管理基本功

菲菲有一個習慣，凡事都喜歡做一個簡單純計，尤其係公事，呢D係做管理層最基本的功夫。菲菲大學時 STAT 好似剛剛合格，其實算不上識得做咩統計分析，但係簡單的平均數、最高、最低、季節性等都一定識 (呢D好似小學生都識… 哈哈！)。

管理層其實有咩做呢？如果管理層只係負責坐響辦公室嘆冷氣就好了，咁我以往 (以及將來) 都唔駛做得咁辛苦。做管理層的，唔係一味手指指老點人做野就攪掂，如果係咁簡單，老細就唔會出高D人工去請一個「紅綠燈」返黎啦，點人做野有邊個唔識？響安排人手去完成工作之前，最基本要瞭解各員工的工作能力、優點缺點、工作的難度和時限、公司有甚麼資源等等，才可以做到一個合適的工作分配。在工作未完成之前，要跟貼進度，從中解決問題，才可以確保工作可以在限期內準確完成。

要瞭解以上種種，唔係單靠估計、直覺或人事關係，係要掌握一些數據才可以作出評估。管理層都有老細，工作完成不了責無旁貸，唔係推卸責任話D下屬做唔到野就可以推得一乾二淨。做亞頭的，唔係要落手落腳幫下屬做細節工作，而係要懂得睇住成個過程，識得防範於未燃。人唔係機器，會累、會有爭拗、會有情緒，管理層唔可以一味下達命令而不考慮以上因素。有時做亞頭要兼埋社工果份，要鼓勵和協調才可以減少因以上人事因素而導致達不到工作目標。

菲菲係跑數出身，做左好多年前線，好瞭解前線人員的苦與樂，對於勉勵前線員工都有一些心得。他們的表現可以好好，亦可以好差，要視乎員工的心理狀態。如果有同事情緒不穩，而公司又有緊迫的目標需要達成，就要鼓勵其他員工「團隊化」，因為同儕間的影響力遠比亞頭高。做亞頭既不斷迫佢交數，最終只會流失員工，有時甚至有連鎖反應，成班手足一齊走，咁樣仲大鑊過交唔到數。

當同事狀態好時，就要鼓勵他們發揮「個人主義」，突破自己的成績。咁可以令同事之間產生競爭心態，係提升公司業績和個人能力的好時候。最重要係「好天斬埋落雨柴」，儲定「彈藥」來平衡成績欠理想的日子，在年結時可以達到年終目標。

管理層要識收放自如，知咩時侯要攻，咩時候要守。咁樣先至可以留得住班手足，亦可以做得到公司的要求。不久的將來，菲菲快要重返職場，而家為自己做定心理準備，在新的工作有更好的表現。