2013年9月30日 星期一

重出江湖

做了四年全職媽媽,在沒有甚麽心理準備下,我將會重出江湖上班去。

2星期前,我的其中一位前老細兼大學師兄,找我回去做 part time admin。反正唔駛跑數,時間又較自由,我就答應了。

世事就是如此可愛,有心裁花花發,無心插柳柳成蔭。去年老是找機會做下嘢,但係點攪都攪唔成。到我完全放下搵啲嘢做下的念頭時,機會就突然出現在我眼前。

老公本來沒有贊成或反對,昨晚佢同我講,如果份工辛苦就唔好做嘞。我仲未返工,辛唔辛苦暫時未知,不過好肯定我找了個好老公!

10月2日,祝我開工大吉!

2013年9月27日 星期五

自己做功課

大仔今年升K3,在家長會中校方提及今年的功課係以文字為主,所有功課必須由學生自己做,不可由家長代勞。可能大家有 D 奇怪,乜做功課唔係學生的責任咩?點解校方會講「不可家長代勞」呢?事緣由N班至K2的功課,好多都有「親子」成份。講得好聽就係親子功課,事實係 D 功課根本超出小朋友的能力範圍。例如︰三歲開始要做剪報,做完之後要回校分享新聞內容。你話一個三歲小朋友點做呀?即係亞媽做好,再教個小朋友回校 present 啦。

今年要準備入小學,所以學校要加大力度,講到明唔要家長做,要小朋友自己做。今日學校有份工作紙,係要小朋友訪問家庭成員一些生活瑣事,問題好簡單,答案都只係簡單的詞語。不過,當中有九成的生字,學校係未教過的。即係我要每個字,一筆一劃咁教亞仔寫,變相我 takeover 左教中文生字呢個 task,仲辛苦過做份剪報教亞仔 present。呢份「簡單任務」,我同亞仔足足努力了一粒鐘,做完之後大家都頂唔順要休息了。

仲有一半功課未做,明天我地要繼續努力了…

而家咩教育制度呀?如果父母忙於工作,冇時間教亞仔寫新生字,咁佢點交功課呀?我好想亞仔可以自己做功課呀,但幾時先至有返 D 正常程度的功課呀?

2013年9月26日 星期四

物質 VS 抗逆

今日執下亞女的頭飾,兩歲人仔竟然有三盒咁多,我忍唔住影張相 POST 上面書同朋友分享。

原來我真係唔夠貪靚,朋友們個個都話佢地個女 (都係兩歲) 閒閒地有十盒八盒頭飾,仲未計其他飾物,我呢D係小兒科。其實頭就得一個,一個月都係得三十日,買埋咁多頭飾戴得哂咩?可能我對飾物係抱簡約態度,頭上永遠只得一個髮夾,唔會夾到七彩咁,所以冇諗過一個兩歲小朋友竟然會有十盒八盒頭飾。對於小朋友的一切打扮,我都係抱簡約態度。衫褲鞋襪全部夠用就唔再買,因為佢地大得快,買咁多最後都係浪費。

再諗深一層,而家好多家長都鐘意用物質去襯托小朋友。這不存在能力或對錯的問題,我只會考慮咁樣做對小朋友的AQ有多大幫助。AQ即係抗逆力有幾強,當你面對逆境時,有幾大能耐去面對和處理。物質太豐盛,在某程度上係削弱了小朋友面對逆境的能耐。一直都都係食得好、穿得好、玩得好,一旦生活質素有所下降,對於小朋友來說就係一個逆境。須知人生幾十年,不可能年年順境,事事如意。如果連物質這小小的關口都過不了,其他人生的關口又如何度過?

節儉不單是一種美德,仲係教育小朋友一種生活態度,就係不需奢華亦很快樂。個個口口聲聲話最緊要小朋友開心,不斷用物質去堆砌所謂快樂童年,但這樣對小朋友的心智有甚麼幫助呢?

2013年9月21日 星期六

試食新款月餅

中秋佳節,當然少不了食月餅呢個重要活動啦!

菲菲好鐘意食傳統的雙黃蓮蓉月,但近年月餅款式越出越多,今年菲菲收到幾款不同的月餅,試食後響度同大家分享下。

雪糕月餅
HD 雪糕月餅唔係新品,但菲菲今年先至第一次食,哈哈!其實我覺得雪糕月餅只係一個綽頭,只不過係朱古力包住舊雪糕,唔覺有咩出人意表之處。唯一的好處就係,消暑!哈哈哈~~

奶皇月餅
大家爭崩頭去買的酒店奶皇月餅,我就冇買過,不過多謝朋友比面,連續2年都收到,呵呵!論味道都不錯,體積亦不大,食一個都唔覺滯。不過我今日度下個 size,原來個月餅的儲存空間同傳統月餅係一樣,但個「內容」就明顯細好多。果然貫徹酒店本色,隻碟好大,但份量很少,仲要整一大堆伴碟,攪到美輪美奐咁。靚就靚嘞,但咁大個盒認真唔環保。

蛋糕月餅
呢款都係今年第一次食,感覺好似一個方形 cupcake 咁。味道都不錯,不會太甜亦不會好油,我的小朋友好喜愛。可惜一盒得2個,稍嫌有啲唔夠喉。

咖啡月餅
初時見到個月餅覺得好奇怪,攪咩連星XX都出月餅?個樣又好似傳統月餅咁喎,切開時見有 nuts,幾驚係五仁月呀。咬落去,食到好香咖啡味,配合埋果仁碎,好似一邊飲咖啡一邊食果仁咁,唔錯唔錯!個人最喜愛呢款,下次中秋一定會自陶腰包買返盒黎食。

澳門某酒店月餅
一共收到2盒,係老公的澳門客戶送的。包裝好堂皇,一睇就知係 for 送禮用的。見有2盒,當然好唔客氣即刻開一盒黎試啦!個盒同包裝袋都冇標明係咩月餅,唔知係咩餡料。切開時覺得把刀有啲「阻力」,個月餅都幾硬下喎!再望下D內容,驚見腰果同花生!食落仲有芝麻。個月餅唔甜唔咸亦唔軟熟,好似趙緊堅果加餅皮同埋唔知係咩蓉咁,好怪!於是菲菲即時將剩下的大半個月餅比左工人食,仲 sell 佢地話冇豬油 (呢點我可以肯定!),唔甜同埋好香 (呢句見人見智啦,哈哈!)。出奇地佢地又鐘意喎。我仲諗緊其他幾個月餅係同一口味定係會唔同,但到現時為止仲未有勇氣切開第二個去求證。

雙黃白蓮蓉
我有2盒至愛,就係美X同恆X。基於貪新忘舊的天性,呢2盒仲未開封。不過我相信,佢地依然係我最喜愛的傳統月餅!

2013年9月16日 星期一

淪陷的樂園

星期日菲菲一家大細去海洋公園玩,可能我實在太耐冇去,今次竟然有令人難忘的回憶。

一向菲菲都是較喜歡海洋公園,一來有童年回憶,二來有較多適合小朋友參觀的地方,所以趁我生日就舉家遊園去。之前都聽唔少強國人打尖和爭先恐後的情況,已有哂心理準備,但係事情原來係可以去得更盡。

我們打算到海洋劇場睇海豚,開場前30分鐘到場都已經高朋滿座。我地一家大細就企響上層欄杆等開場。一邊等開場,一邊有遊人入場,我地後面好快企咗好多人。

開場時,我後面的人,不論男女都迫哂埋黎,原來我地後面企滿強國人。佢地越迫越緊,我比後面的女人迫到夾住響欄杆。老公都比人狂迫,仲要響老公同亞仔頭邊傳汽水。老公當然好火啦,叫佢地唔好再迫,同唔好再響人地個頭度傳汽水。個強國人仲好理直氣壯咁話:「不可以的嗎?」。老公回佢:「梗係唔得啦!」。

佢地實在越迫越大力,老公叫咗幾次後面啲人唔好再迫。我唔知條欄杆頂唔頂到咁大壓力,加上我地全家都夾住響欄杆,當時覺得好危險。終於我忍唔住用普通話叫佢地唔好再迫,我地就快跌落去嘞!後面個女強國人話後面迫佢,言下之意即係唔關佢事啦。

好呀,我再大聲啲叫後面啲人唔好再迫。點知有個男人仲專登用力撞我,呢下我道火即著,喝嗰條麻甩佬:「你是男的,推我幹嗎?」。條友繼續大力撞多我幾下,火到我不能再忍,生平第一次高呼非禮。條友以為佢係啱嘅,仲叫我報警!當時我化氣憤為力量,狂呼咗十幾聲非禮,我肯定場內的人一定聽到。

攪到咁,節目仍然繼續,完全冇職員埋黎處理,亦都冇任何人理會。

當下明白,呢度已經淪陷,係強國人的地方,冇香港人亦冇見義勇為的人。我地帶住細路,又唔夠佢地人多勢眾,唯有打退堂鼓走人。

但係佢地依然壓住我地唔比我地走,我再喝一句:「讓開!」,但冇效。最後我喝多句:「給你們看!讓開!」,佢地先肯讓開比我地走。

行出海洋劇場,望望身邊的遊人,全部都係強國人。

我醒覺了,香港的樂園都淪陷在強國人的手去,我們香港人,一係要比強國人更勇更狠先有資格去呢啲地方,一係以後都唔好比錢入場當炮灰了。

2013年9月7日 星期六

A4單行簿

收到通告,大仔要買2本A4單行簿做剪報和週記。呢個星期都忙於孻女的新生適應期,到今天下午才有時間去買。

到樓下文具店找,找不到合學校規格的單行簿,唯有行去奧海城三期的大眾書局搵。估唔到咁大間書局只有一個品牌係適合學校的規定,更估唔到一本A4單行簿索價四十幾蚊!定價實在不合理,所以不買。

於是打算轉去附近的海富商場睇下,記得果度有2間平民文具店,我估點都唔駛四十幾蚊一本掛。

正當準備入商場之際,一位九十後小女生截住我,話做奶粉市場調查。見佢在一個住滿長者的屋苑 (即係唔多媽咪和BB),加上烈日當空,要搵合適人選做奶粉市場調查,太辛苦了吧。瞄到佢後面有個 supervisor 及實,即係想蛇入商場涼冷氣都唔得。見佢咁可憐,就當幫下佢啦。點知一問就問左半個鐘,自己捉蟲添。而我呢半個鐘的酬勞就係一張七仔二十蚊 coupon。

入到商場,地下的文具店開了燈但關了門,東主似乎去了洗手間。上二樓的文具店,竟然執左。行到腳軟兼口渴,就拎左張 coupon 去七仔度買飲品。順遁行去旁邊的富榮花園,諗住去 E Cosway 買少少野。途經海當街市時,發現街市因為商場準備升格而結業。去到富榮時,連 E Cosway 都執埋!天呀!我想買少少野姐,唔係咁趕盡殺絕呀?

之後折返海富位於地下的文具店,仍然找不到學校指定的A4單行簿。我投降了,明天再去油麻地搵吧。

2013年9月3日 星期二

適應新環境

今日孻女開學,開始踏入她人生的新階段。

學校好體貼的,有為期兩星期的「新生適應期」。首一星期由家長陪同上學,第二星期就開始自己上堂。因為係全日制,所以係每日加長少少時間,令小朋友可以慢慢適應學校生活。我三個小朋友都係讀同一間學校,今次係我第三個「新生適應期」。

今年的N班好特別,清一色係舊家長,即係所有小朋友都有兄姊在此就讀。既然係舊家長,對學校的運作當然好熟悉。今早回校時,小朋友都好快換完鞋,乖乖在學校門口排好隊等開門。當校長出黎諗住睇下我地攪成點之際,見到個個都準備好哂,都覺得好讚嘆。

反而今年學校來了幾位新老師和新主任,她們對學校的運作仍在摸索階段,對新生適應期的流程不太熟悉,見到她們都是戰戰兢兢的。我地呢班「老鬼」在每一個環節都應付自如,減輕了老師要控制場面的壓力。之後有老師同我傾計,話︰「D小朋友好叻喎,識唱哂 D 兒歌既?」。我答︰「之前亞哥響屋企日唱夜唱,聽得多自然識唱啦。」。事實上唔單止我個女,其他小朋友都識唱仲識做埋動作,明顯係響屋企睇得多啦。

當小朋友都在玩大肌肉活動時 (即係玩滑梯,打下波呢 D 跑來跑去的活動),完全冇家長踏入地墊一步,大家都在外圍睇住就算。就算小朋友互有踫撞,都唔會跑埋去幫拖,因為我地清楚呢個環節係咩環境,不需要貼身保護咁緊張。今次可算係一個幾輕鬆的新生適應期。

新老師們個個都好緊張,當小朋友有踫撞時就會睇下我地咩反應。我地當然係冇咩特別反應啦。我地只係協助小朋友適應學校生活,唔係黎幫佢地出頭。之後大把日子撞黎撞去啦,下下都咁緊張,幾時緊張到 K3 呀?我們的悠閒和老師的緊張,形成了一個有趣的對比。

究竟係老師幫小朋友適應學生生活丫?定係我地呢班舊家長幫老師適應新工作環境呢?哈哈!新老師和小朋友們,你地都要加油呀!大家都盡快適應新環境吧!

2013年9月1日 星期日

暑假結束了

明天係9月2日星期一,兩個仔要開學了,亞女就星期二才開學,過埋首2星期的適應週,大家的生活就回復正軌了!

暑假是小朋友的假期,但對家長來說就是最忙碌的日子。平時佢地返全日班,日間我有大部份時間都可以自由支配。但放暑假就要諗下同佢地去邊度玩,有咩新見識,等佢地唔好白白浪費學年中最長的假期。

有些朋友忙於為小朋友報暑期班,大仔的其中一位同學 (升K3),就一日之內可以返4個 session!咁即係放假定係「進補」呀?我都有同大仔報暑期班,只係每天一節珠心算。其實每天一節我都覺得密,所以我就暫停了星期六的普通話,起碼星期六和日都是全日休息。

想當年我放暑假,邊度有暑期班呢回事。放暑假只係響屋企玩,乖乖在開學前完成暑期作業就算了。家人亦沒有安排咩活動比我地,即係全天侯 hea 住等開學,邊有而家 D 學生咁忙。我就奉行「工作時工作,遊戲時遊戲」的宗旨,所以在過去一星期,幾乎每日都帶小朋友去玩。去了科學館、太空館同文化博物館,參加朋友的生日派對等等。趁而家冇咩考試壓力都唔去玩,我會覺得對唔住 D 小朋友。

可能係想補償返自己啦,我童年時暑假都係渾渾噩噩咁過,所以會好想自己的仔女可以開開心心咁放暑假!