英文

菲菲的好友，都有一位正在上K2的兒子。她和我的兒子，從兩歲開始就係同班同學，大家又住在附近，時常約出來遊玩，又交流下湊仔心得。我們的兒子都快要面對升小一的問題，因為我有三個小孩，如果三個都讀私校，加埋補習呀、課外活動呀、學校捐款呀、親子遊學呀等等開支，係一筆好龐大的數目，所以我一直都只會諗大抽獎，完全冇諗過報私校。但朋友只有一粒仔，佢就打算幫個仔報私校。

昨天有一間私校攪開放日，朋友約埋我一齊去。雖然唔諗住考姐，都可以去參觀下吖嘛，所以我抱住去玩的心情，帶埋小朋友去觀摩下。私校果然好識得 marketing，在場所有學生都說得一口流利英語。當我地想問路時，學生都係以英語對答。我的朋友平時比較少用英文，每到問路或問活動詳情時，都係我去問。其實睇佢的表情，我估佢都唔係好明學生們答左佢D咩。學校簡介又係全英文，表演又係英文，到處都係英文，唔知以為自己去左旅行。我朋友好想知簡介講D咩，又唔敢問我 (因為內容都幾長篇)，最衰我個女又扭計，我唔得閒幫佢聽，所以簡介完畢都唔知講左乜… XD

之後同朋友食飯，閒談中佢不斷講佢個仔而家同鬼佬單對單學英文，又學珠心算，又拉小提琴，仲有幾樣都唔記得係咩，總之一星期七日都有野學。我個仔只係最基本的普通話、英文同數學，但我覺得已經好忙，如果學足七日我真係頂唔住。講起學英文，學校每2星期都會派一本英文故事書比小朋友，由家長導讀，再由老師評分。評分分三級︰Excellent，Very Good 和 Fair。朋友好自豪咁話佢個仔成日都攞 Very Good，間唔中仲有 Excellent 添呀！我個仔冇 1 on 1 Native English Teacher 都次次攞 Excellent，我諗我可以唔駛同個仔報呢D野了~ 

我知道原因既，唔係我個仔特別叻，而係我真係每天都比心機去同個仔讀本故事書。而家佢唔單止好快識讀本書，仲會執佢發音、聲調，好似朗誦咁，當然次次都 Excellent 啦！朋友平時好少教個仔讀學校的書，因為佢覺得學校程度太低。不過，朗讀故事書都係「學校成績」的一部份，佢時常忽略校內的功課，會唔會拉低左個仔的分數呢？而家求學真係求分數GA，學校的功課都處理唔好，仲要學咁多野，似乎係本末倒置喎。

再講深一層，菲菲有好多英文底子不好的朋友，佢地為仔女報多種英語課程，其實係想彌補自己心理上的缺失，同小朋友的能力和實際需要並沒有太大關係。我都希望小孩入一間英文小學，但我更希望身為龍的傳人，都要打好中文底子。時代不同了，北望神州係必然事實，不要只重英文而忘了中文和普通話都是很重要呀！

Remote Boyfriend

今日工人B同我講左單八卦消息…

B︰「A話打算做埋呢兩年，就會唔做返印尼。」
我︰「咁快返？佢個仔畢業嗱？」
B︰「唔係呀，佢男朋友叫佢返去呀。」
(呢位所謂男朋友，同工人A係唔識的，係A的爸爸介紹佢地拍拖，由開始到而家約一年，佢地都係用電話傳情。)
我︰「下？佢男朋友諗住養埋佢全家呀？」
B︰「唔係呀，A而家每個月都比錢佢男朋友。因為佢男朋友的農地失收，爭人好多錢，所以A幫佢還緊錢。」

唔係下化…

呢條友仔分明係騙財啦！(可能今年六月工人A放假返印尼時會比人騙埋色…) 咁都信佢既？

最大鑊係，工人A深信對方不疑，B提醒過佢幾次，A只係覺得B唔抵得佢有男朋友，完全冇諗過會比人呃錢。事實上已經係呃緊佢D錢，佢都要中個頭埋去既話，無說話好講了…

久遺了的周公

失眠係一個好困擾的問題。不知從何時開始，菲菲常常失眠，不到三、四點是睡不著。長期失眠有很多後遺症，精神差、記性差，慢慢連身體各部份都出現毛病。菲菲不敢去看西醫，曾經用中藥調理，但效果不太顯著。

最近，菲菲因為骨患的問題去看了一位自然療法醫生。呢位醫生係我和老公老朋友，我知佢開業很久了，但從來沒有想過去找他，因為我對自然療法的認識不深，唔知佢幫唔幫到我。老公建議我去找他睇下，就諗住姑且一試。點知一睇，佢就一次過找出我身體上很多的毛病。昨日去覆診時，我忽然想起長期失眠的問題，佢瞭解左情況之後，開左D營養補充品比我。只係食左一次，昨晚竟然可以成功在11時睡覺，今早未夠八點就起床，而且精神不錯呢！

呢位老朋友仲拍心口話，跟足佢指示，唔單止身體好，瘦返廿零三十磅都唔係問題！我心諗︰「承你貴言！」 XD

祝融不要來

除左火警演習之外，唔知大家有冇走過真正的火警？唔知點解，菲菲真係走過幾次真的火警，今日在睡午覺時又走了一次。

15號我失眠，一直到16號的上午八時半才入睡。睡到12點半時，工人忽然拍門，話全屋突然冇電，開門出去睇時見到有好多煙同埋有「火羅」味，所以即時來拍醒我。當時我都未知咩事，只聽見門外有好多人叫走火警，一時之間我都唔知係邊度有火警。工人話係對面單位的電箱冒煙，又有好多人跑落樓梯，我估情況唔多好。我驚到唔知點算，就打比老公。佢心急問情況，我又唔係太清楚，又聽到有人話要快D報警，都唔理得咁多，求其拎件外套，著住件爛鬼T、短褲、踢住拖，拎埋電話同手袋就逃離現埸。當時2個仔返左學，我就同工人連埋細女 (佢連鞋都冇得著就抱起走人) 就直衝落樓梯。

唐樓果然係有煙囪效應，整條樓梯都係煙，加埋好濃烈的「火羅」味，感覺好恐怖！一路落樓梯時，不斷有警察和消防上緊去。落到地面，個心先至定返少少。有位消防員黎問係邊層出事，我的工人以不太流利的廣東話想回答。為免阻礙救援的速度，就截住工人唔比佢講 (因為我怕佢講完消防員都聽唔明)，直接講左出事樓層同位置，等佢地可以快D攪掂。

我地幾個就好似災民咁企響屋企樓下，咁都唔係辦法，就打電話比老公，睇下佢返到黎未。正當食飯時間，老公叫我地去搵間餐廳坐低等佢。我從未試過以如此「盛裝」在旺角周街行，但係都冇計，帶埋工人同個女去搵地方。我又唔敢去翠華，真係好異相，最後都係求其搵個地方閃埋一邊等老公返黎。等埋佢之後我地都去左食野，我都冇胃口，又擔心屋企會唔會著火… 好在食完野時已冇事，我地可以返上樓，不過全幢大廈都冇電。

返到屋企，都唔知有咩好做。冇電即係冇電視、冇電腦、連想搵D家務做下都唔得，因為樣樣都係「電器」，冇電好似整個空間停頓左。跟住就諗，都唔知幾時先至有返電，又要去買電筒，又要諗下今晚成家人點開飯… (冇電連飯都煮唔到)。好在2個仔的學校有延展服務，小朋友可以在學校逗留至八時，有老師跟埋功課同有飯食，所以就打電話比校長叫佢幫幫手。又要通知業主有單咁既野，業主話對面單位係劏房，可能因為咁電箱會有問題。不過佢地攪到全幢大廈冇電，點都會攪返掂的。佢都冇咩可以做，我又冇咩可以做，唯有等…

八時去接仔放學時，樓梯已有燈，相信好快會冇事。最終，晚上九時就有返電，而家先至可以將呢段經歷和大家分享。在寫呢篇文時心情都未完全平復，希望以後的日子不要再走火警，真係好驚！

同志出軌

本文內容有成人題材，未滿18歲的請離開~

菲菲有很多同志朋友，其中一對女同志時常都會見面聯誼。這對女同志並沒有宣佈出櫃，知道她們是一對的我估並不多。我和老公都係口密之人，所以我地知道佢地係咩關係。而當中的 TBG 係 PT 推拿師，昨日老公去拆骨時，TBG 忍唔住同佢爆左個密秘。

原來 TBG 本來並不是同志，但在最失落時得到 TB 的關懷。在她最脆弱的時候，就和 TB 發展了同志關係。佢地一起好似有2年多了，一直都相安無事。到最近，TBG 出軌了！她始終不是一個天生的同志，心底裡都渴望得到男人的愛護，所以她暪著 TB，和一位外藉男士搭上了。唔知係唔係食左咁耐齋，在好短時間內已發展到性關係，聽聞仲係好刺激果隻！ (該煨！呢段內容係 TBG 在茶餐廳內講述比我老公知的，我估隔離檯的人都聽到哂… @@")

其實呢件事，係 TBG 出軌吖？定係佢決定要尋回真我呢？定係純粹想又保持住一段關係，但係又想滿足自己的慾望呢？我都唔知道。不過，既然發生了，我相信呢段同志關係要經歷一下考驗了。

心態才是永恆

昨日在一個面書群組內，有位媽媽問湊2個小孩是否很吃力。吃唔吃力，其實唔係講「工作量」，而係講心態。

菲菲有三位年幼小孩，正常黎講係好吃力的。事實上我都攪到五勞七傷，表面證據成立，湊咁多細路係好吃力的。雖然我真係周身骨痛，痛到連抱細女的力的冇，但係我唔認為呢D係吃力。有人會認為，菲菲有工人幫手，又唔駛返工，理應唔會吃力。當然唔係啦！工人只會幫忙做家頭細務，管教子女、安排起居生活、假日活動等等全部都要親力親為，唔通會旨意個工人會幫你教埋仔？

小孩要扭抱時，無論我幾累都會抱。通常一抱就抱兩個 (因為爭寵！)，我估我D骨患就係咁「培養」出黎。小孩有爭執時，無論我幾累都會同佢地溝通，瞭解佢地的狀況再加以修正。三個小孩性格完全唔同，唔可以用一個單一方法去解決，往往係要用「多角度」去處理佢地的情緒，又要達至佢地心目中的「公平」，心力少D都頂唔住。

湊三個辛苦嗎？表面上真係唔容易，不過做媽媽係會超人上身，呢D所謂「辛苦」都不當一回事。當我在群組內分享湊三個其實都OK時，別人看在眼裡我好似講緊風涼話咁。唔通我會話佢地心態未夠強咩… XD

冇錯，我冇能力每個小朋友都悉心栽培，唔可能每個小朋友都比佢地學十八般武藝，亦都唔可能個個星期去迪迪尼當行公園，亦唔會一年去幾次旅行… 因為人多成本自然就好高，以上活動對於一個「大家庭」黎講實在係好吃力。不過三個小孩一同成長，我深信他們的溝通能力、社交能力甚至領導才能都比沒有兄弟姊妹的強。因他們在家已不斷受訓，呢D出黎搵食的「必殺技」比識八國語言、五種樂器更為受用！

菲菲堅信，教仔同跑數一樣，唔係講你做左幾多野，係做「對」幾多野！心態永遠係最重要的！ ^^V

晴天霹靂

上星期盤骨突然劇痛，走去睇醫生時先至發現大檸樂… 頸椎鈣化 + 脊椎側彎仲有坐骨神經痛！天呀！可唔可以成棚骨換左佢呀？嗚嗚~~

而家唯有乖乖休養兼勤D覆診，希望可以控制到唔惡化啦…

免費 facial

連續兩星期，菲菲都有機會做免費 facial。

因為菲菲是某日本牌子化妝品的 die hard fans (光顧了20年，但大多數只買化妝品，極少用它的護膚品)，而該品牌又常常有免費化妝、facial 等比會員試，於是上星期我就享用了一次幾唔錯的免費 facial。既然人家是大品牌，美容顧問都係訓練有素，每個細節都做得井井有條，每句說話都有本事令你想即時買它的產品。自知銷售功力深厚，等閒之輩係絕對 sell 我唔到的。不過人地招呼咁殷勤，當比下面都諗住求其買D野。點知呢個品牌的護膚品價錢遠遠超出我呢位無業師奶的筆直，唯有厚住面皮試完就走了。

昨日又有機會去試另一個名不經傳的牌子。事緣呢間公司投資了一筆很大的資金，但銷情極不理想，希望找人出點子救亡。我老公一向有幫不同銷售團隊做訓練，在友人引薦下約了昨天同呢間公司的管理層見面。老公始終是男士，對美容產品不太熟悉，所以找我去試一次，看看呢間公司的產品仲有冇得發圍。

在做 facial 期間，我不斷詢問每種產品的特別之處，但係美容師似乎唔係好懂得表達。一邊做我都感受到產品係不錯的，不過在我再三引導下，佢都講唔到產品的精髓，真係覺得佢地捉到鹿都唔識脫角。不過唔緊要，既然產品係有得做的，總會有方法嘛。

做完 facial 之後諗住傾下點樣可以幫下佢地公司，點知佢地不斷講公司前景有幾好，發展有幾順利，好多大品牌 (例如我上星期試做的那一間) 的產品都唔夠佢地勁云云，咁即係點呀？玩野咩… 又話公司生意唔掂搵人救命，到想幫你手時就講到自己天下無敵，咁即係唔駛我地幫啦~ 最好笑係明明自己冇生意都覺得勁個某大品牌，呢D係自我陶醉定係思覺失調呀？

和諧

如何處理家庭關係，其實真係唔容易。

既然已經成為了一家人，我對姑仔和叔仔都以禮相待，亦都教小朋友必須要尊重長輩。但是當這些「長輩」做出了對小朋友有壞影響的事，做媽媽的就要取捨。就是︰家庭「和諧」比較重要抑或小朋友的安全較為重要。菲菲盡量都會在保持家庭和諧的大前提下，去保護自己的小朋友。若過了我的底線，我就會放棄所謂的和諧。

如果姑仔不理的勸阻，都要抱著小朋友跑下樓梯…
如果在小女兒在公共交通工具上大叫大嚷，父母都在設法哄她冷靜時，姑仔又來指手劃腳扮專家…
如果叔仔無故彈小朋友的耳仔，彈到佢喊…
如果不斷有侍應在小朋友頭上「上菜」，我加以制止時被人揶揄…

我都盡了最後一點EQ去維持所謂的和諧不去爭辯，但是心中就有了鬱結。

為了舒緩我的鬱結和確保小朋友的安全，大家都係少見為妙，免得我為難！

舊夢重溫

我大概在 04 或 05 年開始寫 BLOG。初時好有熱誠去寫，因為自我感覺良好，認為自己的見解很了得，所以不停寫呀寫。當時的內容，十之八九都係圍繞工作上的事，我想有很多打工仔，尤其係做 SALES 的都有共鳴。

昨日才知道，老公真是我的忠實粉絲，原來他把我當年的博文都COPY下來！感動之餘，亦不忘重溫一下當年的菲菲在想甚麼。經過這麼多年，菲菲不再年少，仍然氣盛。但沒有了以前的囂張，學懂了一點點的收歛。我估初次認識我的人，不會覺得我太自以為是掛… XD

沒有工作幾年，一心一意照顧小朋友，生活沒有太多新奇事物可以分享。就算有，都不會是很觸目的題材。不過，我知道還有些人會偶然路過，睇下菲菲的近況。最近，菲菲過得很開心，因為很多事都有良好的進展。

有博友想和我聯絡，我很歡迎！不過，我是不會重出江湖的了。我很願意分享我的工作往事，如果你認為是有得著的，這個 BLOG 都算是有點價值吧！

差點忘了，我的電郵︰vivi.vivicat@gmail.com

自豪

作為一位媽媽，最感到自豪的，是人人都讚自己的孩子乖。

佢地有幾聰明，有咩優點缺點我當然好清楚。到現時為止我相信唔會有人讚我的小朋友「叻」，因為我冇花金錢和時間去培訓一個十項全能的小天才，但係我真係花左好多心血去教導小孩子去做一個人。基本如禮貌、秩序等當然係必修科，其他如公民意識、環保意識等我都好努力去灌輸。兄弟妹間如何相處，要以「愛」作為基礎去發展人際開係。對尊敬長輩、懂感恩、懂珍惜等等都是我教育小孩的重點。反而甚麼唱歌、跳舞、運動等等「技術性」的項目我暫時不太注重。

在學懂成為一個十項全能之前，菲菲認為懂得做一個受人尊重的人更為重要。無論是大人或小孩，都希望得到別人的尊重。要別人尊重，不是一時三刻可以做到的事。要經過人與人之間的互動而產生的結果。當中要學懂的事真的不少，我不知道我可以灌輸幾多，但我憑著這個信念去培育下一代，相信他們終有一日會真正做到一個受人尊重的人。

以前看見別人的小孩懂得多技能，會彈琴、會說流利英語、會畫畫等等，我都曾為自己的孩子著急，因為我的孩子沒有這些技能。但是在每一個場合，別人都稱讚我的孩子乖巧有禮，很受大家歡迎的時侯，我就感到很快樂，原來我的孩子真的很不錯！反而那些十項全能，做人就十分低能，連基本的禮貌都沒有，很不討我歡心。

最近我終於為大仔報了英文和數學班，以前他從未試過英語學習環境，真的擔心他跟不上。但老師們都讚他是個好學生，更神奇地他竟然可以明白老師的指示，可以快而準地完成堂課。在家時他亦不需太多指導都可以完成家課，真的令我喜出望外！在香港的教育制度下，孩子們被迫學很多令人咋舌的「學問」。就連我的二仔，只有2歲多就要學甚麼是「名詞」！既然社會如此「進步」，我也唯有跟風，希望兒子在懂得做人的同時，也不會被時代巨輪吞噬了。

開心過年

新年前後，忙到不可開交，今天終於有時間寫下野~ :P

今年新年過得很開心，有很多團拜、活動同埋禮物！雖然中間有些小插曲 (拜年都有人會放飛機，真係人生第一次)，不過沒有影響菲菲愉快的心情，相信今年是一個豐收的年頭！

今年突然覺得自己輩份高了，多了人找我們拜年。派了利是幾年，今年派得最開心。以前會好似做一盤生意咁計下自己派左幾多利是，收到幾多利是，會做下結算。今年做了幾日就沒有認真去結算了。利是是一個祝福，可以派多些祝福出去，也是一件樂事，所以今年再沒有計較派多少利是了。

小孩子的活動填滿了整個新年假期，看見他們痛痛快快地玩樂追逐，我就在旁吃喝玩樂，很自然就心廣體胖了 (呢樣就最大鑊！)。

而最令我開懷的，就是有一件困擾了我十多年的事終於解決了，那種如釋重負的感覺非筆墨所能形容！

希望今年好事一件接一件，計畫中的事可以盡快實現！

禮貌

在一大群人的聚會中，戶主7歲的女兒看見我拿電話出來看，就跑到我前面，兇巴巴地叫︰「電話！電話！」。我望了望她，然後說︰「個電話係我的，唔係你的。」小女孩依然惡形惡相地咆哮︰「電話呀！哼！」我索性收起了電話，她就走去找別人要電話。一大群人，最終都會有人心軟，願意交出自己的電話比佢。電話一到手，就急不及待衝入自己房閂埋門，我估該「好心人」一定好擔心自己的電話會有甚麼下場。

大概一小時後，小女孩又跑出來，把電話扔回給物主，之後再找其他人要電話。當然啦，電話沒電了，已經沒有利用價值了，還不快快去找另一條水魚？「好心人2號」借出了電話，說︰「唔緊要啦，小朋友想玩未比佢玩LOR！」我心想︰「如果她弄壞了你的電話，或者刪除了你的重要資料，你找他的父母報仇嗎？」

又一小時後，小女孩又跑出來。當時我坐在「好心人2號」旁邊，小女孩一聲不響想推開我，好像有事要找「好心人2號」。她推了一次不果，再推一次。我忍不住問她︰「你有冇禮貌GA？」小女孩「哼」了我幾聲，繼續推。

孩子不是我的，我沒有資格幫別人教女，於是我走開了。

老公仲問我新年會否帶孩子來拜年，我會堅決反對。

20001

這一刻，「菲上枝頭」的瀏覽人次達 20001。

多謝各位捧場！

甜睡的樣子

明晚開始，連續幾個晚上都要外出吃飯。晚飯回來後，三個小寶都入睡了。

未到明晚，我已經開始有點掛念他們甜睡的樣子…

現在他們還小，每當我離家外出時，他們都依依不捨，逐個走到門前和我吻別。過多幾年，他們會否這樣甜蜜呢？

記得有一次，大仔叫我不要出街，他希望我留在家陪他，當時真的想把約會推掉算了。但是，我總不能以這樣的原因爽約吧？所以有好一段日子，我保持深居簡出的生活。

這個星期，老公生日，有很多朋友間的慶祝活動必須出席。臨近年尾，有很多團年活動也不好推卻。我答應了自己，星期六下午有點空檔，就帶三個小寶貝去公園玩個夠吧！

藥房冇貨賣

以前從來沒有想過，要養活一個小孩原來是如此困難。請不要誤會，菲菲不是有甚麼經濟困難需要幫忙，我們做父母所面對的困難，不是錢可以解決到的。單是奶粉和尿片已經是一個很大的問題，香港人有錢都買不到呀！而家連過年關都要同強國人爭，以後日子點過？我冇咁得閒亦冇咁多氣力同佢地搶，不如向廣大親朋戚友講︰「我冇本事去搶購年貨，不如折現吧！」

旺角有N咁多間藥房，有本事連續十幾日，想搵一罐「美X佳兒」的奶粉都冇，但係眼見人地一箱箱咁拖走，藥房都係香港人開的，拆返幾箱賣比港B好喎，香港BB就黎餓死勒！其實D藥房根本唔需要開設店舖，索性攪網上訂購算啦。擺間舖響彌敦道，原來係冇野賣的，搵笨！

在望道號尋寶

在新年期間，全世界最大的海上書展「望道號」停泊在香港。收到消息後是很想帶小朋友去見識一下，可是新年的 schedule 已經排到密不透風，根本抽不到時間去。早幾天，朋友告知「望道號」重臨香江，今次真的不可以錯過，就算氣管敏感發作都頂硬上，帶了大兒子去走一趟。

很久沒有去海運大廈了，對那裡的路徑不是很熟悉。而且沒有明顯的指示牌，竟然要問了2次客戶服務的員工，找了差不多20分鐘才找到入口。入口本來就是一條小小的秘道，我們在秘道前來回了幾遍也不發現呢。走出秘道，還要走上一條很斜的樓梯，入到船艙又要轉一條小小的樓梯才到達書展的現場。

兒子上到船不停問︰「點解隻船仲唔開既？」、「點解隻船唔郁既？」哈哈！小孩以為上了船就會航行，我解釋這艘船是停泊在碼頭，讓大家可以上船看書嘛。他似懂非懂的看著我，不過很快就被種類繁多的圖書吸引了。他鑽來鑽去找他喜歡的書，不時告訴我哪一本有趣，哪一本很漂亮等等。

在船上逗留了半小時，他已挑了很多書。原來他喜歡看世界地圖、各種工程車和有關鱷魚的書。如果不帶他來，可能我只會選一些很有「教育意義」的故事書給他。沒有想過只有四歲半的小孩，原來求知慾比我想像中強！

平日我都經常帶小朋友去書店，但「望道號」的書比較有外國風情，令小朋友 (和我) 都大開眼界。而且要經過一返轉折才達到，有點點冒險家去尋寶的感覺呢！

希望「望道號」在不久的將來會再來香港，到時我就可以帶齊三個小寶貝去發掘寶藏了。

敬老

菲菲不敢說自己是一個十分敬老的人，不過對長者總是很包容的。今天不知是菲菲食錯了藥，定係情緒已到了臨界點，竟然…

先講今早，我和工人在亞皆老街等過馬路，當時是八時多，來往的車輛並不多。在等過馬路的一、兩分鐘間，有三位滿頭白髮的長者，先後不約而同地推開站在最前的我直衝過馬路。我不知他們有甚麼要事要做，弄到如此趕急，不惜做出如此危險的行徑。就算佢地五十年前真係賽跑冠軍，我都唔信佢地會跑得贏高速飛馳的車輛。還有，我三次被人差點推出馬路，他們有沒有顧及別人的安全？當時是有點氣，不過算了，既然大家都無事就算了。

下午，我和工人接2個仔放學。菲菲住在街市樓上，下午的街市實在很擁擠。就在我家大廈的門口，我正在安排兒子逐個進入大廈，剛巧有一位使用柺杖的老翁快速地在我身邊經過。當他經過時我們發生了踫撞，老翁失重心跌向旁邊的發泡膠盒。我嚇了一跳，好怕老翁會受傷。原來老翁身手不凡，在電光火石間已用柺枚打了我一下！本來我係怕佢有事，但即時火上心頭！佢當然好大聲地話我撞跌佢，但我當時係站著，係佢撞我，唔係我撞佢喎！比人撞完、打左一下，仲要比人鬧，真係話之你係邊位，忍唔住吆喝佢︰「你打人就唔啱！」老翁話我撞跌佢，我工人都忍唔住反駁佢︰「係你撞到人自己跌倒仲鬧人？」老翁當然唔會罷休，繼續大聲鬧我撞跌佢，企圖用群眾力量迫我道歉。換了是以前，可能我會當咩都聽唔到行在去，但係果刻真係好嬲，於是我不顧儀態向他吆喝多一次︰「你打人就唔啱！」

老翁係不忿的，但係我被長者欺負了太多次，再係咁落去我都面對唔到自己。

係，我係當街當巷同一個老翁吵，表面上佢好似係比我撞跌，但事實上係佢持老賣老，自己橫衝直撞仲要打人，我再忍真係對唔住自己。

可能大家認為係菲菲沒有教養或EQ不夠高，如果老翁撞到的不是我而是我的兒子呢？誰向我的兒子道歉呀？

做了媽媽，真係夠狠的…

別人的故事

認識了一位26歲女孩Y，她是一個有幹勁但近乎是傻勁的女生。早前和她吃了一頓飯，對單親家庭的影響多了一些瞭解。

無錯，Y是來自單親家庭。自父母離婚後，她和妹妹跟媽媽住。Y的媽媽特別疼Y的妹妹，有甚麼好的東西和機會都會留給她的妹妹。Y只有自己在外爭取，才可以得到自己想要的東西。她的媽媽十分痛恨前夫，經常在女兒面前數落前夫，又灌輸「男人全是壞東西」的思想給2個女兒，令到父女之間形同陌路。

因為Y的媽媽把最好的全給了妹妹，Y終於在18歲時搬了出去獨自生活。就算是再小的一個「家」，房租、雜費、食用、交通等等全部自己一力承擔，Y也曾有過一段艱辛的日子。她說︰「記得有一次我只有五元，想著究竟應該去買麵包充飢，抑或是去網吧上網搵工，當時都唔知係點捱得過。」。之後她走投無路，跟了爸爸住。初時她都不知如何去面對這個「壞蛋」，但她發現爸爸其實很愛她們三母女，至於是甚麼原因導致離婚，是一個永遠不能解釋的迷。Y的爸爸很想關心Y，但Y不能完全適應有父愛的日子。她不知如何和爸爸相處，更不理解現實中的爸爸竟然和媽媽口中的描述完全不同。她迷茫了好一段時間。

對於男女關係，她亦是一頭霧水。以前以為一心對男友好，男友就會對她好。幾個男友，一係當佢奴隸獸，呼之則來揮之則去，一係當佢搖錢樹，哄她幫忙跑業務，一達標就甩了她。經歷過幾次情傷之後，她仍未肯定男女關係該如何建立。

單親家庭，對下一代的影響，相信不止這些。但這些已經足夠令痛苦世襲下去。

提起精神

三個多月沒有寫博，不是太忙，而是在自我調整。事情是發生了很多，但沒有幾樣想分享。因為我對發生的事情，並不肯定自己有甚麼想法。既然自己都唔知自己想點，就索性休息一下吧！

始終我都是捨不得，菲菲又重出江湖了。

先講工作吧，生意合作伙伴一個接一個告吹，最後都是沒有下文。最初是有不忿氣的感覺，每次開會都被挑這挑那，講到尾都係建基於「不信任」。既然沒有信任基礎，唔做就算了。工作事業這些事，似乎暫時不是時機。

再講家庭吧，兒子的學習進度太飄忽，一時掌握得不錯，一時完全跟不上。我不斷找尋問題所在，相信問題不是兒子懶散，是我要增加「愉快學習」的元素，令只有四歲的小孩可以對學習更有興趣。

最後不得不提健康，不知是我的生理時鐘出了問題，抑或壓力太大，晚上總是睡不著，白天就發呆。很多事都記不起，還有很多事是想不通，腦筋打了好轉岔子。現在總算有些好轉，至少仲知自己寫緊咩… 哈哈！

壬辰龍年快將過去，癸巳蛇年很快就到 (農曆計算係2月10日大年初一，干支曆計算係2月4日立春，但係懂得體會「氣」的我知道2012年12月21日冬至時，蛇年的氣已入)，希望大家都有更好的一年！