2013年5月11日 星期六

與怪獸共處一 Group

細仔而家讀緊N班,全班只有十幾個小朋友,我地班家長開左個 whatsapp group 互相交流。好多時我都係睇,好少回覆,因為發現大家唔啱 channel。

事件一︰
去年冬至,學校發生了件很哄動的事。有2名家長在學校附近因為小孩互有踫撞而口角,鬧鬧下仲出埋超勁粗口,嚇到2個細路縮埋一邊喊。剛巧N班的班主任經過見到,2位家長準備大打出手,老師一個人攪唔掂,於是搵埋校長和幾位老師來調停。但係出動到校長都調停不果,最終要報警解決。原來其中一位家長,正是N班的家長。我從沒想過,2個同校小孩有點踫撞可以攪到報警,會唔會誇左D呀?

事件二︰
學校會協助小朋友攪生日會,攪唔攪由家長決定。如果攪就自備蛋糕、禮物和相機,校方會安排茶點時間攪生日會。呢D唔係學校的責任,只係配合家長的需求。

早排有位在職家長,佢幫小朋友攪生日會,訂左蛋糕同禮物,但係冇比相機學校,之後發現「原來」可以帶相機回校,佢就好似失控咁在我們的 whatsapp 內轟了五十幾個 msg!話學校唔提佢帶相機,話學校有責任提佢同埋有責任同佢影相。

又有家長附和,老師冇影到蛋糕的大特寫,又係學校不對。之後有家長搵到開學的「班務通知」,send 出黎比大家睇,內容係有提及生日會安排。意思即係︰學校有比過通知你,係你冇睇姐!但係該家長仍死心不息認為係校方疏忽!我真係唔認同攪生日會係校方責任,仲要應付佢地的怪獸要求,真係難為了老師!

事件三︰
學校舉辦爸媽講故事活動,出了通告講解詳情,家長如想參加,係要出席一次簡介會,之後再出席一次為小朋友講故事。有家長唔知係唔識中文丫,定係唔睇清楚通告,以為只需出席一次,就請假出席。但當收到校方電話,知道要出席2次時,又在 whatsapp 轟了數十個 msg,話校方的通告寫得唔清唔楚。我都有參加是次活動,張通告一睇就明,唔通果幾位家長係外國長大所以唔識中文?嘈左好耐之後決定不參加,因為請唔到假。

其實呢D活動係自願性質,黎到就黎,黎唔到都唔緊要。佢地唔需要咁緊張丫,自己唔睇清楚又大動肝火,好難同佢地溝通喎。

總結以上事件,係我不夠關心校務丫,定係佢地太怪獸呢?有時我真係想退出左個群組算了…

3 則留言:

  1. 恕我直接,我覺得你應該幫個仔轉校,如果今年轉唔切,K1 轉。正所謂有點樣的家長就有點樣的仔女,你個仔對住佢地三年,個人覺得唔咁幾好囉!

    回覆刪除
    回覆
    1. 我三個都讀呢間,好難轉哂三個喎…

      不過我都唔怕仔女同怪獸同學同班,我相信去到邊間都有怪獸,我只會教佢地如何面對。我都努力學習面對…

      刪除
  2. 咁你又啱喎,呢啲人周圍都有,最緊要自己點教好啲仔女! ^_^

    回覆刪除