作為一個團隊的領袖，有很多方式去帶領自己的團隊。可以好 open 咁大家有傾有講，廣納各人的意見。可以好似軍訓咁，咩都係「This is an order!」，隊員必須服從領袖。亦可以不聞不問，由得隊員自由發揮。
其實冇一個方法係絕對正確或絕對錯誤，只有適唔適合。重視創意的團隊，較 open 的 approach 會較適合。重視紀律的團隊就要絕對服從。如果團隊內有優秀及獨立的隊員，領袖可以讓他們自由發揮，不需太限制他們。
如果領袖比隊員年輕，人生經驗較淺，該如何帶領他們呢？世事無奇不有，這些事是很平常的。
其實作為一個領袖，唔一定要在技術上或經驗上比隊員優勝，亦不需要擺出一副高高在上的姿態去壯膽，有社會經驗的人是不吃這一套的。領袖要夠宏觀，要知道隊員的長處，提供空間和機會比佢地發揮，如遇到問題請隊員提出解決方法，盡量少插手為妙。領袖只需在旁觀察，確保事情在正確軌道和預定時間內完成就可以了。
領袖並不是用來炫耀的，也不是靠踐踏別人來顯出自己有幾威。如果團隊內的優秀隊員都真心真意拜服年輕的領袖，他才是一位出色的領袖。
今年很不錯，身邊有不少朋友的小孩，在小一派位都獲派第一志願，大家都非常開心。但開心了不到一星期，壓力也開始來了。
有朋友發現獲派的小學水平太高，現在要努力補習去應付小一的進度。有朋友發現學校要求小孩必須有一體一藝，除了比錢上課買衫買器材之外還有評估云云。又有朋友發現書簿費和雜費都不菲，有點失預算。
我覺得好奇怪，家長們唔知一般的「好」學校都係咁咩？要學生出類拔萃，總要付一些代價吧。
另外，今日遇到一位家長朋友，佢個女同我大仔都係小一生。佢個女讀一線小學，媽媽大嘆好辛苦。不過呻辛苦的潛台詞係佢個女好叻，英文又好，課外活動又勁云云。我應亞仔要求 cut 哂所有課外活動，所以我唔辛苦又冇嘢可以 show off。呢位家長好震驚，佢話我個仔已經唔係讀一線小學，學業唔夠人爭，仲要冇課外活動，認為我在摧毀亞仔的前途。
講真，我絕對唔認同佢的諗法。我見盡太多有知識但冇思想的人，呢啲人比文盲更可怕。如果要我將小朋友變成倒模式填鴨，令佢失去自我，同扼殺佢未來有咩分別？
我相信有好多人唔認同我，唔緊要的。沒有一個方式是絕對正確，我只會找尋更加適合的模式。我心中自有裁培小孩的策略，但絕不是一般人正在採用的方式。因為，我知道過於控制和催谷，係會有反效果的。
最近遇到好幾位剛從事保險業的初哥，他們都一腔熱誠地向身邊的人講保險。我有留意佢地的 presentation，發現有幾個共通點。
1. 講多過聽
可能係初當銷售，以為要滔滔不絕咁講嘢先至似係 sell 緊嘢。又可能係想掩飾自己無信心，所以不斷講嘢黎壯膽。無論係邊一個原因都好，講多過聽一定會趕客。
其實在銷售過程，最重要係知個客想要啲咩，因咩原因想要，在解決過程中唔明啲咩，同埋可以付出幾多去解決佢心中的疑慮。一般情況客人唔會主動講，係要 agent 懂得問。但我發現冇一個新 agent 識問問題，只懂講個 plan 點勁，完全錯哂方向。
2. 和準客爭拗
當客人提出不同意見時，就急不及待要「糾正」佢，講講下就會變成爭拗。相信冇一個客係因為你拗贏咗而同你買單的，對嗎？客人提出不同意見，正好有機會瞭解客人多點，但好多新 agent 會親手扼殺呢個大好機會。
3. 不斷比較產品
每間公司都有自己的優勢，每種 plan 都有不同的特色。盲目地比較產品其實很不智。百貨撞百客，每種計劃都有人 buy 有人唔 buy。Agent 要攪清楚的，係邊種計劃較適合，而不是較好。
以上種種，都係 agent 大忌。但有趣的事，原來呢啲「招數」都係上司教的，真係匪夷所思！究竟係上司都唔識 sell 定係唔識教？
呢啲所謂「招數」係萬試萬靈的山埃毒藥，如果全部做齊點開單呀？有部分公司更將以上招數列入 training manual，要 agent 背熟來應付客人，實在離以想像，點解今天的 training 會係咁？
定係 agent 本身學啲唔學啲，最重要的 fact find 就唔學，淨係學點去 ko 啲客嘅口術呢？
Who knows?
我的其中一個工人完了約返了老家，新聘的工人下星期才報到。在這段間，就只有我和一個工人，去照顧三個小孩。
少了一個工人，家中的效率快了很多。小孩可以早些出門上學，晚飯後可以早點打理完家務，小孩比平時更早上床睡覺，一切都變得爽快了。
原因好簡單，我做事效率快，利落又準確。其實做家務帶小孩，大部分工序和流程都是 routine 工作，變化不大，根本不是甚麼難題，唯一的缺點就是困身。
既然我做得比工人好，為何我仲要請工人？因為有多一個工人，我就可以抽身，不用落場處理雜務。這樣我可以專注各家庭成員的 development，優化各人的素質。
要令家中各人 (包括老公、自己、小孩和工人) 都不斷進步，係要有觀察、辦識和思考空間的。過於投入雜務，腦袋就會被瑣事充塞，埋沒了思考空間。
在長遠來說，development 一定比效率重要。所以我很期待新工人上任，我們又可以繼續向前邁進了。
這種想法，不單家中適用，在工作中都適用，對吧？
我的細仔有學普通話，久唔久都會去參加下朗誦比賽。平時聽佢講普通話，發音不太標準，有很多懶音，面對人群會好緊張，好明顯去比賽只係志在參與，訓練下自信心，求其有張證書比佢影下相開心下就算。
昨日細仔又有比賽，平時我係唔會通知其他人，但今次巧合地有親戚知道了，發了一段錄音來「鼓勵」佢，希望佢得到冠軍云云。可能一般人都會咁樣鼓勵小孩，不過我不認同。每個人最需要戰勝的，並不是其他人，而是自己。冠軍並不是甚麼鼓勵，反而是一種壓力，一種會毀掉人的壓力。
每次比賽，都抱著擴闊視野的心態去參加，才會有真正的得著和真正的成長。獎項只是錦上添花，不要太重視得失，你得到的才會越多。
我有此諗法，並不是我從未得過獎，所以諗呢啲嘢黎安慰自己。獎項只是一個時段的肯定，一場比賽完結後，另一場立即就開始了。這是一個沒完沒了的競賽，一時之高下又何足掛齒？
收到親戚的錄音之後，我細仔都回覆了「唔一定要攞冠軍㗎，咁樣比賽先會開心！」。Dearest son, I am proud of you!
昨日幼稚園有舊生活動，大仔和一班幼稚園同學又再聚首。無見幾個月，個個都明顯長大了，連我都增廣見聞了。
有位小男孩走來同我講咗句：「死八婆」，我唔肯定佢真係罵我，定係覺得呢句說話好得意，所以當係同我玩。我即時同佢媽媽講，佢媽媽好輕描淡寫咁答：「上咗小學係咁㗎啦，啲高年班都成日講啦。」。
言下之意，你即係認為個仔隨意罵人死八婆都冇問題，係我大驚小怪。同埋既然學校啲哥哥姐姐都係咁啦，佢學識講呢啲說話純屬正常。
我明白小朋友有時係唔識分邊啲係好榜樣邊啲係壞習慣，但作為父母都唔好好引導小孩去分辨是非，仲默許佢繼續發展壞習慣，我真係無法認同呢種做法。
算啦，人地個仔做咩我理唔到，既然唔認同佢地就少見為妙啦。
你有甚麼朋友，就反映了你內心有甚麼追求和有甚麼傾向。
喜歡和懶人在一起，就會變得更懶。
喜歡和有錢人在一起，心中最渴望的是金錢。
喜歡和有品味的人在一起，你的生活會更有品味。
喜歡和聰明人在一起，就會變得更聰明。
喜歡和有才能的人相處，你的才能必會提升。
喜歡和有智慧的人相處，你的人生會更有得著。
要瞭解一個人不難，看看他的朋友，就一目了然。
同樣地，你有甚麼下屬，就反映了你是一個怎樣的上司。
如果你認為下屬是廢柴，你就是一個廢柴上司。
如果你認為下屬很能幹，你就是一位能幹的上司。
別抱怨下屬無能，先檢討下自己，為甚麼帶不起他們的工作能力？強將手下無弱兵，細味一下，就知自己有幾多實力。
如此類推，你身邊的每一個人，都在反映你自己。
答案永遠都在問題。
菲菲近年愛上網購，皆因方便，多選擇又唔駛周圍格價。我多在 Instagram 買嘢，貨品種類較多和較 update。
在這段時間的購買經驗中，睇到好多賣家的人生百態。在早期試過幫趁一個賣家，貨品寄失了，但她在 IG 或任何訊息都冇講明郵寄風險的處理方法，賣家只係一句 sorry 就了事。雖然貨物價格不高，但佢沒有考慮長遠留住熟客呢點，我唯有當買個教訓，unfollow 佢就算。
既然郵寄有風險，我就改用當面交收吧。又試過有另一個賣家，交收時遲到成粒鐘，佢不斷發訊息話我知「黎緊」，香港唔係大到咁呀？地鐵會塞車嗎？於是在這次交收之後我又 unfollow 了她。
在網上買嘢，為了貪方便，反而造成不便，多諷刺！不過唔係個個都咁甩皮甩骨的，都有好多負責任的賣家，我會繼續支持真心創業的年青人。
最攪笑係，有好多賣家都在自我介紹中列明「不做受氣生意」和「把棄單者開名」。哈哈！做生意面對各式人等，受氣和棄單本是營商的一般風險，咁都承受唔起？客人要承受郵寄和賣家遲到的風險，點解賺錢的一方卻不能承受這些一般風險？
可能好多賣家只係做買賣，不是在做生意。生意係有來有往，有得有失的。學懂去評估和正面地處理風險，才是生意吧。覺得受氣，究竟係客人問題定係自己溝通問題？我夠膽講句，客人比氣你受，證明你功力未夠，未有足夠能力去處理不同的客人，所以會覺得受氣。
至於客人棄單，直接把貨物賣給其他人吧！有咩好嬲？仲要開人名？雖然我從未棄過單，但我真係唔敢幫趁囉。
再刁難的客戶都處理到，再多的滯貨都賣得出，你的生意就真正可以越做越大了。
大家努力，共勉之！
旺角連夜來的衝突，令旺角的居民和商戶雪上加霜。他們的動機，是爭取普選定係蓄意衝擊警方，明眼人心中有數。
主流傳媒在報導中故意刪掉暴徒衝擊的場面，放大警方驅趕暴徒的所謂暴力，到底是報導事實還是曲線煽動，懂分析的人自有判斷。
在網絡上呼籲網民去旺角「鳩嗚」(普通話購物之諧音)，但帶備了頭盔和口罩，很是耐人尋味。
把警員家屬逐一起底，是甚麼手段？
在網上論壇以暗號交談，我想他們是在策劃一些不見得光的事吧。
反佔人士出言反駁就被滅聲，我們的言論自由已蕩然無存。
網民肆意杜撰旺角警察隨街打人的故事，但住在旺角的我們，每天只見到友善的微笑，警察是不會無故打路人的。
教師主動發表仇警言論，明顯有違專業操守。有部份警察的行為不當就抹黑整個警隊，基於此概念，曾有教師性侵學生，哪整個教育界都是淫魔了嗎？作為教師，應該懂得甚麼是「以偏概全」和「將心比心」吧。
法律界人士聲稱會幫助被捕的「市民」，很正義呀！
以上種種，令我們體會到甚麼叫恐怖。
最近，我正在積極思考一個問題，不如舉家搬去大陸住吧。
如果香港會漸漸被激進份子邊緣化的話，我情願在國內找機會。如果這班激進份子，將會是我們孩子的上司、師長或合作伙伴的話，我真的擔心孩子們的未來。
對於我來說，共產黨並不可怕，我們還要靠國內客戶來養家。但在我眼前的熱血青年，只是不斷破壞我們的生活，危害我們的安全。
不要說我銅臭，熱血的不用吃飯嗎？他們為甚麼要攪咁大鑊嘢?因為年青一輩缺乏向上流動的機會吖嘛。先唔講向上流動要點裝備自己，有正能量等等的條件，我講動機。
向上流動為咗咩呀？講到尾都係錢。向上流動唔係為錢唔通為咗服務社會?你們信嗎？熱血的冇資格話努力工作的人係豬，因為你們連人都未識做。向上流動唔係靠政府，亦都唔係靠政策，係靠自己。
如果香港的未來是掌握在這班不負責任的人手裡，我們的下一代還有希望嗎？
很多年前，有張信用卡係身份的象徵。但現在對某些人來說，信用卡可能是負債的代名詞。
到了2014年11月，回鄉卡搖身一變，成為大家都引以為傲的身份象徵。有回鄉卡，可以在國內吃喝玩樂、打工、做生意，連結婚生仔都得。
回鄉卡不單是一張可以落葉歸根的 Return Home Card (潮爆佔中英語，令人大開眼界！)，仲可以幫你搵工順利啲。失效的回鄉卡，會令多少僱主卻步？就算洗心革面了又如何？所有與國內有關係的工作都做不了，會失去幾多發展機會？
工作以外，想去旅遊觀光又唔得，如在香港搵唔到伴侶，連返大陸結識異性的機會都無了。
有人形容被取消回鄉卡係好「恐怖」，但我只覺得可笑。既然都擺明車馬話不喜歡大陸，人家取消了你的回鄉卡，實在理所當然，有咩咁恐怖？唔通我明知你唔妥我全家，都請你入屋嗎？
汝之智慧，不可思議！
明天開始，大仔開始第一次測驗。
在半個月前已開始幫佢溫習，在呢兩星期，我又學懂了一點點。學懂的當然不是知識啦，係點幫小朋友溫習。
我個仔唔會自動自覺溫書，連範圍係咩同如何溫習都唔知道。都好正常，畢竟係佢人生第一次測驗。評估過佢各科能力之後，我知道普通話同數學都可以唔溫，可以煩少兩科。餘下三科，中文最穩陣，其次係常識，最弱係英文。
為了令佢容易投入，我決定先溫中文，令佢在溫習中得到滿足感。在溫中文期間，滲少少英文生字比佢，等佢對英文有啲認知先。
溫完中文，就攻英文生字。呢段係最艱苦的時刻，因為佢成日撈亂啲字。咁我就每日同佢溫五個生字，雖然好慢，但佢漸漸記得啲字。
苦盡甘來，溫完生字溫常識。經過溫英文的艱苦之後，佢認為常識較易入手，好快就溫習好。在尾段，再同佢溫英文句式，因已有生字打底，感覺無咁困難。
呢兩日，為之前溫習過的作了個總結，有八成內容都記得。希望佢今次測驗可以穩步過關啦。
開學2個月，話咁快就收到測驗的通告。亞仔間學校算係舒服，一年只有2次測驗和2次考試，比起3測3考的小學要舒服得多了。
暫時課程仲係淺，數學可以唔駛溫，只係溫習下中英文詞語應該都可以。作為一位 hea 媽，我唔打算陪太子讀書，我希望可以培養到佢自己溫習的習慣。
亞仔平時最愛扮老師，日日要細佬妹聽佢講書。令我想起我小時候，因為細佬妹太年幼，扮老師都冇學生，就會自製教材和故事書來自娛。在製作這些故事書時，就自自然然溫習了。在我印像中，我係幾乎冇乜點溫書，都考到好成績。
見亞仔扮老師時都有自製教材，佢會唔會好似我咁，順便溫埋書呢？如果佢學習的模式和我小時候一樣的話，我就可以繼續做 hea 媽了。
萬料不到，在2014年的香港，一個國際大都會，當中最繁忙的鬧市旺角，會突然變成一個城寨。
來自四方八面的人，突然合理地攻佔了旺角的心臟，當中的居民商戶全都成為了人質。他們築起城牆，自成一國。他們以家傳戶曉的生日歌作為國歌，黃色作為國家的顏色，只欠一面國旗罷了。
警察趕佢地唔走，禁制令趕佢地唔走，區內市民形形色色的驅趕行動都趕佢地唔走。睇黎佢地意志已經堅定到無人能阻的階段。
大家都係講廣東話，但城裡城外的人完全溝通唔到，令人費解。
不如由得佢地在城寨內，過他們的烏托邦生活好了。他們有大把時間和不明來歷的錢，有學生這個銜頭作擋箭牌，誰也妄想動他們一根頭髮。
懇請城寨內的學生們作一個富教育意義的示範，一人一票選出你們的寨主吧。群龍無首就會淪為烏合之眾，你們仍是一盤散沙各懷鬼胎的話，未爭取到民主就爆發內戰了。
如果唔明我講咩，請讀下中國近代史，或者參考近10年的國際新聞啦。在批評別人短視之前，請思考一下你們有多務實。理想和務實，是唇齒相依的搭檔，如你們硬要把它們劃清界線，無論做甚麼都註定失敗。
擴闊思考空間吧，共勉之!
有支持佔中的人 whatsapp 我，問我旺角的情況。
旺角每天發生咁多事，有些有見報，有些沒有傳媒報導過。我不會去戰區，所以我就求其講幾件傳媒有報導過的事給她知。
她的回覆是質問我有冇證據，拉唔拉到人之類。
其實佢問呢啲嘢係想關心我定落我口供呢？係朋友嘅就算唔慰問，最少都講句無奈吖。我地顧及安全，冇咩事都唔會去高危地帶啦，其實除了見到好多警車警察之外，真係冇嘢好報導喎。我當係朋友式傾計，你要我比證據，係咪攪錯咗啲嘢呢？
在佢地心目中，我地呢班除了是人質之外，仲要為佢地充當戰地記者嗎？
談判冇結果，我們繼續做人質。或者已經是戰地孤兒，誰也幫不上忙。
冇問題，我不介意，我們總有辦法活下去。但請別再問我旺角有甚麼事發生，想知的話自己來找證據吧。反正傳媒報導都係講啲唔講啲，咩消息、圖片和短片都反映不了真相，亦沒有所謂的證據。
關心我們的人，謝謝你們！今天旺角還未爆發內戰，我們仍然安好。
早前和朋友晚飯，大家都係旺角區街坊，話題當然離不開佔領行動。
明顯地大家都討厭佔領行為，但他們好似蟑螂一樣，數目眾多，越打越有，且有損市容。我們面對這群蟑螂實是束手無策。
朋友的客人向她訴苦，她的子女在家張貼大字報，要求民主自由，把朋友的客人氣過半死。朋友問我，如果是我的子女，我會怎樣處理。我下意識地回答:「既然他們想要民主自由，就自己外出生活吧。為了培養他們的責任感，我會停止經濟援助，要靠自己努力去獨立生活了。」。之後再想一想，這情況真的會在我家出現嗎？我肯定我的子女們不會變成這樣。
這不是我一廂情願的想法，是有理據的。子女在家貼大字報，在家宣示主權，即是和家人之間沒有很多的愛。如果你愛你的家人，會用這種手段去傷害他們嗎？如果愛家人，會狠心和他們對立嗎？
我也年青過，也反叛過，但真的可以做到咁絕嗎？撫心自問，真的做不出。
家是一個談情說愛的地方，無論對老公、孩子、工人甚至貓咪，都以情行先，在情的基礎上再說理。在沒有情的基礎上，連道理也不用說了。因為各人心中早已落了閘，只向自己的方面想，失卻了設身處地為別人著想的美德。
用愛做基礎的家，意見不合也會找到共識，對嗎？當紛爭出現時，總會顧及到曾經建立過的情誼吧。
眼見今天年青一輩的所作所為，令我們反思，究竟他們的成長中，得到的是精神上的愛，還是物質上的溺愛?他們的價值觀和人生觀建立於甚麼基礎之上?我想，父母們有很大的反思空間吧。
家長們，共勉之！
小朋友爭玩具，爭電視睇，父母會如何處理?
菲菲三個孩子還年幼，佢地幾乎每日都有嘢爭。有時真的很想要所以爭，有時係為啖氣，人爭我又爭唔好蝕底。無論佢地為乜而爭都好，我都只會用一個辦法去處理，就係叫佢地自己協調一個大家都認同的方案。
個方案係乜唔重要，最重要係大家必須尊重各人的意見和利益，大家都要有適當讓步，同埋大家都願意遵守協定了的規則。
孻女才三歲，知道咩叫和而不同，爭取之餘亦要顧人感受。她懂得爭取不一定要硬搶，往往軟功更為有效。當她嗲下兩個亞哥，哥哥們點都讓佢幾分。
細仔四歲，上有亞哥，下有妹妹，夾在中間其實最冇籌碼。但他精於看時勢，如知道暫時不夠 power，會暫時放下自己的欲望，改做別的事情。到大家都不爭了，就可以從容不迫地做返自己想做的事。
大仔六歲，上了小學明顯成熟了，在爭拗時會第一時間出來主持大局，讓大家盡快解決問題。如果佢都有份爭，我先出手，提醒佢作為大哥的責任，佢就會主動提出解決辦法，和細佬妹商量。
三個小孩性格不同，處事方式不同。但在家中彼此尊重，不會因爭拗而傷感情，這才是一家人。
又好耐冇寫文，呢篇文不煸情不感人，只因壓力太大，邊寫邊流淚……
忙暑假和開學已經夠哂皮了，諗住10月可以 plan 下其他嘢時點知提早佔中。事情發展得奇快，仲佔埋旺角，一夜之間我家的生活受到極大的干擾。
唔想講立場，唔想講政治，亦唔想講我們面對的壓力。唔想睇面書，連 whatsapp 群組都較哂靜音。不住在旺角的人叫我忍耐，細路返少幾日學唔會死，你咁忍得不如一家大細搬黎住同讀書啦。
我只知我地仲要交租交學費，一家五口要開飯，保護家人安全係父母天職。旺角市面一日不回復平靜，我們的壓力就會每日俱增。申訴苦況就批評我冇遠見，當每日都要面對生活和安全問題，再有遠見都捱唔到落去了。
我唔想住在戰場，懇請你們放過我們吧！
菲菲大學時主修市場學，但我的爸爸經常問我有關中國歷史和文學的事。我沒有讀過中國文學，中國歷史只讀到中三，仲要係勉強合格嗰隻，所以爸爸問的課題我全部都唔識，爸爸就會話我讀到大學咩都唔識。同類事情在人生中經歷了 n 次，令我很不快。心諗，你明知我讀 marketing，無啦啦走黎考我中國歷史，係咪玩嘢呀?
大學畢業真的冇乜大不了，區區一個學士課程，只係某專科的基本入門課題，距離成為專業人士仲有十萬九千里，絕對不值得驕傲，但亦未至於咩都唔識咁離譜。自問都算好學，自大學畢業後都斷斷續續學過好多課題。有人問我點解唔讀碩士和博士，偏偏走去學咁多其他嘢，因為我知道自己想要啲咩。
讀完 degree 入唔返自己讀嗰行，就知道再讀上去對我幫助不大。因為我投身銷售行業，所以進修銷售技巧、人際關係和性格學等等的課題。呢啲課題都幫到我提升工作能力和質素。職業生涯中曾放過一個悠長假期，在假期中就學下普通話同日文，因我真的喜歡學外語。做了媽媽就學湊仔，請了工人就學做一個好僱主，而家掌握到家庭節奏，又去學返自己鐘意的 topic。當然我仍在學習一些人生課題，正在努力改進自己中。
學習不是固定的，但是必須的。在香港這樣的大城市，每件事都在急速演變，保持終生學習的態度，才不會被社會淘汰。學如逆水行舟，進則退。在學會各種技能的同時，也要學會修心。任何學問都有助人和損人的一面，修心可令學問發揮正面作用，但心存歪念，就會變成持術欺人，後果只會累已累人。
修心比起任何學習都重要，近期有人提醒我品格不夠高尚 (即係冇品？ @@”)，咁我就注意下改善自己啦!
近排菲菲忙於上課，疏於貼文，希望大家見諒！
做了師奶，不一定沒有夢想。我都有一個夢想，希望可以買樓收租。呢個夢想好似好冇大志，但諗深一層，可以有樓收租，即係建立一個真正的長遠收入，真係唔駛做都有錢洗，你話幾爽！
之不過講就容易姐，要有足夠市值的物業，先至有條件講靠租金過活。呢件事，一直停留響夢想階段，仲未有膽去行第一步。早排老公的其中一個學生買了他人生第一間物業，不久之後成功租出，開始做有收入的業主了。我地替佢高興之餘，亦從佢口中得知佢係上咗一個課程之後學會物業投資的竅門，所以開始了收租的生活。
聽罷我都極有興趣，今天課程舉辦簡介會，我就拉埋老公一齊去了解。其中有幾個三十歲左右的學員都係讀了這個課程後買了樓收租，並計劃在短期內再度置業累積資產。呢個課程，正好可以幫到我實現夢想，於是二話不說就拉埋老公一齊報讀。
其實要讀，我一個都可以。不過講到買樓咁大件事，仲要係買完一間又一間，大家必須要有共識，所以我都叫佢報埋。學費唔平的，但我有信心學識物業投資一定搵得返，絕對值得投資。
我好期待快啲到七月，就可以快啲知道點達到我的夢想了!
現在是星期六上午11時半，我正身處山林道某補習社，等緊大仔放學，佢今日上的是普通話。
補習社有個 area 比家長同小朋友休息和等候，其他家長都在聊天，只有我百無聊賴，於是寫下 blog 打發時間。我和其他家長每星期都見面，大家都是認識的，但她們的話題我一句也搭不上。
她們交流如何跟進功課，可是我係唔跟功課的。功課係小朋友的責任，我只係檢查是否完成。反正而家只係幼稚園，佢地有本錢去錯，亦可培養佢地面對過錯的態度，所以我係唔干涉小朋友如何做功課，同家長們冇咩好交流。
一係會講各種才藝訓練同考試，我的小朋友咩才藝班都冇上，所以我唔識搭咀。另一批講英文考試，oh my god 我連英文文法班都冇報，呢個話題又唔關我事。
仲有一批講小朋友如何痴身，因為佢地只有一個小朋友，沒有弟妹做玩伴，當然只會痴住媽媽啦。我湊仔都湊得瀟灑過人，三個小朋友自己玩，我就可以做下自己嘢，冇佢地的煩惱。
總括而言，係我懶！ XD
