火山爆發

我的三個小孩，性格各異。

大仔算係斯文靚仔果一類，細心體貼，好奇心重，但非常膽小。如果遇到少少不如意第一時間係喊，唔識表達自己的情感或需要，有時對住佢好似玩估歌仔咁。

二仔比較活潑，非常機靈，很會逗人開心，但疑心較重。如果感覺不安全，就第一時間閃人，危機感好重。

孻女係極度愛美的狂野小貓，性格大開大合，不論開心定係唔開心，都係以大呼小叫同誇張動作黎表達。開心時 natural high，唔開心時就火山爆發，係一名烈女。

作為母親的，無論佢地係咩性格我都咁愛，我最愛佢地有自己的 style，三個小朋友互有火花時，都幾令人哭笑不得。

而我最不喜歡的，就係旁人將佢地互相比較，話亞哥唔夠細佬妹叻，二哥最得人鐘意，亞妹好嘈等等。我最唔鐘意親朋戚友當住小朋友面前講邊個叻邊個蠢。講果個好似閒話家常，又好似認為我唔知 D 仔女係咩材料咁，滔滔不絕咁評論，有冇諗過小朋友聽到呢 D 批評會有咩感受呀？我唔係話我的仔女天下無敵冇得彈，就算你見到小朋友有咩優點缺點，都唔係當在佢地面前如數家珍掛？

細女才兩歲半，今日佢忽然興起拿起筷子食野，佢小手肌未發育好，用拳頭手拎筷子有幾出奇？唔駛要我立即糾正佢呀？就算我要糾正都唔係而家啦，最少都等多一年先至會教佢手勢同用力方法。用筷子食野，對於一個小手肌未發育好的幼兒黎講，真係好吃力的，要將手指分別活動同用力，唔係講就得 lor。佢左右手都有用，又比人話佢好用左手。一黎佢平時係用開右手，就算佢真係用左手又點？有咩問題呢？

大仔唔想我斟熱茶比佢，佢一時情急唔識講就喊左出黎，當時我都未知佢想點，旁邊的人又意見多多。可唔可以比少少空間我同個仔溝通下先，瞭解下佢因咩事喊先呢？咁快就七咀八舌，我要處理左個仔先定係應左你地先呀？最終我都係忍唔住鬧左個仔幾句，心中有少少愧疚添。

細仔食飽想同人玩，有位親友無啦啦走埋去話要餵佢食野。佢已經三歲啦，唔駛人餵好耐，不過你鐘意玩餵仔就玩啦。但係佢將舊熱到出煙的燒賣塞入佢個口度，唔喊就奇啦。想比茶佢飲，唔駛用湯匙的，比隻杯佢就得啦，佢識自己拎住隻杯飲茶ga。

招呼完呢班男家親友，唔呻返幾句，我怕我會抑鬱呀！