做生意

菲菲身邊有好多朋友都係做生意的，大小規模都有，各種行業都有，有時同佢地傾下計都學到唔少做生意上的事。菲菲亦認識好多抱住一腔熱誠打算創一番事業的人，生意做不了幾個月就出問題，不出一兩年時間就要把生意結束了。是運氣嗎？是經驗嗎？還是其他原因導致生意失敗呢？經過幾年的觀察，菲菲找到一點點的頭緒。很多生意失敗都有一個共通點，就是管理不善。

想做生意的人，一係對某一行業認識很深，很有信心自己能做出一番成績，一係識得計數，知道點樣營運可以賺到錢，他們對行內知識不需深入，只要找到懂得運作的人就可以了。但係真正要營運一盤生意真係咁簡單嗎？他們往往都係敗在人事和行政問題上。

識得做生意同埋識得管理一盤生意係有好大分別。管理生意包括D咩？人事、財政管理、運作流程都係需要管理的，生意不是懂得收錢就成功，要懂得管理和運用資源，先至可以保住辛辛苦苦搵返黎的錢。好多人都係比「人事問題」纏繞不休，白白浪費大量人力物力財力同時間去處理，虛耗生意的資源。

要知人善用係好重要，不過世事唔係咁完美，你手上的「人」有幾多料唔係最重要，有幾肯幫你先至係最重要。菲菲見過太多有料但係不願做的人，一係每件事都同你講條件，唔係要錢就係要權。比錢同權力都唔係問題，問題係貪得無厭，要完一次又一次，仲慘過比人勒索，咁盤生意仲可以點行落去？

有D人會自己落手落腳做，確保生意命脈不受別人控制，但係當老細專注在日常運作，每日都勞勞碌碌的話，又點可以客觀地抽身睇返全盤大局？咁樣的生意只係手作仔得個做字，唔會蝕不過冇發圍。咁樣做老細為乜姐？不如打返份工好過啦，起碼唔駛咁大壓力丫。

如果將「做」同「管」分開，做的人就專注做，管的人就專注決策管理，盤生意會平衡D。「做」和「管」係兩個不同範疇的專長，唔好以為搵個行內做得耐的人就會識得管理，好多生意都係敗在呢個謬誤上。管理係一門學問，要懂得客觀，不要背負太多「經驗」的包袱，才會在多變的營商環境找到機會。找行內經驗豐富的人來管，往往被經驗所局限，缺乏新思維，慢慢會變得墨守成規。做管理的人仲要懂得平衡各人在生意上的角色、崗位和權利。總不能讓某些人不斷擴大影響力，導致管唔到佢地，佢地就好似貪官咁令生意走向滅亡。到有事需要決策時，究竟誰有最終決定權，決定了之後由誰去執行，執行時出了問題由誰去解決，都要有一個清楚的定案。如果只係做了決定，如何實際推行係沒有清晰方案的話，咁盤生意又可以點進步？呢D全靠管理層的功架，要令整體配合，步伐一致，先至可以達到理想的效果。

最近有朋友C君召集了一批人夾錢做生意，每個股東都因為夾左錢而意見多多。有好多事都係議而不決，夾左錢成年都未真正開到波搵錢。呢一年就洗左好多錢去籌備呢盤生意，餘下的資金已經去到警界線了，但係開業日子仲在爭拗中。未揾錢已經耗盡彈藥，究竟係咩問題？菲菲觀察所得，係召集人管理能力欠奉，在召集時只係為錢而召集，完全沒有考慮如何管理呢一筆資金，更加沒有考慮如何管理呢一大班小股東。經常由得他們你一言我一語的擴大個人影響力，咁盤生意到底係邊個話事GA？既然係冇人話到事，咁點做呀？就算入面有幾多有料的人都好，都係行唔郁GA。

C君話佢地比左錢，想知公司每件事係點攪。道理上係成立，但係究竟佢地要知幾多、幾時知、知D乜、點處理佢地的意見等等係完全冇 idea 的，咁即係不斷為一 D 沒有辦法達成共識的事去討論，咁有咩意思呢？同埋有冇一個人係負責統籌意見之後作出決定呢？係冇的，咁樣的生意會有咩前景呢？菲菲唔敢講，只係慶幸當時我同老公冇夾錢，不需要為呢D事而煩。

大家做生意之前，真係要知道點管先至好開波。