開天殺價

有沒有人聽聞過總代理的價錢貴過小量批發價的道理？今日菲菲又大開眼界了。

之前老公想和富二代合作做生意，最後因為富二代縮沙而告吹。後來佢願意提供貨源，只是不會參與投資和營運。今日我們約了供應商的代表開會，商討供貨細節。當傾到價錢時，對方竟然要求我們每件貨多付一筆費用，是給富二代的酬勞。呢個價錢比其他小批發商的價錢更高，我們傾的是香港區的總代理，竟然要付比小量批發 (每件) 更高的價錢，是甚麼道理？呢位富二代係唔想比我地做香港區總代理丫？定係佢腦殘呢？呢件貨因為缺乏資源做推廣，所以銷量一直都很差。我地就係睇中呢件貨有利可圖，先至願意提出成為香港總代理的合作協議。而家生意佢又唔想做 (因為懶)，叫佢比貨又獅子開大口想中飽私囊，我真係想兜口兜面鬧佢一句「廢柴」。

呢位富二代口口聲聲話要賣好呢隻貨，做D成績比佢老頭子睇，原來都係「講就天下無敵，做就無能為力」。你唔識做唔緊要，我地睇中你件貨想幫你做，竟然玩「過水濕腳」呢D小把戲，呢條友仔有冇大志 ga？做香港區總代理，好明顯我地要的量係好多，正常係可以 bargain 一個更平宜的價錢，佢竟然要我地多付一筆錢比佢自己袋，條氣真係唔多順。佢地都未攪清楚，貨源係好重要，但係我唔搵你係可以搵其他貨，生意一樣可以照做，但係冇人幫佢出貨，就未必搵到另一個人去同佢大批銷貨。邊個上把，邊個下把，佢好似仲未好清楚喎。

我同老公講，如果佢堅持要呢個價，呢單 deal 拉倒好了。我地有其他貨源可以傾，而其他供貨商亦願意提供資源 support 我地出貨，正常人都知點選擇啦。