公園見聞

今日帶小朋友到附近公園玩，天氣清爽，十分舒服。

當孩子們玩緊時，突然聽到一個約五、六歲的小孩大叫：「爺爺！爺爺！你去邊呀？」。他的爺爺正在離開公園，同小孩講：「我去廁所呀，你響度玩吖。」。雖然公園係小朋友地頭，但點都唔會放心到留低個孫自己玩掛？

另一邊，我看到一個小女孩在公園赤足狂奔，冇錯，係赤足呀！留意多佢一陣，發現帶佢黎的係一位女長者，唔知係婆婆定嫲嫲。但點都好，點可以由得小朋友在公園赤足？小朋友腳板仲好嫩，好易受傷吧？

又另一邊有位女長者帶住兩個孫黎玩，一個係會跑會跳的小男孩，另一個係大概一歲的 BB。小男孩和 BB 都坐在公園的滑梯旁玩電芯。坐在滑梯旁已夠危險了，會被其他小朋友撞到，仲要玩電芯，我真係呆了。啲電芯仲要係女長者提供，用腳踢比 BB 玩，極度不可思議！

可能我係怪獸家長，對小朋友太呵護，所以接受唔到老一輩如此湊孫的方式。我慶幸沒有叫老人家幫忙過一天，免得佢地吃力不討好時，我又會心存怨恨。