愛心爆棚

身邊的每一個圈子，總有一兩個願意為大眾付出而且是愛心爆棚的人，我他們彷彿是團隊中的愛心大使。

這些愛心大使義無反顧的付出，的確為大家增添了不少力量。但在另一個角度睇，係助長咗一班凡事都依賴的懶人。

本來一個願打一個願捱，係冇咩可以批評的。但在團隊運作上，就逐漸形成愛心大使咩都做哂，做埋班懶人的「阿四」。而班懶人就越黎越老奉，甚至連自己的責任都推埋比愛心大使。久而久之，愛心大使都會不勝負荷，團隊的運作就會面臨崩潰。

凡事追求結果的我，最近都忍唔住要插手，狠狠地插咗班懶人一嘢。實在離譜到不能接受，在活動開始前不足一小時，才玩失蹤，一個 whatsapp 就要愛心大使頂埋佢嗰份，有冇咁不負責任呀？

愛心大使一臉無奈，我就老實不客氣在 whatsapp 喪插條友。事後我有檢討過，係咪自己太燥底，又亂開火。經過一輪沉澱和討論之後，今次絕對不是一時之氣。佢玩臨時甩底已不是第一次，而愛心大使都幫佢頂咗好多次。每次佢都若無其事咁一點歉意都冇，如果咁都唔駛丙，以後點服眾？

佢可能完全聽唔入耳，亦有機會玩永久失蹤。但在整個團隊的利益上，我點可以縱容一個如此不負責任的人來破壞團結精神呢？

愛心大使們，都應該為自己設下底線，不要被人利用了自己的愛心。