2013年7月31日 星期三

強盜國

早幾日和一位做外傭中介服務的朋友閒談,問他最近生意可好?他說現在不敢再引入菲律賓女傭,只敢引入印傭。因為菲律賓政府的政策有所改變,如再介紹新來港的菲律賓女傭,輕則做一單蝕一單,重則可以摺埋以後唔駃見人。

菲律賓政府改了例,菲律賓女傭不用付任何中介費就可以享用中介服務,咁中介費由邊個比呢?就係僱主!即係香港僱主想僱用新來港的菲律賓女傭,要比香港和菲律賓的中介費、機票、驗身和保險,加加埋埋冇15K都埋唔到單。

比錢事少,呢班新來港菲傭,好多黎到香港不夠一個月都搏炒,迫香港傭主比一個月通知金送走瘟神。而呢位菲傭又可以在港逗留2星期去搵新水魚,變相佢地係黎呃錢,唔係打工。香港僱主如果炒得太多菲律賓工人,係會比菲政府列入黑名單,唔會再比你請菲傭。之前香港傭主在面書上交換一些專業搏炒傭工的資料時,就被刪了群組和惹上非議。試想想,僱主們大拿拿花了15K等了3個月終於請到人黎幫手,點知未夠一個月佢就攪到你家無寧日仲要賠一個月工資和機票送佢走,仲要收拾家中的爛攤子,何止經濟損失?簡直精神受創啦。想搵香港政府幫手咩?冇一個部門會幫到你的。於是呢班好似賊一樣的菲傭繼續活躍於香港外傭市場,繼續欺騙可憐的雙職家庭。

受害者唔單止係僱主,連中介公司都中招。呢班菲傭如果冇錢駛,就會去菲律賓領事館誣告中介公司濫收費用。女傭們不需要任何證據,菲領事館都會為她們「申冤」,迫令中介公司「歸還」一切費用。你可以唔比,但菲政府會把閣下列入黑名單,以後都唔駛做菲傭中介。

菲律賓政府近幾年的所作所為,實在越來越強盜!

2013年7月30日 星期二

遲來的 N810

今日想寫下新題材,作為女人,冇理由唔講扮靚的,哈哈!

2星期前,菲菲的老公送了部日立 N810 給我,這部已經是舊款機,各美容博客都寫到唔寫了。當然我唔係介紹呢部機有幾神奇啦,一黎大把人寫了,二黎新機都陸續登場,寫都冇謂。

較資深的讀者都知道菲菲以前係做美容院管理的,對美容儀器當然有一定的認識。家用美容儀器不是新事物,但我一直都沒有試用,因為一黎怕自己冇恆心,二黎我對家用美容儀器的功效有點保留。

沒有做美容院之後,就沒有享用免費高級面部護理的權利。作為一位全職媽媽,亦不捨得花大量金錢去參加美容療程。所以這幾年都是自己在家做簡單的保養,幸好仲頂得住,未變成完全師奶模樣。

自從有了這部 N810,終於有返少少人生樂趣,亦對家用美容儀有了很大的改觀。原來一部小小的手提儀器,效果可以媲美美容院的儀器。用完之後,覺得塊面極滑,好耐冇試過呢種感覺了!

菲菲的朋友用完呢部機之後,都冇加其他護膚品。可能我青春不再啦,我仍會用上平時的護膚品。因我比較孤寒,在保濕 mode 只用「極潤」,嚴格來說只做了保濕,其他美白呀、緊緻呀完全冇做到,所以做完機之後,我必定會加返其他精華素做返日常護理程序,確保功效有增無減。

女人都係怕老的,我都希望「衰老」可以儘量延遲出現。女人要靚,真係無得懶。

2013年7月29日 星期一

與老醫師的一席話

最近多得一位熱心人介紹,有幸認識了一位退休老醫師。老醫師已八十多歲,不想再每天定時定侯應診,所以沒有掛牌行醫了,只是有人找他幫忙,才偶爾「提點」幾句。他的醫術高明,有好幾位有長期健康問題的朋友都得到這位老醫師的相助,都慢慢有了改善。

菲菲的孻女有嚴重的濕疹,但我不想她用太多類固醇藥物,所以沒有去看西醫。至於中醫嘛,因為她只有2歲,實在不知道如何餵藥。因為中藥不易入口,我估威迫利誘都未必成功,所以亦沒有去看中醫。一直都只是用沒有類固醇的藥膏,成效不大,一直都沒有好轉。

熱心人知道我的處境,就不斷遊說老醫師為我的孻女看一看。最初老醫師是不肯接見我的,因為他認為濕疹只是小事一宗,不用勞煩他出關勞心勞力。經熱心人多番遊說下,老醫師雖然仍未肯接見我,但終於肯開一張洗身的藥方給我,著我每天為孻女洗患處,並每天拍照給他看。

約一星期過後,熱心人通知我,老醫師終於肯見我了!老醫師是一位和藹可親的長者,為女兒把脈後開了一張內服的藥方給我,還教我如何餵藥。他說︰「這藥是要服用一段時間,休息數天,才可以再服一段時間。每次服量不多,但大前提是要她願意服藥。」。

這下問題可來了,怎樣令一個2歲小孩願意服中藥呢?我的刁蠻公主,莫講話苦澀的中藥,連帶有甜味的西藥都不肯服,仲要每天服藥,我真係唔知點算。老醫師說︰「你的女兒很聰明,不要當她是小孩,直接告訴她服藥的好處,讓她明白,自然就會願意服。」

第一天,我向女兒解釋為何要服藥,又指著她的患處問她想不想變回漂亮。她說想,就叫她服藥,但她沒有料到中藥是不好味的,試了一口就不肯服了。之後工人姐姐費了很大的勁迫她服下,但當晚女兒可能受驚過度,整晚睡不好。

我向老醫師報告了情況,老醫師說我不應強迫她服藥,亦不應騙她服藥。如果她不肯服,就索性不為她用中藥洗患處,讓她惡化。當她感到辛苦時,就要尋求解決辦法,到時再遊說她服藥,就會更容易。老醫師說我不夠狼心,這樣教不出好子女。理論等同不肯吃飯的小孩,如果每天追著他餵飯是沒有效果的,最有效就是餓他幾餐,之後看他還敢不敢挑吃!哈哈!我沒有想過,原來令小孩服藥都有如此道理,不過想深一層亦很同意老醫師的說法。我的女兒太懂得鑑貌辨色,一不留神就被她佔了上風,為所欲為。老醫師說如不趁此機會好好教育這小娃,將來就很難教好她。我們還欠一點點耐性和狼心,對她太容忍,實際上是對她對我們都太殘忍。

老醫師的一番有話,確實點醒了我。對這位小公主,我是有點寬鬆的,造成她驕縱刁蠻的性格。幸好她才2歲,還有機會教好她,真的很感激老醫師的提點,令我知道要治好女兒,先要讓她深深地體會痛苦,才知道要珍惜,那樣才會有真正的成效。

我會堅持的!亞女,其實亞媽真係好錫你,就係因為錫你,所以不能太遷就你了。你長大後就會明白媽媽的苦心…

2013年7月19日 星期五

突然的進展

冇諗過會咁快…

一般去協康會排期做評估都要半年,我交左表幾日左右,就有姑娘打電話黎話我只需排個半月就得。點知只係2星期,姑娘又打電話黎話比個快期我,今日我就單獨見了心理專家,同佢詳談小朋友的情況。

傾了個幾鐘,知道而家亞氏保加症係唔會獨立成科,係會歸納做自閉症。雖然我唔想自己小朋友被標籤成自閉症患者,但現在醫學趨勢係咁,我都冇辦法。傾完之後,心理專家都認為小朋友有自閉症傾向,值得做一次評估,亦好快地約了下星期四。

我唔太擔心個結果,我只關心該如何協助他,和為他選一所合適的小學,讓他快樂地成長。

2013年7月14日 星期日

天灸

在中醫的角度,在每年最熱的日子,是很適合醫洽「寒」的病,就是「冬病夏洽」。中國曆法中,有「三伏日」,分別是「初伏」、「中伏」和「末伏」。「夏至」後第三個庚日為初伏,之後的一個庚日為中伏,而「立秋」後第一個庚日就是末伏,今年的初伏就在西曆7月13日。(這些日子在通勝中有標示,不難找。)

一般三伏日都會做「天灸」,即是在一些穴位貼上中藥貼,而這些中藥貼和皮膚接觸後會產生熱力,效果和艾灸相若。只需在三伏日都做一次天灸,就可減輕於冬天時較易病發的氣管敏感。

菲菲一向有氣管疾病,早2年都錯過了三伏日。今年我都幾乎錯過,幸好老公昨天發現是初伏,就趕快打電話去有提供天灸服務的中醫診所約時間。到達診所時,已是坐無虛席,看來懂得冬病夏治的人都不少。為我診症的是一位年輕女醫師,初時都感到有點不習慣,因為我去開的中醫都是老一輩居多。這位女中醫幾風趣幽默,一邊為我診症,一邊逗我說笑,但不失專業,有點令我另眼相看。

這間中醫診所是用藥粉的,對都市人來說是很方便。昨天貼了三伏貼,仍可繼續行街食飯,只是感到藥貼部位有微微發熱,對日常活動沒有影響。回家後再服藥粉 (要用熱水沖),不久就很有睡意。我罕有地睡了十小時,雖然半夜仍有咳 (我有感冒未好返),但不會咳醒,算是不錯了。

希望今年做了天灸之後,冬天的氣管不要太容易敏感啦!

2013年7月8日 星期一

皮紋分析

今日帶哂三個小朋友去做皮紋分析,做的過程好簡單,出黎的結果同事實極吻合!

大仔果然係出現專注力問題,而呢個問題係天生的,不是父母管教出了問題。幸好他語文和邏輯都好強,絕對是讀書的材料,只要趁仲細個多訓練佢專注力會有改善。至於資優嘛,似乎仲未到位。

細仔專注力不錯,語文和邏輯算是中上,而且在創意思維和空間感等係好有潛質的,是三個之中最高分的一個。呢樣我都有留意,只有3歲的他,對藝術特別有共鳴,又愛繪畫,又愛用積木砌各色各樣的東西。皮紋分析師都建議我多發展他的藝術才華,不要迫他鑽研書本。

孻女同大仔有好多相似之處,語文和邏輯都好強,仲強過大仔,又係專注力不足,幸好佢情感發展較理想,係懂得和人相處的,所以問題不是太明顯。呢個女都係要加強佢專注力方面,不過而家太細,等佢大D先至可以做訓練。

總結以上分析,同我所觀察的情況一樣。當然,觀察只是我個人的推斷,做一次測試起碼可以比一個實在的數據我,令我更有信心地為三個小朋友作不同的準備嘛。

2013年7月6日 星期六

意外收穫

早幾日開始有暈眩感覺,原來我有輕微耳水不平衡,總是覺得坐在船上搖下搖下咁。好幾位朋友都勸我多休息,但係呢幾日都安排左親子節目,剛巧都是不能改期的,唯有頂硬上。

今天下午,帶大仔去看一間小學的開放日 (呢D活動只有不出席,哪可能改期呢?哈哈!),本來都是戰戰兢兢的,唔知自己頂唔頂得住 (幸好都OK),又唔知亞仔會唔會悶。但係我對區內學校所知不多,而呢間又係幾熱門的學校,點都要去睇下既。

首先係幾位老師同校長的講話,但係內容都幾悶,在場的小朋友和家長都在閒談,對台上的講者似乎欠了點尊重。好不容易捱過了訓話時間,我們就分組到校內各處體驗小學生活。呢間學校有部份新教室 (例如︰電腦室、視藝室等),但大部份課室,都係同我讀小學時的陳設大同小異,忽然有種時光倒流的感覺,哈哈!

估唔到我個仔去到一間陌生的學校,表現又幾唔錯喎。我地去左4個課室,首先玩電腦 (之前冇比佢玩過,但佢竟然識玩!),之後睇宗教影片 (佢又識答老師問題喎…),再去玩樂器 (音樂老師特意走埋黎讚亞仔可愛,仲問佢叫咩名),最後係玩英文遊戲 (原來我個仔識好多英文,我都唔知既?)。完成整個過程之後仲有小食,亞仔好乖請我食一半,佢今日心情應該唔錯,哈哈!

參觀完小學,我地到附近的M記食野,同檯有一對母子又係剛參觀完畢,不過當然係各有各食啦。我同亞仔傾計,問佢鐘唔鐘意呢間小學,又傾下佢平時返學的趣事。傾傾下,佢見到對面的小朋友手上有玩具,膽粗粗問人借黎玩。就係咁,我就開始同一位陌生媽媽展開交談。我個仔仲話要請小朋友食野,好似第一次見佢咁熱情咋喎。

今次的參觀,不單止對一間學校多了認識,仲係對自己個仔多左瞭解。原來在沒有壓力的情況下,佢的表現同平時係有天壤之別。我一直以為佢唔識同小朋友溝通,原來又唔係喎,係揀人黎溝通 (當然我仲未知佢用咩準則去揀啦)。以為佢唔鐘意答老師問題咩,今日又不斷舉手喎,似乎佢唔係我想像中咁被動。

見到佢今日的表現,我要用刮目相看來形容,可算係我今日同佢參觀學校的意外收穫!


2013年7月5日 星期五

大意的媽媽

上星期有補習老師提議我去 check 下大仔係唔係資優,呢幾日我就忙於搵資料同問人。整合過多人意見之後,我有以下行動︰

1. 去協康會排期做評估,大約個半月左右可以做。
2. book左星期一去做皮紋測試。

以上行動,以前我認為只有怪獸家長才會做的。而家等到個仔差不多五歲先至同佢做,我都怪自己疏忽,點解咁遲先至發現有問題。如果我夠怪獸,早幾年同佢做左,就唔駛而家倒瀉蘿蟹咁。因為好多有關服務只會做到六歲,只有部份私營機構會跟到小六。好在評估可以趕在選小學前完成,咁我都可以因應亞仔的情況去幫佢選校,仲有得掹…

同好多家長和老師傾過,我個仔唔多似真係資優,似亞氏保加症多d。亞氏保加症都好普遍,我的家人朋友中有三位小朋友都有呢個情況,係自閉症一種,小朋友的智能係正常或資優。亞氏保加症,主要有三大特徵︰(1) 社交困難,(2) 溝通困難和 (3)固執或狹窄的興趣。我仔中哂三樣,成數都好高。

另外,亞氏保加症係一個腦功能的問題,並不是父母教養的問題。再爬網上資料,發現差不多五歲的仔仔,社交能力停留在三歲!呢2年我掛住個細女,忽略左大仔的情況,真係罪過!

好想快d到星期一,帶哂三個小朋友去做皮紋測試,等我呢個大意媽媽可以盡早瞭解小朋友的情況,可以用最適合的方式去培育他們。

2013年7月2日 星期二

冷眼旁觀小風波

在面書上有很多媽媽群組,我都有參加好幾個,大家交流一下育兒心得,偶爾吐吐苦水,不失為一個減壓的好地方。

在大家未有見面之前,一切都是愉快的。當大家開始相約出來聚會,攪生日會之類,磨擦漸漸多了。在網上,大家都是以文字圖像來交流,見面就變了一個多方面的接觸層面。大家會憑外表、言談、行為等等去判斷別人。有些看似投緣的就會常常見面,有些慢熱或未能投入其中的就慢慢淡出,返回網上尋找快樂去。

有一個群組,菲菲已經參加了三年。當中有些人見面多了,就會成為朋友。既然是朋友嘛,就會欣賞她的優點,包容她的缺點。難得大家沒有利益衝突,又有共同話題,這種友誼最清純不過。

最近,看到網上的留言有點古怪,出現很多單單打打,有些似有隱喻,有些帶有諷刺,感到有一點點暗湧。字裡行間,隱約見到有某幾位媽媽在攻擊某些人 (我是其中一個),而其中一位被攻擊的,就會群組的始創人。感覺怪怪的,就打電話去問候一下…

原來,有一班較為資深的會員,不喜歡谷主,認為她待人接物不夠友善,留言不夠禮貌,出來聚會時不會主動向別人示好等等,還說︰「如果你呢D性格再唔改變,出年大家就冇朋友做!」。嘩!好一句「冇朋友做」,是恐嚇還是威脅呢?每個人的性格都不同,大家都認識了三年,她為人沒有機心,只是不懂表達和不夠主動,這樣有錯嗎?說出這樣的話,還認為自己是大義凜然,為朋友設想。沒錯,如朋友有改善空間,在旁提點是為朋友好,但出到「冇朋友做」呢句,我估冇幾多人可以接受到。

最終,谷主自己退了組,把一干人等從朋友列中剔走了。

其實佢地係「為朋友好」,定係有強迫症呢?為何一定要別人改變?而自己不可以多一些包容呢?這班媽媽,我全部都認識,她們除了針對谷主之外,同時在針對我。但是到現在,我仍不知道她們對我有甚麼不滿。不過算啦,反正我都唔會再同佢地見面,佢地鐘意點就點啦。

至於谷主,我是同情她的。她建立了一個平台,這幾年來會員不斷增加,又攪了幾次大型活動,甚至有傳媒訪問過,全部都是出心出力,沒有收過一分一毫。但是當組織日益壯大,就會有是非。可能佢地覺得谷主不夠勁,只是師奶仔一名,沒有能力主持大局,所以用「群眾力量」去迫她吧。

估不到,網上世界,都有權力鬥爭。