爸爸請三思

又有朋友和老公要分開，個女才滿一歲不久，又多一個單親家庭了。菲菲都唔記得今年有幾多個朋友離婚了，真係覺得好痛心！

呢位朋友L小姐的情況比較特殊，佢地係冇註冊的，根本算不上係離婚。而佢「老公」有2次離婚紀錄，似乎呢位男士對婚姻並不是太認真，或者佢係一隻無腳雀仔唔適合結婚。據L小姐講，佢「老公」對前妻餘情未了，常常以SMS互訴相思之情。L小姐在懷有身孕時發現此事，亦曾經問過佢「老公」點解仲要同前妻有曖昧留言，當時她的「老公」答應不再玩火。到最近她的「老公」似乎固態復萌，成日偷偷玩電話，仲改埋 password。L小姐忙於照顧女兒都好少干預佢，不過佢「老公」以為她偷睇他的電話，又吵左一次。她的「老公」話覺得壓力好大，同L小姐相處唔到，對L小姐有戒心之類，所以決定要分開。呢位男士仲想爭取女兒撫養權，要女唔要乸。呢位男士紀錄不良，唔通佢想個女年年都叫唔同人做媽咪？

人家兩公婆點相處我不評論，但係呢位男士如果真係咁愛前妻，點解要離婚？就算一時意氣離左婚，佢都搵左另一個「老婆」啦，仲生埋小朋友，都唔可以專心一致為呢頭家咩？點解仲要同前妻有曖昧？據聞他的前妻已在外地再次結婚了，咁即係咩關係呀？佢地兩個在互訴相思的時候，有冇考慮到咁樣係會破壞兩個家庭ga？最無辜係個小朋友呀！不負責任的成年人，你地知唔知咁樣對一個小朋友會有幾大影響呀？講到尾，佢係愛自己多過愛家庭，簡單直接的一句就係︰自私！

每次知道有朋友離婚，菲菲都會好唔開心。如果冇小朋友我都覺得好d，但係已經為人父母，都唔可以拎d EQ出黎解決問題咩？仲有好多男士原來生仔之前冇考慮清楚，諗住生左之後咩都係個老婆攪掂。好勒，到個老婆真係顧住照顧小朋友，佢又嫌個老婆唔陪佢，就會出去搵慰藉。菲菲真係好痛恨呢D用下體思考的動物，枉為人父！

之前菲菲有提及的富二代，佢都有三個小朋友，不過三個小朋友的媽媽都不同。佢屋企有錢，再搵多十個女人去生仔都得，不過呢D小朋友佢地對父親、家庭同愛有咩睇法呢？我估係同我地一般人的睇法有差異。佢地生活水平可以好高，但係愛可以點彌補？