體驗痛苦

晚飯時，大仔扭計要食通粉，我話晚上係食飯，早餐先至會食通粉，叫佢乖乖埋位食飯。大仔聽罷就開始喊，一邊喊一邊扭要食通粉。

工人A見大少扭計，就好言相向，想氹佢唔好喊，話改天再食通粉云云。工人B一向鐘意同工人A唱反調，就話大少做咩扭計，似係準備出言責難。未等佢再講落去，就叫停2個亞姐。之後我當無事發生一樣，著細仔同細女叫人食飯 (開餐前指定動作)，之後我都開始食飯，冇理到大少仲扭緊計。

我唔理佢唔係因為我冷漠，係等佢喊夠，同埋知道喊完都係冇通粉食 (扭計唔成功)之後，就會乖乖食飯。無論氹定係鬧，佢都會繼續喊，直到對方肯屈服為止。我係佢亞娘，又點會唔知佢脾性？果然不出我所料，十分鐘左右佢就收聲，之後問工人姐姐要毛巾去抹眼淚。

工人A拿了毛巾，我叫佢要同姐姐講唔該，大少唔肯講。工人A就恐嚇佢，話唔講唔該就唔比毛巾佢。看似係教緊大少要有禮貌，但係佢唔明咁樣只會令大少再喊過，白白浪費我呢十分鐘的沉默。於是我又要叫停工人，再請大少同姐姐講唔該。最終大少都肯講，抹乾眼淚就開始食飯，仲食到好津津有味。

呢件係每天教仔眾多小事中的其中一件，點解會咁無聊寫出黎呢？只係想同大家分享一下，教仔，唔一定要氹或要鬧，沉默都係一個方法。

扭計的小朋友，就係要引起別人關注，從而滿足自己的需要。無論你比咩反應，佢都有本事食住上，再黎一輪角力，絕對係勞民傷財兼浪費時間。大人覺得很吃力，小朋友亦沒有得著。沉默，即係唔比反應。在沒有對手的情況下，只要情緒發洩過後就會回復平靜。只要佢平靜了，就會做回正軌的事，亦知道扭計係冇效果的。

事後，我沒有和他檢討。因為他愛面子，扭完計冇人理已經好冇面，事後仲要比人秋後算賬，大人都無地自容啦，何況係細路。我傾向用「體驗式」的方法去令小朋友自己明白事理，從不會「苦口婆心」咁做黑白天鵝。道理講就口響，聽唔入耳果度弊呢。但係佢親身體驗過，感受過之後，呢個道理就會成為佢自己的資產。佢會覺得呢個道理佢佢自己認同、接受和願意執行的，不是因為父母的意願而夾硬去遷就。要培育小朋友的心智和思考能力，係要佢適當地受少少苦，佢地先至會領略到。