裁培小孩

今年很不錯，身邊有不少朋友的小孩，在小一派位都獲派第一志願，大家都非常開心。但開心了不到一星期，壓力也開始來了。

有朋友發現獲派的小學水平太高，現在要努力補習去應付小一的進度。有朋友發現學校要求小孩必須有一體一藝，除了比錢上課買衫買器材之外還有評估云云。又有朋友發現書簿費和雜費都不菲，有點失預算。

我覺得好奇怪，家長們唔知一般的「好」學校都係咁咩？要學生出類拔萃，總要付一些代價吧。

另外，今日遇到一位家長朋友，佢個女同我大仔都係小一生。佢個女讀一線小學，媽媽大嘆好辛苦。不過呻辛苦的潛台詞係佢個女好叻，英文又好，課外活動又勁云云。我應亞仔要求 cut 哂所有課外活動，所以我唔辛苦又冇嘢可以 show off。呢位家長好震驚，佢話我個仔已經唔係讀一線小學，學業唔夠人爭，仲要冇課外活動，認為我在摧毀亞仔的前途。

講真，我絕對唔認同佢的諗法。我見盡太多有知識但冇思想的人，呢啲人比文盲更可怕。如果要我將小朋友變成倒模式填鴨，令佢失去自我，同扼殺佢未來有咩分別？

我相信有好多人唔認同我，唔緊要的。沒有一個方式是絕對正確，我只會找尋更加適合的模式。我心中自有裁培小孩的策略，但絕不是一般人正在採用的方式。因為，我知道過於控制和催谷，係會有反效果的。