年薪百萬

菲菲有三個小孩，暫時仲係全職無飯主婦，仲好懶惰地請了2個外傭，一家七口的生活全靠老公獨力支持。本以為我地的每月支出好驚人，點知一山還有一山高，強中自有強中手，真係令我嘆為觀止！

早幾日我地同一位老友A君食飯閒談，先至發現我地的生活其實係好「草根」。A君係我大學師兄，又係我老公老友，佢第三個女又係我大仔的同學，之前我又幫A君打過工，大家都幾有淵源。A君有4名小孩，好似有3至4個傭人，老婆響佢公司幫手做野 (同菲菲情況差不多)，仲係同外母大人一齊住，一家十口何其壯觀！佢D小朋友仲細，管接管送，上興趣班等的時間和洗費都不菲。我地傾傾下講到家庭支出呢個問題，菲菲問︰「你地一個月駛唔駛十萬支出呀？」。A君答︰「梗係唔夠啦！而家我已經比錢比到麻木左，唔單止有每月固定支出，仲有D係日日清既數，真係比到冇哂感覺！」

A君唔係出身豪門，亦唔係娶左個有錢老婆，白手興家自己攪生意，菲菲都好佩服佢的能力、膽色同勇氣！佢成日叫我生多個，我真係頂唔順嘞！老公有錢養我都冇力湊啦，我唔想挑戰呢D極限嘞，哈哈！

以前覺得年薪百萬係一個好令人自豪的成績，到了今天，原來只係一個基本生存的要求，真係嚇怕一眾未生小朋友的人。大家唔好笑我怪獸家長，冇工人係唔駛死，不過要餐餐叫外賣同埋日日拎衫落街洗之嘛。如果是但一個小朋友病左都要一拖三去睇醫生，唔好比小朋友分開上興趣班，或者完全唔上，咁就可以唔駛請工人了。

好多人都話以前D亞媽一個湊幾個做埋家務都仲得啦，不過而家社會已經唔同左，唔可以獨留兒童在家，唔通帶住幾個小朋友又拖又抱咁去買菜？定係掛住做家務，由得小朋友唔識功課都亂作一通？而家好多親子習作，唔理你識唔識都要乖乖就範，鬼叫香港的教育制度咁畸型？連入一間普通的學校都要睇小朋友有參加咩課外活動，比賽係咩成績，有冇能力為學校增光，我地可以完全唔跟呢個遊戲規則嗎？我地又唔係做莊果個，暫時仲未到我地揀。一係再努力D搵多D錢，送哂D仔女去外國讀書，就唔駛比香港的畸型制度玩殘。以前只要讀書成績不是很差都可以繼續有書讀，而家平均分唔夠90分就會收警告信，再唔係比封 Referral Letter 你去考其他學校，為保學藉，就算小朋友唔上興趣班都要去補習。以前的社會係咁的嗎？家長可以咩都當唔知唔理嗎？自問做唔到咁灑脫，除了自己節衣縮食之外，仲要抽調更多人力物力同財力去維持小朋友們的「基本生活和學習水平」。

好在我家支出唔駛每年一百萬，仲頂得住！