2012年10月1日 星期一

我不是火星怪獸

見CK兄講親子功課,激發起菲菲一些想法,在這裡抒發一下。

菲菲的兩個兒子都在上幼稚園,大仔四歲上K2,細仔兩歲上N班。學校每年都有幾件例行「親子功課」,包括︰中秋花燈、新年吊飾,每年兩次的專題習作 (大仔上年做了筆筒和船),仲有每週新聞分享。

當大仔上K1時,菲菲真係大開眼界,其他家長做出黎的功課真係要拎去 gallery 度展覽,我想用鬼斧神工黎形容,究竟係點整出黎 ga?再望下我地果份真正的親子功課,要拎出黎交比老師時要提起好大勇氣!加上菲菲冇做勞作的天份,無論我點努力去幫個仔出貓都做唔到貼近市場指標的作品,真係好氣餒!小朋友係識得分辨咩叫美麗,每次有親子功課要交時我都好大壓力。大仔拎住自己件「作品」,再睇下人地D「展品」,高下立見。你話沒有比較就係呃人的,呢D係天性,唔係你同佢講只要盡力去做就可以。小朋友都有自己的思想,佢知道自己努力過後都係陪跑,咁細個就要面對如此挫敗真係好無奈。佢唔係比其他小朋友差,係佢亞媽唔夠人地亞媽揮,咁輸法真係好唔抵。

一年過後,菲菲已經唔再為親子功課而費神,只要交出不太樣衰的功課就算數。

今年K2,小朋友多左抄寫功課,聽好多家長講係最辛苦的時候,因為要花大量時間去督促小朋友寫好D字。未上K2時菲菲都有D擔心,究竟係邊個讀書呀?做家長仲辛苦過返學果個?我仲要有三個小朋友,我未仲辛苦過返三份工?好在,大仔好快就可以完成抄寫的功課,寫出黎D字都好整齊,完全唔需要我擔心,佢自己都好有滿足感!所以今年細仔上N班,所有親子功課我都會用輕鬆的心情看待,由得細仔自由創作,交左一個「不加思索」的燈籠,我又覺得幾有趣丫!細仔又好開心,反正一定沒有獎項,不如當遊戲玩下就算。

*****

講開親子功課,少不免又講下課外活動。

而家好似有不成文規定,小朋友在幼稚園時已要上不同興趣班,幫助小朋友有培養多種技能,令小朋友更易升上心儀小學。菲菲的大仔有學普通話 (因他的幼稚園沒有普遍話學)、打鼓和跳舞。星期六大仔上普遍話和打鼓,一般小朋友入了課室之後,家長們都會茶聚,等夠鐘就接小朋友下課。

剛過去的星期六菲菲亦有參興家長們的茶聚,原來我係一名懶惰的家長。他們會讓小朋友上兩間幼稚園 (一間上午校,一間下午校!),星期六日又會安排各式各樣的興趣班,令小朋友的時間表密不透風。學習的範圍廣泛,四歲小孩已學四至五種語言,又有畫畫跳舞,又有運動項目,實在令人咋舌!有某家家長話個女在家唔肯練習,認為個女唔聽話,正在諗緊點教好個女。比著我都唔肯練啦,氣都冇得抖,仲有心機練咩!

家長們認為菲菲不夠積極,沒有為小朋友舖路,係一名不夠負責任的家長。但係在菲菲眼中,佢地彷彿係來自火星的怪獸,把小朋友當成甚麼了?是滿足虛榮的工具還是真心為他們著想?大家的分歧太大了,根本係搭不上咀。

又有家長為了讓小朋友入讀教會學校而改信基督教,勉強自己返教會,這又是甚麼風氣?菲菲和老公都不是基督徒,對基督教係抱著尊重的態度,絕對不會勉強自己去扮基督徒。如果真係相信基督教而受洗,係一件光榮的事。但係為左幫小朋友舖路,佢地對宗教似乎欠缺了基本的尊重。家而D父母好似好愛錫子女,出發點係冇錯,不過手法就不敢苛同了。

做家長的懂得不隨波逐流,才會教導出真正有思想和主見的下一代。菲菲相信這樣才是一個真正負責任的家長。

2 則留言:

  1. 可悲,真的很可悲。

    东西是学了,但小孩不知道为什么要学,学来做什么,就算真的学了,过几年还是不记得的。这么辛苦为了什么?

    我家里讲普通话,给嫲嫲带的时候她就讲广东话。电视播的是英语,这里是挪威,到处都是挪威语。儿子本身就在三言四语的环境下长大,根本不用去报班去学。平时在家跟他弹琴,陪他踢球。老婆陪他读书认字。在下觉得已经够了。

    这里的幼儿园是根据住址分配的,小学,中学如是。根本不用找,不用抢。只是学校的基础教育太简单,自己在家里补充就是了。

    看到你和CK的博文让我觉得在香港养小孩只是连累了小孩而已。

    回覆刪除
    回覆
    1. 香港的教育制度有問題,家長的心態也有問題。很多人都以為小孩的「起跑線」比人前係有著數,不過菲菲認為小孩的「耐力」更為重要。小小年紀就透不過氣,幾時捱得到大學畢業?這豈不是弄巧反拙?

      再係咁落去,孩子未有所成已經破壞了寶貴的親子關係,好唔值得。

      刪除