大意的媽媽

上星期有補習老師提議我去 check 下大仔係唔係資優，呢幾日我就忙於搵資料同問人。整合過多人意見之後，我有以下行動︰

1. 去協康會排期做評估，大約個半月左右可以做。
2. book左星期一去做皮紋測試。

以上行動，以前我認為只有怪獸家長才會做的。而家等到個仔差不多五歲先至同佢做，我都怪自己疏忽，點解咁遲先至發現有問題。如果我夠怪獸，早幾年同佢做左，就唔駛而家倒瀉蘿蟹咁。因為好多有關服務只會做到六歲，只有部份私營機構會跟到小六。好在評估可以趕在選小學前完成，咁我都可以因應亞仔的情況去幫佢選校，仲有得掹…

同好多家長和老師傾過，我個仔唔多似真係資優，似亞氏保加症多d。亞氏保加症都好普遍，我的家人朋友中有三位小朋友都有呢個情況，係自閉症一種，小朋友的智能係正常或資優。亞氏保加症，主要有三大特徵︰(1) 社交困難，(2) 溝通困難和 (3)固執或狹窄的興趣。我仔中哂三樣，成數都好高。

另外，亞氏保加症係一個腦功能的問題，並不是父母教養的問題。再爬網上資料，發現差不多五歲的仔仔，社交能力停留在三歲！呢2年我掛住個細女，忽略左大仔的情況，真係罪過！

好想快d到星期一，帶哂三個小朋友去做皮紋測試，等我呢個大意媽媽可以盡早瞭解小朋友的情況，可以用最適合的方式去培育他們。