對人歡笑背人愁

應大古惑兄的要求，寫下 sales 辛酸史先。

做銷售行業最辛酸就係冇數，冇數除左有工作壓力之外，仲有經濟壓力。某D行業，sales 係要自僱的。點解要自僱？因為不用比底薪也。呢一類 sales 如果冇生意就冇收入，你話幾大壓力呢！一般公司不提供客戶來源的行業都鐘意叫 sales 以自僱形成「合作」，好聽D就係打自己工，事實上係公司可以「無本生利」。

另一種辛酸就係唔識做。唔識做的意思係，公司拋你出大海，由得你自生自滅，點 call 客又唔教，點跟客又唔教，遇到問題老細又幫唔到你手。好多老細以為 sales 係免入油的自動波，唔需要 input，只求 output。如果經驗唔夠，EQ 唔夠同埋膽量唔夠都做唔到。如果老細係技術出身，對市場觸覺唔敏銳，只因一門技術就創業，諗住請人返黎就識 sell 的話，對老細同 sales 黎講都係一個悲劇。

亦有一種辛酸係，老細好肯教，不過只識得用佢個人成功的方法硬塞比 sales，對於整全的 sales management 同 sales training 係冇概念的話，真係要人夾人緣先至得。成功的經驗當然好重要，不過每個人的性格、做事手法、承受壓力程度等等都有不同。不可以用個人成功的「方程式」去迫別人跟從，同一句說話出自唔同人的口，都會有唔同效果啦，又點可以迫人 copy 呢？

Sales 辛辛苦苦 sell 左張單返黎，係要 fulfill 的。如果公司內部其他部門不能配合，導致 sales 不能 fulfill 客人的要求的話，仲大鑊過 sell 唔到單。我相信做廠或技術行業的人最常遇到呢D問題，拆彈拆到傻。服務業都時常出現呢D問題，就係 sales 比左個客人一個錯誤的期望，或者客人想像力太高，到服務效果與期望不符時，後果都可以好嚴重。

講住咁多先，有機會再深入探討。