捍婦

如果有人批評我老公，呢個人不配做我朋友。朋友間要互相尊重，不可批評朋友的家人。連你屋企人都批評得嘅，有真心待你為朋友嗎?

事實上，我身邊的人都知我悍衛家人不受別人傷害，冇人敢在我面前講我老公不是。曾經有人在我面前串我老公，我唔會理佢係邊個，當場要令佢收聲。人不犯我，我不犯人，你無啦啦走黎攪事，我會任由家人比你奚落嗎?別人可能覺得我小器，不過當你愛你的家人時，就不能接受這種事發生。

同樣，我亦都不能接受有人在我老公面前說我不是，這是干涉別人的家事，離間別人夫妻感情。

做女人，會義無反顧地維護家庭。

做男人，會同樣地義無反顧嗎?

財務自由

昨日提起過「財務自由」呢個字眼，聽就聽得多，一般人真正做到冇乜幾個。大約二十年前已經知道有「財務自由」呢個願景，但只限於願景，根本唔知以我的本事有咩能力可以達到。「財務自由」簡單D講，即係你的被動收入比你的支出大，唔需要再為生活而工作，可以有足夠金錢過你想要的生活。以前，我只認為二世祖先至有所謂財務自由，一般打工仔如我係冇可能做到的。

做了咁多年銷售，響好多範疇都聽人講過呢個 term。尤其做傳銷、保險、基金呢類，就好多時會講及「財務自由」。老實講，如果要靠以上途徑達到夢想，冇話唔得既，不過唔係咁容易做到咁解之嘛。我老爺仙遊後，有一間物業留返比奶奶收租。因為物業本身價值都不錯，所以收返黎既租絕對夠奶奶生活有餘。呢D就係所謂財務自由了，唔駛做都有一個資產提供現金收入比你，而呢個收入係會追得上通漲，繼續令係生活無憂。

要做到呢一點，只要你擁有一個有租收的物業就可以了，好似好簡單。不過好多人連自己住果間都未攪掂，又點會有能力購入多一間或以上去收租呢？有首期銀行都未必批按揭，只係得個想字。

其實要做到財務自由，唔一定要投資地產\。所有各式各樣的投資項目，只要你真係識得玩，輸得起，輸完學到教訓，再接再勵，總會有達到財務自由的一天。除此之外，仲要有驚人的毅力、信心、膽色、眼光、努力、EQ、AQ和FQ等等，先至有機會做到。冇做足功課同裝備好自己就盲目投資，結果只會得一個，就係做炮灰。

我唔想做砲灰，亦唔想我老公一個人養哂成頭家咁大壓力，亦唔想老來要睇媳婦面色做人，所以今次要好好把握呢個裝備自己的機會，可以儘快走向財務自由的第一步。

如果你睇完呢篇文覺得我好天真好傻，唔緊要，你係正常的。

如果你對我的想法有共鳴，我們對自己的人生都有願景的，希望你都可以達成你的夢想。

後記︰菲菲今日心情低落了一天，但壞心情不會影響我的信念。就係事事不順，心情不佳，更加要為自己打打氣！

我的夢想

做了師奶，不一定沒有夢想。我都有一個夢想，希望可以買樓收租。呢個夢想好似好冇大志，但諗深一層，可以有樓收租，即係建立一個真正的長遠收入，真係唔駛做都有錢洗，你話幾爽！

之不過講就容易姐，要有足夠市值的物業，先至有條件講靠租金過活。呢件事，一直停留響夢想階段，仲未有膽去行第一步。早排老公的其中一個學生買了他人生第一間物業，不久之後成功租出，開始做有收入的業主了。我地替佢高興之餘，亦從佢口中得知佢係上咗一個課程之後學會物業投資的竅門，所以開始了收租的生活。

聽罷我都極有興趣，今天課程舉辦簡介會，我就拉埋老公一齊去了解。其中有幾個三十歲左右的學員都係讀了這個課程後買了樓收租，並計劃在短期內再度置業累積資產。呢個課程，正好可以幫到我實現夢想，於是二話不說就拉埋老公一齊報讀。

其實要讀，我一個都可以。不過講到買樓咁大件事，仲要係買完一間又一間，大家必須要有共識，所以我都叫佢報埋。學費唔平的，但我有信心學識物業投資一定搵得返，絕對值得投資。

我好期待快啲到七月，就可以快啲知道點達到我的夢想了!

懶媽

現在是星期六上午11時半，我正身處山林道某補習社，等緊大仔放學，佢今日上的是普通話。

補習社有個 area 比家長同小朋友休息和等候，其他家長都在聊天，只有我百無聊賴，於是寫下 blog 打發時間。我和其他家長每星期都見面，大家都是認識的，但她們的話題我一句也搭不上。

她們交流如何跟進功課，可是我係唔跟功課的。功課係小朋友的責任，我只係檢查是否完成。反正而家只係幼稚園，佢地有本錢去錯，亦可培養佢地面對過錯的態度，所以我係唔干涉小朋友如何做功課，同家長們冇咩好交流。

一係會講各種才藝訓練同考試，我的小朋友咩才藝班都冇上，所以我唔識搭咀。另一批講英文考試，oh my god 我連英文文法班都冇報，呢個話題又唔關我事。

仲有一批講小朋友如何痴身，因為佢地只有一個小朋友，沒有弟妹做玩伴，當然只會痴住媽媽啦。我湊仔都湊得瀟灑過人，三個小朋友自己玩，我就可以做下自己嘢，冇佢地的煩惱。

總括而言，係我懶！  XD

兒童權利

今天學校舉辦了一個有關兒童權利的講座，今天的講座是我參加過的最少人出席的一個講座。老師和校長都是坐上客，但出席的家長真係寥寥可數。香港的家長對兒童權利有幾關心，由此可見一班。

我對兒童權利一知半解，見到有呢個講座就即時報名參加了。兒童權利包括的範圍很廣泛，由最基本的生存權利，到發展權、言論自由、參與權和遊戲權等等都有涉及到。在香港，雖然都會有虐兒和殺害兒童的個案出現，但大部份兒童都有生存權利，至少吃得飽、穿得暖、有瓦遮頭、有醫療等等。至於發展權，基於香港的教育制度太畸型的關係，孕育了一群怪獸家長，兒童們不愁沒有學習的權利，只怕係學習得太多吧。

很多家長都忽略了兒童的言論自由、參與權和遊戲權。與兒童最切身的教育問題，我估冇乜幾多個家長會徵詢兒童的意見，總之我叫你學乜就學乜。家長們認為小朋友唔識得為前途舖路，但有誰可以肯定你為佢地舖的路係絕對適合佢地呢？如果小朋友從小就厭倦學習，厭倦父母的安排，後果會係點呢？如果小朋友可以學習自己喜歡的東西，情況又會如何呢？世事沒有絕對，但我偏向比小朋友自己選擇，讓佢地享受學習過程，總比拉牛上樹舒服得多！

小朋友有咩意見想發表，往往被成人所忽略，導至好多小朋友到稍為懂事時就不願主動和父母溝通，因為講都冇人會理，講黎做乜？參與權更加少之又少，父母們怕小朋友出岔子，邊敢咩都比佢地參與？很多家長都有控制小朋友的潛意識，又點會比小朋友真正藉著參與而發揮他們的無限潛能？學習不一定要進課室，生活本身就是一個最好的學習環境。在生活上讓小朋友多參與、多瞭解，他們懂的一定比課室多。

至於遊戲嘛，不一定要買名貴玩具，不一定要去主題公園或出外旅遊的，只係去一般的公園，比佢地同其他小朋友玩下，對小朋友黎講已經係最好的遊戲。小朋友之間的互動，係最珍貴的體驗呢。

聽完呢個講座，好慶幸我的小朋友都擁有兒童應有的權利，亦留意到身邊很多家長朋友都忽略了小朋友的權利。希望學校可以大力推動兒童權利的計劃，令更多小朋友可以真正健康愉快的成長。

我回來了

這幾個月，我正在經歷一些心靈上的考驗，沒有心情寫文，亦不知道可以寫D咩，曾經諗過就此休博算了。但近來我卻斷斷續續收到網友發給我的電郵，他們都因為睇了我寫關於銷售的文章而有些感受。直至剛才，又收到另一位網友的電郵，才發現我的文章和想法，其實對很多人都有點意義，所以我決定再寫，至少寫下現在我的感受。

最近我在經歷甚麼呢？就是要經歷「平凡」。菲菲在職場上勇戰了多年，有很多人認同我的能力，我的說話有很多人願意聽，我的見解有很多人願意接納。漸漸我就覺得自己很了不起，當然至直現在我都認為自己很捧，哈哈！在 2009 年我捨棄了職場，全心全意做個全職媽媽，經歷了很多心理調整，先至適應下來。

這幾年我全副心機都花在家庭上，幸好都有點點回報，三個小孩都開心快樂，老公亦不需為家事而操心，總算稱職吧。漸漸身邊一些人就用「師奶」的眼光來量度我。冇錯我而家冇打工，但我的職場智慧不會突然消失，我對人和事的洞察力亦沒有減退，有些人因為定型我係「師奶」，覺得我沒有甚麼見識，男人工作的事的我不會懂等等而看不起我。老實講，我真係受唔到呢D白眼，我絕對會還以顏色。沒有得到我的批准，誰都不可以睇唔起我。好可惜，呢D睇我唔起的人，就係我老公的朋友，為左比面老公，我忍。

呢幾個月，不停有些我認為「不合理」和「不尊重」的事發生。基於比面老公，表面上我不發一言，別人更加認為我係白痴。私底下，我同老公分析利害和事態發展等等，佢都唔太認同，激到我就黎發顛。好啦，我不停遊說自己，放下吧，人地點睇由得佢啦，反正我都冇做野咁耐，當自己脫左節啦。

但收到幾封電郵之後，我對自己多了點肯定。我唔係冇料，係人地唔識欣賞。唔緊要，會睇我文章的人識得欣賞就得勒。所以，我會繼續以我的作風，響呢度繼續分享。呢度有識得欣賞我的人，我不會輕易休博了。

在 2013年12月5日，我寫了這一篇「希望是我錯」，在今天基於事實，當時我沒有看錯，只是大家包括我老公都唔願意相信我的看法。老公，如果你有緣睇到呢篇文章，我的意思並不是要 show off 我的能力，我只係想你知道，我做每一件事都係由你的利益做出發點，我絕對不容許別人去傷容你，亦不容許別人去離間我們的感情。如果有人時常同你講「唔好話比你老婆知」，我百份百肯定佢身有屎，怕我睇穿佢，阻止佢去利用你。我係「小器多疑，婦人之見」，定係「心思細密，觀察力強」，我相信你係有能力分辨的。

舒了口悶氣，可以整理心情，諗下可以再寫D咩了。

理所當然？

星期日菲菲一家和朋友吃晚飯，朋友讚菲菲的三個小孩很乖，會主動和人打招呼，又安靜地自己食飯。菲菲聽罷當然好開心，但開心完之後細心一諗，呢啲基本嘢咋喎，唔駛特別講出黎吖。

朋友話，而家啲細路唔多主動同人打招呼，食飯時一係走黎走去，一係顧住睇平板電腦唔食飯，再唔係就亞媽一邊哦個仔食飯，一邊餵個仔食嘢。有時大人想傾下計都唔得，因為要忙於叫小朋友食飯。

我一直都唔明，如果家長想小朋友專心食飯，點解要開平板電腦比佢睇？有嘢睇就梗係唔食嘢啦！亞媽又怕個仔餓親，就餵個仔食嘢。呢個係咩邏輯呀？乜教識個仔專心食飯真係咁難？

仲有，食飯都要迫，得罪講句，我覺得好折墮。食飯係生理需要，香港竟然富裕到要迫人食飯，我真係 O 哂咀。

我家小孩有半小時晚飯時間，食飯時唔開電視，夠鐘必定收碗。食唔切或周圍走的話，話之佢喊通頂喊到嘔都唔會再有嘢食，直至明日早餐先有得食。我堅持咗幾個月，就唔需要再為食飯呢個問題糾纏 。小朋友都習慣食飯要在限時內自己完成，唔駛迫唔駛餵，我認為這是理所當然的。

我都有同朋友分享呢方面經驗，曾有人批評我殘忍。係，我係殘忍，但在社會上再殘忍的事多如天上繁星，基本連食餐飯都面對唔到，第時小朋友在社會中可以經得起幾多風浪？

希望大家不要随意用一部平板電腦去 calm down 你的孩子。他們需要學習融入社會，唔係預習做宅男宅女呀。

火山爆發

我的三個小孩，性格各異。

大仔算係斯文靚仔果一類，細心體貼，好奇心重，但非常膽小。如果遇到少少不如意第一時間係喊，唔識表達自己的情感或需要，有時對住佢好似玩估歌仔咁。

二仔比較活潑，非常機靈，很會逗人開心，但疑心較重。如果感覺不安全，就第一時間閃人，危機感好重。

孻女係極度愛美的狂野小貓，性格大開大合，不論開心定係唔開心，都係以大呼小叫同誇張動作黎表達。開心時 natural high，唔開心時就火山爆發，係一名烈女。

作為母親的，無論佢地係咩性格我都咁愛，我最愛佢地有自己的 style，三個小朋友互有火花時，都幾令人哭笑不得。

而我最不喜歡的，就係旁人將佢地互相比較，話亞哥唔夠細佬妹叻，二哥最得人鐘意，亞妹好嘈等等。我最唔鐘意親朋戚友當住小朋友面前講邊個叻邊個蠢。講果個好似閒話家常，又好似認為我唔知 D 仔女係咩材料咁，滔滔不絕咁評論，有冇諗過小朋友聽到呢 D 批評會有咩感受呀？我唔係話我的仔女天下無敵冇得彈，就算你見到小朋友有咩優點缺點，都唔係當在佢地面前如數家珍掛？

細女才兩歲半，今日佢忽然興起拿起筷子食野，佢小手肌未發育好，用拳頭手拎筷子有幾出奇？唔駛要我立即糾正佢呀？就算我要糾正都唔係而家啦，最少都等多一年先至會教佢手勢同用力方法。用筷子食野，對於一個小手肌未發育好的幼兒黎講，真係好吃力的，要將手指分別活動同用力，唔係講就得 lor。佢左右手都有用，又比人話佢好用左手。一黎佢平時係用開右手，就算佢真係用左手又點？有咩問題呢？

大仔唔想我斟熱茶比佢，佢一時情急唔識講就喊左出黎，當時我都未知佢想點，旁邊的人又意見多多。可唔可以比少少空間我同個仔溝通下先，瞭解下佢因咩事喊先呢？咁快就七咀八舌，我要處理左個仔先定係應左你地先呀？最終我都係忍唔住鬧左個仔幾句，心中有少少愧疚添。

細仔食飽想同人玩，有位親友無啦啦走埋去話要餵佢食野。佢已經三歲啦，唔駛人餵好耐，不過你鐘意玩餵仔就玩啦。但係佢將舊熱到出煙的燒賣塞入佢個口度，唔喊就奇啦。想比茶佢飲，唔駛用湯匙的，比隻杯佢就得啦，佢識自己拎住隻杯飲茶ga。

招呼完呢班男家親友，唔呻返幾句，我怕我會抑鬱呀！

無法理解的事

在飲宴中，朋友快五歲的兒子在玩閃卡，玩得非常興高采烈，大家食緊野時佢都不停玩，他的媽媽在旁邊餵食。玩玩下閃卡，他的父母就問他英文 One Two Three Four 點串，串得對媽媽餵一口菜，答唔到爸爸就抽走一張閃卡。

飲宴後，我同老公討論此事，有好多我不能理解的地方。

1. 點解一個五歲小孩會有咁多閃卡既？好明顯係佢父母買比佢啦。我從來冇買過呢D野比我的小朋友，如果第時佢地有零用錢自己去買，我都會同佢地討論如何善用自己的零用錢，唔會硬性阻止佢地買，但會引導佢地去思考金錢和慾望之間如何去平衡。

2. 點解在飲宴唔鼓勵小朋友和同席的人交談？以我所見，呢位小朋友好似冇叫過任何人，亦冇興趣瞭解正在參加一個咩飲宴，更加唔知自己食緊咩，要注意咩餐桌禮儀等等。其實佢黎係做咩呢？他的父母白白錯失了一個社會教育的機會喎。

3. 點解五歲都要人餵？唔好理佢用咩餐具，筷子又好，湯匙又好，叉又好，甚至用手都好，一個五歲小孩唔識自己食飯嗎？仲要媽媽一啖一啖咁餵，太離譜了吧！

4. 點解在社交場合食緊飯時會同小朋友串字？呢D唔係屋企做的嗎？出黎食飯係社交活動，串字係家中的溫習活動，咁都會攪唔清咩？

兩日後，我們又再見面，當時小孩返了學，我和媽媽傾計，話題講到補習班。

友︰你有冇同亞仔報劍橋英文課程？
我︰(唔知佢講的課程係乜) 係咩黎 ga？
友︰英交課程 lor
我︰有咩學 ga？
友︰英文 lor
我︰即係學 phonics、grammar。串字定係其他野呀？ (我真係唔知嘛！)
友︰有得考試 ga
我︰考 d 咩 ga？

黎到呢度，我朋友覺得我九唔搭八，行開了。

我又唔明…

1. 點解幼稚園生一定要去學英文呢？ (我認我懶，所以亞仔冇讀果d要考試的課程。)
2. 既然有一個課程佢想報，佢唔知個課程學咩都得？其實佢知唔知自己做緊乜呢？

係我落伍定係時代變遷得太快呢？我完全跟唔到朋友教仔果個 beat，完全唔啱 channel，理解唔到。.

生命的元素

老公問過我，對小朋友有咩期望。我的答案很簡單，就係希望佢有自己的夢想，和努力去實踐它。我冇諗過小朋友長大之後會做咩職業搵幾多錢，只係想佢地做一個有「生命」的人。

每個人未入土都叫做有生命，但有幾多人真係做緊一 D 佢真心喜歡的事？又有幾多人為了生活而放棄自已的理想？我和老公都在做自己真心喜歡的事，不是因為我們有家底 (我們的父母都係捱大成頭家)，而係我地有信念，知道自己想要 D 咩，想做 D 咩，一直為自己的夢想而堅持，所以可以做自己真心喜歡的事。

菲菲一直深信，只要有自己的意願，有為自己的意願計劃、實踐、學習和努力，就會一步一步達到自己的理想。我老公亦然。菲菲仍在求學時，老爸堅持要我讀會計，因他心目中的菲菲係應該做會計師。真係唔好意思，菲菲係數字白痴，中學讀了4年會計，LCC考到 Higher，都從來沒有 balance 過一條數。我心知肚明，我絕對唔係做會計師的材料，在報大學時，完全沒有選會計這科，我選了自己喜歡的 Marketing。老爸為了此事，生平第一次同我反面 (之後仲有好多次，都係因為我冇跟隨他的意願，唉！)。

到出來社會做事，老爸不喜歡我做 sales，要我做秘書或不用外出的文職。但我份人太好勝，做文職對於我黎講太冇挑戰性，所以我冇理佢，繼續做 sales，繼續在工作中找到挑戰和滿足感。做銷售係一份先苦後甜的工作，在未有收成之前係要不斷付出，唔係每個人都有這份能耐堅持。做銷售又可以擴闊我的眼界，迅速地在「社會大學」學會了不少學校沒有教的事，我就更加堅持自己的信念，去為自己的未來作好準備。

菲菲都想自己的小孩有為自己而堅持的能耐，從小我就訓練佢地自己想辦法解決問題。就算係好小好小的困難 (例如拿一些自己拿不到的東西)，我都不會幫忙，只會引導佢地自己想辦法去解決。久而久之，幾個小朋友每當遇到困難，都會嘗試自己解決，或找其他2人幫忙解決。這就是「生命」的其中一個元素，我不知他們將來會遇到咩困難，唔知我有冇能力為他們遮風擋雨，但他們有能力為自己找出路，這才是生命最基本的元素呀！

這幾個小孩，未必是成績優異的模範生，亦未必是十項全能的小天才，但我有信心，佢地係會行出一條真正屬於佢自己的路，他們不會為「沒有做過的事」而後悔。我不需要佢地羸在起跑線，只希望到佢地在終點時會為自己而驕傲。

學校沒有教的事

又係菲菲自我感覺良好的分享~ 呵呵呵~~

大仔五歲多，但他的心思和行為已經不像一個五歲小孩咁簡單。

在吃飯時會先夾餸比我，之後至夾比自己。
外出時，一定做好哥哥，幫忙照顧弟妹。
會提出幫我拎重物，雖然佢拎一陣就頂唔順要比返我，但我欣賞他肯嘗試幫手。
和我出街時，會幫忙睇交通燈，會「提醒」我綠燈先可過馬路。
和我外出食飯時，會幫我準備牙簽。

這個小男孩雖然有點膽小，但他的體貼就是最討人歡心的優點。

希望是我錯

觀人於微已是我的本能。

心思慎密不等於小心眼。

當一些人做出反常的事，就要注意有甚麼事將要發生。

不錯，我答應了我會「相信」，但我的內心深處仍有很多疑惑。

讓時間來證明給我看，真心希望事實證明是我看錯，是我冤枉了一個大好人。

新嘗試 - 「菲越美麗」誕生了！

終於鼓起勇氣寫第一篇扮靚 blog ！各位女士們多多指教呀！

菲越美麗

mybeautymission.blogspot.hk

有好多野想寫，但在休養期不能太急進，我會慢慢寫吧。如果喜歡的話，留個言當係鼓勵下我啦！ ^^

菲常轉變

休息了兩個月冇寫文，因為我太忙… 哈哈！

先講下份工，一份 hea 到冇得再 hea 的工，理應係 part time 媽的至愛，但係家事唔知點解真係好繁重，加上身體又開始不適，做了所謂一個月就冇做了。冇返工之後，我忙於休養… T.T

前文有提過的一位退休老中醫，終於肯醫我了。我的身體狀況都幾複雜，唔係三兩下手勢可以攪得掂。事實上我都試過好多醫生，好多療法，好多藥物同好多營養品，全部都唔覺有咩真正效果。呢位老中醫好利害，雖然我最嚴重的眼疾仲未可以開始處理，但係佢已經處理左我好多身心問題，呢個月我感覺好多了。

經過呢個月的休養 (事實上我仍需繼續休養 :P)，我感覺到自己有點轉變了。過往我太多追求和執著，令到自己失去了健康。為了可以有一個安樂的下半世，我要輕輕鬆鬆地做人，名成利就，曾經擁有已經不枉此生了。往後的歲月，除左教下仔同湊下老公之外，就會做多D自己真正享受的事。所以，我不會再寫有關事業和人事的文章，事實上我都有4年冇工作，都甩哂 beat，不寫也罷。

可能我會寫多d湊仔經，或者生活小事，又或者… 我會寫多d扮靚心得 (已經開定個新 blog 準備寫了，哈哈！)，總之就係講一 d 我真正享受的事。能夠如此幸運，可以放心休養，放慢腳步做下無聊野，要特別鳴謝我的好老公！無論精神上同經濟上都盡力支持我，我相信我的下半生一定比上半生精彩！

重出江湖

做了四年全職媽媽，在沒有甚麽心理準備下，我將會重出江湖上班去。

2星期前，我的其中一位前老細兼大學師兄，找我回去做 part time admin。反正唔駛跑數，時間又較自由，我就答應了。

世事就是如此可愛，有心裁花花發，無心插柳柳成蔭。去年老是找機會做下嘢，但係點攪都攪唔成。到我完全放下搵啲嘢做下的念頭時，機會就突然出現在我眼前。

老公本來沒有贊成或反對，昨晚佢同我講，如果份工辛苦就唔好做嘞。我仲未返工，辛唔辛苦暫時未知，不過好肯定我找了個好老公！

10月2日，祝我開工大吉！

自己做功課

大仔今年升K3，在家長會中校方提及今年的功課係以文字為主，所有功課必須由學生自己做，不可由家長代勞。可能大家有 D 奇怪，乜做功課唔係學生的責任咩？點解校方會講「不可家長代勞」呢？事緣由N班至K2的功課，好多都有「親子」成份。講得好聽就係親子功課，事實係 D 功課根本超出小朋友的能力範圍。例如︰三歲開始要做剪報，做完之後要回校分享新聞內容。你話一個三歲小朋友點做呀？即係亞媽做好，再教個小朋友回校 present 啦。

今年要準備入小學，所以學校要加大力度，講到明唔要家長做，要小朋友自己做。今日學校有份工作紙，係要小朋友訪問家庭成員一些生活瑣事，問題好簡單，答案都只係簡單的詞語。不過，當中有九成的生字，學校係未教過的。即係我要每個字，一筆一劃咁教亞仔寫，變相我 takeover 左教中文生字呢個 task，仲辛苦過做份剪報教亞仔 present。呢份「簡單任務」，我同亞仔足足努力了一粒鐘，做完之後大家都頂唔順要休息了。

仲有一半功課未做，明天我地要繼續努力了…

而家咩教育制度呀？如果父母忙於工作，冇時間教亞仔寫新生字，咁佢點交功課呀？我好想亞仔可以自己做功課呀，但幾時先至有返 D 正常程度的功課呀？

物質 VS 抗逆

今日執下亞女的頭飾，兩歲人仔竟然有三盒咁多，我忍唔住影張相 POST 上面書同朋友分享。

原來我真係唔夠貪靚，朋友們個個都話佢地個女 (都係兩歲) 閒閒地有十盒八盒頭飾，仲未計其他飾物，我呢D係小兒科。其實頭就得一個，一個月都係得三十日，買埋咁多頭飾戴得哂咩？可能我對飾物係抱簡約態度，頭上永遠只得一個髮夾，唔會夾到七彩咁，所以冇諗過一個兩歲小朋友竟然會有十盒八盒頭飾。對於小朋友的一切打扮，我都係抱簡約態度。衫褲鞋襪全部夠用就唔再買，因為佢地大得快，買咁多最後都係浪費。

再諗深一層，而家好多家長都鐘意用物質去襯托小朋友。這不存在能力或對錯的問題，我只會考慮咁樣做對小朋友的AQ有多大幫助。AQ即係抗逆力有幾強，當你面對逆境時，有幾大能耐去面對和處理。物質太豐盛，在某程度上係削弱了小朋友面對逆境的能耐。一直都都係食得好、穿得好、玩得好，一旦生活質素有所下降，對於小朋友來說就係一個逆境。須知人生幾十年，不可能年年順境，事事如意。如果連物質這小小的關口都過不了，其他人生的關口又如何度過？

節儉不單是一種美德，仲係教育小朋友一種生活態度，就係不需奢華亦很快樂。個個口口聲聲話最緊要小朋友開心，不斷用物質去堆砌所謂快樂童年，但這樣對小朋友的心智有甚麼幫助呢？

試食新款月餅

中秋佳節，當然少不了食月餅呢個重要活動啦！

菲菲好鐘意食傳統的雙黃蓮蓉月，但近年月餅款式越出越多，今年菲菲收到幾款不同的月餅，試食後響度同大家分享下。

雪糕月餅
HD 雪糕月餅唔係新品，但菲菲今年先至第一次食，哈哈！其實我覺得雪糕月餅只係一個綽頭，只不過係朱古力包住舊雪糕，唔覺有咩出人意表之處。唯一的好處就係，消暑！哈哈哈~~

奶皇月餅
大家爭崩頭去買的酒店奶皇月餅，我就冇買過，不過多謝朋友比面，連續2年都收到，呵呵！論味道都不錯，體積亦不大，食一個都唔覺滯。不過我今日度下個 size，原來個月餅的儲存空間同傳統月餅係一樣，但個「內容」就明顯細好多。果然貫徹酒店本色，隻碟好大，但份量很少，仲要整一大堆伴碟，攪到美輪美奐咁。靚就靚嘞，但咁大個盒認真唔環保。

蛋糕月餅
呢款都係今年第一次食，感覺好似一個方形 cupcake 咁。味道都不錯，不會太甜亦不會好油，我的小朋友好喜愛。可惜一盒得2個，稍嫌有啲唔夠喉。

咖啡月餅
初時見到個月餅覺得好奇怪，攪咩連星XX都出月餅？個樣又好似傳統月餅咁喎，切開時見有 nuts，幾驚係五仁月呀。咬落去，食到好香咖啡味，配合埋果仁碎，好似一邊飲咖啡一邊食果仁咁，唔錯唔錯！個人最喜愛呢款，下次中秋一定會自陶腰包買返盒黎食。

澳門某酒店月餅
一共收到2盒，係老公的澳門客戶送的。包裝好堂皇，一睇就知係 for 送禮用的。見有2盒，當然好唔客氣即刻開一盒黎試啦！個盒同包裝袋都冇標明係咩月餅，唔知係咩餡料。切開時覺得把刀有啲「阻力」，個月餅都幾硬下喎！再望下D內容，驚見腰果同花生！食落仲有芝麻。個月餅唔甜唔咸亦唔軟熟，好似趙緊堅果加餅皮同埋唔知係咩蓉咁，好怪！於是菲菲即時將剩下的大半個月餅比左工人食，仲 sell 佢地話冇豬油 (呢點我可以肯定！)，唔甜同埋好香 (呢句見人見智啦，哈哈！)。出奇地佢地又鐘意喎。我仲諗緊其他幾個月餅係同一口味定係會唔同，但到現時為止仲未有勇氣切開第二個去求證。

雙黃白蓮蓉
我有2盒至愛，就係美X同恆X。基於貪新忘舊的天性，呢2盒仲未開封。不過我相信，佢地依然係我最喜愛的傳統月餅！

淪陷的樂園

星期日菲菲一家大細去海洋公園玩，可能我實在太耐冇去，今次竟然有令人難忘的回憶。

一向菲菲都是較喜歡海洋公園，一來有童年回憶，二來有較多適合小朋友參觀的地方，所以趁我生日就舉家遊園去。之前都聽唔少強國人打尖和爭先恐後的情況，已有哂心理準備，但係事情原來係可以去得更盡。

我們打算到海洋劇場睇海豚，開場前30分鐘到場都已經高朋滿座。我地一家大細就企響上層欄杆等開場。一邊等開場，一邊有遊人入場，我地後面好快企咗好多人。

開場時，我後面的人，不論男女都迫哂埋黎，原來我地後面企滿強國人。佢地越迫越緊，我比後面的女人迫到夾住響欄杆。老公都比人狂迫，仲要響老公同亞仔頭邊傳汽水。老公當然好火啦，叫佢地唔好再迫，同唔好再響人地個頭度傳汽水。個強國人仲好理直氣壯咁話：「不可以的嗎？」。老公回佢：「梗係唔得啦！」。

佢地實在越迫越大力，老公叫咗幾次後面啲人唔好再迫。我唔知條欄杆頂唔頂到咁大壓力，加上我地全家都夾住響欄杆，當時覺得好危險。終於我忍唔住用普通話叫佢地唔好再迫，我地就快跌落去嘞！後面個女強國人話後面迫佢，言下之意即係唔關佢事啦。

好呀，我再大聲啲叫後面啲人唔好再迫。點知有個男人仲專登用力撞我，呢下我道火即著，喝嗰條麻甩佬：「你是男的，推我幹嗎？」。條友繼續大力撞多我幾下，火到我不能再忍，生平第一次高呼非禮。條友以為佢係啱嘅，仲叫我報警！當時我化氣憤為力量，狂呼咗十幾聲非禮，我肯定場內的人一定聽到。

攪到咁，節目仍然繼續，完全冇職員埋黎處理，亦都冇任何人理會。

當下明白，呢度已經淪陷，係強國人的地方，冇香港人亦冇見義勇為的人。我地帶住細路，又唔夠佢地人多勢眾，唯有打退堂鼓走人。

但係佢地依然壓住我地唔比我地走，我再喝一句：「讓開！」，但冇效。最後我喝多句：「給你們看！讓開！」，佢地先肯讓開比我地走。

行出海洋劇場，望望身邊的遊人，全部都係強國人。

我醒覺了，香港的樂園都淪陷在強國人的手去，我們香港人，一係要比強國人更勇更狠先有資格去呢啲地方，一係以後都唔好比錢入場當炮灰了。

A4單行簿

收到通告，大仔要買2本A4單行簿做剪報和週記。呢個星期都忙於孻女的新生適應期，到今天下午才有時間去買。

到樓下文具店找，找不到合學校規格的單行簿，唯有行去奧海城三期的大眾書局搵。估唔到咁大間書局只有一個品牌係適合學校的規定，更估唔到一本A4單行簿索價四十幾蚊！定價實在不合理，所以不買。

於是打算轉去附近的海富商場睇下，記得果度有2間平民文具店，我估點都唔駛四十幾蚊一本掛。

正當準備入商場之際，一位九十後小女生截住我，話做奶粉市場調查。見佢在一個住滿長者的屋苑 (即係唔多媽咪和BB)，加上烈日當空，要搵合適人選做奶粉市場調查，太辛苦了吧。瞄到佢後面有個 supervisor 及實，即係想蛇入商場涼冷氣都唔得。見佢咁可憐，就當幫下佢啦。點知一問就問左半個鐘，自己捉蟲添。而我呢半個鐘的酬勞就係一張七仔二十蚊 coupon。

入到商場，地下的文具店開了燈但關了門，東主似乎去了洗手間。上二樓的文具店，竟然執左。行到腳軟兼口渴，就拎左張 coupon 去七仔度買飲品。順遁行去旁邊的富榮花園，諗住去 E Cosway 買少少野。途經海當街市時，發現街市因為商場準備升格而結業。去到富榮時，連 E Cosway 都執埋！天呀！我想買少少野姐，唔係咁趕盡殺絕呀？

之後折返海富位於地下的文具店，仍然找不到學校指定的A4單行簿。我投降了，明天再去油麻地搵吧。