2014年6月5日 星期四

2014 的 cold call

在 2012年6月28日,我寫了一篇名為「Cold Call 皇后」的文章。呢篇文章係呢個 blog 閱讀次數最高,亦引發最多保險界網友發電郵比我了解有關 cold call 的事。我做 cold call 最輝煌的時候,係 2001 年的事,即係 13 年前的事。在 13 年前,cold call 確有生存空間,只要你肯做,唔會冇生意。在 2014 年的現在,cold call 仲可行嗎?

做保險,在各式各樣的原因下,都無可避免要做下 cold call。有 D 係為湊夠單或湊夠數,有 D 係 warm market 不足,焗住要做 cold call。但在今時今日,打電話、企街或洗樓仲可行嗎?

先講企街,我都做過唔少。當年公司有部 van 仔,可以車我地去唔同地方搵客,搵到客就上車傾。我都響車度開過唔少單,仲有好多大單。但而家你地有幾可見到有保險公司攪呢 D 活動?可能我出得街少,呢幾年真係唔多覺眼。在商言商,如果呢招仲有效,一定會繼續用。好明顯,基於結果,流動保險銷售已經不合時宜了。

再講洗樓,我地以前幾乎想去邊度洗樓都得。因為保安冇而家咁嚴密,一般商業大廈或工廈都可以自出自入。而家好多大廈都唔容易比你白撞入到去,就算你入到大廈,去到商業單位,你接觸到的只是叫你留卡片的 receptionist。以前我地連 receptionist 都唔放過照 sell,但現在好多 receptionist 都久經訓練,采你都傻。如果你搵的係小企單位,佢地都唔輕易放你入去講野,因為佢地人手不足,唔得閒聽你講保險。

最後就係打電話,先唔好講你份講稿有幾無懈可擊,相信大部份人接到 cold call 都會即時 cut 線,你根本冇機會講落去。

我唔敢講以上方法完全冇效,但相對 13 年前,呢 D 方法太吃力不討好了,白白消磨自已的意志,何苦呢?

市場永遠在變。大家有冇留意,香港絕大部份人都用緊智能電話。而智能電詰大多數都唔係用黎傾計,係用黎玩交友 apps 或即時訊息。而家電話 plan 已經唔係講比你傾幾多分鐘,因為你好難傾爆個 plan,反而係著重上網速度和流量。好明顯個智能電話唔係用黎傾,係用黎玩啦。要做 cold call,何不向呢班玩電話的人埋手?

如果我接到個 cold call 電話,二話不說就會 cut 線。但收到唔知邊個 send 黎的 msg 就會睇喎。我估唔止我一個係咁,大部份人都係咁。原來市場已經有咁既變化,做 cold call 的係唔係要變下陣呢?

有好多交友 apps 都有比你 search 附近的人的功能。你只要不斷響電話度 search,不難搵到附近的人留意到你。相信總會有人會繼續同你閒聊,聊下聊下就可以傾生意了。希望呢個小貼上可以幫到要做 cold call 的朋友啦。

7 則留言:

  1. 妙! 环境在变,适者生存,大自然的规律。

    自问销售能力,口才欠奉,幸好公司有一堆KAM帮我们安排销售会议,省却我不少功夫,要我去Cold Call, 死得。

    话说回来,以前也替大学做过Cold Call去募捐,成绩一般,但训练到我起码跟陌生人讲电话不会口窒窒。

    回覆刪除
    回覆
    1. Thanks! ^^

      做 B2B 生意,cold call 的路太漫長了,都唔知幾時先至接觸到 decision maker,哈哈!

      刪除
  2. 唉~呢招往往只係女仔先用得着,男仔coldcall點都蝕底啲

    回覆刪除
    回覆
    1. 都唔一定既,當年我都識位師巳做 cold call 好勁,佢係用異性相吸的道理,多搵女士客戶,提高成功率。

      刪除
  3. cold call 洗樓,幾時都仍然有效。即使洗樓仍然有效,唔知點解每個年代靠洗樓開始的agent,上岸後又話現今唔同晒、做唔到。70年出道話90年代再做唔到洗樓,90年代出道又話2010打後又已經再做唔到,到2010年出道的;又會話2040年代的做唔到。千祈唔好信呀,否則保險公司都執笠!從來無變過;你可以想像70年亦有些場所不能隨便內進。應將注意力視線放在可以洗、可以call的地方。

    回覆刪除
  4. 男或女亦無關,永遠人夾人。

    回覆刪除
  5. 可以話個個年代都有其當時的特點;但追住幅圍牆來睇事情,你會發覺比你時光倒流又一樣是做不到的。

    回覆刪除