增廣見聞

昨日幼稚園有舊生活動，大仔和一班幼稚園同學又再聚首。無見幾個月，個個都明顯長大了，連我都增廣見聞了。

有位小男孩走來同我講咗句：「死八婆」，我唔肯定佢真係罵我，定係覺得呢句說話好得意，所以當係同我玩。我即時同佢媽媽講，佢媽媽好輕描淡寫咁答：「上咗小學係咁㗎啦，啲高年班都成日講啦。」。

言下之意，你即係認為個仔隨意罵人死八婆都冇問題，係我大驚小怪。同埋既然學校啲哥哥姐姐都係咁啦，佢學識講呢啲說話純屬正常。

我明白小朋友有時係唔識分邊啲係好榜樣邊啲係壞習慣，但作為父母都唔好好引導小孩去分辨是非，仲默許佢繼續發展壞習慣，我真係無法認同呢種做法。

算啦，人地個仔做咩我理唔到，既然唔認同佢地就少見為妙啦。