名就會改變。但人們都選擇相信奇蹟，事實呢？多年後的今天，境況如何？只有他們才知道。

菲菲在現實生活中沒有幾個知心友，因我仍未找到一個和我有共鳴的人。或許，和我有相同想法的人，不能在大部份人的圈子中生存，所以我找不到。

由細到大，我都不能和我的「同伴」接軌，到底是我出了問題，抑或我去了錯的地方？

幻象

網上世界，令人大開眼界。

一個和你素未謀面的人，單憑文字影像來判斷你是一個怎樣的人。可能會很受人愛戴，亦可能很令人生厭。不管怎樣，大家素未謀面，沒有共處過一分鐘，在網上所見所看，是「事實」還是你心中的「幻象」？邊個下到定論？

而某人可以在如此有限的資料來下判斷，到底他有多高明？

我已經沒有發洩的空間了，這裡是唯一一個讓我暢所欲言的地方。

大家看了不明白不要緊，我心中明白就夠了…

說謊

菲菲真的很討厭說謊，言可不盡，不可不實。我小時候為了逃避責備就時常說謊，但係後果係仲甘過企出黎承擔責任，所以我係不愛說謊的。你有權不相信，但我情願硬食一野，都唔想一個大話蓋一個大話，到最後係收拾不了的殘局！

早2日收到一個好突然同好令人擔心的消息，當事人做錯了事，竟想瞞騙佢身邊所有人，希望事情過去之後可以當冇事發生過。好可惜，若要人不知，除非己莫為。事情做過就是做過，就算你有多神通廣大，都會有被揭發的一天。當大家都知道的時侯，有些事真的不能挽回了，那種痛心不能用言語來形容。這件事還未結束，希望我們可以盡一點綿力，把事情對大家的傷害可以減到最低，亦希望當事人真的可以反省一下，不斷說謊有甚麼無法彌補的後果！

今天，大兒子的老師告訴我，他在學校有些行為不當。回家後我問兒子發生了甚麼事，他說不記得了。當然唔係忘記，係怕我鬧。為了要培養小孩誠實的美德，我提高EQ不去責罰他，但求佢肯面對事情，肯坦白告訴我發生了甚麼事，已經是難能可貴了。就算是小孩，都不願面對「自己做錯」的事實。如果坦白之後換來責罵，對於一個4歲的小孩當然係選擇逃避。今次我不責罰他，是給他一個鼓勵，勇於面對自己的過錯，比受責來得更有意義。

港媽唔易做

唔知係真定假，而家吹緊風，話會提升外傭的最低工資至 $4500。現時的最低工資是 $3920, 即是加 14.8%！香港的打工仔，唔好話加 14.8%，連有得加 4.8%的都唔多。香港人加人工，要睇老細面色、公司業績、工作表現、工作態度、資歷等等一大堆因素，而唔係睇通漲。公司冇錢賺或老細嫌賺得唔夠，話之你通漲幾多，唔加就唔加，打工仔可以點？唔通年年轉工搏加多少少？

請外傭，除左要出糧之外，係包食包住的，所有通漲都係僱主承擔。傭主要比的又何止薪金？除了龐大的中介費、機票和保險之外，而家菲律賓和印尼政府都乘機加收呢樣果樣，好過去搶。外傭工作表現不佳，話佢係冇改善。唔想做的工作，一句「I don't know」就可以推得一乾二淨。仲有時常打爛野同整壞電器，呢D都係支出喎！佢地趁僱主返工時就偷懶，一係不停講電話，一係SMS，而家仲玩埋 FB 同 whatsapp，生活比傭主仲多姿多采，仲夠膽走出黎遊行話每天工作16小時喎，真係要幾無恥有幾無恥！傭主們都係打工仔，返工要睇老細面色，放工要睇工人面色，究竟係咩世界！

一係叫所有香港女人生左仔之後都唔好做野，全部留返在屋企湊仔，咁就唔需要請外傭了。但係，老婆唔返工，老公一份糧頂唔頂到全家開支先？就算得，香港女性在職場都有一定地位，係唔係個個都願意放下事業做全職媽媽？請外傭係為左釋放女性勞動市場，提高競爭力，但現時的狀況似乎係要時光倒流，要女性返回家中不再涉足職場了。

假如一個一般打工仔，搵一萬蚊一個月。淨係出糧比外傭都冇左 $4500，仲有其他食住水電煤洗費，埋單差不多 $6000。加埋自己返工的成本，份糧都即係白逗，完全沒有得益。仲要受工人氣、擔心佢去借錢或偷野，不如唔返工唔請工人，自己湊返小朋友好過。先唔講失敗的教育制度，淨係解決照顧小朋友的問題都超頭痛，香港人仲敢生多幾個嗎？

香港政府，你地幾時先至真正為香港人設想？

講下地產經紀

早排同一位新晉地產 sales 閒聊，佢同我呻過，佢依從客人的指示去提供樓盤，睇樓無數，最終都係不成功，客人跟左另一間買了樓。佢話d客玩到佢氹氹轉，明明同業主傾左價都唔肯買。

問題出在哪裡？一個同你素未謀面的客人，會咁得閒用佢的寶貴時間去玩一個地產經紀嗎？聽落都荒謬啦！

客人比的「指示」，係一個依據，唔係規則。例如︰

客人講出一個價錢，只係一個參考數，遇到心水單位，加多少少都可能會肯比。
客人講出一個呎數，都係一個參考值，佢想要的極有可能比呢個呎數大。
呢d都唔重要，最重要係你知唔知個客「為什麼」要搵樓。

正如我之前的交章有講過，所有事情都有一個根源。買樓唔係買衫，唔會心情好又買，心情唔好又買。買樓一係投資，一係自住，一係有人想「洗乾淨d錢」。如果做 sales 的連呢個根源都未攪清，又點比合適的樓盤客人選擇？要知道「根源」，唔係靠把口去問，係要自己觀察，客人入到單位會睇咩先，對咩最有興趣，同埋佢忽略左d咩，都係最好的提示。身體語言更勝千言萬語呀！

搵到客人真正買樓的原因，就要設身處地，在眾多樓盤中找出最接近的樓盤去介紹給客人。介紹時唔係講呎數呎價呢d，係講有咩優點。價值永遠凌駕在價錢之上，時常糾纏在價格上，係一個不入流的 sales。如果客人喜歡，佢自然有辦法搵舊錢出黎買。

經驗告訴我，如果依足客人的指示去射盤，你預左做唔到單生意了。慢慢思考下係咩意思啦。

我果位地產 sales 朋友好似聽得明，又好似聽唔明。唔知係我講得唔清楚，定係而家做地產唔係咁做呢？哈哈！

留客

每個行業都競爭劇烈，加上經營成本不斷上漲，個個老細都希望營業員能夠為公司搵多D生意。既然每一間公司都有相同的期望，SALES們就要不斷鞏固現有客戶，同埋開拓新客戶先至搵到食。

鞏固現有客戶，係極重要的。要找一個新客，不是一件容易的事，加上現在 customer loyalty 越來越低，客人好容易流失到其他競爭對手。若現有客戶流失得快，對公司的穩定性有好大影響。如果要保住最基本的飯碗，穩定客源好重要。有固定客源，就容易在客戶身上加單加碼，比起搵新客來得容易。當然，舊客加單的佣金可能不夠可觀，但勝在易做呀！如果個個客都肯加碼，積少成多都幾和味。

要找一個新客，要由建立關係開始。客人點解要揀你唔揀其他人，一係你公司的產品或服務好獨特好了得，客人點都會黎搵你。如果未達如此神級境界，客人信你先至會幫襯你。要令客人信任，就要讓客人覺得你專業同誠懇。專業呢方面，要自己多下苦功去鑽研，誠懇嘛，就要啄磨一下人與人之間的相處之道了。下下報喜不報憂，並不是最佳方法。客人唔係傻仔，佢地都識得咩叫有利有弊。問題係你識唔識得同客人分析，令佢地搵到最佳的平衡點。

客人拒絕你，一係佢根本沒有此需要，一係佢地未搵到一個合適的方案，所以未能下決定。比人拒絕，係做SALES的基本情況，如果每一單傾親都中，就唔駛出高佣去請SALES啦。做得SALES就預左比人 reject，好小事姐。失敗乃成功之母，知道點解比人 reject，下次改善一下溝通技巧，或者搵過一批更合適的客戶群，有助提高成功率。

好多sales就係因為搵錯客戶群而常常踫壁，硬生生磨掉自己的鬥志。仔細地想一想，真正的潛在客戶在哪裡，先至出力去掘，好過相信某些「腦細」所講︰「係人都做到你的客戶。」。呢句野只係佢心中不切實際的願望，同事實係絕對不符的。

搵客，要努力之餘，仲要有智慧。

納悶

最近覺得很納悶，見到一些不平事，就發生在自己及家人身上，但不能開口，不能有所動作，很不是味兒。

我不是想討回公道，因公道自在人心。每個人心中都有一把尺，我覺得不公道嗎？別人覺得公道嘛！哪我又可以討回甚麼呢？只是眼看小人得志，一步一步侵蝕權力中心，但當權者卻蒙在鼓裡。有如宮廷劇內的妃子和太監在蠱惑皇上一樣，但我不想做那些所謂忠烈角色，謬然走去做炮灰。只有隔岸觀火，有咁遠行咁遠，當自己時運高咩都聽唔到睇唔到就算了。

擁有權力的人，如果沒有足夠的智慧、定力、洞察力和遠見，就有如一個昏君，任由小人去擺佈。以為睇電視先至有，原來現實生活都係一樣。希望事情又可以好似電視劇咁，在結局時可以黎返個邪不能勝正就好了。

反正大仔都就黎升K3，細女又返學了，我要理都理左佢地D學業先啦。其他人的事，我淡出就算了。

點解要做 sales？

估唔到菲菲的一篇舊文章 Cold Call 皇后係咁受歡迎，有好幾位網友睇完之後 send email 比我討論有關做 cold call 的情況。菲菲先謝過大家厚愛，我很樂意為大家分享這些趣事。

菲菲很想提供適合的意見去幫助新入行的 sales，但發現很多sales原來不擅於「陳述」。先唔好講深入的銷售技巧，有條理地陳述一件事、產品或服務係最最最基本的要求。

所有事情、產品、服務等等，都會有一個起因或根源，隨著這個根源，會有概念上或實質上的「發展」，有「發展」就會引伸出一些結果，這是「陳述」中最基本的三部曲。菲菲看到的，就是大家都集中在「結果」上，對「根源」和「發展」隻字不提，哪我又怎可以對症下藥呢？

同樣地，要銷售一個項目，都要瞭解它的根源、發展和結果，才可以帶出第四點「影響」。而這「影響」就是客人為甚麼要購買的原因！

銷售世界，話簡單又得，話容易又得。為甚麼有人會覺得好困難呢？首先要問問自己，係唔係真係咁鐘意 sell 野先。如果唔鐘意，都唔緊要，又有冇一個好迫切的原因，令係非做 sales 不可呢？如果又冇，咁要考慮清楚係唔係入錯行。

世上絕大部份「生意」，都需要 sales 去拓展業務。有些人好叻 sell 有實質形態的產品，有些人好叻 sell 著重概念和感受的服務。在選擇入邊一類行業之前，要攪清楚自己邊樣叻d。很多新入行的 sales 都不知道自己強項在哪裡，就白白浪費了寶貴的光陰。

有些行業提供高佣金低 (或沒有) 底薪，看似好吸引，好有可能發圍搵大錢。當然，做到數就係，做唔到數就連生活都成問題。這類行業一般都很渴求有新客，如果 sales 本身客源不夠，就要超乎常人地勤力和堅定，才可以找到足夠客源去賺取佣金。如果不夠勤力或不夠堅定，就要考慮清楚是不是要換另一個行業了。

要知道如何去做一個 sales，先要知道自己點解要做 sales。唔做 sales 做第二行得唔得。到你知道自己點解一定要做 sales 之後，一些所謂的困難就會不存在了。

下流

在一個有幾十人的即時通訊群組中驚見有不雅照片，剛巧兒子入房，我即時關上電話，免被兒子看到。

之後我在群組內說不要放這些相片，被小朋友看到不好，或者在公眾場合 check msg 時被旁人看到會很尷尬。怎料，放相人的男友仲「理直氣壯」地說︰「同小朋友做健康教育LOR」。之後有人說電話沒電，聽不到我的留言，就靜了好一陣子。

不一會，該位「電話沒電」的朋友，又不斷催促其他人放多D勁料上去。竟然真係有人放更不雅的照片 (4級程度那種)，更說「不要被小朋友看」。

我真係接受唔到！生氣情度不能用筆墨形容！

唔識尊重人，都要尊重下自己丫！

因為某D原因，不能謬然退出群組，但這班有份 PO 相和有份附和的人，我不屑與他們為伍！

直昇機親戚續

早陣子，菲菲講了直昇機親戚，於剛過去的星期五，上演了續集。

星期五，學校容許家長踏入校園接放學，好讓家長和教師有少許交流空間。一般我都會帶埋細女去接放學，等佢可以同老師多熟稔，到九月時可以適應校園生活。星期五，大仔於放學後都必須到補習社上英文班，所以會安排一個工人儘快同大仔換鞋轉場，我就同另一個工人留在學校同老師傾下計先。

正當我同老師傾緊計時，照顧大仔的工人突然折返學校同我講︰「三姑姐黎左呀。佢話專登黎同大哥玩。我話大哥要返英文班，三姑姐唔開心呀。」下？無啦啦做咩會走黎同我D仔女玩又唔通知聲呀？你不請自來，我地唔可能放低原有的程序去招呼你喎。我同工人講︰「快D同大哥去搭車啦，遲到勒。」

當我出到校門，見到三姑仔面黑黑坐在響度，似有不滿咁。係唔係攪錯左D野呀？你失驚無神出現，唔通我叫個仔唔返學同你玩呀？就算唔駛返補習班，放學後都要做功課啦，都唔得閒陪你玩喎。

之後，佢拖住我細仔，問佢︰「跟三姑姐返屋企好唔好呀？」

細仔好可憐咁望一望我，話唔好，佢想返自己屋企。

三姑仔就拖住我個細仔，「送」我地返屋企。一路行，我都冇理佢，聽到細仔響後面嗌「媽咪！媽咪！」，好似怕我掉低佢咁。

返到屋企，我就攤哂D書包出黎，叫細仔洗手做功課。三姑仔就走去同細女影相，仲話︰「我要比二姑姐睇，等佢羨慕下先！我有得同細妹影相，佢冇份！」。我心諗「唔係下化，如果二姑姐睇完D相心有不甘，又黎玩突襲咁未好煩？」

因為我全程冇咩理佢，佢逗留左一陣就走了。

我忍唔住同老公投訴了，叫佢D屋企人唔好成日響人冇準備之下出現，有冇尊重下人ga？乜打個電話黎通知聲好難咩？唔係人人都要隨時 stand by 服侍你喎！

師母

我老公係一個師父，順理成章，我就係佢一班學生的師母。

師母，並不是一個稱號咁簡單。他的學生們，對師母這個角色都有一定的期望。

師母，是平衡各學生的角色。學生們的性格不一，目的不同，相處時偶有磨擦。如果任由磨擦惡化，就會流失學生。作為師父的，如太著重處理學生的問題，就會阻礙大家的學習進度。又或如師父對某人太好，對某人不夠好，又會惹起爭議，認為師父偏心。所以我就會出面處理他們的磨擦，盡量令大家都有一個舒適和愉快的學習環境。有時他們有心事，都會找我傾計。我對於他們來說，係一個會解決問題的人。

師母，是維持秩序的角色。當有學生太執意要在課堂上處理私人問題時 (最常見係問自己的事)，我就會出面叫停，好讓課堂可以順利繼續。師父自己當然都可以叫停，但現在的學生，就算是三十來歲的成人，都會在意師父是否冷待他或偏袒他。這些醜人由我出手，可保師父的「中立」地位。甚至有學生心術不正，心存歪念來學習，都會很快被我識穿，不會污染其他學生。

師母，亦是安排館內所有活動的聯絡人。這些跑腿工作，由師父來做太失身份了，就由我呢個女人仔代勞吧！事無大小，由追收學費至攪大型活動，都包在我身上吧。師父，要有威嚴和氣度的，這些雞毛蒜皮的事，不用他操心。

我認識的一些「師母」，她們過著闊太的生活，對老公的事不聞不問。但又會和他的學生建立小圈子，和投契的嘻嘻哈哈，對不投契的就冷嘲熱諷。每逢過時過節就要求學生送禮，平昤又希望有學生請佢吃喝玩樂。可能佢覺得學生應該去奉承師母，才會有出頭天。或者呢D係人地的方式，不過個人覺得幾倒米。

今日又開新班了，希望新的學生繼續享受學習的過程，課程完結時大家都有所得著！

網絡欺凌

昨日在一個即時通訊群組中，有朋友上載了一段短片。短片不夠十秒，內容係一位朋友A君，和兩位小女孩 (另一對朋友夫婦的女兒) 在玩包剪 dup。當小女孩輸了之後，就要做一個很醜的表情，去模仿另一位朋友 E小姐，之後聽到很多人哈哈大笑。看似無傷大雅嗎？

如果我是E小姐，竟然有人用「醜化自己」來做遊戲的大懲罰，心裡一定不好受。這段短片還在朋友的通訊群組內流傳，作為一位女士，情何以堪？

該位A君，喜歡醜化身邊人來娛人娛己，本來就是很缺德的行為。佢仲要教小朋友做出不尊重別人的事，更加不知所謂。他務求要更多認同佢醜化別人的惡行，連小孩都不放過！

小女孩的母親，也在群組中見到此段短片。她好似覺得2個女沒有問題，仲在群組內笑埋一份。受害人E小姐仲係呢個家庭的好友，但好友不應要更加尊重嗎？如果作為她的好友要被踐踏的話，我就不想成為她的朋友了。

拍攝呢段短片的W君，在拍攝的過程，好似幾認同A君的做法。放了在群組之後，有班朋友仲落井下石，W君彷彿做了一件好事，令大家在沉悶的星期一帶來了歡樂。大家在揶揄之際，有冇考慮到E小姐的感受？

終於有位J君出來說句公道話，大家都是朋友，開下玩笑係無防，但令人不快就過火了。W君就即時認錯，求E小姐原諒。雖然我覺得佢咁大個人做野唔經大腦，但知錯能改，善莫大焉。

小女孩的母親，好似做左E小姐的代言人咁，話E小姐唔係咁小器，唔會嬲的。但我們認識E小姐的為人，自尊心好重，今次比人擺上檯玩，唔嬲就假！作為一位母親，不教好女兒要尊重人已經係失職，做錯事惹怒了人，仲要厚住面皮話人地唔會嬲你，有冇攪錯呀？

至於教小朋友醜化E小姐的A君，完全沒有半點歉意，好似被人打斷了玩人的興致咁，沒有在群組內發表任何訊息。

呢班人，大家都係朋友，點解會做出D咁既事？用傷害別人的方式去娛樂自己？仲要教小朋友做埋D咁野，係可恥定係可悲？

合理待遇？

早半個月，我家工人剛續約不久，佢話收到風人工會加到 $4XXX，次次都係剛續約先至走黎加，感覺有D唔抵喎。早幾日，呢件事真的浮上面，何議員竟然為外傭爭取合理工資至 $4200！更(有傳係加至 $4500！

作為僱主的我，當然好唔想又加外傭的最低工資。佢地可以年年加人工，有幾多香港人可以年年加人工？香港打工仔，返工比老細鬧，為左一家生活，幾唔願意都會硬食。如果老細叫開OT，無論你有幾累，幾想見下個仔，都係因為要生活而頂硬上。打工人份人工，係唔包衣食住行，亦唔包保險，更加唔會包你交通費。

但係外傭嘛，佢唔LIKE就黑你面，某D家務唔想就就索性唔做，一係扮唔識做。佢地份人工係全包宴，傭主要包食包住包保險機票，香港通貨膨脹影響唔到佢地。如果工人表現不佳，有情緒問題等等，我地只係有得震冇得訓。奇怪地，外傭成日都有好多家事要處理，家鄉成日都有人受傷、死人、LUM樓等等。外傭的男人都喜歡包二奶，佢地又會打打下工想返鄉下睇住佢頭家。咁佢返左去睇佢頭家，我頭家點呀？仲要比埋機票送佢走。都未講機票價錢已經三級跳…

以上的事，全部係我親身經驗。

仲未計有部份不良女傭，會勾引男僱主、偷野、借財仔、在香港識男人攪大個肚、虐兒等等的問題，我真係睇唔到有咩理據需要加佢地人工。

有好多香港人，要公一份婆一份先至養到家，迫於無奈先至要請個外人黎照顧自己的小朋友。在香港要照顧一個小朋友已經好貴，由爭生仔床位，到搶奶粉尿片，醫療教育又要搶，最大鑊係幼稚園已經成為必然項目，學費年年加，但15年免費教育仲係未有著落。再要加外傭人工的話，香港人仲有能力撫養小朋友嗎？仲有人敢生嗎？

提出呢D垃圾建議的人，腦袋生草了嗎？

無知婦孺

雖然我係一個全職家庭主婦，但我唔係一個無知婦孺。

仍在職場工作的你，不用下下扮q哂專家，我講咩你都話有問題，搬好多data出黎駁我。你的目的係要證明你對我錯之嘛，有咩實質得著呢？

我唔返工，唔係因為我搵唔到食冇料到，係我有更加重要的人和事要關心。最重要係有一個好好的老公支持我！

你識得搵data我唔識咩？唔同你拗係因為我覺得好無聊。

你硬要搵d野去凌駕於我之上的，隨便你。

在職媽媽，你唔好響我呢d全職媽媽面前扮哂咩都識啦！我係全副心機精神去做一個媽媽，你仲要花心思響你份工度呀，講專家，你夠我黎咩？超！

唔識營養學，就唔好響我面前扮營養專家。唔好意思，我有營養學證書的，咩營養產品要點用，我可以講返個 talk 都得。網上資源係好豐富，但當中底蘊你瞭解嗎？

如何同孩子溝通，先唔講量 (我實多過你！)，淨係講質都比你優勝。你懂得小朋友的潛台詞嗎？從小朋友的身體語言你瞭解到他們的動機嗎？你知道孩子性格的底層是甚麼嗎？

一味去買最貴最多人推的產品…
人云亦云咁去教仔…
呢d先至係無知婦孺。

加瘋

月初時，公司的業主提出加租要求。本來我地簽左一年生約，一年死約。但係業主在一年死約後，就提出要加租超過三十幾巴仙！一年就加咁多，如果佢年年都加三十幾巴仙，即係叫我搵地方搬姐！

今日打電話去傾下可唔可以加少D，同我傾的只係職員，話唔到事。我就探下口風，睇下可以傾到幾多。呢位職員口吻好似公務員咁，咩都答唔到我，叫我試下還價，睇下老板點答覆。佢唯一有講的就係︰「唔會比你減得幾多。」

同老公商議過後，決定中間落墨。我同呢位職員表示，不如只加十幾個巴仙啦 (十幾都好溶呀！頂！)，職員話會照同我話比老板知，不過機會好微云云。

救命！剛搬黎只一年，就加得咁兇狠，唔通剛落腳又搬過咩？呢D未叫做大石壓死蟹LOR！

直昇機親戚

結婚對於大部份女士黎講，係一個好大的挑戰。你要嫁的，並唔係一位老公，而係一個家族。

被冠夫姓之後，無論時代如何變遷，無論你願意與否，都會多左一班原本係不相干的人來干涉你。呢班人，我地會稱呼佢地為「親戚」。呢班親戚，與我既冇血緣關係，大家性格、成長背景、人生觀、價值觀完全唔同，理論上係連朋友都做唔成。但因為我有了老公，就順道要有埋呢班「親人」了。

我和小孩的一言一行，一舉一動，都成為他們談論的焦點。每次見面都好似審訊大會咁，比人問足幾粒鐘，好似比人拉左返差館問話咁。佢地關心的其實只係小朋友的日常生活，其他人與事係完全不關心的。老公平時在外搵食，照顧小孩的事佢不太清楚，想幫我解圍都幫唔到。有時真係太煩，連老公都匿埋一二邊，等我獨力招架佢全家。所以我會盡量減少大家見面的機會，只有大時大節才會見面，好讓我有喘息的空間。

見面少了，就會用面書去報告小孩的近況。例如︰有咩威水野啦，有咩校外活動啦，去邊度玩啦之類，總之就好似明星咁不斷上載消息，比呢班人追下星。

當佢地見到照片內的小孩有咩不對勁，例如︰笑容不夠燦爛、衣飾髮型唔合佢地心意、去主題公園冇叫佢地一齊去、皮膚上的濕疹未好返等等，都會以各種方式來查詢。真係想講一句︰「你地好煩呀！不如自己生個小朋友黎玩啦，唔好煩我啦唔該！」。

如果我怕煩唔上載照片，一係追問我幾時擺相，一係話要上黎探佢地… 總之就係一日不見如隔三秋。我知佢地係錫小朋友，不過可以溫和點嗎？我唔係老奉要招呼你地全家喎！要照顧三個小朋友加一個大朋友 (我老公) 已經好忙了，再無餘力去應付咁多人的問話，請放過我吧，直昇機親威！

註︰現今，有「直昇機家長」，是無時無刻要監視子女所有活動的家長。直昇機親戚，你地知係咩啦！

佛地魔

有睇過哈利波特的朋友，一定知邊個係佛地魔。呢個名，連提都唔可以提，一講起，彷彿不可思議的恐怖事情就會發生。

菲菲認識一位N小姐，最初認識她，因為她是我老公的學生。但係不久，有好多學生都向我老公投訴，呢位N小姐太討厭，如果N小姐再讀落去，佢地就會唔讀。看似係玩要脅，不過呢位N小姐經常遲到，上堂訓覺 (呢D都唔緊要)，訓醒唔明又要問，問黎問去都係問佢「自身」的問題，並不是客觀的學術研究，所以令到很多人不滿。

課餘時間，就要想盡辦法搵我老公，一係上佢公司，一係打電話黎講幾粒鐘。講咁耐都冇實質內容，似係無病呻吟，浪費別人時間居多。呢位N小姐明知有我存在，當時我仲大住個肚等生細女，我唔扮產前抑鬱剷Q佢，已經極度比面我老公。因為佢太鐘意痴住我老公唔放，有些為人正義的學生，對呢位疑似小三更加不滿。(好在我老公有TASTE，呢件野佢哽唔落！)

最終，呢位N小姐再冇上堂，亦冇在學生之間的聚會內出現。

點知…

佢經由另一位朋友介紹下，我地和N小姐在同一宗教團體內成為兄弟姊妹！天呀！

N小姐今次改了對象，纏住我們的師父唔放，又係晚晚打電話講埋哂D無謂野。我們的師母可不是善男信女，一係當眾對呢位N小姐冷嘲熱諷，一係索性借故批評佢。呢D都唔怪得人，面係人地比，架係自己丟，邊個叫佢好攪唔攪，走去攪人老公？

N小姐在其他圈子，包括︰成長課程、公司、家人和朋友，都係不受歡迎人物。一係不斷搵人傾吐心事，一講就幾粒鐘。一係就專痴住團體內的首領 (例如︰佢老細 / 某 Training Center 的 Trainer / 我老公 / 我地師父等)，而呢D人物全部係人地老公，咁又點會受歡迎？我都覺得佢好勁，我知唔可能要世上所有人都喜歡自己，但係要犯眾憎犯到咁盡真係未見過！

記得有一次飯局，某朋友想提起N小姐，我忍唔住講左句︰「佢係佛地魔黎GA，唔好講佢個名啦！」

席間，大家笑到拍哂檯，而「佛地魔」之名亦好快在不同的朋友圈子中流傳開去…

窩心小子

昨日被一隻蚊針了鼻哥，相信隻蚊都幾毒下，個鼻即時又痕又痛，仲要腫起半邊。

回到家，用無比滴搽患處，竟然痛到入心入肺，我更肯定隻蚊真係好毒。

今晚，細仔走埋黎，指住我個鼻話我流鼻血。原來佢見我鼻上的針痕結左焦，佢以為係鼻血。哈哈！

細仔好細心，拎左張紙巾幫我抹，仲問我痛唔痛。

呢個就黎三歲的小子，真係夠體貼，令媽媽很窩心！

換新機

未有小孩之前，不知道DVD機原來是會爛的。菲菲講的係「爛」，並不是壞。只係我個大仔，已經整爛左2部DVD機。無論我放到幾高，佢都有本事駁腳上去整爛佢。所以我不會買貴的DVD機，反正下場都係比小朋友整爛。

最近，輪到細女成日走去攪部DVD機。部機冇爛到，不過唔知佢按左D咩制，所有碟播到一半就唔肯再播落去。我攪左部機幾日都攪唔掂，叫老公試下。佢又攪左好耐都攪唔掂，我估部機應該係壞左了。

壞左，不過都睇到，只係每隻碟只可以睇頭半截。我有打算去買過部機，不過老公話去深水埗買會平D，所以我將呢個重任交左比佢。責任係交左比佢，但部機一日未瓜佢一日都未的起心肝去買。之前我買左成套 Toy Story 諗住同2個仔煲碟，結果都係冇得睇，無癮！

星期日，我帶三個小朋友去逛書店，見到有 Cinderella 呢隻DVD，就諗住買比細女睇。佢實在太男仔頭勒，要搵D女性化既野去薰陶下先得。星期一，細女睇新碟睇到好入神，正當故事講到灰姑娘穿起舞衣和玻璃鞋，跳上南瓜車準備去王子的宴會時，部機一如以往停左。呢下可不得了，細女大吵大鬧要睇埋落去，但係部機真係唔肯播，我都冇計GA。

老公知道亞女冇得睇灰姑娘發脾氣，就九秒九衝左去深水埗買機。第二日，亞女有得睇哂成隻碟，冇投訴仲好開心添！

睇黎以後屋企有咩要老公做，只要叫亞女開句聲，就必定辦得快靚正！哈哈！