2012年6月30日 星期六

讀書為咩?

無論你讀書係為左咩都好,請緊記,讀書係為左自己。

有D人讀書係為左爭取到一張入場劵,令自己在職場起步比人高,升得比人快。有D人讀書係為左增加自己的學問知識,追求學術上的突破。有D人讀書係為左陶冶性情,滿足自己的心靈。有D人讀書係為左興趣,學咩都津津有味。以上咩原因都好,只要係為左自己,對自己某一方面有所得益,已經係一件好事。

有D人為左唔想出黎做野,所以不停讀書,其實係逃避現實。有D人為左令父母開心或不想父母日哦夜哦,父母叫佢讀咩就讀咩,其實係失去自我。有D人為左打發時間而讀書,其實係浪費緊自己的人生。

世上每一件事都不存在「好」與「壞」,好壞只在乎人們抱著咩原因咩心態去做每一件事。好多人都抱怨現在教育制度不濟,其實有冇人諗過係家庭都有責任呢?家庭的責任不是去鞭策下一代讀好D書,而係有冇為讀書呢件事上,為佢地設立一個咩定位呢?只要小朋友對讀書有一個自己很接受而清晰的定位,既可增加小朋友對讀書的動力,亦可減少與小朋友之間的磨擦。

在為小朋友設立定位之前,父母們請放下自己,真心為小朋友設想。不要刻意引導小朋友成為自己的傀儡,把自己的期望硬套在小朋友身上,這樣只會有反效果。

2012年6月29日 星期五

讓坐

有朋友在FB上 post 左呢段野出黎,睇左少少已經無辦法再睇落去,實在令人難以接受。


原來而家d年青人認為讓座比大肚婆係一件「父權社會」的事!唔好意思,菲菲真係好想爆粗,以宣洩一下對呢班下一代的不滿。D!你講乜L野呀!乜「父權社會」係咁解咩?唔識就讀多D書,豐富左自己的知識先至去講呢D咁嚴肅既字眼啦!

呢D問題究竟係學校唔教丫?定係亞媽冇教丫?定係青年人反叛,總知成年人講乜都認為係一種欺壓?菲菲真係唔明白而家d人諗咩。點解要讓坐比有需要人士?正正就係因為佢地「有需要」丫嘛!同邊個上車先有咩關係呀?如果佢上車先過你,就不存在「讓坐」呢回事啦。究竟佢地知唔知自己講緊咩呀?呢班不知所謂又話大肚就唔好搭港鐵,正如哮喘就唔好入吸煙室一樣。呢d係咩比喻呀?歪理連篇!

記得菲菲大肚時,上港鐵都冇 expect 有人讓坐,因為已習慣左年青人的自私和冷漠。不過最氣結係試過有打扮入時的女生同大肚的菲菲爭位坐。我大住個肚當然唔夠佢爭,佢搶位時仲要撞開我,之後佢就一個屁股「得」落去,即時低頭玩電話,完全唔認為有問題。而家社會風氣就係咁,我地認為呢d係自私的行為咩?佢地認為我地係用「父權社會」去壓迫佢地喎,吹漲!

真係想問下教通識科的老師,學生們在各種媒體上學識左一大堆批判性字眼,句句鏗鏘,看似好有料到,原來佢地係不求甚解ga?悲哀!

讓坐比有需要人士,不存在邊個「大哂」的問題,係同理心的問題,係沒有設身處地為別人著想的問題。當然大家都有比錢,你有權不讓坐,只要你日後大肚、年老、殘障時千萬不要 expect 別人會讓坐比你就得勒。


2012年6月28日 星期四

Cold Call 皇后

菲菲在2001年9月入行做保險,點解咁記得?因為我仲上緊 training 的階段時發生911事件,實在令人難以忘記。當年點解入行?因為我係做開中層管理的,但當時中層cut人cut得好利害,一年之內我經歷左三次裁員,響冇其他出路之下就走左去做保險。

諗返起當時都好勇,九十年代尾我離港遊學玩左一段時間,到2000年先至返香港工作。返到香港時好多舊友既 contact 都冇哂,即係我係響冇 warm market 的情況下踏足保險界的。既然冇warm market,唯有做 cold call 啦。當中包括搵 call list 打,上工商大廈甚至住宅逐家逐戶拍門,跟公司 van 仔周街拉客上車,去人多地方做問卷等等,真係咩方法都試。

講起 call list,其實係老細唔知響邊度搵返黎的一堆電話加個名,佢地係乜水我地完全唔知道。一般每個星期都會有一晚安排新仔玩 cold call 比賽。賽前老細叫我地預測自己一小時內打到幾多個 call 同埋 make 到幾多個 appointment。第一次玩比賽時,我答︰「打20個call,約到2個 appointment啦。」,其實答果陣都冇咩信心,老細問到唔通話打唔到咩!一小時的比賽過後,我好似打左四十幾個 call,約到5個 appointment,攪到全場嘩然,因為大部份都係約唔到。老細都係好穩陣的,話d客唔放飛機先至當係約實。哈哈!又咁好彩5個都見到面,仲簽左2張細單添!

做公司 van 仔拉客時,一日最少響街8粒鐘,見人就埋去講,訓練左摩打口同面皮厚。公司為左獎勵一班勇於抓爛塊面企街既小 agent,每日出車都有三個獎︰最快開單,最高C數獎 (即係最大張單),同埋最多 case 獎。菲菲試過一日內響街抓左3張單,攞哂三筆獎金,當中最高C數係講緊月供二千幾蚊的儲蓄保單。好多新入行 agent 一個月都未必有三張單,當時菲菲的紀錄成為公司的佳話。

好快菲菲亦可以招聘自己的agent下屬,在同期入職的同事們中,我亦係最快有自己下屬,下屬數目都比別人多。一般情況,保險呢行要招攬下屬都係向熟人入手,菲菲響冇「熟人」既情況底下又點搵下屬呢?其實呢d下屬都係 cold call 返黎的!當時有好多職業展覽,菲菲就去會場搵下有冇 smart 既後生仔女,一見有就上前派卡片遊說佢地入職。真係咩事都有可能,我就係靠全 cold call 建立左自己的團隊。可能佢地覺得我夠 guts,所以願意在完全冇互相的情況下膽粗粗跟我入行。


做左保險公司唔夠一年,菲菲就轉左去 broker firm 度做 Training,係唔係好匪夷所思呢!一個在行內做唔夠一年既人,竟然可以去教人?因為 broker firm 的老細知道菲菲有超強做新客生意的能力,所以叫我去幫佢地公司手教一眾新人點做 cold market。

相信憑以上的例子,菲菲自稱 Cold Call 皇后都不為過吧!哈哈!

2012年6月27日 星期三

失蹤人口

菲菲今日約了榮升 Director of GI 的朋友,因為有些基金的事要處理 (佢以前係做保險和基金的)。唔知係貴為掌門人所以工作繁忙丫?定係佢既千年惡習未改呢?打左成朝電話,包括佢所有手提同公司,都搵佢唔到,仲要係冇得留言,打左幾次之後,仲熄埋電話!咁我點簽文件呀?真係比佢激到紮紮跳!

以前當佢仲係我下屬時,已經話左佢N次,出得黎撈,個電話必須24小時 on call,仲必定要有留言。做保險呢行尤其重要,d 客搵親你好多時都係發生左事,極需要人幫忙。個電話打左成朝都搵唔到人,仲竟然熄埋機,你話令客人幾失望呢!仲有今日我係約左佢,都唔聽電話,即係爽約。呢條同死罪冇咩大分別。

唉!成四十歲人唔該生性啦!做野冇交帶成咁,我已經唔係佢亞頭,冇得再咁話佢。為左我既安心起見,三個小朋友既所有保險我都搵左另一位 agent 買,起碼佢幾多點都會接電話,有幾次我個仔晚上入急症都 call 到佢幫手,個心都定d。

仲以為後生仔先至會咁冇責任心,估唔到跑左十幾年江湖既老鬼都係咁…

2012年6月26日 星期二

難過

剛知道友人決定離婚,好難過!

上年佢生左對孖女,在奶奶的壓力下今年終於追到個男嬰。三個小朋友都咁細,佢都決定離婚,我估佢響呢個家一定受左唔少既壓力。清官難審家庭事,究竟有咩咁解決唔到我真係唔知道,只係希望佢同三位小朋友都安好。

我自己都有三個小朋友,好體會到做媽媽係幾咁吃力。孖女才剛滿一歲,生活上仍好需要貼身照顧,如果佢選擇分開,要獨力湊大三個小朋友 (現在仲未知小朋友跟邊一方) 的話,一定需要人協助。雖然我幫唔到D咩,只希望佢地往後的日子真正得到幸福。

奇怪的學生

在FB上見到有朋友話上堂好悶想訓覺,菲菲覺得好奇怪,出左黎做野自己比錢報 course,唔係自己有興趣先至上咩?點解上堂會想訓覺既?老師真係悶得咁緊要?

老公每星期都會教三班風水或八字,小班教學唔會多過十個人。一般情況咁少人上堂,可以學得更加多,因為老師有時間解決同學的個別進度問題。同埋學生人數少,大家自然變得好熟落,放學後會一齊食宵夜,學習順道聯誼。世事就係咁奇,依然係有某位學生十次有八次上堂都訓著覺。如果真係咁悶,上完初班就唔會上中班啦。但係佢又繼續黎上堂喎,真係令人費解。

以前返學就話必定要坐響課室啫,出左社會做野,學習呢d興趣班係想學先至會報,點解都可以堂堂訓覺呢?有冇人可以解答我呢個疑團呀?

執手尾

看見 karol 一篇文章講關於辦公室內的人沒有手尾,不洗杯,食完野唔掉左個盒之類,引發起菲菲對「家教」呢個問題的很多想法。本想在文中留言,但太長篇了,都係響度講啦。karol,希望你不要介意!

會收拾好自己用完的物品,看似是一件好平常的事,沒有手尾就是不知所謂的行為。在評論行為之前,先要看看背後的原因。

為什麼我們會懂得收拾好自己的東西呢?原因好簡單,在家中已經習慣要自己的事自己要攪掂,亞媽唔係你工人,唔會幫你做。如果家中有兄弟姊妹,一個亞媽又點執得哂成屋人手尾?所以必需要教識仔女自動自覺,咁頭家先至唔會變左垃圾站。又或者,有d人係懶或不在意,成日都冇手尾的,但係經媽媽用各種方式的引導、身教、勸勉底下,都會知道自己要執手尾,呢d人偶有失手,但係每當見到自己的「手尾」時都會記得攪返掂。

至於點解有人係會冇手尾呢?一係佢亞媽服侍周到,返到屋企可以四肢殘廢,飯來張口衣來伸手,食完飯唔需要洗碗,家務唔需要做,呢d係亞媽既「份內事」。點解亞媽會服侍周到呢?其一係亞媽唔想仔女辛苦,想佢地返到屋企休息。呢d慈母真係… 唉!一係認為仔女做極都唔合佢心水,索性唔駛佢地做,費事勞氣。呢d過於執著的媽媽又係幫唔到仔女。

最後一種係軟皮蛇,無論亞媽出咩招數都係決定唔做,呢d人冇得救。

齋講好抽象的,舉例啦。

菲菲雖然有兩個外傭,但係小朋友都必須執返自己的手尾。大仔未夠四歲,幫手開飯、食完飯收好自己個碗同椅子、做完功課要收拾自己的書包、臨訓要執好玩具之類。至於未夠兩歲既細仔要幫手掉尿片、執玩具、收拾自己餐具和椅子、沖完涼自己把衣服放進污衣籃等等。未有孩子的朋友可能覺得冇乜特別,有孩子的父母你們就會知係咩事。而家有幾多個小朋友識照顧自己?以上種種絕對係小朋友能力範圍以內的事,但很多父母都不讓小朋友做。久而久之,他們就缺乏了這方面的責任感,以為到處都有人執佢手尾。到他們出來社會做事,就會變成令人不耐煩的「公主王子」。

個人責任感是培養出來的,不單是個別行為,亦是一種價值觀。懂得照顧自己的人,背後就是有一個好媽媽。這些事學校沒有時間去教,做媽媽的真是責無旁貸,孩子的生活習慣,絕對是媽媽培養出來的。


2012年6月25日 星期一

隱藏的準則

菲菲大仔讀既幼稚園係有學劵,冇一條龍,不過係基督教團體轄下的幼稚園,見往績都估到大概會派去邊幾間小學。菲菲一直諗,究竟響大抽獎呢個遊戲,小學係點揀幼稚園生呢?如果只係睇佢地響幼稚園的成績,又似乎唔係唯一的準則。今日一通電話,「叮」左我個腦一野。

大仔的老師打黎,佢記得大仔有參加過普通話比賽,問我詳情同埋成績。原來學校係會將呢D野紀錄在案的。大仔的學校冇普通話讀,為左令佢上小學時不至於聽都唔識聽,就比佢學普通話。一般補習學校都會為學生報比賽,我本來係抱住不防一試既心態比大仔去玩下,原來學校係認真對待呢D比賽結果的!

另外,菲菲有友人大女今年考小學,好不幸地派左去間「國際學校」,即係有好多強國同南亞同學的那一種,響大抽獎根本唔會有人揀的。友人嘗試為個女叩門,但係佢冇幫個女報乜班物班,又冇比賽,又無做下小義工之類,想整本叩門 portfolio 都冇野整。最後都係叩唔成,要接受現實。

唔知我有冇猜錯啦,響云云幼稚園生揀學生,學校成績其實都唔係好高參考價值。因為老師比分一定鬆手,務求令自己的學生可以入頭三志願。既然個個都咁「標青」,咁小學又憑咩去揀學生呢?我估課外活動、比賽之類既野係有幫助的。如果唔係,老師都唔會專登問詳情啦。

有錢去報課外活動就話啫,冇錢攪咁多野果D家庭未要走上惡性循環的道路?貧窮係唔係咁樣世襲出黎 ga?呢種收生準則係唔係變相歧視基層?等佢地既下一代都冇辦法逃離呢個老鼠圈?呢度有冇教肓界人士可以指正嗎?

寶刀未老

又係菲菲自己讚自己既時間勒!哈哈哈!真係未出發先興奮!

今日出席左個盛會,菲菲在懷有孻女時上網識左一班舊年六月預產的媽媽,大家在FB上開左個群組日講夜講。今日我地為呢班BB攪左個一歲PARTY,只係半數人出席,都40圍!好多人結婚都冇咁大場面啦,所以菲菲認為係一個盛會!

菲菲係群組內最年長仲要係生左三個小朋友的媽媽,但係菲菲個樣只係鬥唔過D九十後媽媽,有部份八十後睇上去仲比我年長。呵呵呵~~~~ 寶刀未老耶~~~

女人就係咁無聊,但係我好開心!

2012年6月24日 星期日

工時太長

香港人工時太長,導致精神壓太大,缺乏私人社交生活,減少和家人見面等等。如果我們認為一日工作十小時以上是「工時太長」的話,為什麼小朋友在每天放學後都要有不同的課外活動、興趣班、補習班?之後仲要溫書做功課,幾樣野加埋唔只十粒鐘喎!唔通一個小朋友應付壓力既能耐比成人強?定係小朋友唔需要社交生活?更加唔需要和家人相處?

為了自己的孩子起跑線比別人前,就要孩子們痛下苦功,幾歲人仔就要佢地深深體會咩叫「吃得苦中苦,方為人上人」。從小要他們適應急速的生活節奏、密密麻麻的時間表和有限的休息時間。其實有幾多個小朋友有咁好耐力,日操夜操都唔會累呢?定係唔敢累呢?密不透風的時間表,令人沒有喘息的餘地,亦沒有思考的空間。每天要盲目完成不同的目標,完成左之後係為咩呢?我估未必個個小朋友都答得出。


大家都知咩叫「己所不欲,勿施於人」,點解自己唔想工時太長,偏偏自己個小朋友的工時比自己仲長?好弔詭的邏輯!

2012年6月23日 星期六

傷港人

懷有第二胎的友人,今日自己推住架BB車搭港鐵由旺角去油麻地,途中兩次搭升降機都被強國人打尖、推撞和口角。第一次D強國人話︰「都唔明D香港人,成日都要人讓!」第二位強國人話︰「大家都係香港人啫,駛唔駛咁呀?」友人回佢一句︰「有身份證就可以撞人呀?我老師唔係咁教喎!」

呢D事日日都發生,不過觀乎今日友人的遭遇,菲菲對強國人多左瞭解。原來佢地覺得「禮讓」係香港人多餘,大肚婆又點呀?撞你未撞你 lor,我地老師冇教過要禮讓喎!執輸行頭慘過敗家呀!邊有人排隊咁on居ga?我都有身份證ga,係「傷港人」黎ga,唔好諗住歧視我呀!

有身份證又點啫,連大肚婆都推既仲算係人咩?BTW,菲菲忘了強國人慣了草菅人命,連自己骨肉都唔放過,又點會理人地既骨肉丫?國內做人流,就好似我地感冒去睇醫生咁,係一件極度平常既事,我老公其中一個客人落左至少六個,真係令人難以接受!

本來菲菲對強國人唔係咁偏激的,自從做左媽媽之後常常身受其害,不其然對佢地冇好感。搶生仔床位、尿片、奶粉、幼稚園學位、醫療等等問題,菲菲全部領教過,呢D都係基本民生既野,但係土生土長既香港人都冇保障要同雙非B爭,又點會唔勞氣呢?

另有友人話香港出生率低,所以要比雙非黎生仔。聽罷真係想檸甩佢個頭。佢未結婚生仔就梗係口響啦,真係針唔吉到肉唔知痛呀。而家生仔唔係錢既問題,係有錢都解決唔到既問題,叫人點敢生?菲菲真係試過有一次,行勻旺角既藥房都買唔到一罐亞女食開既奶粉呀,唔通叫未夠一歲既B女唔好飲奶?同大仔考幼稚園,處處都係傷港人,最少人爭果間都要15收1,菲菲同個仔報左10間,頭9間都唔收,收到第9封「侯補通知書」時真係喊左出黎。我已經冇考名校,都咁艱難先至有一個幼稚園學位,而家越黎越多雙非學童,又冇新幼稚園,就黎連3歲小朋友就要面對失學問題勒。

2012年6月22日 星期五

有名冇實

朋友做了十多年 IFA (Independent Financial Advisor),最近他轉了公司,因為新公司讓他掌管整個 GI Department (General Insurance),成為了 Director of GI。菲菲連聲恭喜,記得十年前佢係我下屬,現在榮升掌門人,當然值得慶賀!

恭喜之聲未停,已聽見他唉聲連連。原來他這個 Director 係一毫子底薪都冇,只係食成個部門總營業額的某個百份比。再問之下,公司才成立了一年多,即係冇咩生意啦,真係恭喜唔落。

你話幾諷刺,拎張卡片出黎,人地見到係 Director 以為你好掂,點知又係搵朝唔得晚既一份工。雖說話 GI 生意穩定,到時就好似收租咁收,不過公司響發展既階段都唔出返少少底薪,用「前景」去 sell 個員工返黎打江山,個老細都好好心地喎。話分兩頭,我朋友撈左十幾年都係原地踏步,久唔久就話有公司睇得起佢叫佢過檔云云,個 Title 一次勁過一次,唔清楚內情真係以為佢平步青雲。原來係唔駛出糧的,我做老細都得啦,只要 sell 十件八件呢 D 「高層」返黎,一定唔憂冇生意。次次同人地打完江山,人地就空降一件皇親國戚黎迫佢走,希望今次會有例外啦。(雖然好渺茫…)

2012年6月21日 星期四

一生一世 (二)

點先至可以一生一世,菲菲不敢下定論,要請教滿頭白髮仍然手拖手的老夫老妻。不過以下兩則有關單親家庭的真人真事,會讓大家想想,點解婚姻不能長久。

(1)
K小姐於單親家庭長大,爸爸據說是江湖人物,她是跟媽媽長大的,正確點來說是跟契媽一家長大的。K小姐的媽媽有兩個孩子,K小姐和她的哥哥。她的父母為什麼分開已無從稽考,因為K小姐的媽媽從不說實話。K小姐還小的時候,她的媽媽就把她交托給朋友照顧,就是K小姐的契媽。而K小姐的媽媽就繼續尋找可以依靠的男人,為自己的「終身幸福」而努力。據說K小姐的媽媽不喜歡K小姐,常常虐打她,所以母女關係惡劣。

K小姐11歲開始拍拖,無心向學,未夠16歲已經墮過幾次胎。在她17歲那年認識了一名二十出頭的乖仔,她又再度懷孕。那男的真的很疼她,決定和她結婚。怎料在婚前不足一週時,K小姐在產前檢查時發現胎兒不正常,需要終止懷孕。男家知道後極力反對他們結婚,這事連K小姐久違了的媽媽也知道了,亦都出面反對。但是雙方反對的理由是南轅北轍的。男家認為K小姐不是好女孩,更質疑她的BB是否別人的孩子,反正現在BB都不能留了,就不要結婚好了。而K媽媽則認為她的未婚夫沒有家底,不能提供良好生活給K小姐,將來她必定後悔,所以極力反對。

年青人都是反叛的,老是喜歡衝破障礙來證明自己,所以他們不理父母的反對,堅持繼續結婚。K小姐當時只有17歲,結婚必須有家長簽名。K媽媽都願意簽名,不過條件就是要K小姐給她幾萬元。最終這對小情人於婚姻註冊處成為了合法夫妻,K小姐亦搬入男家,和老公在小房間裡開始了夫妻生活。不謀而合,K小姐的奶奶也是離了婚,但她的老爺間中都會來探望子女。

K小姐19歲時再度懷孕,這次終於成功誕下一名可愛女兒。但是在懷孕期間,K小姐和男家發生很多磨擦,女兒出生後磨擦加劇了。K小姐常常想和老公和女兒搬離蝸居,但她的老公收入只夠一家三口生活,要搬家談可容易?K媽媽又再慫恿K小姐離開這個家去找一個可以照顧她的男人,最後K小姐竟然在女兒還未夠三個月時拋夫棄女一走了之。

K小姐的所作所為,在菲菲的角度來說是極度不負責任的行為。至於K媽媽所做的一切,比K小姐更為自私可恥。

(2)
M小姐自幼喪父,和媽媽、外公外婆一起住。外公外婆是傳統的重男輕女,對於家中的一對孤兒寡婦並不是很歡迎。後來母女終於申請到公屋,離開歧視的眼光過新生活去。M媽媽寡母婆守女,對女兒管教甚嚴,更加不許她胡亂結交男友。

M小姐差不多二十歲時常常瞞著媽媽去結交男友,她想快些結婚,這樣就可以離開母親的操控,呼吸自由的空氣。在她二十歲時決定和一名純樸的年青人結婚,本來她想搬出去建立自己的家,但遭M媽媽極力反對。因為M媽媽已經沒有了老公,女兒就是她終身依靠,又豈容她離開自已?最後,M小姐婚後,她的老公搬進了M小姐的家,好讓M小姐盡一盡孝道繼續照顧母親。之後不久,M小姐誕下了兒子,過了幾年一家四口的生活。

M小姐一直想脫離母親的操控,但是她彷彿是孫悟空戴上了金剛圈一樣,她越想走,她的媽媽就綁得越緊。而結婚本來是M小姐想離開母親的手段,最後卻是多了兩個人 (老公和兒子) 令她的生活更多制肘,壓力快要爆煲了。當她的兒子還未上幼稚園時,她結識了一位有婦之夫,偷偷地展開了四角關係。

想要擺脫困局嗎?偏偏越攪越糊塗。紙是包不住火的,M小姐的老公終於發現了她背夫偷漢的事,M小姐被揭發了之後索性發難,大數老公沒有志氣、媽媽管得太苛刻之類。這麼一鬧,家是破了 (老公決定離婚),還幾乎攪到人亡 (M媽媽受不住打擊企圖自殺,幸好最後沒事)。離婚之後,M小姐知道母親是擺脫不了,M媽媽亦反對M小姐再婚,要她下半世好好照顧兒子,盡一個母親的責任。


********

故事講完了,大家有甚麼想法呢?


單憑以上兩則故事,是不能以偏蓋全地討論一些社會問題。但至少從這兩個故事可以看到一個共通點,就是︰「操控別人的生命不等於愛」。K媽媽和M媽媽用不同的手段去控制自己的女兒,很不幸地K小姐和M小姐的婚姻都失敗了,還成為了單親媽媽。她們的故事會延續到下一代嗎?




********


下次,菲菲再分享其他男士導致離婚的真人真事。

2012年6月20日 星期三

一生一世 (一)

菲菲是遲婚的一群,幸好我是遲婚。經歷讓我瞭解到甚麼是婚姻,知道該找甚麼伴侶才適合結婚,是對婚姻的尊重,亦是對我們下一代的尊重。點解講到咁嚴肅?婚姻唔係一場 SHOW,唔係一個「童話故事」,更加唔係一個趕搭尾班車的活動。要婚姻維持一生一世,先要知道對方同你有幾多相同的觀念,又有幾多不同的睇法,究竟有沒有方法去達致共識?如果以上的問題都答不上,建議先停一停,諗一諗,不要因一時衝動而結婚,最後只會令離婚率和單親家庭的問題惡化。菲菲又貢獻自己的故事比大家借鏡。

在一般人認為是適婚年齡時的菲菲,剛好遇上911、沙士、金融海嘯的情況,最悲痛的莫過於菲菲和當時的男友就在911之前買了樓,一當業主即時成了負資產。加上種種經濟環境,我們的生活都捉襟見肘,當然沒有錢結婚。

在經濟低迷的情況,菲菲和男友各自用不同的方式求存。在2000年,菲菲好好歹歹都是一個中層管理,但是經濟不景氣令我被裁了幾次!再係咁落去真係唔掂,於是菲菲放下身段,由小SALES做起,起碼SALES係一個較難被裁的職位。初初做時收入不穩定,個個月唔食都要供樓,家住元朗要到市區返工,好一個弱勢社群的寫照!哈哈!不過菲菲真係有樂觀底,冇生意之嘛,去搵LOR!未夠單咋?做到有單為止LOR!當時真係要一日做十幾粒鐘,先至有本事供到樓,自己既洗費真係慳得就慳。我相信,總會雨過天青的。

菲菲的男友,是普通打工仔一名,佢對菲菲如此「上進」的做法係抱否定的態度。每晚菲菲放工回家已經冇哂電,都仲要應付男友的諸多批評。佢想我搵份有穩定收入既工,做個「安份守己」既人。(乜我好唔安守本份咩?講到好似做雞咁既?)。以當時的情況,菲菲要找一份普通的工作實在不易。因為菲菲的工作履歷都幾見得下人,小公司唔敢請 (怕我做唔長),大公司冇得請 (中層位已經 CUT 哂,點請?),真係好無辦法之下先至去做SALES,好在都有得做,響當時的環境仲想點?佢份人工只夠交水電煤,都唔諗下如果我都只係打份幾千蚊既工會有咩下場。

響佢既世界,女人唔需要叻。唔緊要,如果佢夠叻可以養得起頭家,我唔介意蠢。好可惜佢唔係,原來佢只係一名不思進取既小男人,為左逃避經濟壓力,放工後除左打機就咩都唔做。菲菲唔介意返工十幾粒鐘之後仲要做家務,只係希望返到屋企會有人留返餐飯比我食,但係從來都未試過。佢放工後會返自己媽媽家食飯,食完飯就返我們家打機直至訓覺。佢對我工作有幾辛苦係不聞不問,只會埋怨我家務做得不好,星期日不早些起身煮早餐給他吃,去他媽媽食飯時不洗埋廚房等等。我相信作為一個家庭經濟支柱受到如此對待,唔會有幾多個會白頭到老。

響呢幾年患難生活,果然見到真情。我深深體會到呢位男友唔可能同我過埋下半世,因為大家響價值觀、人生觀同埋處理逆境的態度都係完全相反。於是,在經濟好轉之後,菲菲決定離開這位男友。當時菲菲都好痛心,因為已經花了最寶貴的八年光陰給一個錯誤的人。記得在2001年我們買樓時,係打算結婚的。點解我想結婚?因為年紀唔細,到左適婚年齡,所以就諗住同當時的男友結婚。至於大家有沒有共同家庭觀的問題,根本沒有考慮過。到經歷左咁多野之後,先至明白要搵一個合適既人過下半世,係一件好重要的事,所以而家有咁多女士選擇單身。

講左咁耐,只不過係引子。菲菲想分享幾位朋友的單親家長故事,在講她們的故事之前,請大家先懂得尊重婚姻,尊重下一代。

她們的故事,下回分解。

水可載舟,亦可覆舟

早年老公初初出黎自立門戶做風水師時,招收左一批舊友做學生,其中一位叫 L君。L君係一個好鐘意交朋結友既人,咩人咩話題都吹得一餐,仲有本事自己棟篤笑咁講幾粒鐘唔駛抖氣,未見人先聽見佢把聲。L君家境中上,成三十幾四十歲人都冇正真打過一份工,「正職」係陪亞媽飲茶食飯玩股票,幾十年都係遊戲人生咁過。唔知點解,菲菲對冇打過工或做過生意既人存有偏見,認為佢地對社會冇貢獻之餘,對自己既人生都冇咩貢獻,彷彿係一個未長大的細路一樣。

L君做咩玩咩都喜歡聯群結黨,當年來學風水八字時,都帶過不少朋友來當學生,和介紹了不少風水和八字客戶給我老公。老公好器重呢位學生,因為初初做全職風水師,必須靠相熟朋友介紹才會有生意,L君正好幫上了很大的忙。

L君好鐘意成為眾人目光焦點,常常語出驚人,又喜歡作弄人,仲會帶動他的粉絲去集體欺凌他不喜歡的人,尤其喜歡欺負不去當他粉絲的人。好一個「順我者昌,逆我者亡」的風範呀!單憑呢點,菲菲對 L君一直存有戒心。之前有同老公提起過,叫他提防,但老公要靠他搵食,冇理由走去得罪佢,仲會處處維護佢。呢D係人之常情,菲菲理解,但並不能完全認同。

學風水八字不是一門簡單的學問,老套D講句真係要有返多少慧根先至學到。L君人是聰明的,學得也很快,很快就成為得意門生,我老公仲成日帶住佢周圍去睇風水,「師徒」二人如魚得水,樂也融融。

但是兩年過後,問題就出現了。L君帶來的學生大多數都不能完成基本課程,一些人因有得玩就缺課,缺一兩堂就追不上進度,因而放棄了。另一些人本著「玩玩下」的態度來上課,毫不認真,漸漸亦追不上。亦有一些人,只為和 L君多個玩樂的場所,就借上課為名,其實在課堂上大講爛GAG,打亂了上課的進度。

我老公作為一位盡責的老師,怎會容許這些事發生?所以就和 L君詳談,希望情況有所改善。之前菲菲提及過 L君係一個未長大的細路,比人話佢掛住玩唔正經上課,L君當然唔高興,於是佢私底下叫他的朋友不要再來上課了,一時之間,老公建立左幾年的學生流失了接近七成,好大的影響呀!仲有,L君介紹過來的客戶,全部都流失了。

之前老公器重佢,除左係佢聰明之外,亦都因為佢為公司帶來不少生意,是不能得罪的「老細」。但當 L君覺得呢度唔好玩的時候,就會帶哂成班人走,公司曾經一度陷入困境。老公曾經為呢件事唔開心左好耐,幾經辛苦終於可以再建立新的學生和客戶,不過吸取左呢次教訓之後,佢明白不可以將所有雞蛋放在一個藍子的道理,不會讓任何一個學生「坐大」,以免歷史重演。

我老公用左2年去上左寶貴一課,明白到養虎為患是甚麼道理。雖然教訓是慘痛左D,總好過白交學費咩都領悟唔到。

最近,我和老公在宗教上的師傅剛收了一位「高徒」,不論性格、背景、行為等等和 L君幾乎完全一樣!更不謀而合的是,那位「高徒」為師傅帶來不少新弟子,所以師傅對他愛護有加。「高徒」囂張的程度不比 L君遜色,我和老公看在眼裡,彷彿幾年前的故事又在重演一樣。

老公終於明白當年菲菲的心情,當時菲菲冒死勸諫卻踫了一鼻子灰,如今老公想提醒師傅但卻無從入手。算吧,我好明白而家同師傅講咩都唔會有用,因為「高徒」現在是最有貢獻的人物,加上得罪「高徒」等同自討苦吃,我都鼓勵老公不要多事。我們只會在旁扶持,希望到「高徒」原形畢露之時,師傅仍有我們這些忠心弟子為他分憂。

鬥爛GAG

頭先同老公在廚房,老公看見菲菲後面的牆壁有隻很大的「小強」在慢步。呢隻小強已經在家出沒過幾次,但係次次都比佢走甩。今次老公眼明手快,叫我行開即時解決左佢。

菲菲驚魂未定,老公就話︰「見左佢幾次,終於解決左!」
我︰「你又知係同一隻?」
老公︰「我認得佢丫嘛!」(咁寸?)

我︰「係咩?咁佢叫咩名呀?」(哈哈!睇你點答!)




老公︰「樓下賣魚佬你夠認得佢啦,你知唔知佢叫咩名丫?」(菲菲唔識駁落去,ROUND 1 老公勝)

好無聊,不過係我們的生活情趣。

2012年6月19日 星期二

心中光明

菲菲自小患有視網膜色素退化,暫時醫學界中的一個不治之症。患者既視網膜會不斷退化直至失明。一個好恐怖的病,不過已經伴隨菲菲幾十年了,我都習慣了。你問我怕不怕,我不敢說完全不怕,不過好在呢個係一個慢性病,由100至0係有一段時間的,總算會讓我適應。

當我只有幾歲時就發現有此眼疾,仲要係不治之症,都係一件幾嚇人的事。不過菲菲真係樂觀底,打從小時候已接受自己患病,一般人不會察覺,不過現在視力已大不如前,很多人都知道菲菲睇野唔清楚。噢!我要更正!唔係唔清楚,係唔夠多!點解我咁講?菲菲只有百零度遠視同少少散光,響 focus 呢一部份絕對比大部份人優勝,我可以不載眼鏡照常活動、閱讀、工作等等 (事實上菲菲只有太陽眼鏡,哈哈!)。不過我既視線範圍比一般人少,可能只有九份之一吧。打個比喻,將一般人的視力分成九宮格,菲菲只看到中間的一格,就係咁。

正因為菲菲視線範圍比一般人少,生活上我比別人提高警覺。記得有朋友問我會唔會唔見電話 / 銀包 / 鎖匙之類,怕不怕被人偷野之類?老實講,聽完真係覺得好好笑!正因為我看不多,我D貴重野用完會即時收好,唔會懶型咁一邊食飯一邊 show 電話,通常呢D人先至會唔見電話。Touchwood 我未試過唔見野,因為我心水好清,所有物品用完放左響邊我一定記得。之於偷野,更加無可能,正因為我時時刻刻都會將貴重物品收好,要偷都偷個容易D啦。

菲菲自信係一個觀察力好強的人,不過好多人都唔信,因為佢地視力比我好,以為我睇唔到就判斷唔到。唔好意思,觀察力強唔強,係用心而唔只係用眼。睇到但係分析唔到,即係唔識觀察,我單憑好小既動作、講說話的語氣、場面、人物等等,已經觀眾左好多野出黎。最初老公都唔相信,經過多次佢誤信別人,再由我提出疑點之後,佢先至心服口服,仲以為我有特異功能,哈哈!無計啦,我幾歲開始就面對呢個殘酷的社會,自小就知咩叫人情冷暖 (有部份長輩親戚會以整古我為樂,你話呢D係咩世界?),如何去辨別一個人有咩動機,已經成為菲菲的「眼晴」,眼晴看到的往往不是事實,用心去體會才瞭解得深入。

眼前光明一片當然好,但是讓我再選擇一次,我都會選擇心中光明,看不到的永遠比看得到的多,細心回味,我的人生比很多人都豐盛!


垂死的體驗

休息了一天,今日終於有氣力打字…

愛說話的菲菲老是氣管有問題,我估係食幾多著幾多同講幾多都係整定的,講得太多條氣管就會自動收縮,唔比我講野。除左講唔到野之外,幾乎咩都做唔到,包括拎住個杯飲啖水,都覺得好費力,坐都坐唔到,只可以響張床度休息,都幾似一個垂死的病人。

記得2009年秋天,菲菲氣管收縮得好利害,於是入左院四日。當時去到急症室,分流後醫護人員即時比左張輪椅加氧氣我,已心知不妙,照完X光之後就即時入院。上到病房個心真係寒左一寒,整個病房內既病人清一色係冇活動能力的婆婆!整個病房瀰漫著暗暗沉沉既氣氛,除左醫護人員之外,冇一位病人會講野,包括我在內,因為我連講野都冇氣!

在留院期間,菲菲除左聞氧氣之外,就只有氣管擴張藥物同抗生素,病情冇咩好轉,亦好在冇咩惡化。在我留院的其中一晚,我比人聲嘈醒了。(人聲?唔係掛?班婆婆個個都講唔到野喎…)。菲菲睜眼看看,我張病床既布簾被人拉上了,睇唔到出面發生咩事。因為我都郁唔到,只可以靜靜聽下究竟發生咩事。原來,在我對面床的婆婆過身了,她的家人來看最後一面。

菲菲定一定神之後,就感覺到整個病房的氣壓好低,好像快要打風一樣。我又好奇地四圍望,睇下會唔會見到牛頭馬面或者其他有關既「人物」,點知又咩都見唔到。只係聽到家屬討論婆婆的身後事,佢地既聲線好平靜,我估婆婆都已經病左好一段時間,佢地都有哂心理準備,所以都唔係太哀傷。仲聽到佢地叮囑醫護人員將婆婆手上既玉鐲除返出黎。(當時菲菲心諗,如果我死左,我D仔女夠薑將我老公送比我隻玉鐲除出黎,我實同佢死過…)

經歷左四日垂死體驗之後,我就唔想再因為氣管問題而入院,呢種感覺實在太令人不安,唔係一個養病既好地方。所以在今年年初同現在,菲菲兩次氣管病發,都改為去睇中醫。菲菲有幸認識一位好夾我的醫師,每次去睇都好快藥到病除。不過菲菲自己知道,我個病係唔會根治,只希望不要惡化得太快就心滿意足了。

2012年6月18日 星期一

菲菲爛 GAG - 高EQ

咩叫高EQ?

小朋友唔聽話時唔動怒,仲可以先讓佢地冷靜下來,再慢慢同佢地講道理。

老公發脾氣時唔需要唔開心,細心留意佢嬲緊D咩,再用佢既角度去同佢傾件事。

當我感冒加支氣管炎,病到連坐都冇力,都堅持幫小朋友跟哂D功課先至休息。

原來打字都好耗力氣…

2012年6月16日 星期六

鬼話連篇

菲菲又再挑戰另一條底…線,就係講成長課程。點解菲菲話係一個挑戰呢?因為︰(1)上過或帶領過成長課程既人多得很,(2)菲菲只上過商業式既變種成長課程,我冇真正上過原汁原味既成長課程,但接觸很多上過及帶領過的人,(3)菲菲要講既好多人都唔啱聽…

菲菲響2005年上過一個以商業為主題既體驗式課程,目的幫助生意發展,同時培養營商既種種 soft skills (例如︰毅力、發揮卓越、帶領團隊、溝通能力、營商智慧等等不能盡錄)。我地一樣有 workshop,一樣有上山下水 (我真係徒手爬過懸崖同瀑布),一樣有大型慈善活動,一樣有褒獎同畢業。形式同成長課程差唔多,但係主旨不同。

菲菲上呢個課程,講得最多既係︰卓越、可行性、目標、集中 (focus) 之類既字眼。課程中的三個月雖然辛 (每日訓最多4粒鐘),但不苦。完成課程之後真係對生意同工作有好大得益,菲菲既朋友都覺得我進步左,同埋時不時都會繼續上短期課程去增值自己,學習已成為菲菲既習慣。普遍黎講,無論上過或旁觀既人都對呢個課程持正面態度。因為我地呢班畢業既同學就係最好既證明。

菲菲早在1996接觸成長課程,玩過N咁多次 guest event,身邊亦有不少人讀過 (我老公都係九十年代讀成長課程),但係始終吸引唔到菲菲去試。點解呢?其實九十年代既成長課程都真係幾好,當時導師同 senior 既質素都唔錯,畢左業既學員都擁有積極正面既態度。不過千禧過後就每況愈下,好多 senior 係冇正職,係全職義務去「服務」。講好聽D係付出,難聽D係只可以做「課室英雄」,出左課室就冇左人生意義,即係活在虛幻之中。

本來九十年代菲菲真係有考慮過上成長課程,當時菲菲的好友邀請我去睇佢畢業 (即係我既 guest event 啦),佢話在課程內認識左一位男士,仲開始拍拖添,叫我黎睇下喎。菲菲當年青春少艾,追求者眾,對於呢D賣點不感興趣,不過當係去支持下佢啦。點知佢一畢業出黎果刻,好興奮咁同我講佢接受左個男士既求婚!唔係呀?識左唔夠三個月就結婚?大家瞭解清楚未呀?友人好堅持,話課程中令彼此瞭解好深,所以認定對方係終生伴侶。既然係咁,我除左「恭喜」之外,就係開始忙於為呢位好姊妹籌備婚禮兼做埋伴娘啦。

結婚之後唔夠三個月,男女雙方都從課程既熱情中冷卻下來,走回自己人生原來既路。明顯地,大家係黎自兩個世界既人,有不同既思想同價值觀,照常黎講唔好話結婚,連拍拖撻唔著。過左三個月既「婚姻」生活之後,佢地決定離婚。呢件事令菲菲對成長課程產生左戒心,點解上完一個課程會令人迷失過以前?仲要比幾皮野入去比 senior 插,點計都唔化算喎。所以當時菲菲暫時擱置左呢個諗法。

之後不斷有好多朋友都上成長課程,不斷有人邀請我去睇畢業。睇得越多,就越唔想接觸。個個朋友都係咁既模式,上果陣好興奮,廢寢忘餐都要支持 buddy,有D甚至有工都唔返走去做慈善活動,有好多人無啦啦拍拖結婚之後離婚,又有人辭左份好 pay 但冇乜「意義」既工去做冇 pay 但好有「意義」既 senior,一心諗住幫人點知自己連開飯都成問題。咁既情況,你叫我點敢上呀?

And then,上完課程就滿口鬼話,開口埋口就︰Draw,受害,唔夠付出,不負責任之類,聽得多個人都唔慌正面得去邊。識得少少 NLP 既人都知,呢D字眼少講為妙,少諗為上。越講得多諗得多,個人就會有所偏向,在菲菲既角度,同慢性自毀冇咩分別。

成長課程事實上係有好既一面,對於未成長既人黎講係一個好好既體驗。只要 senior 係真心付出為學員好而唔係想做「課室英雄」的話,呢幾皮野係值回票價的。

2012年6月15日 星期五

幾位港女的故事

同大家分享幾則真人真事︰

(1)
M小姐係我老公既所謂朋友,大家相識但係大家都唔鐘意見到對方。但係大家都有位共同朋友P小姐,所以響P小姐結婚當日,點都會踫面,仲比P小姐安排我地同坐一檯。我老公同M小姐唔係冇計傾果種,係一見面就自不然會開火果種。按我觀察,M小姐為人好有霸氣,常自以為是,別人永遠是錯的。M小姐有結過婚,但係離左婚未就唔知,因為佢老公係突然無聲無息咁執哂D野走,之後再冇出現過。

最近從P小姐口中得知,M小姐早排因醉駕被捕,等緊上庭。M小姐撞到的士,的士司機受左輕傷,M小姐架 BMW 幾乎 TO 左,我估車速都唔慢,好在的士司機只係輕傷,不過人地開唔到工就好頭痕。P小姐好擔心M小姐,怕佢會入獄。菲菲同老公反而希望佢入獄,唔係我地黑心想佢受,係M小姐本人已經去到失控既地步,唔入去坐下,仲會以為自己冇問題,之後佢仲會攪D咩大頭佛出黎真係冇人知。

(2)
C小姐係M小姐個妹,佢老公同M小姐個老公一樣,都係粒聲唔出人間蒸發左。C小姐就用另一種態度繼續生活,就係不斷搵男友。但係佢搵既男友清一色係有婦之夫,同埋喜歡以量取勝。早幾年朋友A先生個仔滿月,我同老公到賀。酒過三巡,C小姐已經飲到貓貓地,走黎我地張檯,然後一屁股坐落我老公大脾上!成張檯既人即時呆左,我當然係嬲到頭頂出煙啦!老公即時彈起身,借尿遁走為上著。

C小姐好似冇事發生咁,竟然走去攪住A先生!呢個情景我相信A先生會畢生難忘!響自己個仔滿月宴,親朋戚友聚首一堂既環境,竟然有個女人公然走黎攪住自己,我唔知佢點同外父外母解話勒。

之後,我老公同A先生都唔敢再聯絡C小姐。

(3)
兩年前我懷住細女果陣老公認識左N小姐,N小姐係佢學生兼且成日有「生意」同我老公傾。但係不尋常既事發生了… 每晚兩、三點左右N小姐就會打電話比我老公「問功課」同「傾生意」。菲菲觀察左一星期之後,發現有問題,就同老公傾。當時老公仲話我敏感,唔相信人之類既說話,真係激到啤啤聲!老公為表清白,仲專登安排左我地食下午茶見面,比我知道佢地係冇野。我當然知我老公冇野啦,但係N小姐有野丫嘛!(點解我老公咁蠢…唉!)一出到黎N小姐完全唔敢望我一眼,菲菲就知係咩事啦。

從老公口中得知,N小姐有一位「男朋友」,但係果位男朋友係另外有位女朋友,得閒會約N小姐出黎打下友誼波 (咁都算係男朋友?)。之後又搭上了一個有婦之夫,仲比我老公無意中響街度撞到佢地手拖手,竟然叫我老公一齊食飯… (天呀!個男的係我老公朋友呀!)

老公生日當晚,我地約左幾位要好的朋友晚飯。當晚N小姐不斷打電話找我老公,話有事要找他。之後老公叫佢黎餐廳搵佢,N小姐一到就滿懷心事咁既樣,仲用我老公支叉去食蛋糕!又係成張檯都為之嘩然!(唉!菲菲又一次響朋友面前丟面了,我忍!)。最後,終於有朋友忍唔住窒N小姐,佢先至悻悻然離去,朋友估計如果當時我不在場,果位N小姐可能捉住我老公有下文都唔定。到左呢一刻,我老公先至醒覺N小姐有問題,之後開始疏遠佢。

仲有好多圍繞繞我老公身邊既女士,不能盡錄。

菲菲都唔知而家D女士點解會係咁,一個女權至上,霸氣十足,一個水性楊花 (唔好意思,真係諗唔到一個更好既形容詞),一個只愛別人老公… 而家變左做咩世界?

同性三分親

雖然呢則係娛樂新聞,但係涉及既範疇真係唔細。宗教同埋同性戀都唔係一個可以開玩笑的話題,希望呢篇文章唔會令呢度收視率不尋常地上升啦。

先唔講宗教,菲菲唔係基督徒,冇資格去評論我不熟悉既宗教。就講同性戀…

呢十幾二十年來,菲菲都認識不少同性戀者,當中有男有女,唔知點解大部份都好 charming,佢地一出現就會深深吸引住菲菲。佢地會悉心打扮,一行出黎彷彿就係一顆明星,好有自信,社交得體,言詞有禮,其實我對同性戀者既印象真係唔錯!佢地都係追求真愛,不過對象係同性,所以一般人對佢地都存有奇異的目光。最近認識的一位女同志,唔單止承認自己既性取向,仲成日帶女友出黎見朋友,菲菲認為係一個好正面既做法。

性取向呢回事,講到尾都係好個人,如果佢真係對異性冇興趣,只喜歡同性,呢D都係佢自己既事,犯不著比異性戀者排斥。除左基督教,其實都有好多宗教反對同性戀,認為係違反天然定律。世上既事,有例就會有例外,有咩咁出奇?同性戀係你情我願之下產生的,反而異性戀仲多一廂情願既事,繼而導致不愉快既結果,究竟邊樣可怕D?其實又點會有定論?

2012年6月14日 星期四

萬千寵愛


菲菲的孻女係一個萬千寵愛在一身既小壞蛋。無論佢幾刁蠻任性都好,無論佢幾惡霸都好,父母都係忍唔住要寵佢。呢個小壞蛋最愛打哥哥 (女仔之家咁暴力,唉!),但係兩個哥哥又好樂意比佢打 (一個願打,兩個願捱,又唉!),孻女究竟係帶住D咩神奇力量黎到呢個世上?

菲菲認識既所有孻女,包括我個妹,都係比較我行我素,有公主病既病徵,彷彿一出世就係一位小天仙下凡。而家到我生左個孻女,先至明白原來孻女係有一種非常人能匹敵既魔力,令人著迷,令人傾倒。睇緊BLOG既你可能覺得呢個BB係一個好普通既BB,只係菲菲教女無方,不過當你真係有一個孻女既時候,你就知味道!哈哈!

情感的禁區

最近菲菲上戲劇班,真係獲益良多。菲菲上既係最基本既戲劇班,學既都係好皮毛既入門知識,不過令菲菲對自己有所反思。

課堂上少不免都要出黎演下戲,導師比菲菲既意見係︰肢體動作不多、表情不多同埋聲線好平穩。簡單D講,即係入唔到戲啦。菲菲既反思又係D咩呢?

以往菲菲初出茅廬學做SALES時,每日都有特訓,就係點同客戶 present。當時我所學既係要保持平穩,面上除左親切既微笑之外唔好有其他表情,講說話時要清楚表達自己,同時要留心客戶既變化,掌握客戶邊個位可以 try closing,同埋最緊要用高EQ去處變不驚。為左達到訓練目的,我地係要錄音同錄影,再比我地自己睇返,先至知有咩可以改善。到最後,菲菲好成功咁做左個表現好得體既 top sales,之後都係用呢一套方法去訓練我既 Sales Team。

到而家,菲菲雖然已金盆洗手,但係習慣左抽離情緒既溝通方式,所以學做戲真係一個大挑戰。最初學黎諗住玩下,不過學學下又真係學到野,同埋響日常生活可以用得返。朋友們眼中既菲菲永遠都好淡定,咩事都唔會驚 (其實我都會淆底,不過一般人唔會發現),最大鑊係大家都捉摸唔到我呢個人,佢地真係要講一句︰估你唔到!久而久之,朋友們都好少搵我,因為我彷彿只係一個掛住笑臉既木頭人,好似冇真正喜怒哀樂既人,讓人感覺好疏離。

學演戲令我學識面對人既情緒,包括自己既情緒。我從來唔會比朋友知自己真正係開心定係唔開心,原來咁係會令朋友卻步。既然已經離開職場,就要將職場既面具放下,讓真正既菲菲可以走出來,就算心情壞透都不要掩飾,做返個有血有肉有感情既人!

2012年6月13日 星期三

警告信

打工仔個個都唔會想收到警告信,同敲起喪鐘冇咩分別。

菲菲既朋友,有好多都會請家傭。家傭一般都係來自印尼或者菲律賓,佢地響家鄉既生活環境同節奏同香港好唔同。唔知點解,好多朋友都喜歡請新來港工作既外傭,因為覺得佢地純品D,唔會咁容易同僱主攪作對。不過經菲菲幾年來既觀察,似乎打錯左個如意算盤。

菲菲偏好已在港工作一段時間既外傭,因為佢地熟悉香港既生活環境,亦都適應左香港急速既生活節奏,唔需要太多時間去磨合。請新來港外傭既朋友,成日抱怨外傭蠢、慢手慢腳、咩都唔識、粗心大意等等,其實請得個未黎過香港打工既人,係唔係需要比返D時間佢去適應呢?唔係一落機就好似女超人咁乜都攪得掂掛?仲有好多初黎步到,佢又唔敢比傭主知佢咩都唔識,唯有膽粗粗做左至算,加上言語不通,好多時爭拗就由此而起。

友人的外傭昨日遺失了八達通,加上之前打爛左好多野,友人決定比封警告信佢,希望佢以後醒醒定定。其實將心比己,自己響工作上成日做錯事比傭主鬧,心中除左唔開心外,必定有一定程度既壓力。作為傭主見自己再犯錯時終於忍唔住出左封警告信,你估會產生咩效果?請記住,好多外傭知識水平有限,處理壓力能力有限,呢封警告信好可能會適得其反。

菲菲每次帶外傭出去,朋友都好羨慕我D工人好幫得手。背後我花左幾多心機同佢地溝通同建立感情佢地又知幾多?我既2個工人,都話我係好老細,唔會郁D就鬧,會當佢地係一家人。我又會教佢地解決問題既方法,做錯事唔會即時鬧,會等佢地驚完之後教佢地下次點做好D。每次都係好小好小既事,不過日積月累,我地慢慢建立左良好關係,佢地都唔想出去再搵工,怕遇到衰僱主。

有位導師講過︰「沒有九流員工,只有九流老細」。呢D道理不但可應用左職場上,亦都可應用在外傭上。各位有請外傭既朋友,共勉之。

2012年6月12日 星期二

不談政治

由幾年前既菲常任務,到久休復出既菲上枝頭,菲菲都決不談政治。原因好簡單,我唔識… 所以冇得講。哈哈!

今日見到呢則評論,令我想起上個月有朋友叫我同老公去睇 Talk Show,之前我都冇問清楚係咩SHOW就應承左,原來係香港人網攪既「媽媽聲愛你」… (菲菲心中真係媽媽聲,即走又好唔比面朋友,唯有頂硬上捱到完場)。雖然菲菲不懂政治,都知道某D人既激進手法係唔 WORK。在場內,好多都係年青人,佢地一聽到台上既人用粗口問侯政界人物時就發出歡呼聲,污染左我一晚。

鬧人有邊個唔識?比你做你又識點做咩?話人地唔得既同時,你又有幾得?

就係呢則︰
http://hk.apple.nextmedia.com/financeestate/art/20120612/16418220?ref=fb

太陽底下無新事

昨日提及在FB有好多唔同群組都鐘意不斷ADD人入去,其中一類既群組好鐘意吸納媽媽入會,然後「發現」有好多平靚正既野可以「團購」。聰明的你一睇就知係咩事啦,菲菲都係睇下就算,之後索性退埋群組冇眼睇。

今日一開FB,就見到有一位媽媽「踢爆」另一位媽媽騙財,惹起一大班媽媽聲討。好俠義的媽媽呀!即時將所有收視率收歸旗下。呢D係咩招數,都唔需要菲菲多講啦,心照!

呢D事真係周而復始,菲菲好細個已經知道「來說是非者,便是是非人」的道理。之前仲攬頭攬頸以好姊妹相稱,一到利益關頭又係反轉豬肚。呢D劇情晚晚響電視劇都見到,點解D晚晚追劇既媽媽們都會毫不察覺呢?真係人生如戲咩?係天真同傻!真正既友誼係D咩?斷估唔係建築在買賣關係掛?好多「受騙」既媽媽都係比較年青,彷彿入世未深,又好似冇咩社會經驗,critical thinking 只係對人唔對事,睇黎響佢地既人生中仲要交好多學費。

開個FB群組做下網上生意,本來就冇咩問題。問題就係賣方扮好人幫手組團買平野,買方又唔諗清楚就隨便埋堆。基本上,一個願打一個願捱係相安無事的。不過有人眼紅別人咁都搵到食,就唱人地騙財,呢D又係咩技倆?

菲菲只係冷眼旁觀,不宜加入戰團。響是非之地,不宜久留。

2012年6月11日 星期一

踢入會

FB上有好多不同類別既群組,今日菲菲響個 list 度退左幾個,點知又有幾個新群組 add 左我。

成日無啦啦比人踢入會,好多時我對果d群組既內容不感興趣,開 group 既人為左人多勢眾就夾硬加左一大堆人入去,大家互不認識都唔緊要,但係大家唔係志趣相投丫嘛,最後未又係一大堆人退出,咁你話幾無謂呢?

尷尬的定位

有讀過市場學的朋友都知道咩叫 Positioning,唔單止商業上要定位,人都要定位。

菲菲有時都覺得好尷尬,因為唔知自己係咩定位。理論上我冇工作留在家湊仔,應該係全職媽媽或家庭主婦。好可惜,一般家庭主婦既十八般武藝我樣樣都唔掂,如果冇左家傭都唔知點算。有時菲菲又會心思思去「協助」老公既工作,咁可以當係半職媽媽啦,但係我既主要工作係老公既 Coach,唔駛返工又冇 routine duties,咁又算唔算係半職呢?

究竟我可以定位自己係個咩媽媽呢?

終於,老公比左個定位我勒,就係…

少奶… 哈哈! (咁既定位,令我飄飄然之餘,仲覺得自己好廢… )

傾下計,都要諗下計

菲菲遲結婚遲生仔,有朋友大我幾年,對孖仔都已經二十歲,我個大仔仲讀緊K1,有排都未甩身。一直都好羨慕早結婚早生仔既朋友,因為正常黎講我應該係捱多幾年就可以甩身。原來,事實並非如此。

世事就係咁得意,往往都係「你睇我好,我睇你好」。我朋友反而後悔太早生仔,當時年少氣盛唔識教仔,亦都唔想教仔。一心諗住兩公婆打份工,湊仔交比工人做,教仔就交比學校做。咁耐以黎佢都好少有真正既親子活動,到近幾年大孖犯事入獄,細孖仲係吊兒郎當,中五又畢唔到業 (而家想讀返都讀唔到,轉左三三四),工作又做唔長,母子之間又溝通唔到,佢先至慨嘆當年冇好好管教對孖仔,先至攪到而家難以改變既情況。

佢好鐘意同我D仔女玩,因為覺得佢地好乖 (我唔係自己讚自己呀,真係好多人都讚佢地乖~ 呵呵!)。所以佢覺得當年應該好似我咁放棄工作,將全部時間比哂屋企,起碼自己有努力過,唔駛而家咁後悔。安慰既說話菲菲真係唔識講,不過二十歲都仲有得救既,不過唔係自己教,係比人教。亞媽講左廿年都聽唔入耳既說話,唔會突然之間會聽得入耳。同時我都有留意佢地既溝通方式,大家都唔會聽完對方講野就要表達自己既意見,咁既方式我相信唔會好有效。只會加深大家既磨擦,對互相瞭解係冇幫助。

做全職媽媽都唔一定教得出好仔女,真係好考媽媽既耐性、愛心同埋本質。菲菲曾經以為學左咁多野,唔做野走去湊仔好浪費,幾年過後,我先至發現教育一個小朋友,媽媽既素質真係好重要。雖然我係兜個大圈讚自己,不過事實上,要真正瞭解自己既仔女,要佢地肯將我地當為朋友,溝通技巧、基本既心理學同NLP都唔少得。仲要識D性格學,知道小朋友係咩性格,響溝通上先至可以得心應手,免行冤枉路。

在真正得到小朋友既信任之後,先至有機會同佢地講道理。人係一種好奇怪既動物,只要佢 LIKE 你,你講乜都係入耳D,如果佢唔 LIKE 你,望下佢都有罪。所以建立信任既關係係比教乜教物更重要。同埋做媽媽警覺性要高,每當小朋友唔想再溝通落去既時候,一定要識停。再講落去只會令佢地討厭。要將話題拉返遠同拉得夠軟,等佢地唔再刻意防範時找出佢地唔願意溝通落去既原因,解決左個原因先,先至可以繼續入正題。呢D野,講就真係好容易,邊個唔識講,不過做起上黎係要有高EQ先至得。好在菲菲響職場訓練多年,EQ都有返咁上下,到現時為止都仲應付到。希望之後既日子唔好太難HANDLE啦。哈~

2012年6月10日 星期日

富二代

菲菲認識幾位香港富二代,他們的父母雖然唔係國際級既富豪,但係身家都係用「億」黎做計算單位,都可以叫唔駛憂啦。

以前好想自己屋企有錢,就唔駛捱得咁辛苦,咩都要自己攪掂。當認識左幾位富二代之後,真心慶幸自己出身一般,先至有機會學到好多野。唔知睇 BLOG 既你係唔係富二代,係既話先講返句唔好意思先,因為…

菲菲所認識既富二代,唔知點解都係冇乜腦筋,思考能力欠奉,工作能力唔好講啦,人際關係更加唔好提,衰D講句,真係生舊叉燒好過。佢地遊戲人間,老豆盤生意做緊乜又唔知,老豆叫佢出去打工學下野又唔願,成日睇唔起人,覺得自己老豆叻過其他人多多聲,所以唔需要向別人學習。

好勒,唔講工作能力,富二代既強項就係玩,但係玩唔係指上山下水既活動,亦唔係周遊列國果種,係鐘意玩人!佢地硬係要搵D比佢地弱勢既人去欺凌先至開心,真正將自己既快樂建築響別人既痛苦身上,呢D行為真係好令人難以接受。好在,菲菲唔係弱勢社群,佢地玩都玩唔到黎我呢度,不過見佢地咁樣「高人一等」,不其然會產生對佢地鄙視既目光。

有錢又有咩用?冇腦冇品冇志氣,人生幾十年就係咁樣白白浪費了。

如果你唔係一個咁樣既富二代,菲菲好想認識你,我真心希望我只係井底之蛙,見識少所以有以上既睇法。

2012年6月9日 星期六

分因

最近得悉有2個朋友都有小三介入婚姻,有一位朋友的老公索性拋妻棄子一走了之,有另一位朋友的老公仍「留」在家中但個心已經唔響度。好奇怪,2個朋友的老公找小三的原因都一樣,因為夫婦之間已幾乎冇左性生活。女友人們好嬲,猛鬧賤男不顧老婆仔女只用下半身思考,係CHEAP精。

響某個角度上,老公拋棄屋企去搵一個比自己老婆更索既女人,當然係不負責任既賤男。女人咁辛苦十月懷胎生左個仔出黎,仲要日以繼夜去照顧BB,連訓既時間都冇,仲邊有精神照顧老公既性需要?老公唔體諒不特止,仲大條道理出去攪女人,做老婆既真係好心淡。如果唔係生完仔,身材唔會走哂樣。如果唔係生左個仔,唔需要唔訓都要湊好個仔。個仔係跟老公姓的,但係響男人既角度,除左性之外老婆就冇其他功能,你話做女人又點會唔嬲?

不過,有時出現呢D家庭問題,都唔可以一面倒怪哂男人。做女人真係唔容易GA,真係要入得廚房出得廳堂同埋訓得落床GA。男人們不得不承認,好多時你地真係會用下半身思考,如果老婆長期禁慾,我估冇幾多個男人真係頂得住兼抗拒到出面的誘惑。屋企冇飯開,餓得耐都想去叫下外賣,呢D係人之常情。女人湊仔真係好辛苦,但係為左維繫正常婚姻生活,唔好比小三有機可乘,女人點累都要抽時間陪下個老公。講到尾,老公返到屋企只係一個大細路,都想老婆當佢係仔咁錫GA。

呢番說話我唔敢響FB度講,必定會惹起朋友間的批評。但撫心自問,夫妻之間,性生活係絕對唔可以忽視,到老公出去食過返尋味既時候先至黎後悔同埋怨,已經係去到難以補救既地步了。

2012年6月8日 星期五

炒埋一碟

菲菲2日冇寫BLOG,唔係因為菲菲懶,係因為實在太多突發事出現了。

大仔響學校度感染左手足口病,屋企仲有2個細既,要響一間七百呎既屋攪隔離病房,實在唔容易。咁唔好彩,呢2日我唔知點解內臟好似火燒咁又熱又痛,今日先至好返D。都仲未夠,老公用開既寫字樓,下月中要全幢遷出等待拆卸,剛巧老公響對面大廈搵到單位,又要攪簽租約同安排搬遷既事…

駛唔駛咁齊心,所有事響2日之內發生呢?

好在我仲有啖氣,仲寫到幾隻字,記錄左呢2日菲菲既「豐功偉績」,哈哈!

2012年6月6日 星期三

上課的途上

地鐵入面充斥住各種濃濃淡淡的香水味,有花香、有果香、優雅的、庸俗的,嗅到鼻子都痛。

原來以前的菲菲曾為途人帶來困擾。

現在是天理循環,惡有惡報了。

2012年6月5日 星期二

峰迴路轉

是日 14:45 踏入芒種,壬辰年丙午月的開始。芒種係廿四節氣既第九個節,是干支曆內「午」月的開始。一般轉節或轉氣 (轉氣大概同西方轉星座差不多日子,在二十至二十三號之間),都代表了太陽和地球之間之距離有了變化。要深入研究箇中道理,要學習天文學和中國曆法的互動,菲菲未有咁深厚既功力,有機會再探討。

菲菲想講既係,每逢轉節或轉氣,都會有事發生。本來老公和富二代的合作計劃都已經傾到七七八八,準備開波,點知今日出現急轉直下既情況,富二代似乎想縮沙。最初老公打算同佢合作,我有提出意見叫佢諗清楚,仲比老公話我敏感,唔信人。呢條友仔,係百份百既吹水怪兼失匙夾萬,同埋一開始我已知道佢唔信我老公,口口聲聲話想做返D野比佢老豆睇,其實係咩都唔想做等接收遺產。自從老公話要同佢合作之後,菲菲更留心去觀察佢,對佢真係越黎越冇信心。但係老公好想做,如果我成日潑佢冷水,盞大家關係惡化,為左D咁既人,冇必要。

本來老公發現條友唔對路,在未開波之前唔合作,我應該開心至係,不過我真係有D唔開心。唔係因為老公失去左一個攪生意既機會,始終條友唔係路,盞蝕左錢仲有交嗌,唔攪好過攪。菲菲最唔開心係,因為老公聽左另一個人既意見之後先至「發現」富二代有問題。果個人係一位曾經對我老公有非份之想既女仔,大家因為宗教關係唔可能唔見面。菲菲當然係好唔鐘意佢,之前都因為佢同老公有拗撓,不過擺平左就算。呢個女仔所講既野,同菲菲之前同老公講既野,意思大概一致,但係我最嬲既就係,同一番說話,我講就話我敏感,果條女講就聽得入耳,呢下真係撻著左。

而家生意暫時擱置,不過菲菲心中既不滿仲未有辦法可以解決。

午月,一直都係菲菲最多困擾既月份…

2012年6月4日 星期一

喪失甚麼最可怕?

人到底喪失左D咩係最可怕?錢?健康?家人?朋友?工作?青春?能力?別人的信任?權力?愛?影響力?定係其他?

以上種種皆不是,原來人生最可怕係喪志。街上的乞丐點解會做乞丐?在人生中無論你失去咩,都會有方法有途徑去搵返或者彌補,但係喪志,佢自己都放棄左自己,仲有得救嗎?

講童

在友人眼中菲菲好勇敢,因為我有三個小寶貝。很多朋友只會生一至兩個,甚少會生三個,不過我都有朋友是有四個小孩的,菲菲不算最勇敢!哈哈!

我常鼓勵人生多幾個,朋友們都怕怕,一黎香港養小朋友越黎越貴,二黎怕教得辛苦。第一點係無可厚非的,而家香港養一個小朋友確實好貴,不過唔請家傭、唔會個個月都帶小朋友去主題公園,唔迫小朋友學十八般武藝、唔駛學多國語言、唔強迫小朋友入名校的話,都唔會好貴。弊在而家D家長真係走火入魔,都唔知點解要一個小朋友除左返學都做十幾樣功課之外,仲要參加十幾個興趣班,咁攪法唔好話唔夠錢養,連珍貴既親子時間都比一大堆活動摧毀了。

至於第二點菲菲覺得唔成立,其實教一個小朋友係比教幾個小朋友困難。兄弟姊妹之間既互動就係最好既教育。屋企只有一個小朋友的話,父母都會全神貫注咁睇實個小朋友,咩都照顧周到,咩都以小朋友為先,港童就係咁樣培養出黎。菲菲的三個小魔怪,每日為左在父母面前突圍而出,自自然然提高左競爭力、表達能力同埋自理能力。雖然有2個家傭幫忙,但係日常家務已經好忙,邊有時間貼身照顧。小魔怪們唯有「自食其力」,自己照顧自己。如果想同父母玩,都要千方百計令父母注意,要比兄弟姊妹出色,各出奇謀,鬥智鬥力!

家庭係社會既縮影,自小習慣左要點同其他人相處,點表現自己,點力爭上游,先至可以勇敢地在社會上立足。最近同朋友食飯,佢見我未夠2歲既第二仔識自己食飯,覺得好利害。真係啼笑皆非,識自己食飯好平常啫,又唔係咩特異功能。原來佢有另一位朋友個仔三歲半都要亞媽餵飯!而家D小朋友三歲識講英文同普通話,識唱歌跳舞同畫畫,但係唔識自己食飯!咩世界呀?

君子之交

菲菲應該係一個君子,因為我同朋友既關係「淡如水」。

好奇怪,唔知係我COOL得滯丫?定係我仲未搵到真正既朋友呢?圍繞菲菲身邊既「朋友」,不論種類同埋數目都唔少,但係朋友之間既聚會硬係好少人會記得叫我去。本來我會估係我太衰,所以不受歡迎。但係又無理由丫?如果我真係咁不受歡迎,我個FB應該比人 unfriend 哂,但係時不時都會有人留言,所以我相信我仲未去到咁惡劣既地步。

經過我反覆檢討之後,得出一個結論,就係菲菲不擅交際!我唔鐘意無啦啦冇野搵野講,好少講無聊野,又冇咩心事要搵人傾訴,攪攪下d朋友都唔記得左有我呢個人都未定。唔通菲菲只係一個工作狂?除左返工就咩都唔識?以前仲有返工時人際關係都算唔錯,可能我唔識同家庭主婦溝通,唔認為家務事需要傷腦筋,所以同媽媽朋友們冇共鳴?我都唔知點解…

可能我追求既友誼同一般人唔同,所以我只停留左「君子之交」呢個層面。

2012年6月2日 星期六

重出江湖?

早前提過老公同富二代合作攪生意,都傾到八八九九差唔多開波。本來菲菲好想加入幫忙做行政管理果 part,但係經我連日黎觀察所得,我應該加入唔到。原因好複雜,不過最基礎嘅一個原因係信心問題。可能係我嘅師奶形象已經深人民心,唔多似做得嘢嘅人,所以我遲遲都未能加入戰團。不過唔緊要,我都唔想攞苦黎辛,無謂因為呢D事而攪到不愉快。

好在最近比我發現有另一個人可以代替菲菲做呢個醜人 (不嬲做行政管理既人都係衰人,唔係醜人係咩!哈哈!),呢個人係老公同富二代嘅共同朋友,富二代對佢信任有加。而呢個人做事比較穩陣,有佢睇住間公司,應該冇咩大問題。

今日同老公講起,老公誤會我對富二代有不滿。講真,我真係冇不滿。我只想攪好件事,在未有其他人選之前,我想親自幫老公手。既然富二代唔係好信得過我,而又有另一人可以勝任,就由其他人去做啦。我唔會因此而唔開心喎,仲好唔駛做,呵呵!

唔知係唔係菲菲兇悍霸道慣,老公一時之間唔適應我已經變成一個溫柔體貼既賢內助呢?哈哈!

留住客人的心

係人都話女人錢易賺,女人有太多花費的項目,買衫買鞋買手袋、化妝美容修甲整頭髮,淨係數都數到氣咳。加上每個項目都追新款,一出街就少不免要買D嘢令自己開心。女人錢的確係易賺,不過要睇你識唔識賺。菲菲雖然升呢做左師奶,但係對扮靚仍然至死不渝。今日菲菲又去左整GEL甲,不過做埋呢個 package 之後,我唔會再幫趁呢一間美甲店。

呢間美甲店係朋友開的,最初諗住反正都係比錢人賺,不如幫趁朋友啦。我由 join package 嘅第一次到而家,我嘅朋友都未同我整過一次,每一次都係搵唔同既甲師幫我整。心理上已經被待慢了。頭幾次菲菲都好熱切期待咁諗下整咩甲,點知次次都比甲師冷言相向,一係話而家唔興整咁複雜,一係話我諗得耐阻住佢。攪攪下我都冇心機諗咩款式,整黎整去都好似只係搽左指甲油咁單調。同埋每次去幫趁,D甲師都唔多願同客人傾下計,大家完全冇建立過任何關係。

女人錢我都賺過,深明女人洗錢要洗得開心之道。逗客人傾多 D 計,一黎可以瞭解客人的喜好,方便大額推銷 (在商言商,冇計啦,要搵食丫嘛!),二黎比客人覺得有歸屬感,佢地先至願意黎多D同埋介紹朋友黎。

唔好講全香港,單係旺角區都有好多美甲店,唔幫趁呢間,大可以幫趁第二間,我冇必要貼錢買難受。一眾消費者不論男女都係咁諗,所以我朋友慨嘆生意難做,問題應該要攪掂甲師既服務質素先。

可能有人覺得「比錢大哂咩!」,係呀, Cash is KING,比錢你賺果個真係大哂呀!你老細唔係老細,D客先至係老細呀!只要你夠多 die hard fans 客,老細都要買你怕。

2012年6月1日 星期五

母親的抉擇

最近有友人升職了,但卻不開心了。升職除了代表加薪之外,亦代表了加辛。但是她的女兒才滿一歲,加辛即是少了時間陪伴女兒。她為了此事感到很懊惱。

在職場上,大家都想向上爬,希望得到上司的賞識。都努力了一段時間,有機會升職是大部份打工仔值得開心的事。但是要平衡家庭與事業,似乎沒甚麼可能。菲菲是過來人,深明她為什麼如此掙扎。早幾年我放棄事業而選擇家庭,都有一段很長的適應期。在工作上得到的滿足感、收入、影響力等等全部都要放棄,要從新適應一個新的生活節奏,由事業女性變成家庭主婦,實在不容易。

先不計較錢這個問題,一決定做家庭主婦那天起,家庭收入就由老公一力承擔了。但是小孩不是下屬,他們不會聽命於我,只會和我鬥智鬥力扭盡六壬。家傭亦不是我以往管理的「精英」,大家文化背景不同,溝通的方法也要調節。家務事不同跑業績,家務這些「小事」做了老公不會知道,不做就即時察覺到。做家庭主婦沒有掌聲,沒有機會出風頭,跟菲菲好勝的性格完全相反。所以我用了整整一年才適應到,過程是艱辛的,因為曾經因此而抑鬱過。

要在「錢」和「愛」之間選擇,我會選擇愛。孩子在成長中遇到的種種問題,很需要父母的支持和關懷,當然要有很多時間才可以做到。如果我繼續在職場拼搏,哪裡有空和他們溝通?他們在想甚麼我會知道嗎?他們遇到困難我可以即時幫忙嗎?

每個人的選擇不一樣,希望友人可以找到平衡工作與家庭的方式,可以成為一眾在職媽媽的典範!